དེང་སང་ལྷ་ས་ན་བོད་པ་མི་འདུག་ཟེར།

བོད་མི་གནས་ཡུལ་དུ་བོད་པ་མི་འདུག
གང་ཡིན དཔེ་མི་སྲིད་ཅེས་ངས་ཁོ་ལ་དྲིས
སྐྲ་སེར་བོ་བོད་སྐད་ཆུ་བཞུར་བཞུར་དུ་བཤད་མཁན་དེས
ཇོ་བོ་རིན་པོ ངས་སྐྱག་རྫུན་བཤད་ནས་གང་བྱེད
ངས་རིག་རིག་ལ བོད་སྐད་བཤད་ཀྱང་
ཚང་མས་ང་ལ་མགོ་བོ་ཐད་དུ་གཡུགས

གཞི་ནས་ང་རང་ས་མཐའ་ཞིག་ནས
ཡུན་རིང་བོར་འདང་རྒྱགས་ཀྱི་ནང་དུ་གཡུགས
ངའི་ཕ་ཡུལ་ན་བོད་མི་མི་འདུག
དཔེ་མི་སྲིད བོད་མི་ཡོད་ཁོ་ཐག་ཡིན
ལྷག་པར་དུ་ལྷ་ས་ན་བོད་མི་ཡོད་ཁོ་ཐག་ཡིན
ངའི་ག་ལེར་ཨམ་ཕྲག་ལས
ལྷ་སའི་གྲོགས་པོ་ཞིག་ལ་ཁ་པར་བཏང་

སྐུད་སྣེ་གཞན་ཞིག་ནས
ལན་འདེབས་མཁན་ནི་ངའི་གྲོགས་པོ་རེད་འདུག
འོན་ཀྱང་། ངས་ཞིབ་དུ་ཉན་དུས་སུ
ད་གཟོད་ངའི་གྲོགས་པོའི་ང་ལ་བཤད་བཞིན་པ་ནི
བོད་སྐད་རེད་དམ་ཟེར་ནས
སྟིག་སྒྲ་ལྕི་མོ་ཞིག་ངའི་རྣ་བའི་བུ་གར་འཛུལ་སོང་