འདི་ལོའི་ཨ་ཕ་གསེར་གྱི་ཕོར་བ་རྐང་སྤོལ་འགྲན་སྡུར་དེ་སྦེལ་ཀོབ་བདེ་སླར་དུ་འཚོག་རྒྱུ་རེད།

ཨ་ཕ་གསེར་གྱི་ཕོར་བ་རྐང་སྤོལ་འགྲན་སྡུར་ཐེངས་གསུམ་པའི་ནང་རྒྱ་བལ་གཉིས་གཙོས་ཨ་རི་དང་། ཁེ་ན་ཊ། ཧྥ་རན་སི། ཡུ་རོབ་བཅས་ནས་རང་ལོ་ ༤༠ ཡན་གྱི་སྐྱེས་པའི་རུ་ཁག་ ༢༤ ཡིས་མཉམ་ཞུགས་གནང་གི་ཡོད་འདུག

ཨ་ཕ་རྐང་རྩེད་སྤོ་ལོའི་ཚོགས་པའི་གོ་སྒྲིག་འོག་ལོ་རེ་བཞིན་རང་ལོ་བཞི་བཅུ་ཡན་གྱི་ཨ་ཕ་གསེར་གྱི་ཕོར་བ་རྐང་སྤོལ་འགྲན་སྡུར་འཚོག་གི་ཡོད་པ་ལྟར། འདི་ལོའི་ཕྱི་ཟླ་ ༥ ཚེས་ ༡ ནས་ ༡༥ བར་རྒྱ་གར་ལྷོ་ཕྱོགས་སྦེལ་ཀོབ་བདེ་སྐྱིད་སླར་གསོ་གཞིས་ཆགས་ཀྱི་རྩེད་ཐང་དུ། ཨ་ཕ་གསེར་གྱི་ཕོར་བ་རྐང་སྤོལ་འགྲན་སྡུར་ཐེངས་གསུམ་པ་དེ་འཚོག་རྒྱུ་ཡིན་པ་དང་། འདི་ལོའི་རྩེད་འགྲན་ཁྲོད་རྒྱ་བལ་གཉིས་གཙོས་ཨ་རི་དང་།  ཁེ་ན་ཊ། ཧྥ་རན་སི། ཡུ་རོབ་བཅས་ནས་རང་ལོ་ ༤༠ ཡན་གྱི་སྐྱེས་པའི་རུ་ཁག་ ༢༤ ཡིས་མཉམ་ཞུགས་གནང་རྒྱུ་ཡིན་འདུག ཐེངས་འདིར་འབྲས་ལྗོངས་རྐང་སྤོལ་ཚོགས་པའི་ཤན་འབྱེད་པ་སྐྱེས་པ་གསུམ་དང་བུད་མེད་ལྔ་བཅས་གདན་འདྲེན་ཞུས་ཡོད་འདུག

ཐེངས་འདིའི་ཨ་ཕ་གསེར་གྱི་ཕོར་བ་རྐང་སྤོལ་འགྲན་སྡུར་སྐོར་ལ་ཨ་ཕ་རྐང་རྩེད་སྤོ་ལོ་ཚོགས་པའི་ཚོགས་གཙོ་ཚེ་རིང་ཡེ་ཤེས་ལགས་ཀྱིས་འདི་གའི་གསར་འགོད་པར། པཱ་ལགས་རྐང་སྤོལ་རྩེད་འགྲན་བཟོས་པའི་དམིགས་ཡུལ་ནི་འགྲན་བསྡུར་རྫིག་པོ་ཞིག་བྱེད་པའི་ཆེད་དུ་མ་རེད། རང་ལོ་བཞི་བཅུ་བརྒལ་བའི་པཱ་ལགས་རྣམས་ཁྱིམ་གྱི་ཨ་ཕ་དང་སྤྱི་ཚོགས་ནང་དུ་འགན་འཁུར་མཁན་སྒལ་ཚིགས་ལྟ་བུ་ཆགས་ཡོད། ཡིན་ནའང་། ང་ཚོའི་སྤྱི་ཚོགས་ནང་ལོ་བཞི་བཅུ་བརྒལ་ན་མི་ཚེ་རྫོགས་པ་ལྟར་རྩེད་མོ་སོགས་བཞག་གི་ཡོད་པས། ཁྲག་དང་། རླུང་། གཅིན་སྙི་སོགས་ཀྱི་ན་ཚ་འབྱུང་མགོ་འཛུགས་ཀྱི་འདུག ཉི་ཧོང་གཙོས་འཛམ་གླིང་གི་ས་གནས་ཁག་ཏུ་རང་ལོ་ ༩༠ བསླེབས་ཀྱང་འཕྲོད་བསྟེན་ཆེད་དུ་རྩེད་འགྲན་ནང་དུ་མཉམ་ཞུགས་བྱེད་བཞིན་ཡོད། བོད་པའི་སྤྱི་ཚོགས་ཀྱི་འཕྲོད་བསྟེན་ཡག་པོ་ཆགས་པར་དམིགས་ནས་ཕྱི་ལོ་ ༢༠༢༤ ལོར་ཨ་ཕ་རྐང་སྤོལ་རྩེད་འགྲན་མགོ་བཙུགས་པ་རེད། ཅེས་བརྗོད་བྱུང་།

ཡང་ཁོང་གིས། རྒྱ་གར་བྱང་ཤར་ཁུལ་གྱི་བོད་པའི་སྤྱི་ཚོགས་ཁྲོད་དུ་རྐང་སྤོལ་རྩེད་འགྲན་ཞིག་འཚོགས་མྱོང་མེད་པས། ཨ་ཕ་རྐང་རྩེད་སྤོ་ལོ་ཚོགས་པས་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་རྐང་སྤོལ་རྩེད་འགྲན་བསྡུས་པ་ལ་བརྟེན་ནས།  ཕྱི་རྒྱལ་དང་རྒྱ་བལ་གྱི་རྩེད་འགྲན་རུ་ཁག་ ༢༠ མཉམ་ཞུགས་གནང་སྟེ་བོད་པའི་སྤྱི་ཚོགས་ཁྲོད་དུ་དགའ་བསུ་ཐོབ་པ་དང་། ལོ་རེ་བཞིན་རང་ལོ་བཞི་བཅུ་བརྒལ་བའི་རྩེད་མོ་བ་རྣམས་མཉམ་ཞུགས་བྱེད་མཁན་ཇེ་མང་དུ་འགྱུར་མུས་ཡིན་ལ། ཨ་ཕ་རྐང་སྤོལ་རྩེད་འགྲན་ནི་བོད་པའི་སྤྱི་ཚོགས་ཁྲོད་ཀྱི་ཨ་ཕ་རྣམས་ཀྱི་འཕྲོད་བསྟེན་ཙམ་དུ་མ་ཟད། བོད་དོན་འཐབ་རྩོད་ལའང་ཕན་ཐོགས་པ་ཞིག་རེད། ཅེས་བརྗོད་བྱུང་།

ད་ལོའི་ཨ་ཕ་རྐང་སྤོལ་རྩེད་འགྲན་གྱི་རུ་ཁག་ ༢༤ དེ་སྡེ་ཚན་དྲུག་ཏུ་ཕྱེ་ནས། རིམ་བསྡུར་རྩེད་འགྲན་( league match) ཁྲོད་ཉུང་མཐར་འགྲན་རིམ་བཞི་ལ་ཞུགས་ཆོག་ཅིང་། དེ་ལས་རྣམ་པར་རྒྱལ་ཚེ་འགྲན་རིམ་གྱི་འགྲོ་ལུགས་བཞིན་བརྒྱད་རྩོད་དང་། བཞི་རྩོད། རྟིང་རྩོད་བཅས་སུ་རིམ་གྱིས་ཞུགས་ཆོག་ཀྱང་། གལ་ཏེ་བརྒྱད་རྩོད་དང་བཞི་རྩོད་སོགས་ནས་འགྲན་ཕམ་བྱུང་ཚེ་རྩེད་འགྲན་ཕྱི་མ་དག་ལ་ཞུགས་མི་ཆོག་པ་རེད།

བཙན་བྱོལ་བོད་མིའི་སྤྱི་ཚོགས་ཁྲོད་བོད་རྒྱལ་ཡོངས་རྩེད་རིགས་ཚོགས་པའི་ཁོངས་སུ་གྲགས་ཆེ་བའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་འགྲན་ཚོགས་དང་། བོད་ཀྱི་བུད་མེད་ཀྱི་རྐང་སྤོལ་རྩེད་འགྲན་སོགས་རྐང་སྤོལ་དང་སིལ་སྤོལ་གྱི་རྩེད་འགྲན་ཁག་ཅིག་ཡོད་ཅིང་། ཕྱི་ལོ་ ༢༠༢༤ ལོ་ནས་བཟུང་པཱ་ལགས་གསེར་གྱི་བུམ་པའི་རྐང་སྤོལ་རྩེད་འགྲན་ཞེས་པ་འདི་ཡང་གསར་དུ་མགོ་འཛུགས་གནང་ཡོད་ཅིང་། རྐང་སྤོལ་རྩེད་འགྲན་ནི་བོད་ཀྱི་སྤྱི་ཚོགས་ནང་གི་ལོ་ ༤༠ བརྒལ་བའི་མི་རབས་ཀྱི་འཕྲོད་བསྟེན་ཡར་རྒྱས་གཏང་རྒྱུར་དམིགས་ནས་འཚོག་གི་ཡོད་འདུག

ཕྱི་ལོ་ ༢༠༢༤ ལོར་ལྡེ་ར་རྡུན་དོན་གྲུབ་གླིང་བོད་མིའི་གཞིས་ཆགས་སུ་ཨ་ཕ་གསེར་གྱི་བུམ་པའི་རྐང་སྤོལ་རྩེད་འགྲན་ཐེངས་དང་པོ་འཚོགས་ཡོད་ཅིང་།   སྐབས་དེའི་རྩེད་འགྲན་ནང་རྒྱ་གར་དང་བལ་ཡུལ་ནས་ཡིན་པའི་དགུང་ལོ་ ༤༠ བརྒལ་བ་ཁྱོན་རུ་ཁག་ ༡༤ མཉམ་ཞུགས་གནང་ཡོད་པ་དང་།  ཨོ་ཌི་ཤ་པོ་ཏཱ་ལ་རུ་ཁག་གིས་ཕྱི་ལོ་ ༢༠༢༤ ལོའི་ཨ་ཕ་གསེར་གྱི་བུམ་པ་བཀྱགས། རྩེད་འགྲན་ཁྲོད་དུ་ཀརྨ་དངོས་གྲུབ་ལགས་ལ་ལོ་ ༦༤ བརྒལ་བའི་རྩེད་མོ་བ་རྒན་ཤོས་ཀྱི་བྱ་དགའ་དང་། ཨོ་ཌི་ཤ་པོ་ཏཱ་ལ་རུ་ཁག་གི་རུ་དཔོན་བུ་ཆུང་ལགས་སུ་རྩེད་འགྲན་པ་ལེགས་ཤོས། བལ་ཡུལ་སྤྲོ་སྐྱིད་རུ་ཁག་གི་སྒོ་ར་བ་རྒྱལ་པོ་ལགས་སུ་སྒོ་ར་བ་ཡག་ཤོས། དེ་བཞིན་དྷ་རམ་ས་ལའི་རུ་ཁག་ལ་བཟང་སྤྱོད་ཡག་ཤོས་ཀྱི་རུ་ཁག་བཅས་ཀྱི་བྱ་དགའ་ཐོབ་ཡོད་འདུག

འདས་ལོའི་རྒྱ་གར་འབྲས་ལྗོངས་སྒང་ཏོག་ཏུ་ཨ་ཕ་གསེར་གྱི་བུམ་པའི་རྐང་སྤོལ་རྩེད་འགྲན་ཐེངས་གཉིས་པ་འཚོགས་ཡོད་ཅིང་། སྐབས་དེར་རྒྱ་གར་དང་བལ་ཡུལ་ནས་ཡིན་པའི་དགུང་ལོ་ ༤༠ བརྒལ་བ་ཁྱོན་རུ་ཁག་ ༢༠ མཉམ་ཞུགས་བྱས། རྡོ་རྗེ་གླིང་གཡག་རུ་ཁག་གིས་ཕྱི་ལོ་ ༢༠༢༥ ཨ་ཕ་གསེར་གྱི་བུམ་པ་བཀྱགས།  བལ་ཡུལ་སྤྲོ་སྐྱིད་རུ་ཁག་གི་པ་སངས་ཚེ་རིང་ལགས་ལ་ལོ་ ༦༦ བརྒལ་བའི་རྩེད་མོ་བ་རྒན་ཤོས་ཀྱི་བྱ་དགའ་དང་། བལ་ཡུལ་སྤྲོ་སྐྱིད་རུ་ཁག་གི་རུ་དཔོན་རྩེད་མོ་བ་བཀྲ་ཤིས་དོན་གྲུབ་ལགས་སུ་རྩེད་འགྲན་པ་ལེགས་ཤོས། རྡོ་རྗེ་གླིང་རུ་ཁག་གི་སྒོ་ར་བ་དོན་གྲུབ་ལགས་སུ་སྒོ་ར་བ་ཡག་ཤོས། སྤོན་ཊ་ཆོལ་གསུམ་རུ་ཁག་ལ་བཟང་སྤྱོད་ཡག་ཤོས་ཀྱི་རུ་ཁག་བཅས་ཀྱི་བྱ་དགའ་ཐོབ་ཡོད་འདུག  དེ་བཞིན་འདི་ལོར་ཡུ་རོབ་ཆོལ་གསུམ་རུ་ཁག་དང་། ཁེ་ན་ཊའི་རུ་ཁག བལ་ཡུལ་ནོར་བུ་གླིང་ཁ་རུ་ཁག སྦེལ་ཀོབ་དཔའ་བོ་རུ་ཁག་བཅས་གསར་དུ་མཉམ་ཞུགས་གནང་ཡོད་པ་རེད།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།