གཞིས་མགོ་ ༡༤ ཡི་ཚོགས་འདུ།

ཟླ་འདིའི་ཕྱི་ཚེས་ ༢ ཉིན་བོད་གཞུང་ནང་སྲིད་ལས་ཁུངས་ཀྱིས་གོ་སྒྲིག་འོག བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་བཀའ་བློན་ཁྲི་པ་དང་བོད་གཞུང་ནང་སྲིད་ལས་ཁུངས་ཀྱི་དྲུང་ཆེ་དངོས་གྲུབ་རྡོ་རྗེ་རྣམ་གཉིས་ཀྱིས་གཙོ་སྐྱོང་འོག ཨུ་ཏར་ཁན་དང་ཧི་མ་ཅལ་ཁུལ་ས་གནས་མགོ་འཛིན་ ༡༤ དང་མཉམ་དུ་ས་གནས་ཁག་གི་མང་ཚོགས་ཀྱི་དཀའ་ངལ་ཁག་ཅིག་ཐད་བགྲོ་གླེང་གནང་སྟེ། མཇུག་མཐར་གནད་དོན་མང་དག་ཅིག་ཐག་གཅོད་བྱུང་ཡོད་འདུག

དེ་རིང་འདི་གའི་གསར་འགོད་པས་བོད་གཞུང་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་སུ་དེའི་སྐོར་བཀའ་འདྲི་ཞུས་པར་ཁོང་གིས་གསུངས་དོན། ཚེས་ ༢ ཉིན་བསྐོངས་པའི་ཚོགས་འདུ་དེ་ནི་ཉེ་ཆར་བཀའ་བློན་ཁྲི་པ་མཆོག་ཕྱོགས་མཐའ་ཁག་གི་གཞས་ཆགས་ཁག་ཚང་མར་བསྐོར་སྐྱོད་གནང་སྐབས། ཧི་མ་ཅལ་ས་ཁུལ་གྱི་གཞིས་ཆགས་ཁག་བཅུ་གསུམ་དང་། ཨུ་ཏར་ཁན་གཞིས་ཆགས་བཅས་ཀྱི་ས་གནས་མང་ཚོགས་རྣམས་ཀྱིས་ད་དུང་འཛུགས་སྐྲུན་གྱི་འཆར་གཞི་དང་། སྤྱི་ཡོངས་ཀྱི་དཀའ་ངལ་སོགས་བདེ་སྡུག་གི་གནས་སྟངས་མང་དག་ཅིག་སྙན་གསན་ཞུས་སྟབས། ང་ཚོས་ནམ་རྒྱུན་ལྟར་གཞིས་ཆགས་ཁག་རེ་རེ་བཞིན་འབྲེལ་བ་བྱས་ཏེ། གསལ་བཤད་དང་ལམ་སྟོན་བྱས་ན་མ་འགྲིག་པ་མེད་ཀྱང་། དེ་ལྟར་བྱེད་པར་དུས་ཚོད་ཅུང་ཙམ་འགོར་གྱིན་ཡོད་སྟབས། ཐེངས་འདིར་ས་གནས་ཁག་བཅུ་བཞིའི་གཞིས་མགོ་རྣམས་འདིར་སྐད་བཏང་སྟེ། བཀའ་བློན་ཁྲི་པ་མཆོག་དབུ་བཞུགས་ཐོག་ཉིན་གཅིག་རིང་ཚོགས་འདུ་ཚོགས་པ་རེད། ཚོགས་ཐོག་ཏུ་དཔེར་ན། འཆར་གཞི་ཁ་ཤས་ས་གནས་རང་ནས་ཐག་གཅོད་ཐུབ་པ་དེ་འདྲ་ཡོད་སྟབས། དེ་ཚོ་ས་གནས་རང་དུ་ཐག་གཅོད་བྱ་རྒྱུ་དང་། ཡང་འཆར་གཞི་རེ་ཟུང་རོགས་དངུལ་ཕོན་ཆེན་པོ་དང་ལས་གཞི་རྒྱ་ཆེན་པོ་ཡིན་སྟབས། དུས་ཚོད་འགོར་བ་དང་། ལམ་སེང་ཐག་གཅོད་བྱེད་མི་ཐུབ་པ་དེ་འདྲ་ཕྱིར་འགྱངས་གནང་བ། ཡང་ལམ་སེང་མགོ་འཛུགས་དགོས་པའི་འཆར་གཞི་ཁག་ཅིག་དུས་ལྟར་ལག་བསྟར་བྱས་ཏེ་ཟླ་གཅིག་གཉིས་ནང་འགྲུབ་པར་བྱ་རྒྱུ་སོགས་ཐག་གཅོད་བྱས་ཡོད། ཅེས་གསུངས།

ཁོང་གིས་ཐེངས་འདིར་ཐག་གཅོད་བྱུང་བའི་དོན་དག་ཁག་ཅིག་གསལ་འགྲེལ་གནང་དོན། ཐེངས་འདིར་དཔེར་ན། གཞིས་ཆགས་ཁག་ཅིག་ནང་བགྲོད་ལམ་ཡག་པོ་མེད་དང་གཞིས་ཆགས་ཁག་ཅིག་ནང་འཐུང་ཆུའི་དཀའ་ངལ་ཡོད་པ། ཡང་གཞིས་ཆགས་ཁག་ཅིག་ནང་གློག་ཡག་པོ་མེད་སྟབས་སྲང་ལམ་ཁག་ཏུ་ཉི་གློག་འཛུགས་སྐྲུན། གཞིས་ཆགས་ཁག་ཅིག་ནང་རྒས་འཁོགས་སོགས་ལ་ཆ་རྐྱེན་ཡག་པོ་མེད་པར་འཚོ་བའི་མཐུན་རྐྱེན་སྦྱོར་དགོས་རིགས་ལག་བསྟར་བྱ་རྒྱུ་ཐག་གཅོད་བྱུང་བ་དང་། ཡང་གཞིས་ཆགས་ཁག་ཅིག་ནང་ཆུ་རགས་རྒྱག་པ་དང་། གཞིས་ཆགས་ཁག་ཅིག་ནང་ཚོགས་ཁང་རྒྱག་པ། གཞིས་ཆགས་ཁག་ཅིག་ནང་སྡོད་ཁང་བསྐྱར་གསོ་བྱེད་པ་སོགས་ཀྱི་ལས་འཆར་འདུག་ཀྱང་། དེའི་རིགས་དུས་ལྟར་ཐག་གཅོད་མི་ཐུབ་པ་དང་དུས་ཚོད་འགོར་འགྱངས་འགྲོ་བ། འཆར་གཞི་བསྐྱར་དུ་བསྒྲིག་དགོས་པ་སོགས་ཡིན་སྟབས་ལམ་སེང་ལག་བསྟར་བྱ་ཐུབ་ཀྱི་མེད། དེ་བཞིན་གནས་ཚུལ་ཁག་ཅིག་ས་གནས་ཀྱི་གནས་སྟངས་དང་འཚམ་པོ་མེད་སྟབས། ས་གནས་མང་ཚོགས་ལ་རེ་བ་སྟོང་པ་ཙམ་དུ་མ་བཞག་པར་མཐའ་གཅིག་ཏུ་ངོས་ལེན་ཞུ་མི་ཐུབ་པའི་རྒྱུ་མཚན་གསལ་བཤད་གནང་ཐོག དགོངས་བཞེས་གནང་མི་ཐུབ་པ་ཐག་གཅོད་གཙང་མ་བྱུང་ཡོད་ཅེས་གསུངས།

ཚེས་ ༢ ཉིན་གྱི་ཚོགས་འདིའི་སྟེང་བཀའ་ཁྲི་མཆོག་གིས། འཇིག་རྟེན་སྤྱི་ཡོངས་ཀྱི་འགྲོ་སྟངས་དང་དངོས་ཡོད་ཀྱི་གནས་ཚུལ་ཐོག ང་ཚོ་རྒྱ་གར་དུ་བསླེབས་ནས་ལོ་ ༥༡ འཁོར་ཟིན་པ་དང་། གཞིས་ཆགས་ཁག་ནི་དྲུག་ཅུ་རེ་གྲངས་དང་བདུན་ཅུ་དོན་གྲངས་ནང་ཆགས་པ་ཤ་སྟག་ཡིན་པས་གཞིས་ཆགས་ཆེ་ཆུང་གང་འདྲ་ཞིག་ཡིན་རུང་ལོ་ ༣༥ མ་འཁོར་བ་ཧ་ལམ་མེད། ལོ་གྲངས་དེ་ལྟ་བུའི་རིང་ལ་སྤྱི་ཚོགས་སུ་དང་སུ་ཡིན་རུང་ལྷིང་འཇགས་པ་དང་རང་མགོ་ཐོན་པ། ལྷག་པར་ཕྱི་ཕྱོགས་ཀྱི་རོགས་རམ་ལ་རྟེན་མ་དགོས་པ་ཞིག་ངེས་པར་དུ་ཡོང་དགོས་པ་ལྟ་བུ་ཡིན། ཐོག་མར་གཞིས་ཆགས་ཚུགས་སྐབས་ཀྱི་སྤྱི་ཚོགས་དང་དཔལ་འབྱོར་གྱི་གནས་སྟངས་དང་། ད་ལྟའི་སྤྱི་ཚོགས་དང་དཔལ་འབྱོར་གྱི་གནས་སྟངས་གཉིས་བསྡུར་ན། ཧ་ཅང་ཡག་ཏུ་ཕྱིན་ཡོད་ཀྱང་ད་ལྟ་ཡིན་ནའང་ལྷིང་འཇགས་ཐོག་ནས་འཚོ་བའི་མདུན་ལམ་དང་སྤྱི་ཚོགས་ཀྱི་གནས་བབས་ཐད་འདོད་པ་ཁེངས་སོང་བསམ་པ་ཞིག་ས་ཕྱོགས་གང་དུའང་མེད་པ་དེ་ང་ཚོ་བཙན་བྱོལ་བོད་མིའི་སྤྱི་ཚོགས་ཀྱི་ཞན་ཆ་རེད་སྙམ་གྱི་ཡོད། ཅེས་གསུངས་ཡོད།

གསར་འགོད་པ། ཨ་རིག་འགྱུར་མེད།