༼ ༧གོང་ས་མཆོག་བགྲེས་ཡོལ་གནང་རྒྱུའི་དགོངས་བཞེས་དང་དེ་འབྲེལ་གྱི་བོད་མིའི་སེམས་ཚོར་ལས་འཕྲོས་པ ༽
༸གོང་ས་མཆོག་གིས་བགྲེས་ཡོལ་དང་ཕྱེད་བགྲེས་ཡོལ་གནང་རྒྱུའི་ཐུགས་རེ་བཀའ་མོལ་སྔ་ཕྱི་རིམ་པར་གནང་ནས་ལོ་ངོ་གང་འཚམས་འདས། བོད་མི་སྤྱི་དང་ལྷག་པར་གཞུང་དང་སྤྱི་ཚོགས་ཁྲོད་ཀྱི་དབང་ཤུགས་ཅན་གྱི་མི་སྣ་མང་པོ་ཞིག་གིས་གནས་ཚུལ་དེ་དང་ལེན་མི་བྱེད་པའི་ རྣམ་འགྱུར་སྔ་རྗེས་སུ་བསྟན། ཁོང་གི་ཐུགས་རེ་དེ་གནད་དོན་གང་ཞིག་དང་འབྲེལ་ཡོད་དམ། ཐུགས་འདུན་དེ་དང་ལེན་མ་བྱས་པ་དེ་གནད་དོན་གང་ཞིག་དང་ལེན་མ་བྱས་པར་གྱུར་ཡོད་དམ།
ཕྲན་གྱིས་ཉམས་ཞིབ་བྱས་དོན་ལྟར་ན། ལོ་ངོ་ལྔ་བཅུ་ལྷག་གི་དུས་ཡུན་རིང། ༸གོང་ས་མཆོག་གིས་བོད་མི་ཚོར་དམིགས་པའི་བཀའ་སློབ་གནང་བའི་ནང་དོན་གཙོ་གནད་ཅིག་ནི་བོད་མི་ཚོས་རང་འགན་རང་ཉིད་ཀྱིས་ཁུར་དགོས་པའི་ལམ་སྟོན་དང་སྐུལ་འདེད་ཡིན་ཞིང་། འགན་ཁུར་བསྒྲུབ་ཕྱོགས་ཀྱི་ཐབས་ལམ་གྱི་རྣམ་གྲངས་ལས་ཀྱང་། འགན་ཁུར་གྱི་འདུ་ཤེས་ངེས་པར་ཡོད་དགོས་པ་དེར་ཤུགས་སྣོན་བརྒྱབ་པའི་ཆ་དེ་ཧ་ཅང་ཤུགས་ཆེན་པོ་རེད།
དེང་སྐབས་རྒྱ་ནག་པ་སྐོར་ཞིག་ལ་༸གོང་ས་མཆོག་དང་འབྲེལ་བའི་གནད་གཙོ་བོ་གཉིས་ཡོད་པ་ལས། གཅིག་ནི་༸གོང་ས་ཏཱ་ལའི་བླ་མ་ནི་བོད་རྒྱའི་གནད་དོན་ཐག་གཅོད་ཀྱི་ལྡེ་མིག་ཡིན་པའི་ངོས་འཛིན་དང། གཞན་ཞིག་ནི་༸གོང་ས་ཏཱ་ལའི་བླ་མ་སྐུ་མ་བཞུགས་ཚེ་བོད་དོན་འཐབ་རྩོད་ཀྱི་རྒྱུན་ཆད་ངེས་ཡིན་པའི་འདོད་ཚུལ་དང་གླེང་ཕྱོགས་གཉིས་རེད།
ཁོང་ཉིད་བགྲེས་ཡོལ་གནད་འདུན་དེས་རྒྱ་ནག་གི་ལྟ་ཕྱོགས་དེ་གཉིས་ལ་སེམས་ཚབས་ཤིག་བསླངས་ཡོད། གང་ཡིན་ཞེ་ན་བོད་ཀྱི་གནད་དོན་ཐག་གཅོད་བྱེད་གལ་ཆེ་བར་འདོད་མཁན་ཚོར་འགོར་འགྱང་བྱེད་མི་རུང་བའི་སེམས་ཚོར་ཞིག་བསླངས་ཡོད་ཅིང། བོད་ཀྱི་གནད་དོན་ཐག་གཅོད་བྱེད་མི་འདོད་མཁན་ཚོར་རྒྱང་རིང་གི་ཉེན་ཁ་ཞིག་གི་ཁུངས་སྣེ་བསྟན་ཡོད།
༸གོང་ས་སྐྱབས་མགོན་ཏཱ་ལའི་བླ་མ་ནི། འཛམ་གླིང་གི་མི་འབོར་དུང་ཕྱུར་མང་པའི་བསམ་བློ་ལ་ཤུགས་རྐྱེན་ཐེབས་པའི་རྒྱལ་སྤྱིའི་ཁྲོད་འགྲོ་བ་མིའི་རིན་ཐང་གོང་མཐོར་སྤེལ་བའི་མཛད་འགན་དང། མི་འབོར་ས་ཡ་མང་པོའི་དད་པ་བྱེད་ཡུལ་གྱི་ཆོས་ལུགས་ཁག་གི་མཛའ་འབྲེལ་སྣེ་ཁྲིད་ཀྱི་དཔེ་སྟོན་མི་སྣ། ནང་པ་ས་ཡ་བཞི་བཅུའི་དབུ་ཁྲིད་ཡིན།
ཁོང་གིས་འཛམ་གླིང་དང་འགྲོ་བ་མིའི་རིགས་སྤྱི་ལ་ཁྱབ་པའི་མཛད་འགན་དག་བསྒྲུབ་པའི་རླབས་ཆེན་གྱི་ཕྱག་ལས་གནང་བཞིན་པ་དེ་བཞིན་དུ་བྱེད་ནུས་མཁན་བོད་ཙམ་མ་ཟད་ཧ་ལམ་ད་ལྟའི་འཛམ་གླིང་ན་མེད་པ་རེད། ཁོང་གི་འཛམ་གླིང་རང་བཞིན་གྱི་མཛད་འགན་ལེགས་བསྒྲུབ་དང། འཛམ་གླིང་མི་མང་ལ་ཁོང་གི་དགོངས་དོན་དང་ལམ་སྟོན་མྱོང་བའི་གོ་སྐབས་མང་ཙམ་ཐོབ་རྒྱུ་རྒྱ་ཆེ་ནས་བཤད་ན་ད་ལྟ་དང་མ་འོངས་པའི་འཛམ་གླིང་གི་བདེ་དོན་དང་འབྲེལ་ཡོད།
འོན་ཀྱང་བོད་མི་ཚོས་ལོ་རྒྱུས་ཁྲོད་༸གོང་ས་མཆོག་གི་མཚན་གནས་ལ་སེམས་ཚབས་ཆེ་ཤོས་བྱེད་ཀྱི་ཡོད། ཕྱི་ལོ་ ༡༩༥༡ ལོར་རྒྱ་བོད་གཉིས་ཀྱིས་གྲོས་མཐུན་དོན་ཚན་བཅུ་བདུན་བཞག་པའི་ནང་དོན་གཙོ་གྲས་སུ་རྒྱལ་བ་ཡབ་སྲས་ཀྱི་ཆོས་སྲིད་ཀྱི་གོ་དབང་དེ་བོད་ཀྱི་ལོ་རྒྱུས་རང་བཞིན་གྱི་ཐོབ་ཐང་གཞན་དག་ལས་ཀྱང་གལ་ཆེན་དུ་རྒྱ་བོད་གཉིས་ཀྱིས་བལྟས་ཡོད་པ་དང། ༡༩༥༩ ལོར་༸གོང་ས་མཆོག་གི་སྐུ་ཕྱཱ་དང་འབྲེལ་བའི་གནས་ཚུལ་ལྷག་ཚེ་བོད་མི་ཚང་མས་་རང་སྲོག་བློས་གཏོང་གིས་འགེབ་སྲུང་འགོག་རྒོལ་བྱས་པ་གཉིས་ནི་༸གོང་ས་མཆོག་དང་བོད་སྤྱི་ཚོགས་ཀྱི་འབྲེལ་བ་མཚོན་པའི་ལོ་རྒྱུས་ཀྱི་བདེན་དཔང་གལ་ཆེན་གཉིས་རེད།
དེ་བཞིན་དུ་རྩ་ཁྲིམས་ཀྱིས་ཁོང་གི་སྐུ་དབང་ལ་ཐེ་བྱུས་བྱས་ཆོག་པའི་ལམ་ལུགས་ལ་མོས་མཐུན་མ་བྱས་པ་དང། ཁོང་གི་བགྲེས་ཡོལ་གྱི་གསུང་མོལ་ཙམ་ཡང་མི་གནང་བའི་རེ་འདུན་ཞུ་མཁན་གྱི་བོད་གཞུང་གི་བཀའ་ཟུར་ཚོ་དང། འཛིན་སྐྱོང་གི་མི་སྣ་རྒན་རབས་པ་སོགས་ཀྱིས་མཚོན་པའི་བོད་མི་མང་པོ་ཞིག་གིས་སེམས་ཚབས་གནང་བཞིན་པ་དང། དང་ལེན་བྱེད་ཀྱི་མེད་པ་དེ་ཡང་ལོ་རྒྱུས་ཀྱི་ཤུལ་རྒྱུན་དང་ད་ལྟའི་གནས་བབ་མང་པོ་ཞིག་ལ་གཟིགས་པའི་ལོ་རྒྱུས་རང་བཞིན་གྱི་སེམས་ཚབས་ཅིག་ཡིན་ངེས།
ཕྱོགས་གཞན་ཞིག་ནས་འདས་པའི་ལོ་ངོ་ལྔ་བཅུའི་རིང་༸གོང་ས་མཆོག་གིས་མི་རབས་གསར་པ་དང་སྤྱི་ཚོགས་འདི་ལ་ལམ་སྟོན་སྐུལ་འདེད་དང། གསོ་སྐྱོང་འགོ་འདོམས་གནང་བའི་གྲུབ་འབྲས་ལ། ༸གོང་ས་མཆོག་གིས་བློས་བཀལ་ཏེ་ལས་དོན་བསྒྲུབ་ཐུབ་པའི་སྤྱི་ཚོགས་ཤིག་ཏུ་འཕེལ་རྒྱས་བྱུང་བ་འདིས་བོད་ཕྱི་ནང་གི་ན་གཞོན་དག་ལ་སྤོབས་པ་གསར་པ་ཞིག་བསྐྲུན་ཡོད་པ་དང། ༸གོང་ས་མཆོག་དང་བཙན་བྱོལ་བོད་མི་ཚོས་ལོ་ངོ་ལྔ་བཅུའི་རིང་ནུས་ཤུགས་ལྡན་པའི་འཛིན་སྐྱོང་དང་། ཚད་ལྡན་གྱི་སྤྱི་ཚོགས་ཤིག་བསྐྲུན་པར་བསྐྱར་དུ་ངོས་འཛིན་ཐོབ་པའི་གདེང་སྤོབས་སྐྱེ་མཁན་ཡང་ཡོད་ངེས།
༸གོང་ས་མཆོག་གིས་ཐོག་མཐའ་བར་གསུམ་དུ་བཙན་བྱོལ་བོད་མི་ཚོར་ལས་འགན་ཆེན་པོ་གསུམ་ཡོད་པར་ངོས་འཛིན་དང་ལམ་སྟོན་གནང་ཡོད། དེ་ཡང་བཙན་བྱོལ་བོད་མི་ཚོས་རྒྱལ་སྤྱིའི་ནང་བཙན་འོག་གི་བོད་མི་ཚོའི་ངོ་ཚབ་བྱེད་ཐུབ་རྒྱུ་དང། བོད་ཀྱི་ཆོས་དང་རིག་གཞུང་གི་རིན་ཐང་ཁྱབ་སྤེལ་དང་འཛིན་སྐྱོང། གནས་སྐབས་བཙན་བྱོལ་བོད་མིའི་སྒྲིག་འཛུགས་ཚགས་ཚུད་དང་སྤྱི་ཚོགས་སྲ་བརྟན་བཟོ་དགོས་པ་གསུམ་པོ་རེད།
ཁོང་གི་ཕྱེད་བགྲེས་ཡོལ་གནང་བའི་དགོངས་བཞེས་དེ་ནི་བཙན་བྱོལ་གཞུང་གི་ཉིེན་རེའི་བྱེད་སྒོ་དག་ལ་ཐེ་བྱུས་གནང་མི་དགོས་པ་ཡིན་པ་ལས། བོད་ཀྱི་ཆོས་དང་རིག་གཞུང་ཁྱབ་སྤེལ་དང། རྒྱལ་སྤྱིའི་ནང་བོད་མི་མང་གི་ངོ་ཚབ་གནང་རྒྱུའི་ལས་དོན་གཉིས་ཁོང་གིས་མཚམས་འཇོག་གི་མེད་ལ། ཚད་ངེས་ཅན་གྱི་ཐོག་ནས་བཤད་ན་དེ་གཉིས་ཚད་ལྡན་བསྒྲུབ་ཐུབ་པའི་ཆེད་དུའང་ཡིན་སྲིད། དེ་བས་ན་ཁོང་ཉིད་བགྲེས་ཡོལ་གནང་རྒྱུའི་ཐུགས་འདུན་དེ་ནི་ལས་དོན་དང་མཛད་འགན་ལ་དབྱེ་མཚམས་ཤིག་ཕྱེས་ཡོད།
ལོ་རྒྱུས་དང་སྤྱི་ཚོགས་ཀྱི་གནད་དོན་ལ་གཟུ་བོར་གནས་པའི་ལྟ་མཁན་ཞིག་ཡིན་ཕྱིན། ༸གོང་ས་མཆོག་ནི་བོད་ཀྱི་མང་གཙོའི་འབྱུང་ཁུངས་དང། བོད་ཀྱི་མང་གཙོ་འཕེལ་རྒྱས་ཀྱི་བསྐྱེད་བསྲིངས་པ། བོད་ཀྱི་མང་གཙོ་ཚད་ལྡན་དུ་སྒྱུར་བའི་སྣེ་ཤན་དང་དག་བཅོས་པ་བཅས་ཡིན་པ་ཧ་ཅང་གསལ་པོ་རེད།
འོན་ཀྱང་༸གོང་མཆོག་གིས་བོད་ཀྱི་མང་གཙོ་དེ་ཡང་དག་པ་དང། བརྒྱ་ཆ་བརྒྱ་འཛམ་གླིང་གི་ཡར་རྒྱས་ཀྱི་རྣམ་པ་ཚད་མཐོ་བའི་མང་གཙོ་ལྟར་ལག་བསྟར་བྱེད་དགོས་པར་དགོངས་བཞིན་ཡོད་ཅིང་། མང་གཙོ་ཡང་དག་པ་དང། ཁོང་གིས་ལས་དོན་ལ་ཐེ་བྱུས་བྱེད་རྒྱུ་གཉིས་ཀ་ཅུང་མ་བདེ་བ་ཞིག་ཏུ་ཁོང་ཉིད་ཀྱིས་གཟིགས་བཞིན་ཡོད། དགོངས་ཚུལ་འདི་ཁོང་གི་བཀའ་སློབ་མང་དག་ཅིག་ཏུ་གསལ་འདོན་གནང་ཡོད།
བཙན་བྱོལ་ནང་གི་མཐོ་རིམ་མི་སྣ་མང་པོ་ཞིག་གིས། ༸གོང་ས་མཆོག་གིས་ཕྱེད་བགྲེས་ཡོལ་དང་བགྲེས་ཡོལ་སོགས་མི་གསུངས་པར་ཐུགས་འགན་མི་མཐུད་བཞེས་པ་དང་སྐུ་ཚེ་ཞབས་པད་བརྟན་པ་སོགས་ཀྱི་ཞུ་བ་འཐེན་གྱི་ཡོད་མོད། ཁོང་གིས་བགྲེས་ཡོལ་གསུང་བ་ནི་འགན་མ་ཁུར་བ་ཞིག་མིན་པར། དེ་ལས་ལྡོག་ཏེ་འགན་ཁུར་་བ་དང། རྒྱུ་མཚན་ལྡན་པ། བོད་སྤྱི་ལ་ཕན་པ། བོད་རྒྱ་ཆེའི་མི་མང་ལ་ཕན་པ་ཞིག་ཡིན་ཚུལ་ཁོང་གིས་གསུངས་བཞིན་ཡོད།
༸གོང་ས་མཆོག་གིས་རྒྱུ་མཚན་དང་རྒྱབ་ལྗོངས་མང་པོ་ཞིག་གི་འོག་ནས་དེ་ལྟར་གསུངས་ཡང། བོད་མིའི་སྤྱི་ཚོགས་ཀྱིས་དེ་དང་ལེན་བྱེད་མ་འདོད་པའམ། ལེན་མ་ཕོད་པར། དེ་ལས་ལྡོག་ཏེ་ཞུ་བ་མང་དུ་འཐེན་པས། མཐར་༸གོང་ས་མཆོག་གིས་བགྲེས་ཡོལ་ནི་ངའི་ཐོབ་ཐང་ཞིག་ཡིན་པ་དང་། ང་ཡང་འཛམ་གླིང་གི་མི་འབོར་དུང་ཕྱུར་བདུན་ཅུའི་ནང་གི་མི་གཅིག་ཡིན་པས་ང་ཡང་རང་ཉིད་ཀྱི་ཐོབ་ཐང་ཞིག་དགོས་ཞེས་གསུངས་དགོས་ཐུག་ཡོད།
ལྷག་དོན་ཉེ་བའི་ཆར་༸གོང་ས་མཆོག་གིས་འབྱུང་འགྱུར་ཟླ་དྲུག་ཙམ་གྱི་ནང་ཁོང་བགྲེས་ཡོལ་ཆ་ཚང་ལ་ཕེབས་འདུན་ཡོད་སྐོར་གསུངས་ཡོད་ཅིང་། གནད་དོན་དེ་འབྱུང་ངེས་པའི་བཀའ་ཁྲི་དང་སྤྱི་འཐུས་རྣམ་པར་བཀའ་མོལ་གནང་འདུན་ཡོད་ལུགས་གསུངས་ཡོད། འབྱུང་འགྱུར་གྱི་བཀའ་ཁྲི་དང་སྤྱི་འཐུས་ཚོས་ཁོང་གི་ཐུགས་འདུན་དེ་དང་ལེན་བྱེད་སྲིད་དམ། ཁོང་གི་ཐུགས་རེ་དེར་མོས་མཐུན་ཞུ་སྲིད་དམ།
ལོ་རྒྱུས་ལ་འགྱུར་ལྡོག་འགྲོ་བའི་སྐབས་དང། ལོ་རྒྱུས་ལ་འགྱུར་ལྡོག་གཏོང་བའི་སྐབས་སུ་མི་མང་པོས་མོས་མཐུན་བྱེད་དཀའ་བ་འདི་ཡང་ལོ་རྒྱུས་ཀྱི་སྣང་ཚུལ་ཞིག་ཡིན་ངེས་མོད། ལོ་རྒྱུས་ཀྱི་དགོས་མཁོའི་དབང་གིས་ལོ་རྒྱུས་ལ་བཅོས་བསྒྱུར་བྱེད་སྐབས་ལོ་རྒྱུས་ཀྱི་མྱོང་བ་ལེན་ཤེས་མཁན་ཚོ་ད་གཟོད་ལོ་རྒྱུས་ཤེས་མཁན་གྱི་མི་དང་སྤྱི་ཚོགས་ཡིན་པས། འབྱུང་འགྱུར་གྱི་ཟླ་བ་དྲུག་གི་ནང་དུ་བོད་དང་བོད་ཀྱི་སྤྱི་ཚོགས་ལ་ལོ་རྒྱུས་ཀྱི་མཐོ་རྒྱུགས་ཆེན་པོ་ཞིག་ལེན་རྒྱུ་རེད། འབྱུང་ངེས་པའི་བཀའ་ཁྲི་དང་སྤྱི་འཐུས་ཚོ་བོད་མི་མང་གི་ཚབ་བྱས་ནས་རྒྱུགས་སྤྲོད་འདིར་ཞུགས་དགོས་པ་རེད།
འདས་པའི་ལོ་ཤས་རིང་བཀའ་ཤག་གི་སྲིད་བྱུས་དང་ལས་དོན་གང་ཞིག་ལ་མང་ཚོགས་ཁྲོད་བསམ་འཆར་དང་གླེང་སློང་སྣ་ཚོགས་བྱུང་སྐབས། བཀའ་ཤག་གིས་རང་གི་སྲིད་བྱུས་དེ་༸གོང་ས་མཆོག་གི་བཀའ་དགོངས་ཡིན་ཚུལ་མང་ཚོགས་ལ་འགྲེལ་བཤད་བྱེད་ཀྱི་ཡོད། དེ་བས་ན་བཙན་བྱོལ་བོད་མིའི་སྤྱི་ཚོགས་ཁྲོད་ལས་དོན་གང་ཞིག་བསྒྲུབ་པ་དེ་འགྲིག་མིན་ལས་ཀྱང་ལས་དོན་གང་ཞིག་སུ་ཞིག་གི་བཀོད་བྱུས་དང་འཆར་གཞི་ལྟར་བསྒྲུབ་ཀྱི་ཡོད་མེད་ལ་བློ་དོགས་ཆེ་བར་མངོན་ཡོད།
ད་དུང་བོད་མི་ཆེས་མང་པོ་ཞིག་གིས་༸གོང་ས་མཆོག་བགྲེས་ཡོལ་ལ་ཕེབས་ཚེ། བཙན་བྱོལ་བོད་མིའི་འགོ་ཁྲིད་དང་སྒྲིག་འཛུགས་ཁག་གིས་ལས་དོན་ཐད་གནད་དོན་སྣ་ཚོགས་འབྱུང་ངེས་ཡིན་པ་དོགས་པ་བྱེད་ཀྱི་ཡོད་པ་བཤད་མ་དགོས་པ་ཞིག་རེད། འདས་པའི་ལོ་ངོ་མང་པོའི་ནང་བོད་མི་ཚོས་༸གོང་ས་མཆོག་ལ་ཡིད་ཆེས་བྱེད་པ་དང་བོད་གཞུང་ལ་ཡིད་ཆེས་དེ་ཙམ་བྱེད་མ་ཐུབ་པའི་སྟོང་ཆ་དེ་གསབ་ཆེད་༸གོང་ས་མཆོག་གིས་སྐུལ་འདེད་དང་སློབ་སྟོན་གྱི་བཀའ་མོལ་མང་པོ་གནང་མིན་ལ་ལྟོས་པར། བོད་མིའི་འདུ་ཤེས་ཀྱི་གཏིང་རིམ་དུ་གནས་པའི་བསམ་འཁྱེར་གྱི་རྒྱུན་དེ་ད་དུང་ཡང་ལྷག་ཡོད།
དེ་ལས་ཀྱང་གནད་དོན་ཆེ་བ་ཞིག་ནི་གལ་སྲིད་འབྱུང་འགྱུར་གྱི་བཀའ་ཁྲི་གསར་པས་༸གོང་ས་མཆོག་བགྲེས་ཡོལ་ལ་ཕེབས་རྒྱུའི་ཐུགས་འདུན་དེ་ཡོངས་སུ་དང་ལེན་བྱས་ཚེ། མི་ཧ་ཅང་མང་པོ་ཞིག་གིས་བཀའ་ཁྲི་སྒེར་ལ་དོགས་པ་ཆེན་པོ་བྱེད་ངེས་པ་དང། མི་ཧ་ཅང་མང་པོ་ཞིག་གིས་གླེང་ཕྱོགས་སྣ་ཚོགས་བཟོ་མི་སྲིད་པའང་གཏན་ནས་མིན། གལ་ཏེ་གླེང་གཞི་འདི་གྲོས་ཚོགས་ར་བའི་ནང་དུ་བསླེབས་ཚེ་དེ་ལས་ཀྱང་ཐག་གཅོད་དཀའ་བའི་རྩོད་གླེང་རིང་མོ་ཞིག་གི་ནང་དུ་འཁྲིད་སྲིད།
༸གོང་ས་མཆོག་བགྲེས་ཡོལ་ལ་ཕེབས་རྒྱུའི་ཐུགས་འདུན་དེ་ཁོང་གི་ལྷག་བསམ་དང་འགན་འཁྲིའི་དགོངས་པ་ལས་བྱུང་ཞིང། འདས་པའི་དུས་ཡུན་ནང་བཙན་བྱོལ་བོད་མའི་མཐོ་རིམ་མི་སྣ་མང་པོས་གནད་དོན་དེ་དང་ལེན་མ་བྱས་པའང་ཁོོང་ཚོའི་ལྷག་བསམ་དང་འགན་འཁྲིའི་འདུ་ཤེས་དང་འབྲེལ་ཡོད་ངེས་ལ། ད་དུང་བོད་མི་མང་པོ་ཞིག་གིས་གནད་དོན་འདིར་ཚོར་སྣང་སྐྱེན་པོས་དོ་སྣང་དང་གླེང་སློང་བྱེད་བཞིན་པའང་དམངས་ཀྱི་ལྷག་བསམ་དང་འགན་ཁུར་ཞིག་མཚོན་ངེས་པས། ༸གོང་ས་མཆོག་གི་བགྲེས་ཡོལ་ལ་ཕེབས་རྒྱུའི་ཐུགས་འདུན་དང་དེ་འབྲེལ་གྱི་བོད་མིའི་སེམས་ཚོར་དེ་འདི་ལྟར་ལྷག་བསམ་གྱི་གདོང་ཐུག་ཆེན་པོ་ཞིག་ཏུ་གྱུར་ཡོད།
འདི་ནི་དབུ་ཁྲིད་དང་མང་ཚོགས་བར་བྱུང་བའི་ཐག་གཅོད་དང་སེམས་ཚོར་གྱི་བྱུང་རབས་ནང་སའི་གོ་ལའི་སྟེང་གི་ཡ་མཚན་དངོས་བྱུང་ཞིག་ཡིན་ངེས་ལ། བཙན་བྱོལ་བོད་མིའི་དམིགས་བསལ་གྱི་ལོ་རྒྱུས་གནས་བབ་འོག་གི་དམིགས་བསལ་གྱི་ལོ་རྒྱུས་ཤིག་དང། བོད་ཀྱི་ལོ་རྒྱུས་ནང་གི་མགོ་འཛུགས་དང་མཇུག་སྡོམ་གཉིས་ཀྱི་ཆ་ཡོད་པའི་ལོ་རྒྱུས་ཀྱི་དབྱེ་མཚམས་འབྱེད་བྱེད་ཀྱི་འགྱུར་ལྡོག་གི་མཚོན་རྟགས་ཤིག་ཀྱང་ཡིན།
དྲ་གྲོགས་རྣམ་པ་ཚོ། འདིའི་སྐོར་ལ་ངས་བདག་གི་བསམ་ཚུལ་ཞིག་རང་གི་ཟིན་བྲིས་ལ་བྲིས་ཡོད་པས་དུས་ཚོད་བྱུང་ན་དེར་ཕེབས་རོགས་ཞུ། དེའི་དྲ་འབྲེལ་ནི་འདི་ཡིན།
http://njampel.blogspot.com/2010/12/blog-post.html ཡང་ན། https://tibettimes.net/wordpress/blogs.php?id=343&post_id=13021
དཔྱད་པ་ཡག་པོ་གནང་འདུག ཡིན་ནའང་། ང་རྒན་ཨ་འབྲུག་ལ་དོགས་འདྲི་ཞིག་འདུག ནང་པ་ས་ཡ་ ༤༠ ཡི་དབུ་ཁྲིད་ཟེར་བའི་ནང་པ་དེ་ཚོ་གང་དག་རེད། དེ་གསལ་པོ་ཞིག་གསུང་རོགས། ཐུགས་རྗེ་ཆེ།
ཡ་ཡ་རྣམ་རྟོག་མང་དག་ཞིག་ཕྱོགས་སྡོམས་བྱས་སྟེ་་ཡིག་ཚད་ཞིག་བཏང་འདུག
གསལ་བོར་ཞུས་ན་འདི་ནི་གོང་ས་མཆོག་གི་ཡེ་ཤེས་དབྱིངས་དཔྱད་ཡིན་པར་མ་ཟད། སྔ་རྗེས་སུ་ཡེ་ཤེས་དབྱིངས་དཔྱད་ཀྱི་ཐོབ་ཐང་གོང་ས་མཆོག་ལ་ཕུལ་ཟིན་པས། འདིར་བཀའ་ཁྲི་གསར་བས་དང་ལེན་བྱེད་མིན་ལ་ཐུག་མེད་པར་གོང་ས་མཆོག་གིས་ཐུགས་ཐག་ཆོད་པོའི་ལམ་ནས་སྐུ་སྒེར་ལ་ཐག་གཅོད་དབང་ཆ་བརྒྱ་ཆའི་བརྒྱ་ཡོད་པ་འདི་ཇི་ལྟར་ཕྱག་བསྟར་གནང་མིན་ལ་ཐུག་ཡོད།
གཞན་དག་ཨ་འབྲུག་ལགས་ཀྱིས་ཅུང་འཐུས་ཚང་ཞིག་དབྱེ་ཞིབ་གནང་འདུག་པས། གོང་གི་བསམ་ཚུལ་འདིའི་སྒོ་མོ་འབྱེད་སོང་།
ཨ་འབྲུག་མཆོག སྐུ་ཉིད་ཀྱིས་དེ་ལྟར་༸གོང་ས་མཆོག་གི་བཀའ་སློབ་ལ་ཉམས་ཞིབ་གནས་བའི་ནང་ནས་དུས་ཐོག་ཆར་བ་ལྟ་བུའི་གཟིགས་ཚུལ་གྱི་རྩོམ་ཡིག་ལེགས་པོ་འདི་འདྲ་སྤེལ་བར་ཐུགས་རྗེ་ཆེ་ཞུ། གུས་པ་ད་ལྟ་བདེ་འཚམས་ངང་སློབ་སྦྱོང་བྱེད་ཀྱིན་ཡོད་ལགས།
ཡིན་ན་ཡང་༸ང་ལ་དོགས་པ་ཞིག་ཡོད་པ་ནི་༸མཆོག་གི་དགྲེས་ཡོལ་གནང་གསུངས་པའི་དགྲེས་ཡོལ་གྱི་ཚད་གཞི་དེ་གསལ་པོ་ཞིག་ངོས་ཟིན་གྱི་མེད་པ་འདྲ།
སྐབས་རེར་ཇི་སྲིད་བོད་མིའི་སེམས་ནང་གི་རྒྱལ་བ་རིན་པོ་ཆེར་འཛིན་པའི་འཛིན་སྟངས་ཀྱི་བསམ་བློར་འགྱུར་བ་མ་སོང་གི་བར་དང་། སྐུ་མདུན་ནས་ཁ་བ་གངས་ཅན་པར་བརྩེ་བ་མ་དོར་གྱི་བར་དེ་སྲིད་དུ་དོན་གྱི་བདག་པོ་རང་ཡིན་པ་ལས་དགོངས་པ་ཞུ་མི་སྲིད་པ་ཞིག་རེད་སྙམ།
འདི་དང་ཆ་འདྲ་ཞིག་སྔོན་སྐུ་མདུན་གྱིས་གནང་བའི་དགྲེས་ཡོལ་སྐོར་གྱི་གསལ་བཤད་བཀའ་མོལ་ཞིག་ཏུ་ཡོད་སྙམ།
དཔེར་ན། ཐེ་ལན་ཌའི་རྒྱལ་པོ་དེ་ད་ཆ་གཞུང་འཛིན་གྱི་དབང་ཆ་མེད་པའི་སྤྱིར་བཏང་གི་མི་ཞིག་ཡིན་ཀྱང་། གཞུང་གིས་ཐག་མ་ཆོད་པའི་གལ་ཆེའི་ལས་དོན་མང་པོ་ཞིག་རྒྱལ་པོ་རང་གིས་ཆེ་མཐོང་སྤྱད་ནས་སྒྲུབ་ཐུབ་ཀྱི་ཡོད་སྐད། དེ་ཡང་ཡུལ་དེས་རྒྱལ་བོ་ཁོང་ལ་དད་གུས་དག་སྣང་ཆེན་པོ་བྱེད་ཀྱི་ཡོད་པས་རེད་འདུག། ལིམ་བྷི་ནིའི་ཐེ་ལན་ཌའི་ཆོས་ཀྱི་ལྟི་གནས་སུ་ཡང་རྒྱལ་བོ་ཁོང་ནི་ང་ཚོའི་རྒྱལ་བ་རིན་པོ་ཆེའི་སྐུ་དཔར་མཆོད་བཤམས་སུ་བསྒྲིགས་པའི་ཚོད་ཙམ་དུ་བཤམས་འདུག ཞོལ་འཕྲོས་སོ།
གྲོགས་པོ་ལགས་ཧ་ཅང་ཡག་པོ་ཞིག་བྲིས་གནང་འདུག་པས་ཐུགས་རྗེ་ཆེ་ཞུ་བཞིན་ཡོད། བཙན་བྱོལ་བོད་མི་ཚོས་རྒྱུགས་སྤྲོད་ཆེན་མོ་འདིའི་ནང་དུ་ཐོབ་སྐར་མཐོ་ཙམ་ལེན་ཐུབ་རྒྱུའི་རེ་བ་ཞུ་བཞིན་ཡོད་པ་ལས་ཡིད་ཆེས་གང་ཡང་མེད།
ཨ་འབྲུག་དཀོན་མཆོག་ལ་དོན་སྙིང་ཡོད་ཀི