རྒྱ་ནག་གི་གསར་ཤོག་ནང་བདེན་པ་ཟླ་ཚེས་གཅིག་པུ་རེད།

རྒྱ་ནག་གི་གསར་ལམ་ལ་ཡིད་ཆེས་དང་གྲུབ་འབྲས་གང་འདྲ་ཡོད་མེད་ཐད། རྒྱ་ནག་དཔར་སྐྲུན་སྤྱི་ཁྱབ་ལས་ཁུངས་ཀྱི་འགན་འཛིན་ཟུར་པ་ཞིག་གིས། རྒྱ་ནག་ལ་གསར་ཤོག་དང་རླུང་འཕྲིན། བརྙན་འཕྲིན། དྲ་རྒྱ་འདི་འདྲ་མང་པོ་ཞིག་ཡོད་ཀྱང་། རྒྱལ་སྤྱིའི་གླེང་ཕྱོགས་ལ་ཤུགས་རྐྱེན་ཐེབས་པ་བརྒྱ་ཆར་བཀུག་ན་ ༡ ཙམ་ཡང་ཟིན་ཐུབ་ཀྱི་མེད་ཟེར།

ཉེ་ཆར་བཞུགས་སྒར་ངྷ་རམ་ས་ལར་བསྐངས་པའི་བོད་ཀྱི་གསར་འགོད་པའི་ལྷན་ཚོགས་ཐོག སྐུ་སྒེར་དྲུང་ཆེ་རྔ་བ་ཚེ་རྒྱམ་ལགས་ཀྱིས་༼ རྒྱ་ནག་གི་གསར་འགྱུར་བརྒྱུད་ལམ་གྱི་སྟོབས་ཤུགས ༽ ཞེས་པའི་བརྗོད་གཞིའི་ཐོག་གཏམ་བཤད་གནང་ཡོད། ཁོང་གིས་བོད་པའི་གསར་འགོད་པ་ཚོ་ནི། སྤྱི་ཚོགས་ནང་ལས་རིགས་སྣ་ཚོགས་ཤིག་ཡོད་པའི་ནང་གི་གལ་ཆེ་ཤོས་དེ་ཡིན་པ་མ་ཟད། དམག་འཁྲུག་གི་གཡུལ་ས་ན་ཡོད་པའི་པའི་འཐབ་མོ་བ་ལྟ་བུ་ཡིན་སྐོར་ནས་མགོ་བཙུགས་ཏེ་རྒྱ་ནག་གི་གསར་འགྱུར་བརྒྱུད་ལམ་ལ་དབྱེ་ཞིབ་ཀྱིས་གཏམ་བཤད་གནང་དོན། རྒྱ་ནག་ཅེས་པ་དེ་གང་འདྲ་ཞིག་ཡིན་པ་རགས་ཙམ་བློ་ངོར་འཆར་ཡོད་ན། ད་གཟོད་རྒྱ་ནག་གི་གསར་འགྱུར་བརྒྱུད་ལམ་ལ་ཡང་ཤེས་རྟོགས་བྱ་སླ་བོ་ཡིན། རྒྱ་ནག་ནི་སྲིད་དབང་སྒེར་འཛིན་གྱི་རྒྱལ་ཁབ་ཅིག་དང་། ཕྱི་ལོ་ ༡༩༤༩ ལོར་དམར་པོའི་སྲིད་གཞུང་དབུ་བརྙས་པ་ནས་ད་བར་དམར་ཤོག་ཚོགས་པ་གཅིག་པུ་ལས་སྲིད་དོན་ཚོགས་པ་གང་ལའང་སྲིད་གཞུང་འཛིན་པའི་དབང་ཚད་རག་མེད། འོན་ཀྱང་རྒྱ་ནག་གི་སྲིད་གཞུང་དེ་ད་བར་བརྟན་པོར་གནས་ཐུབ་པ་དེ་རྒྱ་ནག་ལ་རྒྱལ་ཁབ་གཞན་དང་མ་འདྲ་བའི་སྒྲིག་འཛུགས་ཚགས་ཆུད་པོ་དང་ཡག་པོ་ཡོད་པས་རེད། དེ་ལྟ་བུའི་སྒྲིག་འཛུགས་ལ་གྲུབ་ཆའི་ལས་ཁུངས་མང་པོ་ཡོད་ཀྱང་། གལ་ཆེ་ཤོས་གསུམ་ཡོད་པ་ནི།  རྒྱ་ནག་རྩ་འཛུགས་ལས་ཁུངས་དང་། དྲིལ་བསྒྲགས་ལས་ཁུངས། དབུས་འཐབ་ཕྱོགས་གཅིག་གྱུར་ལས་ཁུངས་བཅས་རེད།

སྒྲིག་འཛུགས་དེ་དག་ནང་གི་གལ་ཆེ་ཤོས་ནི་དབུས་རྩ་འཛུགས་ལས་ཁུངས་རེད། རྒྱ་ནག་གཞུང་གི་ལས་བྱེད་བསྐོ་བཞག་རིགས་ཚུད་པའི་སྲིད་གཞུང་གི་ལས་དོན་གལ་ཆེན་རིགས་ལས་ཁུངས་འདིའི་ཁོངས་སུ་གཏོགས་ཡོད། གཉིས་པ་དྲིལ་བསྒྲགས་ལས་ཁུངས་ཀྱི་ལས་འགན་གཙོ་བོ་དྲང་བདེན་ཡིན་མིན་ལ་མ་ལྟོས་པར་དམར་པོའི་སྲིད་གཞུང་གི་ལྟ་གྲུབ་བཙན་གྱིས་ཕ་རོལ་བོའི་བསམ་བློའི་ནང་ལྡུག་པའམ། དྲིལ་བསྒྲགས་བྱས་ཏེ་མི་མང་གི་བསམ་བློར་སྒྱུར་བཅོས་གཏོང་རྒྱུ་དེ་རེད། རྒྱ་ནག་གི་གསར་འགྱུར་བརྒྱུད་ལམ་བརྒྱ་ཆ་ ༩༩ དང་ཚེག་ ༩ གཞུང་འབྲེལ་རྐྱང་ཆགས་ཡོད་སྟབས། རྒྱ་ནག་གི་གསར་ཤོག་དང་རླུང་འཕྲིན། བརྙན་འཕྲིན་སོགས་རྒྱལ་ཁབ་གཞན་ཚོ་དང་མི་འདྲ་བར། གཞུང་གི་ལྟ་གྲུབ་དང་སྲིད་བྱུས་དྲིལ་བསྒྲགས་བྱེད་སའི་བརྒྱུད་ལམ་ཙམ་རེད།

རྒྱ་ནག་གི་གསར་འགྱུར་བརྒྱུད་ལམ་དང་འབྲེལ་བའི་ལས་ཁུངས་ཆེན་པོ་གཉིས་ཡོད། གཅིག་ནི་རྒྱ་ནག་དཔར་སྐྲུན་སྤྱི་ཁྱབ་ལས་ཁུངས་དང་། དེའི་དབང་ཚད་གཙོ་བོ་རྒྱ་ནག་ནང་གསར་ཁང་གསར་འཛུག་དང་དཔར་སྐྲུན་རིགས་ཀྱི་དེབ་སྐྱེལ་ལ་སྟངས་འཛིན་བྱེད་པ། ཕྱི་ཕྱོགས་ཀྱི་དཔེ་དེབ་དང་གསར་འགྱུར་བརྒྱུད་ལམ་ཁག་རྒྱ་ནག་ནང་ཡོང་ཆོག་མིན་ལ་སྟངས་འཛིན་བྱེད་པ་བཅས་རེད། གཉིས་པ་རྒྱ་ནག་སྤྱི་ཁྱབ་གསར་འགྱུར་གཞུང་ལས་ཁང་རེད། དེས་གཞུང་འབྲེལ་གནས་ཚུལ་དང་གསར་འགྱུར་རིགས་རྒྱ་ནག་ནང་ཁུལ་ལ་མཁོ་གཏོང་དྲིལ་བསྒྲགས་བྱེད་ཀྱི་ཡོད། ལས་ཁུངས་འདི་གཉིས་དྲིལ་བསྒྲགས་ལས་ཁུངས་ཀྱི་སྟངས་འཛིན་འོག་ཡོད།

རྒྱ་ནག་གི་གསར་འགྱུར་བརྒྱུད་ལམ་གྱི་ཁ་ཕྱོགས་ས་གཙོ་བོ་བསམ་བློ་གཅིག་གྱུར་བཟོ་རྒྱུ་དང་། མི་མང་གི་ཀླད་པ་བཅོས་སྒྱུར་བྱེད་རྒྱུ། གཞུང་གི་ལྟ་གྲུབ་དང་སྲིད་ཇུས་དྲིལ་བསྒྲགས་བྱེད་རྒྱུ་བཅས་རེད། རྒྱ་ནག་ལ་གསར་ཁང་ཟེར་ན་འདྲ། གསར་འགྱུར་བརྒྱུད་ལམ་ཟེར་ནའང་འདྲ་གཙོ་བོ་གསུམ་ཡོད། དེ་ལ་རྒྱ་ནག་གི་མགྲིན་ཚབ་པ་གསུམ་ཟེར་གྱི་ཡོད། གཅིག་མི་མང་ཉིན་རེའི་ཚགས་པར་རེད། དེའི་དཔར་སྐྲུན་གྲངས་ཚད་འཛམ་གླིང་ནང་གི་གསར་ཤོག་ཨང་དང་པོར་སླེབས་ཀྱི་ཡོད། གསར་ཤོག་འདི་ཀློག་ཐུབ་མིན་གང་ལྟར་ཡང་། ཚོགས་སྡེ་ཁག་ཡོད་ཚད་ཀྱིས་མངགས་ཉོ་བྱ་དགོས་པ་རེད། གཉིས་པ་ཞཱིན་ཧ་གསར་འགྱུར་ཁང་རེད། དེས་རྒྱ་ནག་གི་གསར་འགྱུར་ཕྱི་ཕྱོགས་སུ་མཁོ་གཏོང་དང་ཕྱི་ཕྱོགས་ཀྱི་གསར་འགྱུར་མཁོ་སྒྲུབ་བྱེད་ཀྱི་ཡོད། རྒྱ་ནག་ཕྱི་ལོགས་ན་དེ་ལ་ཡན་ལག་གསར་ཁང་ ༢༠ ལྷག་ཡོད། གསར་ཁང་དེ་ཚོས་བཏང་ཡོང་པའི་གསར་འགྱུར་རིགས་རྒྱ་ནག་གིས་དབྱེ་ཞིབ་བྱས་ཏེ། རིགས་གཅིག་ཐད་ཀར་གསར་ལམ་ཁག་བརྒྱུད་མང་ཚོགས་ལ་གཏོང་གི་ཡོད་པ་དང་། རིགས་གཅིག་དཔྱད་ཞིབ་ཡིག་ཆ་རུ་ཉར་གྱི་ཡོད། དཔྱད་ཞིབ་ཡིག་ཆ་དེ་རྒྱ་ནག་མཐོ་རིམ་མི་སྣ་དང་གསང་བའི་ལས་ཁུངས་ཁག་གི་ཉམས་ཞིབ་ཚན་པར་འགྲོ་བཞིན་ཡོད། གསུམ་པ་རྒྱ་ནག་སི་སི་བརྙན་འཕྲིན་(CCTV)ནང་ལེ་ཚན་ ༢༡ ཡོད་པ་ཚང་མ་གཞུང་འབྲེལ་ལེ་ཚན་རེད། འདིའི་ཐད། རྒྱ་ནག་ཁོ་རང་ཚོར་བཤད་སྲོལ་ཞིག་ཡོད་པ་ནི། མི་མང་ཉིན་རེ་ཚགས་པར་ནང་བདེན་པ་གཅིག་ཡོད། དེ་ཚགས་པར་སྟེང་གི་ཟླ་ཚེས་གཅིག་པོ་རེད། དེ་བཞིན་སི་སི་བརྙན་འཕྲིན་ནང་བདེན་པ་གཅིག་ཡོད། དེ་གནམ་གཤིས་སྔོན་བརྡའི་ལེ་ཚན་གཅིག་པོ་རེད་ཟེར།

“>www.youtube.com/v/ULb8ABYLjowརྒྱ་ནག་རྒྱལ་ཡོངས་ལ་རླུང་འཕྲིན་ཁང་ ༢༥༡ དང་བརྙན་འཕྲིན་ཁང་ ༢༧༢ ཡོད་ལ། སྒེར་དབང་འོག་ཚགས་ཤོག་དང་རླུང་འཕྲིན། བརྙན་འཕྲིན་སོགས་འཛུགས་ཆོག་གི་མེད། ཡིན་ནའང་དྲ་རྒྱ་འམ་དྲ་གནས་བརྒྱུད་ལམ་རིགས་གཞུང་འབྲེལ་མ་ཡིན་པ་ཤུགས་ཆེན་པོ་ཡོང་གི་ཡོད་ཅིང་། རྒྱ་ནག་གིས་སྟངས་འཛིན་བྱ་རྒྱུར་དཀའ་ངལ་ཞིག་ཀྱང་འཕྲད་བཞིན་པ་རེད། ད་ལྟའི་ཆར་རྒྱ་ནག་མི་གྲངས་དུང་ཕྱུར་བཅུ་གསུམ་ལས་དུང་ཕྱུར་ ༤ ལྷག་གིས་དྲ་རྒྱ་བེད་སྤྱོད་གཏོང་གི་ཡོད་ལ། ཧྲང་ཧེ་ས་ཁོངས་གཅིག་པོར་མཚོན་ན། རྒྱ་ནག་གི་དྲ་རྒྱའི་སྟངས་འཛིན་ལས་བརྒལ་པའི་མཉེན་ཆས་བེད་སྤྱོད་བྱེད་མཁན་མི་ས་ཡ་གཉིས་ལྷག་ཡོད། དྲ་རྒྱ་བེད་སྤྱོད་གཏོང་མཁན་དུང་ཕྱུར་བཞི་ལས་དུང་ཕྱུར་ ༢ ཙམ་གྱིས་ཟིན་བྲིས་སམ་བེད་སྤྱོད་བྱེད་ཀྱི་ཡོད་པར་བརྟེན། ང་ཚོས་དྲ་རྒྱ་བརྒྱུད་ནས་བོད་དོན་གླེང་སློང་བྱ་རྒྱུ་དེ་ལམ་ཁ་ཡག་ཤོས་གཅིག་ཆགས་ཡོད། དྲ་རྒྱ་མ་ཡིན་པའི་བརྒྱུད་ལམ་གཞན་པ་དམངས་ཁྲོད་ནས་འདོན་སྤེལ་བྱ་རྒྱུ་ཧ་ཅང་ཁག་པོ་རེད།

དེང་སང་གསར་འགྱུར་ལས་རིགས་དེ་ཚོང་གི་ངོ་བོར་འགྲོ་བཞིན་ཡོད་སྟབས། གསར་འགྱུར་ནི་ཚོང་ལས་ཁྲོམ་རའི་ནང་གི་ཚོང་རྫས་ཤིག་ཆགས་ཡོད་དུས། རྒྱ་ནག་གིས་སོ་སོའི་གསར་འགྱུར་ཕར་བཙོང་ཐུབ་ཀྱི་མེད་ནའང་། མི་གཞན་གྱི་གསར་འགྱུར་ཉོ་སྒྲུབ་བྱེད་པ་དང་། ཧོང་ཀོང་དང་ཐེ་ཝན་སོགས་ཀྱི་གསར་འགྱུར་བརྒྱུད་ལམ་ཁག་ལ་མ་རྐང་ཆེན་པོ་བཞག་སྟེ། ཕྱི་ཕྱོགས་ཀྱི་གསར་ཁང་དང་བརྒྱུད་ལམ་ཁག་མང་པོ་རྒྱ་ནག་གིས་བེད་སྤྱོད་གཏོང་ཐབས་བྱེད་ཀྱི་ཡོད།

རྒྱ་ནག་གིས་ད་ལྟའི་བར་གསར་འགྱུར་བརྒྱུད་ལམ་ཐད། སྒྱུར་བཅོས་ཐེངས་གཉིས་གཏོང་དགོས་བྱུང་ཡོད། དང་པོ། དྲུག་བཞིའི་ལས་འགུལ་བྱུང་རྗེས་ཀྱི་ལོ་རབས་དགུ་བཅུ་བའི་ནང་སྒྱུར་བཅོས་ཤིག་བཏང་ཡོད་པ་དང་། ཐེངས་གཉིས་པ་ནི་ཉིས་སྟོང་བརྒྱད་ལོར་རྒྱ་ནག་གིས་ཨོ་ལིམ་པིག་དབལ་འབར་རྒྱལ་སྤྱིའི་སྟེང་ཁྱེར་སྐབས་ངོ་རྒོལ་ཤུགས་ཆེན་བྱུང་པ་དང་བོད་ནང་གི་ཞི་རྒོལ་ཆེན་མོ་བྱུང་པ་བཅས་ཀྱིས་རྐྱེན་པས། རྒྱ་ནག་གཞུང་གིས་རྒྱལ་སྤྱིའི་སྟེང་ནས་གླེང་བརྗོད་ཀྱི་དབང་ཚད་ཅིག་ལེན་རྒྱུར་འབད་བརྩོན་བྱེད་བཞིན་ཡོད། དེའི་ལས་གཞི་གཅིག་ནི་ད་ལོའི་ཕྱི་ཟླ་ ༧ པའི་ནང་ནས་རྒྱ་སྒོར་དུང་ཕྱུར་ ༤༥ ལྷག་གི་འགྲོ་གྲོན་བཏང་སྟེ། རྒྱལ་སྤྱི་རང་བཞིན་གྱི་བརྙན་འཕྲིན་ཞིག་མགོ་འཛུགས་བྱེད་མུས་ཡིན་ལ། བརྙན་འཕྲིན་དེ་བྷི་བྷི་སི་དང་སི་ཨན་ཨན་ལྟ་བུ་ཞིག་ཡོང་རྒྱུར་དམིགས་འབེན་བཟུང་ཡོད་པ་མ་ཟད། དེའི་གསར་འགོད་པ་དག་ཀྱང་ཕྱི་རྒྱལ་ཁག་ནས་གླ་ཕོག་མཐོ་བོ་སྤྲད་དེ་འཚོལ་བསྡུ་བྱེད་མུས་རེད།  

ཉེ་ཆར་ཕྱི་ཟླ་ ༡༢ པའི་ཚེས་གཅིག་ནས་རྒྱ་ནག་མི་མང་ཀུན་ཁྱབ་རླུང་འཕྲིན་ནང་། ཆུ་ཚོད་གཅིག་རིང་མཚོ་སྔོན་བོད་སྐད་རླུང་འཕྲིན་གྱི་བོད་སྐད་གཏོང་གཏན་འཁེལ་འདུག དེ་དགོང་མོའི་ཆུད་ཚོ་ ༡༠ ནས་ ༡༡ བར་ཡིན་ཞིང་། དུས་ཚོད་དེ་ནི་ཏག་ཏག་ཨེ་ཤ་ཡ་རང་དབང་རླུང་འཕྲིན་གྱི་ཨམ་སྐད་དང་ཁམས་སྐད་ལེ་ཚན་གཏོང་པའི་དུས་ཚོད་ལ་འཁེལ་བ་བཟོས་ཡོད། དེ་ནི་ཐད་ཀར་ཨེ་ཤ་ཡ་རང་དབང་རླུང་འཕྲིན་ལ་འགོག་རྐྱེན་བཟོ་ཆེད་རེད། དེ་བཞིན་ཉེ་ཆར་ཨ་རིའི་བརྙན་འཕྲིན་དུ་སྨོན་ལམ་ཡིག་གཟིགས་དང་སྨོན་ལམ་ཚིག་མཛོད་ངོ་སྤྲོད་བྱས་པའི་ཁ་གཏད་དུ། ཉིན་ཤས་རིང་ནས་ལྷ་སའི་བརྙན་འཕྲིན་དུ་བློ་བཟང་བོད་རྒྱ་དབྱིན་གསུམ་ཚིག་མཛོད་ཅེས་པའི་འཕྲུལ་ཆས་ཤིག་ངོ་སྤྲོད་བྱེད་མགོ་བརྩམས་སོང་།

རྒྱ་ནག་གི་གསར་འགྱུར་བརྒྱུད་ལམ་གྱི་སྟོབས་ཤུགས་དེ་འདྲའི་ཆེན་པོ་ཞིག་ཡིན་རུང་། དེ་ལ་ཡིད་ཆེས་དང་གྲུབ་འབྲས་གང་འདྲ་ཡོད་མེད་ཐད་ནས་བཤད་ན། རྒྱ་ནག་དཔར་སྐྲུན་སྤྱི་ཁྱབ་ལས་ཁུངས་ཀྱི་འགན་འཛིན་བྱས་མྱོང་མཁན་ཞིག་གིས། རྒྱ་ནག་ལ་གསར་ཤོག་དང་རླུང་འཕྲིན། བརྙན་འཕྲིན། དྲ་རྒྱ་འདི་འདྲ་མང་པོ་ཞིག་ཡོད་ཀྱང་། རྒྱལ་སྤྱིའི་གླེང་ཕྱོགས་ལ་ཤུགས་རྐྱེན་ཐེབས་པ་ཧ་ཅང་ཉུང་ཉུང་རེད། བརྒྱ་ཆ་ ༡ ཙམ་ཡང་ཟིན་ཐུབ་ཀྱི་མི་འདུག ཅེས་ཉིས་སྟོང་བརྒྱད་ཀྱི་ཕྱི་ཟླ་ ༡༢ ནང་བཤད་འདུག དེ་བཞིན་རྒྱ་ནག་སྤྱི་ཚོགས་ཚན་རིག་ཁང་གི་ཞེ་ཡོ་ཝེ་ཞེས་པའི་མཁས་པ་ཞིག་གིས། རྒྱ་ནག་ལ་གསར་འགྱུར་བརྒྱུད་ལམ་ཁག་ཧ་ཅང་མང་པོ་ཞིག་ཡོད་ཀྱང་། དོན་དངོས་ཐོག་དེ་ཚོ་ད་ལྟ་མུན་ནག་གི་དུས་སྐབས་ཤིག་ཏུ་གྱུར་ཡོད་རེད་ལ། རྒྱ་ནག་གཞུང་གིས་མུ་ནག་དེ་རྒྱ་ཇེ་ཆེར་གཏོང་གི་ཡོད་པ་རེད། ཅེས་བརྗོད་འདུག འོན་ཀྱང་རྒྱ་ནག་གི་གསར་འགྱུར་བརྒྱུད་ལམ་ཁག་གིས་རྒྱལ་སྤྱིའི་སྟེང་ཤུགས་རྐྱེན་ཐེབས་མེད་ཀྱང་། རྒྱ་ནག་ནང་ཁུལ་ལ་ནུས་པ་གང་འཚམ་ཐོན་ཡོད། ཅེས་བརྗོད་སོང་།

གསར་འགོད་པ། བནྡེ་སྐྱབས།