བཙན་བྱོལ་བོད་གཞུང་གི་ཕྱི་ལོ་ ༢༠༡༠ ལོ་ནས་ ༢༠༡༡ ལོའི་བར་གྱི་བསྐྱར་བཅོས་སྔོན་རྩིས་གཏན་འབེབས་ནང་། རྒྱུན་་གྲོན་དང་དམིགས་བསལ། ཟུར་བཀོལ་གསུམ་ལ་ཁྱོན་བསྡོམས་ཧིན་སྒོར་ཐེར་འབུམ་གཅིག་དང་དུང་ཕྱུར་གཅིག བྱེ་བ་བཞི། ས་ཡ་བཞི། སུམ་ཁྲི་ ༡༡༤༤༠༣༠༡༠༨།༠༠ ཙམ་ཡིན་འདུག
ཟླ་འདིའི་ཕྱི་ཚེས་ ༡ ཉིན་བོད་གཞུང་ཚོགས་དྲུང་ལས་ཁུངས་ཀྱིས་ཕྱིར་བསྒྲགས་གནང་བ་ལྟར་ན། བཙན་བྱོལ་བོད་གཞུང་གི་ ༢༠༡༠ ལོ་ནས་ ༡༠༡༡ ལོའི་བསྐྱར་བཅོས་སྔོན་རྩིས་རྒྱུན་གྲོན་དང་དམིགས་བསལ། ཟུར་བཀོལ་བཅས་ལ་བཀའ་ཤག་ནས་རྒྱབ་གཉེར་ཧིན་སྒོར་ཐེར་འབུམ་གཅིག་དང་དུང་ཕྱུར་གཅིག བྱེ་བ་བཞི། ས་ཡ་བཞི། ཆིག་འབུམ་ཆིག་ཁྲི་ ༡༡༤༤༡༡༤༣༣༧།༠༠ གནང་འདུག་ཀྱང་། ཕྱི་ཚེས་ ༢༣ ཉིན་ནས་ ༢༦ བར་བོད་མི་མང་སྤྱི་འཐུས་རྒྱུན་ལས་ཀྱི་བསྐྱར་བཅོས་སྔོན་རྩིས་ཀྱི་ཚོགས་འདུའི་ཐོག གཅོག་ཆ་ ༡༦ ལ་ཧིན་སྒོར་སུམ་འབུམ་སུམ་ཁྲི་ལྔ་སྟོང་ ༣༣༥༨༥༡།༠༠ དང་། སྤར་ཆ་ ༧ ལ་ཧིན་སྒོར་ཉིས་འབུམ་ལྔ་ཁྲི་ཆིག་སྟོང་ ༢༥༡༦༢༢།༠༠ གནང་སྟེ། མཐའ་དོན་རྒྱུན་གྲོན་དང་དམིགས་བསལ། དམིགས་བཀར་གསུམ་ལ་ཧིན་སྒོར་ཐེར་འབུམ་གཅིག་དང་དུང་ཕྱུར་གཅིག བྱེ་བ་བཞི། ས་ཡ་བཞི་ ༡༡༤༤༠༣༠༡༠༨།༠༠ གཏན་འབེབས་བྱུང་ཡོད་འདུག
ས་འཐུས་མེད་པའི་ས་གནས་ཁག་བདུན་གྱི་བསྐྱར་བཅོས་སྔོན་རྩིས་སུ་བཀའ་ཤག་གིས་རྒྱབ་གཉེར་ཧིན་སྒོར་བྱེ་བ་གསུམ་དང་ས་ཡ་གཅིག སུམ་འབུམ་བཞི་ཁྲི་ ༣༡༣༤༦༦༣༩།༠༣ གནང་བ་རང་འཇགས་དང་། འཕྲོད་བསྟེན་ཁྱབ་ཁོངས་སྨན་ཁང་ཁག་དང་མངོན་དགའ་སློབ་གྲྭ་བཅས་ཀྱི་འགྲོ་གྲོན་ལ་བཀའ་ཤག་གིས་རྒྱབ་གཉེར་ཧིན་སྒོར་བྱེ་བ་གསུམ་དང་ས་ཡ་དྲུག བདུན་ཁྲི་ ༣༦༠༧༤༩༤༡།༠༠ གནང་བར། སྤྱི་འཐུས་རྒྱུན་ལས་ཀྱིས་གཅོག་ཆ་ཧིན་སྒོར་ཉིས་ཁྲི་ ༢༠༠༠༠།༠༠ དང་། སྤར་ཆ་ཧིན་སྒོར་ཉིས་སྟོང་སུམ་བརྒྱ་ ༢༠༣༠༡།༠༠ གནང་སྟེ་ཁྱོན་བསྡོམས་བཀའ་འཁྲོལ་ཧིན་སྒོར་བྱེ་བ་གསུམ་དང་ཡ་ས་དྲུག བདུན་ཁྲི་ ༣༦༠༧༥༢༤༢།༠༠ གཏན་འབེབས་གྲུབ་སྟེ། བཙན་བྱོལ་བོད་མིའི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞིའི་དགོངས་དོན་ལྟར། ཕྱི་ཟླ་ ༡༡ ཚེས་ ༣༠ ཉིན་ནས་རྩ་འཛིན་གནང་རྒྱུ་ཡིན་འདུག
འདི་གའི་གསར་འགོད་པས་ཕྱི་ཚེས་ ༤ ཉིན་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་ལ་བསྐྱར་བཅོས་སྔོན་རྩིས་གཏན་འབེབས་སྐོར་བཀའ་འདྲི་ཞུས་པར་ཁོང་གིས་གསུངས་དོན། ཟླ་སྔོན་མའི་ཕྱི་ཚེས་ ༢༠ ཉིན་བཀའ་ཤག་གི་ངོས་ནས་སྤྱི་འཐུས་ལྷན་ཚོགས་ལ་ ༢༠༡༠ དང་༢༠༡༡ ལོའི་བསྐྱར་བཅོས་སྔོན་རྩིས་འབྱོར་བ་རེད། དེའི་ཐོག་སྤྱི་འཐུས་རྒྱུན་ལས་ཀྱིས་ཟླ་བ་དེའི་ཚེས་ ༢༣ ནས་ ༢༦ བར་ཉིན་བཞིའི་རིང་བཀའ་བསྡུར་གནང་སྟེ། རྩིས་མགོ་རེ་རེ་བཞིན་ཞིབ་བཤེར་བྱས་ཏེ་མཐའ་མར། བཀའ་ཤག་གིས་རྒྱབ་གཉེར་གནང་བའི་དངུལ་འབོར་ནང་ནས་གཅོག་ཆ་ ༡༦ ཙམ་ལ་ཧིན་སྒོར་ ༣༣༥༨༥༡།༠༠ ཙམ་གཅོག་རྒྱུ་དང་། སྤར་ཆ་ ༧ ལ་ཧིན་སྒོར་ ༢༥༡༦༢༢།༠༠ ཙམ་སྤར་རྒྱུ་བྱུང་སོང་། གཅོག་ཆའི་ནང་དུ་དམིགས་བསལ་གཅོག་ཆ་ཆེན་པོ་དེ་འདྲ་བྱུང་མེད་ནའང་། སྤྱི་ཡོངས་ནས་ང་ཚོས་གནང་སྟངས་ནི། དཔེར་ན། དུས་རྒྱུན་དུ་འགྲོ་གྲོན་གཏོང་དགོས་པའི་རྩིས་མགོ་ལྟ་བུ་ཞིག་ཡིན་ན། སྤྱི་འཐུས་རྒྱུན་ལས་ཀྱིས་འདས་པའི་ཟླ་བདུན་ནང་ངོ་སོང་གི་འགྲོ་གྲོན་ག་ཚོད་ཕྱིན་པ་དང་། ལོ་སྔོན་མར་འགྲོ་སོང་བསྡོམས་པས་ག་ཚོད་ཕྱིན་ཡོད་མེད་ལ་གཞི་ལ་བཞག་སྟེ་བཀའ་འཁྲོལ་གནང་གི་ཡོད། ཅེས་ངོ་སྤྲོད་གནང་བྱུང་།
ཡང་ཁོང་མོས་སྤར་ཆའི་ཐད་གསུངས་དོན། སྤར་ཆ་གནང་དགོས་པ་ཁག་ལ་རིམ་པ་གཉིས་འདུག ཁ་ཤས་ལས་དོན་གྱི་ཐོག་ནས་གལ་ཆེན་པོ་ཡིན་ནའང་། བསྡོམས་ནང་དུ་ལྷག་བསྡད་པ། དཔེར་ན། བོད་གཞུང་བདེ་སྲུང་ལས་ཁུངས་ཀྱི་རྩིས་མགོའི་ནང་དུ་ཧིན་སྒོར་ ༣༡༠༠༠༠།༠༠ བཀའ་འཁྲོལ་ཡོད་པ་དང་བཀའ་ཤག་གིས་རྒྱབ་གཉེར་ཡོད་ནའང་། བསྡོམས་ནང་དུ་བསླེབས་མེད་སྟབས་ང་ཚོས་སྤར་ཆའི་ཁོངས་སུ་བཞག་ཡོད། དེ་བཞིན་བོད་གཞུང་ཕྱི་དྲིལ་ལས་ཁུངས་ཀྱི་ལས་འཆར་ཁག་ནང་རྩིས་མགོ་བཀའ་འཁྲོལ་ཡོད་པའི་སྙན་གསན་ཞུས་པའི་ནང་། བོད་དོན་རྒྱབ་སྐྱོར་གནང་མཁན་ཞིག་གིས་བོད་ཀྱི་ལོ་རྒྱུས་དང་འབྲེལ་བའི་པར་རིས་དང་ཉམས་ཞིབ་ཀྱི་དེབ་ཅིག་དཔར་སློག་བརྒྱབ་སྟེ། བདག་གཉེར་བྱ་རྒྱུའི་ལས་འཆར་ཞིག་འདུག དེ་ལ་བཀའ་ཤག་ནས་བཀའ་འཁྲོལ་བྱུང་མི་འདུག་ཀྱང་། ང་ཚོའི་རྒྱུན་ལས་རྣམས་ཀྱིས་འབྲེལ་ཡོད་དྲུང་ཆེ་ཚུར་སྐད་བཏང་སྟེ། བརྟག་དཔྱད་བྱས་པ་བརྒྱུད་དེ་སྤར་ཆ་དགོས་ཀྱི་ཡོད་པ་ཞིག་ལ་གཟིགས་ཏེ་སྤར་ཆ་གནང་ཡོད།
ཁ་ཤས་ལས་འཆར་དང་འབྲེལ་བ་ཡོད་པའི་ཐོག ལྷན་ཁང་གི་ལས་འཆར་ཡིན་པ་དང་བཀའ་ཤག་གིས་བཀའ་འཁྲོལ་ཐོབ་མེད་ཀྱང་། སྤྱི་འཐུས་རྒྱུན་ལས་ངོས་ནས་དགོས་གལ་དུ་མཐོང་གི་ཡོད་ན། ང་ཚོས་བཀའ་འཁྲོལ་གནང་ཡོད། གཅོག་ཆ་ཁག་གི་ནང་ནས་དཔེར་ན། འཕྲོད་བསྟེན་ཁྱབ་ཁོངས་སྦེལ་ཀོབ་འཚོ་བྱེད་སྨན་ཁང་གི་ཟུར་བཀོལ་ནང་། འགྲིམ་འགྲུལ་དང་ཟུར་ཕོགས་ཧིན་སྒོར་ ༢༠༠༠༠།༠༠ ཟེར་བ་ཞིག་ལ་དམིགས་བསལ་རྒྱུ་མཚན་མེད་དང་། ཤེས་རིག་ལས་ཁུངས་ཟུར་བཀོལ་ནང་དགོས་གལ་མེད་པའི་འགྲེལ་བརྗོད་བྱུང་བ་ལྟ་བུའི་རིགས་གཅོག་ཆ་བྱས་ཡོད། ནམ་རྒྱུན་ལས་ལྷག་པའི་དངུལ་དགོས་ཀྱི་ཡོད་ན། ལས་འཆར་འདི་དང་གན་ཡོད། དེ་ལ་འགྲོ་གྲོན་འདི་དང་དེ་ཙམ་དགོས་ཀྱི་འདུག་ཟེར་ནས་རྒྱུ་མཚན་བཤད་རྒྱུ་དགོས་པ་རེད། དེར་བརྟེན། སྦེལ་ཀོབ་འཚོ་བྱེད་སྨན་ཁང་ལྟ་བུ་ཡིན་ན། དམིགས་བསལ་གྱི་རྒྱུ་མཚན་གང་ཡང་བརྗོད་མེད་སྟབས། སྔོན་མའི་དངུལ་གྲོན་ལས་འདང་ངེས་ལ་མཐོང་སྟེ་གཅོག་ཆ་ཞུས་ཡོད།
ང་ཚོས་གཅོག་ཆ་ག་རེ་གནང་ནའང་། གཅོག་ཆ་མ་བྱས་གོང་འབྲེལ་ཡོད་ལྷན་ཁང་གི་རྩིས་པ་སྐད་བཏང་སྟེ། ཁྱེད་ཚོའི་རྩིས་ཁྲའི་ནང་དུ་སྔོན་མ་དངུལ་འདི་ལྟ་བུ་ཞིག་ཕྱིན་འདུག ད་རེབ་སྔོན་རྩིས་འདི་འདྲ་ཞིག་འདུག དེ་རྒྱུ་མཚན་གང་དང་གང་ལ་བརྟེན་ཏེ་བྱུང་བ་རེད་ཅེས་སྐད་ཆ་འདྲི་བཞིན་ཡོད། དེ་ལ་ཁོང་ཚོས་འདོད་བློ་ཁེངས་པའི་ལན་འདེབས་ཤིག་ཡོད་ན། དེ་ལ་དཔག་པའི་དགོངས་པ་བཞེས་ཀྱི་ཡོད། གཙོ་བོ་རྒྱུན་གྲོན་ཡིན་ན་ངོ་སོང་ག་ཚོད་ཕྱིན་ཡོད་མེད་ལ་བལྟ་ས་ཡོད། ལོ་སྔོན་མར་དངུལ་ག་ཚོད་ཕྱིན་ཡོད་མེད་ལའང་ལྟ་ཆོག་ཆོག་ཡོད། རྒྱུ་མཚན་རྒྱབ་ལྗོངས་མང་པོ་ཞིག་ལ་ཞིབ་འཇུག་བྱེད་ཀྱིན་ཡོད་སྟབས། ང་ཚོས་གཅོག་ཆ་བྱས་རིགས་ཀྱིས་ལྷན་ཁང་ཁག་གི་ཕྱག་ལས་གནང་སྟངས་ལ་འགྱུར་བ་གང་ཡང་འགྲོ་བ་མ་རེད། ཅེས་གསུངས།
ཡང་སྤྱི་འཐུས་རྒྱུས་ལས་ཀྱིས་ལྷན་ཁང་ཁག་ལ་ཕུལ་བའི་ཡིག་ཆའི་ནང་། མ་འོངས་པར་ཐུགས་སྣང་གནང་དགོས་པ་ཁག་ཅིག་འཁོད་ཡོད་པ་ལས། དབུས་སྣེ་ལེན་ཁང་གསར་རྒྱག་གི་ཨར་ལས་འགྲོ་གྲོན་དངུལ་འབོར་དེ་དབུས་སྣེ་ལེན་ཁང་དང་། ཤེས་རིག་ལས་ཁུངས་གཉིས་ཀའི་ཟུར་བཀོལ་ནང་གསལ་ཡོད་སྟབས། མ་འོངས་པར་དེ་རིགས་མ་ཡོང་བའི་དམ་དོན་གནང་གལ་ཞེས་དང་། མངོན་དགའ་སློབ་གྲྭའི་ཟུར་བཀོལ་ནང་གི་འབབ་གྲོན་གཞན་༼ ༨ ༽ པ་བཟོ་བཅོས་དང་། ཉམས་བཟོའི་ཆེད་ཧིན་སྒོར་ ༨༠༠༠༠།༠༠ བཀའ་འཁྲོལ་ཞུས་འདུག་ཀྱང་། ཧིན་སྒོར་ ༡༩༦༩༩།༠༠ འགྲོ་སོང་སྔོན་ལ་བཏང་སྟེ། བཀའ་འཁྲོལ་རྗེས་ནས་ཞུས་ཏེ་སྒྲིག་འགལ་བྱུང་ཡོད་སྐོར་བཅས་ཀྱང་བཀོད་འདུག
གསར་འགོད་པ། ཨ་རིག་འགྱུར་མེད།
དྲ་གྲོགས་བདེ་ཁང་ལགས། ཡི་གེ་ཐོག་བཀོད་པའི་གྲངས་ཀ་ནི་སྤྱི་ཙམ་ལས་གྲངས་གནས་ཆུང་ངུ་དག་བཀོད་མེད། གཞི་འཛིན་ས་གཙོ་བོ་ཨང་ཀི་ལ་གཞི་བཅོལ་དགོས།
ཡི་གེའི་ཐོག་བཀོད་པའི་གྲངས་ཀ་དང་ཨང་གྲངས་གཉིས་ལ་ཁྱད་པར་ཆེན་པོ་འདུག གྲངས་འབོར་རེ་རེ་བཞིན་ཨང་ཀི་ནས་མཚོན་ཕྱིར་ཡིག་བསྡུས་བྱས་པ་ཞིག་རེད་དམ་ཡང་ན་དེ་གཉིས་ལོགས་སུ་གོ་དགོས་པ་རེད། ༼ཡིག་གྲངས་ལ་གཞི་འཇོག་དགོས་པ་རེད་ཡང་ན་ཨང་གྲངས་ལ་གཞི་འཛིན་དགོས་རེད།༽ འདི་ནི་ལོ་འཁོར་མོ་ཞིག་གི་གཞུང་དངུལ་སྔོན་རྩིས་ཡིན་པས་མང་ཚོགས་སུ་གོ་བརྡ་སྤྲོད་ཆེད་གྲངས་ཀ་མ་ནོར་བཀོད་ཐུབ་ན་ལེགས།