བཀའ་སྤྱི་གཉིས་ཀྱིས་ལིག་ཞོ་པོ་ལ་འཚམས་འདྲི་ཞུས།

༧གོང་ས་མཆོག་གིས་ནོ་བྷེལ་ཞི་བདེའི་གཟེངས་རྟགས་བཞེས་ཏེ་མི་ལོ་ ༢༡ འཁོར་བར་རྗེས་དྲན་དང་། ད་ལོའི་ནོ་བྷེལ་ཞི་བདེའི་གཟེངས་རྟགས་རྒྱ་རིགས་མང་གཙོ་དོན་གཉེར་བ་སྐུ་ཞབས་ལིག་ཞོ་པོ་ལ་ཐོབ་པར་བཀའ་སྤྱི་གཉིས་ཀྱིས་འཚམས་འདྲི་ཞུས་ཡོད།

དེ་རིང་འཛམ་གླིང་མི་མང་གིས་དེ་རིང་གི་ཉིན་མོ་འདི་ནོ་བྷེལ་ཞི་བདེའི་གཟེངས་རྟགས་ཀྱི་ཉིན་མོ་ཞིག་ཏུ་སྲུང་གཙི་བྱེད་ཀྱིན་ཡོད་པ་ལྟར། གཞིས་བྱེས་བོད་མི་ཡོངས་ཀྱིས་དེ་རིང་གི་ཉིན་མོ་འདི་༧གོང་ས་མཆོག་གིས་ནོ་བྷེལ་ཞི་བདེའི་གཟེངས་རྟགས་བཞེས་ཏེ་མི་ལོ་ཧྲིལ་བོ་ ༢༡ འཁོར་བའི་དུས་དྲན་དུ་སྲུང་གཙི་བྱེད་ཀྱིན་ཡོད། ལྷག་པར་དུ། དེ་རིང་གི་ཉིན་མོ་འདི་རྒྱ་ནག་གི་མི་མང་ལ་མཚོན་ན་འཛམ་གླིང་ནང་མཚན་སྙན་འབར་བའི་ནོ་བྷེལ་ཞི་བདེའི་གཟེངས་རྟགས་འདི་བཞིན། རྒྱ་ནག་རང་གི་མི་རིགས་ཤིག་དང་མང་གཙོ་དོན་དོན་གཉེར་བའི་རླབས་ཆེན་གྱི་མི་སྣ་སྟེ། སྐུ་ཞབས་ལིག་ཞོ་པོ་ལ་ཐོབ་པར་ཆེས་ཐོག་མའི་དགའ་སྟོན་རྟེན་འབྲེལ་གྱི་ཉིན་མོར་འཁེལ་ཡོད།

དེ་རིང་ཞོགས་པར་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བཙན་བྱོལ་བོད་གཞུང་གི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། གཞུང་ཞབས་ལས་བྱེད། གྲྭ་བཙུན་དང་སློབ་ཕྲུག མང་ཚོགས་བཅས་མི་མང་སྟོང་ཕྲག་མང་པོ་འདུ་འཛོམས་ཐོག ༧གོང་ས་མཆོག་ལ་ནོ་བྷེལ་ཞི་བདེའི་གཟེངས་རྟགས་ཐོབ་སྟེ་མི་ལོ་ ༢༡ འཁོར་བའི་དུས་དྲན་མཛད་སྒོ་སྲུང་གཙི་གནང་ཡོད་ལ། ཉིན་དེར་བོད་གཞུང་དཔལ་འབྱོར་ལས་ཁུངས་ཀྱི་བཀའ་བློན་ཚེ་རིང་དོན་གྲུབ་ལགས་ཀྱིས་བཀའ་ཤག་གི་གསུང་འཕྲིན་སྒྲོག་སྦྱོང་གནང་བའི་ནང་། ཕྱི་ལོ་ ༡༩༨༩ ལོར་ནོ་བྷེལ་ཞི་བདེའི་གཟེངས་རྟགས་༧གོང་ས་མཆོག་ལ་ཕུལ་བ་དེས་ནོ་བྷེལ་ཞི་བདེའི་གཟེངས་རྟགས་ཀྱི་རིན་ཐང་དང་ཆེ་མཐོང་སྔར་ལྷག་གོང་མཐོར་སོང་བ་དང་ཆབས་ཅིག བོད་ཀྱི་བདེན་པའི་གནད་དོན་ལ་རྒྱལ་སྤྱིའི་ནང་གོ་རྟོགས་དང་དོ་སྣང་ཇེ་ཆེར་འགྲོ་རྒྱུར་ཕན་ཐོགས་ཆེན་པོ་བྱུང་ཡོད། དེ་ནི་འཚེ་བ་མེད་པའི་ཐབས་ཇུས་ལ་ཡིད་ཆེས་སྤེལ་བའི་སྐུལ་འདེད་དང་བོད་མིའི་བདེན་དོན་ངོས་འཛིན་གྱི་མཚོན་རྟགས་རྨད་དུ་བྱུང་བ་ཞིག་ཏུ་གྱུར་བ་ཡིན་པས། ང་ཚོས་དགའ་གུས་ངང་རྗེས་དྲན་ཞུ་བ་དང་བསྟུན། གོ་སྐབས་འདི་བརྒྱུད་གཞིས་བྱེས་བོད་མི་ཚང་མས་ལྷག་བསམ་རྣམ་དག་གིས་འཚེ་མེད་ཞི་བའི་ལམ་ལ་རྒྱུ་མཚན་ཤེས་པའི་ངེད་པ་རྙེད་ཐོག ཡིད་ཆེས་དང་དམ་བཅའ་བསྐྱར་ནན་ཞིག་འཇོག་ཐུབ་ན་དུས་དྲན་སྲུང་གཙི་ཚད་ལྡན་ཞིང་ཡོང་རྒྱུ་ཡིན་ཞེས་དང་།

ཡང་། ད་རེས་ང་ཚོས་དགའ་སྤོབས་བྱ་འོས་པའི་གནད་དོན་ཞིག་ནི། འདི་ལོའི་ནོ་བྷེལ་ཞི་བདེའི་གཟེངས་རྟགས་ད་ལྟ་རྒྱ་ནག་གི་བཙོན་ཁང་དུ་ཡོད་པའི་མང་གཙོ་དང་རང་དབང་དོན་གཉེར་བ་སྐུ་ཞབས་ལིག་ཞོ་པོ་ལ་ཕུལ་བ་དེ་ཡིན་སྟབས། གཞིས་བྱེས་བོད་མི་ཡོངས་ཀྱི་ངོས་ནས་ཁོང་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། ནོ་བྷེལ་གཟེངས་རྟགས་ཚོགས་ཆུང་གིས་རྒྱ་ནག་གི་གནོན་ཤུགས་ལ་མགོ་མ་བསྒུར་བར་རང་དབང་གི་སྒོ་ནས་དྲང་བདེན་གྱི་ཐག་གཅོད་གནང་བར་བསྔགས་བརྗོད་ཞུ་རྒྱུ། དེ་བཞིན་སྐུ་ཞབས་ལིག་ཞོ་པོ་བཙོན་གྲོལ་ཐོབ་མེད་པར་མ་ཟད། ཁོང་གི་སྐུ་ཟླ་ཡང་དོ་དམ་གྱི་འོག་ཏུ་བཞག་ཡོད་པ་སོགས་རྒྱ་ནག་དབང་འཛིན་པའི་མ་རབས་ཐ་ཤལ་གྱི་བྱ་སྤྱོད་ལ་བློ་ཕམ་དང་བཅས་སྐྱོན་བརྗོད་ནན་པོ་བྱེད་རྒྱུ་ཡིན། ཞེས་དང་།

རྒྱ་ནག་གི་སྐད་གཉིས་སློབ་གསོའི་སྲིད་ཇུས་གསར་བའི་སྐོར་གསལ་དོན། ཉེ་བའི་ཆར་བོད་ཀྱི་ས་ཁུལ་མང་བོར་རྒྱ་གཞུང་གི་དབང་འཛིན་པས་སློབ་གྲྭ་ཁག་ཏུ་སློབ་སྦྱོང་གི་སྐད་ཡིག་བོད་སྐད་ཀྱི་ཚབ་ཏུ་རྒྱ་སྐད་འཇོག་དགོས་པའི་བསྒྲགས་གཏམ་སྤེལ་བ་ནི། བོད་མིའི་ཐུན་མིན་གྱི་ངོས་འཛིན་རྩ་བརླག་གཏོང་རྒྱུའི་གཞི་རྒྱ་ཆེ་བའི་ངན་ཇུས་ཤིག་ཡིན་པ་དང་། དེ་ནི་མར་ཁེ་སི་དང་ལེ་ཉིན། མའོ་སོགས་ཀྱིས་གྲངས་ཉུང་མི་རིགས་ལ་འཛིན་པའི་ལྟ་གྲུབ་དང་ཡོངས་སུ་འགལ་བ་མ་ཟད། མི་རིགས་ཀྱི་ལེགས་བྱང་སྡེབ་གསོད་བྱེད་པའི་ཐབས་ཇུས་ནུས་ཤུགས་ཆེ་ལ་མངོན་གསལ་དོད་པ་ཞིག་ཡིན་པ་དེར་ང་ཚོས་མཐའ་གཅིག་ཏུ་ངོ་རྒོལ་དང་། སྐྱོན་བརྗོད་ནན་པོ་བྱེད་རྒྱུ་ཡིན། དེ་བཞིན་བོད་ཀྱི་ས་ཁུལ་མང་བོར་རང་སྐད་སྲུང་སྐྱོབ་སླད་ཞི་འཇམ་ཁྲིམས་མཐུན་གྱི་སྒོ་ནས་མངོན་འདོད་རེ་སྐུལ་གནང་བཞིན་པའི་དགེ་རྒན་དང་སློབ་ཕྲུག མང་ཚོགས་བཅས་ལ་བྱེས་འབྱོར་བོད་མི་ཡོངས་ཀྱིས་གདུང་སེམས་མཉམ་སྐྱེད་དང་སེམས་ཤུགས་ཀྱི་རྒྱབ་སྐྱོར་ཞུ་རྒྱུ་ཡིན་ཞེས་འཁོད་འདུག  

ཡང་གསུང་འཕྲིན་དེའི་ནང་༧གོང་ས་མཆོག་ལ་བགྲེས་ཡོལ་དུ་ཕེབས་འདུན་ཡོད་སྐོར་ནམ་ཡང་མི་གསུང་རྒྱུའི་གསོལ་འདེབས་ཞུས་དོན། ད་རེས་ཀྱི་གོ་སྐབས་འདི་བཟུང་སྟེ། བཀའ་ཤག་ཐུན་མོང་གིས་གཞིས་བྱེས་བོད་མི་ཡོངས་ཀྱི་ངོས་ནས་༧གོང་ས་མཆོག་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྔར་བཞིན་རྒྱུན་འཁྱོངས་གནང་རྒྱུ་ལས་བགྲེས་ཡོལ་དང་། ཕྱེད་བགྲེས་ཡོལ་སོགས་ཀྱི་དགོངས་བཞེས་དང་། བཀའ་གསུང་རིགས་ནམ་ཡང་མི་ཡོང་བ་ཞེས་སྙིང་ཁུངས་རུས་པའི་གཏིང་ནས་གསོལ་བ་ཕུར་ཚུགས་སུ་འདེབས་པ་དང་ཆབས་ཅིག མང་ཚོགས་ལའང་སྤྱི་མཐུན་བསོད་ནམས་གོང་མཐོར་སྤེལ་ཐབས་དང་། བོད་མིའི་བཟང་སྤྱོད་ཉམས་མེད་རྒྱུན་འཛིན་གྱི་སྒོ་ནས་རྒྱལ་བ་དགྱེས་པའི་མཆོད་སྤྲིན་དུ་འགྲོ་བ་ཞིག་ངེས་པར་གནང་དགོས་པའི་རེ་སྐུལ་ནན་པོ་ཞུ་རྒྱུ་ཡིན། ཞེས་བསྟན་འདུག  

དེ་བཞིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་མི་མང་སྤྱི་འཐུས་ཀྱི་གསུང་འཕྲིན་སྒྲོག་སྦྱོང་གནང་བའི་ནང་། ༧གོང་ས་མཆོག་ལ་ནོ་བྷེལ་ཞི་བདེའི་གཟེགས་རྟགས་ཕལ་ཏེ་མི་ལོ་ཧྲིལ་བོ་ ༢༡ འཁོར་བར་བཀའ་དྲིན་རྗེས་དྲན་ཞུས་པ་དང་སྦྲགས། ཁོང་གིས་ད་བར་བོད་རྒྱལ་ཁབ་ཆེན་པོའི་དབུ་ཁྲིད་དང་། བོད་གཞུང་གི་དབུ་ཁྲིད་ཀྱི་ཐུགས་འགན་རྐང་བཞེས་མཛད་པར་བོད་གཞིས་བྱེས་གཉིས་ཀྱི་ཚབ་ཞུས་ཏེ་བཀའ་དྲིན་བླ་མེད་དུ་ཆེ་ཞུས་པ་དང་། ཁོང་བགྲེས་ཡོལ་དུ་ཕེབས་འདུན་ཡོད་སྐོར་བཀའ་སློབ་བསྩལ་བ་དེས་གཞིས་བྱེས་བོད་མི་ཡོངས་ལ་ཟས་བཅུད་གཉིད་བྲལ་གྱི་བློ་འཚབ་ཧ་ཅང་ཆེན་པོ་ཡོང་བཞིན་པར་བརྟེན། དེ་འདྲའི་དགོངས་བཞེས་ནམ་ཡང་མི་མཛད་པའི་གསོལ་བ་ཕུར་ཚུགས་སུ་འདེབས་རྒྱུ་ཡིན། ཞེས་བཀོད་འདུག  

ཡང་བོད་མི་མང་སྤྱི་འཐུས་ཀྱི་གསུང་འཕྲིན་དུའང་ཐེངས་འདིར་སྐུ་ཞབས་ལིག་ཞོ་པོ་ལ་ནོ་བྷེལ་ཞི་བདེའི་གཟེངས་རྟགས་ཐོབ་པ་ནི། རྒྱ་ནག་ནང་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ཀྱི་ལེའུ་གསར་པ་ཞིག་ཕྱེས་པ་མཚོན་སྟབས། སྐུ་ཞབས་ལིག་ཞོ་པོ་ལགས་གཙོས་ཞི་བདེར་དགའ་བའི་རྒྱ་ནག་རྒྱ་ཆེའི་མི་མང་རྣམ་པར་དགའ་བསུ་དང་བཅས་བཀྲ་ཤིས་བདེ་ལེགས་ཀྱི་འཚམས་འདྲི་ཞུས་པར་མ་ཟད། ནོ་བྷེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཨང་སན་ས་ཀེ་མཆོག་འབར་མའི་གཞུང་གིས་ཉེ་སྔོན་ཆ་རྐྱེན་གང་ཡང་མེད་པར་ཀློད་གྲོལ་བཏང་བར་དགའ་བསུ་ཞུས་ཡོད།

གསུང་འཕྲིན་ནང་མུ་མཐུད་བཀོད་དོན། ཉེ་ཆར་རྒྱ་ནག་དབུས་ས་གཉིས་ཀྱི་གཞུང་གིས་བོད་ནང་བོད་ཀྱི་སྐད་ཡིག་སློབ་སྦྱོང་དང་བཀོལ་སྤྱོད་ལ་དམ་དྲག་ཆེ་རུ་བཏང་བའི་སྲིད་ཇུས་གཏན་འབེབས་བྱས་པ་དེ་ནི་འགྲོ་བ་མིའི་ཐོབ་ཐང་སྤྱི་དང་། བྱེ་བྲག་རྒྱ་ནག་མགོ་ཁྲིད་ཚོས་རང་གི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་བཅས་ལ་མངོན་སུམ་འཛེམ་མེད་ཀྱིས་རྡོག་རོལ་བཏང་བ་ཞིག་ཡིན་པ་དང་། ད་དུང་རྒྱ་ནག་ཆོས་ལུགས་ལས་དོན་ལྷན་ཁང་གིས་གཏན་ལ་ཕབ་པ་ཟེར་བའི་བོད་བརྒྱུད་ནང་བསྟན་གྱི་དགོན་སྡེར་དོ་དམ་བྱེད་ཐབས་སྐོར་གྱི་ཡིག་ཨང་ ༨ གཏན་འབེབས་བྱས་པ་ནི། རྒྱ་ནག་ཆོས་མེད་སྲིད་གཞུང་གིས་བཀོད་ཇུས་ཚོད་འཛིན་འོག ཆོས་ལུགས་ལ་དམ་བསྒྲགས་བྱ་ཐབས་ཤིག་ཡིན་པར་བརྟེན། བོད་མི་མང་སྤྱི་འཐུས་ལྷན་ཚོགས་ཀྱི་ཡིག་ཆ་དེར་ནམ་ཡང་ངོས་ལེན་བྱ་ཐབས་མེད་པའི་ནན་བཤད་བྱ་རྒྱུ་ཡིན། ཞེས་སོགས་བཀོད་འདུག  

ཉིན་དེར་རྣམ་རྒྱལ་གྲྭ་ཚང་གི་ཤེས་ཡོན་ལྷན་ཚོགས་ཀྱིས་དཔར་སྐྲུན་གནང་བའི་༧གོང་ས་མཆོག་གིས་ ༡༩༧༨ ནས་ ༢༠༡༠ བར་དུ་དོལ་རྒྱལ་སྐོར་ལ་ལམ་སྟོན་བཀའ་སློབ་ཕྱོགས་བསྒྲིགས་དེབ་ཕྲང་གཉིས་དང་། ཐར་ལམ་གསལ་བའི་སྒྲོན་མེ། ལམ་སྟོན་བཀའ་སློབ་ཕྱོགས་བསྡུས་ཞེས་པ་སོགས་དཔེ་དེབ་ཁག་ཅིག་དབུ་འབྱེད་གནང་ཡོད་ལ། མཛད་སྒོའི་སྟེང་ཐང་སྟོང་གླུ་གར་ཚོགས་པ་དང་གྷོ་པལ་པུར་བོད་ཁྱིམ། ཡོངས་གླིང་སྔོན་འགྲོ་སློབ་གྲྭ། ངྷ་སྟེང་བོད་ཁྱིམ་དང་གངས་སྐྱིད་ཉིན་སློབ་སོགས་སློབ་གྲྭ་ཁག་ཅིག་གིས་གཞས་སྣ་འཁྲབ་སྟོན་ཡང་གནང་ཡོད།

གསར་འགོད་པ། ཨ་རིག་འགྱུར་མེད།