དེ་རིང་སྲིད་བློན་ཝུན་ཅཱ་པའོ་ལྡི་ལིར་བསླེབས་འདུག

དེ་རིང་རྒྱ་ནག་གི་སྲིད་བློན་ཝུན་ཅཱ་པའོ་རྒྱ་གར་ལ་རྒྱལ་དོན་འཚམས་གཟིགས་སུ་འབྱོར་ཡོད་ལ། ད་ཐེངས་ས་མཚམས་གནད་དོན་གྱིས་གཙོས་པའི་རྒྱ་དཀར་ནག་བར་ཨ་སྒོར་དུང་ཕྱུར་ ༢༠༠ ཙམ་གྱིས་ཚོང་འབྲེལ་བྱ་རྒྱུ་ཡིན་འདུག་ཅིང་། ཁྱོན་ད་ལོ་རྒྱལ་ཁབ་འདི་གཉིས་བར་ཨ་སྒོར་དུང་ཕྱུར་ ༦༠༠ ཙམ་གྱི་ཚོང་འབྲེལ་བྱས་ཡོད།

རྒྱ་གར་དང་པ་ཀི་སི་ཐན་སྲིད་བློན་གཉིས་ཀྱིས་མགྲོན་བརྡ་བཏང་བ་བཞིན། རྒྱ་ནག་སྲིད་བློན་ཝུན་ཅཱ་པའོ་ཡིས་ཡུལ་དེ་གཉིས་ནང་ཉིན་ ༥ རིང་གི་གཞུང་འབྲེལ་ལྟ་སྐོར་མགོ་འཛུགས་བྱས་ཡོད་པ་དང་།  རྒྱ་གར་མཐོ་རིམ་དཔོན་རིགས་ཁག་གི་ཕེབས་བསུའི་འོག་དེ་རིང་ཕྱི་ཚེས་ ༡༥ ཉིན་རྒྱ་ནག་སྲིད་བློན་ཝུན་ཅཱ་པའོ་གཙོས་པའི་རྒྱ་རིགས་ཚོང་ལས་གནད་ཡོད་མི་སྣ་ ༤༠༠ ཙམ་རྒྱ་གར་རྒྱལ་ས་ལྡི་ལིར་འབྱོར་རྒྱུ་ཡིན་འདུག་ལ། ཐེངས་འདིའི་ཚོགས་འདུའི་ཐོག་ཕྱོགས་གཉིས་ཀྱི་ཚོང་འབྲེལ་ཡར་རྒྱས་དང་མཉམ་ལས་རྒྱ་བསྐྱེད། རྒྱལ་སྤྱི་དང་ས་མཚམས་རྩོད་རྙོག་བཅས་ཀྱི་ཐད་གྲོས་བསྡུར་བྱ་རྒྱུ་ཡིན་པ་མ་ཟད། གྲོས་ཆོད་ཁག་ཅིག་གི་ཐོག་མིང་རྟགས་ཀྱང་འགོད་འཆར་ཡོད་འདུག 

ཐེངས་འདིར་ཝུན་རྒྱ་གར་ནང་གཟིགས་སྐོར་དུ་འབྱོར་བ་དང་བསྟུན་ཏེ། བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཁ་སང་ཕྱི་ཚེས་ ༡༤ ཉིན་རྒྱལ་ས་ལྡི་ལིའི་སྲིད་འཛིན་ལས་ཁུངས་རཱ་ཤི་ཊི་རཱ་པ་ཊི་བྷ་ཝན་  Rashtrapati Bhawan མདུན་ཐང་དུ། གཞོན་ནུའི་ཚོགས་གཙོ་ཚེ་དབང་རིག་འཛིན་གཙོས་པའི་བོད་མི་ཁག་ཅིག་གིས་ཝུན་ཅཱ་པའོ་ལ་ངོ་རྒོལ་ལས་འགུལ་ཤུགས་ཆེན་སྤེལ་ཡོད་འདུག་ལ། དེ་རིང་སྔ་དྲོའི་ཆུ་ཚོད་ ༡༠།༣༠ ཐོག་བོད་མི་མང་པོ་ཞིག་ལྡི་ལིའི་ཇེན་ཊིར མཱ་ཊིར་  Jantar Mantar ས་གནས་སུ་འདུ་འཛོམས་ཐོག ཉིན་གསུམ་རིང་གི་ངོ་རྒོལ་སྐད་འབོད་ཀྱི་ལས་འགུལ་ཤུགས་ཆེན་སྤེལ་བཞིན་ཡོད་པ་དང་། ལས་འགུལ་དེའི་མཇུག་སྡོམ་མཛད་སྒོའི་སྟེང་། རྒྱ་གར་གྲོས་ཚོགས་འཐུས་མི་ཁིར་ཊི་ཨ་ཛུ་ཊི་ Kirti Azad ལགས་དང་། གྲོས་ཚོགས་ཀྱི་བོད་དོན་རྒྱབ་སྐྱོར་བ་ཁག་ཅིག་བཅས་ཆེད་ཕེབས་ཀྱིས་གཏམ་བཤད་སྤེལ་རྒྱུ་རེད།

ལོ་འདིའི་ནང་རྒྱ་གར་སྲིད་འཛིན་དང་ཕྱི་སྲིད་བློན་ཆེན་གཉིས་སྔ་རྗེས་སུ་རྒྱ་ནག་ཏུ་ཕེབས་ཏེ། རྒྱ་དཀར་ནག་གི་ས་མཚམས་གནད་དོན་གྲོས་མོལ་ཚོགས་འདུ་ཐེངས་ ༡༤ པ་དང་དེ་མིན་གྱི་གནད་དོན་ཁག་ཅིག་ཐོག་གྲོས་བསྡུར་བྱས་ཡོད་ལ། དེ་བཞིན། འདི་ལོའི་ཕྱི་ཟླ་ ༡༠ པའི་ནང་རྒྱ་ནག་ཆབ་སྲིད་སྡེ་ཚན་གྱི་རྒྱུན་ལས་ཀྲུག་ཡུན་ཁཱང་རྒྱ་གར་ལ་རྒྱལ་དོན་འཚམ་གཟིགས་སུ་བཅར་ཏེ་གྲོས་མོལ་བྱས་ཡོད། དེ་རིང་ཕྱི་ཚེས་ ༡༥ ཉིན་སྲིད་བློན་ཝུན་ཅཱ་པའོ་ལྡི་ལིར་འཚོགས་བཞིན་པའི་རྒྱ་དཀར་ནག་གི་འབྲེལ་བ་བཙུགས་ཏེ། ལོ་  ༦༠ འཁོར་བའི་དུས་དྲན་མཛད་སྒོའི་སྟེང་ཞུགས་རྒྱུ་ཡིན་པ་རེད།

འདི་ནི་ཕྱི་ལོ་ ༢༠༠༥ ལོའི་རྗེས་རྒྱ་ནག་སྲིད་བློན་ཝུན་ཅཱ་པའོ་རྒྱ་གར་དུ་ལྟ་སྐོར་བྱས་པ་ཐོག་མ་ཆགས་ཡོད་ཅིང་། ཐེངས་འདིར་རྒྱ་དཀར་ནག་གཉིས་བར་ཨ་སྒོར་དུང་ཕྱུར་ ༢༠༠ ཙམ་གྱི་ཚོང་དོན་མཉམ་ལས་བྱ་འཆར་ཡོད་འདུག་ལ། ཁྱོན་བསྡོམས་ ༢༠༡༠ ལོར་རྒྱ་དཀར་ནག་གཉིས་བར་ཨ་སྒོར་དུང་ཕྱུར་ ༦༠༠ ཙམ་གྱི་ཚོང་འབྲེལ་བྱས་ཡོད་ཅིང་། དེ་ནི་ཨ་རྒྱ་གཉིས་ཀྱི་ཚོང་འབྲེལ་ལས་ལྡབ་གཅིག་དང་ཕྱེད་ཀའི་མང་བ་ཆགས་ཡོད། ཕྱི་ཚེས་ ༡༧ ཉིན་སྲིད་བློན་ཝུན་གྱི་རྒྱ་གར་གྱི་ལྟ་སྐོར་ཁག་འགྲུབ་རྗེས་པ་ཀི་སི་ཐན་དུ་ཕེབས་ཏེ། ཡུལ་དེའི་མཐོ་རིོམ་མི་སྣར་ཐུག་འཕྲད་དང་ཚོང་དོན་མཉམ་ལས་ཚོགས་འདུར་ཞུགས་རྒྱུ་རེད།

གསར་འགོད་པ། དཔལ་ལྡན།