ཉེ་ཆར་སི་ཨིན་ཨིན་ལྡི་ལིའི་ཡན་ལག་སྡེ་ཚན་གྱི་གསར་འགོད་པས་༧གོང་ས་མཆོག་ལ་བོད་དོན་དང་འབྲེལ་བའི་བཀའ་འདྲི་ཞུས་སྐབས་༧གོང་ས་མཆོག་གིས། ང་རང་གིས་མ་འོངས་པའི་ཟླ་ ༦ ནང་བཀའ་ཤག་དང་གྲོས་ཚོགས་གཉིས་སུ་བཀའ་བསྡུར་བྱས་ཏེ། བོད་ཀྱི་ཆབ་སྲིད་ཀྱི་དབུ་ཁྲིད་ལས་བགྲེས་ཡོལ་གནང་རྒྱུ་ཡིན་ཞེས་གསུངས་རྗེས། བོད་ཕྱི་ནང་གཉིས་སུ་སེམས་འཚབ་དང་གླེང་སློང་ཤུགས་ཆེན་བྱེད་བཞིན་ཡོད།
ཉིན་འདི་འགར་༧གོང་ས་མཆོག་གིས་འབྲས་ལྗོངས་སུ་ཆོས་ཕྱོགས་ཀྱི་མཛད་འཆར་ཁག་སྐྱོང་བཞིན་ཡོད་པ་ལྟར། ཕྱི་ཚེས་ ༡༤ ཉིན་ཀ་སྦུག་ཁུལ་དུ་གསར་འགོད་པས་༧གོང་ས་མཆོག་ལ་བགྲེས་ཡོལ་གྱི་གནད་དོན་དེའི་ཐོག་བཀའ་འདྲི་ཞུས་སྐབས་༧གོང་ས་མཆོག་གིས་བཀའ་ལན་གནང་དོན། ངོས་རང་བོད་མི་ཞིག་དང་ཏཱ་ལའི་བླ་མའི་མིང་ཞིག་ཡོད་པའི་ཆ་ནས། བོད་ཕྱི་ནང་གི་བོད་མི་བརྒྱ་ཆ་ ༩༩ ལྷག་གིས་ང་ལ་ཡིད་ཆེས་བློས་འགེལ་བྱེད་ཀྱི་ཡོད་སྟབས། ངོས་ལ་ཁོང་ཚོར་ཞབས་འདེགས་བསྒྲུབ་རྒྱུའི་བཟང་སྤྱོད་ཀྱི་འགན་འཁུར་ཡོད། ངས་སྔོན་མ་ནས་ཕྱེད་རྒན་ཡོལ་ཡིན་ཟེར་གྱི་ཡོད་ལ། ད་ཆར་རྒན་ཡོལ་ཆ་ཚང་ཞུ་རྒྱུ་ཡིན་ཟེར་བ་དེ་ངོས་ནས་བོད་མིའི་འཐབ་རྩོད་བརྗེད་སོང་བ་དེ་འདྲ་མ་རེད། ངོས་རང་བོད་མི་ཞིག་ཡིན་དུས་བོད་པ་ཚོར་མི་རེ་ངོ་རེར་བོད་དོན་འཐབ་རྩོད་ཀྱི་ལས་འགན་རེ་ཡོད། ཅེས་དང་།
ཡང་༧གོང་ས་མཆོག་གིས་མུ་མཐུད་དོན། གཞིས་ལུས་བོད་མི་ཚོའི་ཁྲོད། ངོས་རང་གིས་རྒན་ཡོལ་ཆ་ཚང་བྱ་རྒྱུ་དེར་སེམས་ཁུར་དང་ཟིང་ཆ་ཡོང་གི་ཡོད་ཚོད་འདུག རིགས་ཁ་ཤས་ཀྱིས་༧གོང་ས་མཆོག་བོད་མིའི་འཐབ་རྩོད་ལ་དགའ་སྣང་ཡལ་བ་རེད་ཟེར་མཁན་ཡང་ཡོད་ས་རེད། དེ་འདྲ་རྩ་བ་ནས་མ་རེད། ངོས་ལ་ལས་འགན་གསུམ་ཡོད་པ་ལས་གཅིག་བོད་ཀྱི་གནད་དོན་སེལ་རྒྱུ་དེ་ཡིན་པས་དེར་མུ་མཐུད་ཤུགས་རྒྱག་གི་རེད། ཡིན་ནའང་། གཞུང་འབྲེལ་ཡིག་ཆ་ཁག་ལ་ས་ཡིག་རྒྱག་དགོས་པ་སོགས་མི་མང་གིས་འོས་འདེམས་བྱས་པའི་བོད་མིའི་དབུ་ཁྲིད་དེར་རྩིས་སྤྲོད་རྒྱུ་ཡིན། ཅེས་དང་།
མཐར་མར་༧གོང་ས་མཆོག་གིས། ང་རང་བྱིས་པའི་གནས་སྐབས་སུ་མང་གཙོའི་ལམ་ལུགས་སུ་ཧ་ཅང་མོས་པ་ཡོད། ཕྱི་ལོ་ ༡༩༥༢ ལོར་ངོས་ནས་བོད་ནང་གི་སྒྲིག་འཛུགས་ལ་འགྱུར་བ་གཏོང་ཐབས་བྱས་ཀྱང་ལམ་ལྷོང་མ་བྱུང་བ་རེད། ༡༩༥༩ ལོར་བཙན་བྱོལ་དུ་འབྱོར་མཚམས་སྒྲིག་འཛུགས་ལ་འགྱུར་བ་གཏོང་ཐུབ་བྱུང་ཡོད་པ་མ་ཟད། ༢༠༠༡ ལོ་ནས་བཟུང་ཆབ་སྲིད་ཀྱི་དབུ་ཁྲིད་མང་ཚོགས་ནས་ཐད་ཀར་འོས་འདེམས་གནང་ཐུབ་ཡོད། དེའི་སྟབས་ཀྱིས་ངོས་ནས་ནམ་རྒྱུན་མང་ཚོགས་ཀྱི་བདམས་པའི་དབུ་ཁྲིད་ཀྱིས་ཏཱ་ལའི་བླ་མ་མེད་པ་ལྟར། འགན་ཆ་ཚང་ཞིག་ཁྱེར་ཏེ་ལས་ཀ་བྱ་ཐུབ་དགོས་ཞེས་ལབ་བསྡད་ཡོད། ཁྱེད་ཚོ་གསར་འགོད་པ་ཚོས་ཀྱང་རྒྱབ་མདུན་ཀྱིས་གནས་ཚུལ་ཚང་མ་ཤེས་རྟོགས་ཡོང་བ་བྱས་ཏེ། ཕྱི་གསལ་ནང་གསལ་བཟོ་རྒྱུ་ཧ་ཅང་གལ་ཆེན་རེད། ཅེས་བཀའ་ལན་གནང་འདུག
གསར་འགོད་པ། དཔལ་ལྡན།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
བརྒྱ་ཆའི་བརྒྱ་ཐམ་པའི་རྒྱབ་བསྐྱོར་ཞུ་རྒྱུ་ཡིན་ལ། ང་རང་བོད་པ་ཞིག་ཡིན་པའི་རང་ངོས་ནས་གོང་ས་མཆོག་ལ་རྒན་ཡོལ་གྱི་དགོངས་པའང་སྤྲོད་ཀྱི་ཡིན། འདི་ནི་ཡེ་ཤེས་དབྱིངས་དཔྱད་རེད་ལ། ཡེ་ཤེས་དབྱིངས་དཔྱད་ཀྱི་ཐོབ་ཐང་ཁོང་ལ་ཕུལ་ཟིན་པས་ཀྱང་ཡིན།
འདི་ཕྱིའི་སྐྱབས་གནས་དམ་པར་བཀའ་དྲིན་གུས་ཕྱག་གྲངས་མེད་ཞུས། ད་ནི་ང་ཚོ་བོད་མི་རྣམས་ནས་༸གོང་ས་མཆོག་གིས་གསུང་དྲོན་མོ་རྣམས་སྣང་མེད་དུ་མ་བཞག་པར་གཅིག་ཏུ་རིག་པ་བསྒྲིམས་ནས་བགྲོ་བསྡུར་ཟབ་ནན་བྱ་དགོས་པའི་དུས་ཚོད་ཛ་དྲག་ཏུ་སླེབས་ནས་འདུག ༸རྒྱལ་བ་དོན་གྱི་བདག་པོས་བོད་མིའི་རྩ་དོན་གྱི་ཐུགས་འཁུར་དུས་ནམ་ཡང་བཤོལ་མི་སྲིད། དེས་ན། ང་ཚོས་ད་ནི་༸གོང་ས་མཆོག་གི་ཐུགས་དགོངས་ལ་ཡིད་ཆེས་དང་། རྒྱ་མིས་རྒྱལ་བའི་འཆི་བསྒུག་ལ་ཡ་ལན་གསལ་པོ་ཞིག་སྟེར་ཆེད། ང་ཚོས་སང་ཉིན་གྱི་མི་རབས་གསར་པའི་བཀའ་ཤག་གསར་པ་ནས་འགོ་འཛུགས་ཀྱིས་རྒྱལ་བའི་ལམ་སྟོན་ཟབ་མོའི་འོག རང་སྲིད་རང་གིས་སྐྱོང་ཐུབ་ངེས་ཡིན་པའི་ཡིད་ཆེས་གསར་པ་ཞིག་འཛམ་གླིང་མི་མང་གི་མདུན་དུ་འབོར་དགོས་པ་ལས། ད་དུང་ཐམས་ཅད་༸གོང་ས་མཆོག་ལ་ཕུལ་ནས་བསྡད་ན་མི་འགྲིགས་པར་སེམས།