དགེ་འདུན་པ་ཞིག་ལ་ཁྲིམས་ཆད།

ཉེ་ལམ་རྒྱ་གཞུང་གིས་ཀན་ལྷོ་ཁུལ་ཝ་དམར་ཞང་བྲག་དཀར་དགོན་པའི་གྲྭ་འཇིགས་མེད་རྒྱ་མཚོ་ལགས་སུ། རྒྱལ་ཁབ་ཁ་བྲལ་གཏོང་མཁན་གྱི་ཉེས་མིང་འོག་ལོ་ ༤ ཡི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག དེ་ནི་ ༢༠༠༨ ལོའི་བོད་ནང་གི་ཞི་རྒོལ་རྗེས་སུ་རྒྱ་གཞུང་གིས་མདོ་སྨད་ཀན་ལྷོ་བོད་རིགས་རང་སྐྱོང་ཁུལ་བྲག་དཀར་དགོན་པའི་དགེ་འདུན་པ་ ༣༠ ལྷག་དགོན་པའི་ནང་སྤྱར་ཡིག་བཀྲམས་པ་དང་ངོ་རྒོལ་སྐད་འབོད་བྱས་པའི་ཉེས་མིང་འོག་འཛིན་བཟུང་བྱས་ཏེ། རྒྱ་སྒོར་ ༢༠༠༠ ལྷག་གི་ཉེས་ཆད་བཅད་དེ་ཀློད་གྲོལ་བཏང་ཡོད་ཀྱང་། གྲྭ་འཇིགས་མེད་རྒྱ་མཚོ་མུ་མཐུད་བཀག་ཉར་བྱས་ཡོད་འདུག

འབྲེལ་ཡོད་མི་སྣས་བརྗོད་དོན་ལྟར་ན། གྲྭ་འཇིགས་མེད་རྒྱ་མཚོ་ལགས་ལ་ཐེངས་འདིར་ལོ་བཞི་ཡི་ཁྲིམས་ཐག་གཅོད་དོན་ནི། རྒྱ་གཞུང་གིས་སྤྱར་ཡིག་བཀྲམས་པ་དང་ངོ་རྒོལ་གྱི་སྣེ་འཁྲིད་པ་སུ་རྩད་གཅོད་བྱས་ཏེ། བྲག་དཀར་དགོན་པའི་དགེ་འདུན་པ་ཚོར་སུན་གཙེར་ཡང་ཡང་བཟོ་བཞིན་པར་སེམས་ཀྱིས་མ་གཟོད་པར། སྦྱར་ཡིག་བཀྲམས་མཁན་དང་ངོ་རྒོལ་སྣེ་ཁྲིད་པ་ཁོ་རང་ཡིན་ཚུལ་ངོས་ལེན་བྱས་ཡོད་སྟབས། ཐེངས་འདིར་ལོ་བཞི་ཡི་བཙོན་འཇུག་ཁྲིམས་ཐག་བཅད་དེ། ད་ཆར་རྒྱ་ནག་ལན་ཀྲུའུ་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་འདུག  

གསར་འགོད་པ། དོན་གོ