བོད་ཡིག་གི་བརྡ་དག་རོལ་རྩེད།

བོད་ནང་གི་དྲ་ཚིགས་ཁག་ཅིག་ཏུ་གནས་ཚུལ་སྤེལ་བ་ལྟར་ན། ཉེ་ཆར་བོད་ནང་གི་བོད་མི་རྫོང་ཁ་ཡོན་ཏན་དོན་གྲུབ་ཟེར་བ་ཞིག་གིས་བོད་ཡིག་གི་དབྱངས་གསལ་ལས་གྲུབ་ཅིང་། བོད་ཡིག་གི་བརྡ་སྤྲོད་སློབ་སྦྱོང་ལ་ཕན་པའི་རོལ་རྩེད་རྣམ་པ་ཅན་གྱི་བོད་ཡིག་གི་ཤོག་ཤོ་བརྡ་དག་གི་དཔར་གཞི་ཞིག་བསྒྲིགས་ཡོད་འདུག་ལ། མི་རིང་བར་བོད་པའི་སྤྱི་ཚོགས་ཁྲོད་འགྲེམས་སྤེལ་བྱ་འཆར་ཡོད་འདུག

ཁོང་གིས་གསར་གཏོད་བྱས་པའི་ཤོག་ཤོ་རོལ་རྩེད་དེའི་ནང་། བོད་ཀྱི་ཡི་གེའི་སྲོག་དང་རྐྱེན། ཕ། མ། བུ་ཚའི་ཡི་གེ་ཞེས་སྡེ་ཚན་ལྔར་བསྡུས་ཡོད་ཅིང་། རོལ་རྩེད་འདིའི་དགོས་དབང་དང་བསྟུན་ཏེ་སྲོག་ཡིག་ལྔའི་ཚེག་དང་། རྐྱེན་གྱི་ཡི་གེ་དབུ་ཁྱུད། ཕུར་ཤད། སྦྲུལ་ཤད། རིན་ཆེན་སྤུངས་ཤད་བཅས་བསྡུས་མེད་ཀྱང་། དེ་མིན་གྱི་གསལ་བྱེད་སུམ་ཅུ། སྔོན་རྗེས་བཅོ་ལྔ། ཡང་འཇུག་གཉིས། གུག་ཀྱེད་བརྩེགས་འདོགས་ཀྱི་ཡི་གེ་བཅུ་གཅིག་བཅས་ཁྱོན་ཡི་གེ་ང་བརྒྱད་ཆ་ཚང་བ་བཀོད་ཡོད་པར་མ་ཟད། རྩེད་མོ་འདི་ཕོ་ཡིག་དང་མ་ནིང་གི་ཡི་གེ མོ་ཡིག ཤིན་ཏུ་མོའི་ཡི་གེ་བཅས་ཚན་པ་བཞིར་དབྱེ་སྟེ། དེ་དག་སོ་སོར་ཁ་དོག་མི་འདྲ་བ་བཞིས་མཚོན་པར་བྱས་ཡོད་འདུག་ལ། འཛམ་གླིང་ནང་རྒྱ་ཁྱབ་ཏུ་སྤྱོད་བཞིན་པའི་ཤོག་ཤོ་དང་གཅིག་མཚུངས་ཀྱི་རྩེ་སྟངས་ཐད་ཁག་གསུམ་ཙམ་ལས་གཞན་རྩེ་སྟངས་འདྲ་མིན་སྣ་ཚོགས་ཀྱི་ལམ་ནས་རྩེ་ཆོག་གི་ཡོད་འདུག

ཤོག་ཤོ་རོལ་རྩེད་འདི་གསར་གཏོད་ཀྱི་དམིགས་ཡུལ་གཙོ་བོ། བོད་ཡིག་འདི་ཉིད་འཛམ་གླིང་གི་སྔོན་ཐོན་འཕྲུལ་རིག་གི་སྟེང་དུ་གོམ་པ་སྤོས་ཏེ་བཀོལ་སྤྱོད་ཀྱི་ནུས་པ་ཆེ་རུ་འགྲོ་བཞིན་ཡོད་ཀྱང་། ད་དུང་རྩེད་རིགས་སོགས་ཀྱི་སྟེང་དུ་བོད་ཡིག་རྒྱུགས་ཆེ་བར་གཏོང་བ་དང་བཀོད་སྤྱོད་ཁྱབ་རྒྱ་ཆེ་རུ་གཏོང་ཆེད་ཡིན་འདུག་ལ། མི་རིང་བར་བོད་ཡིག་གི་ཤོག་ཤོ་བརྡ་དག་རོལ་རྩེད་དེ་སྤྱི་ཚོགས་ནང་པར་འགྲེམས་བྱ་རྒྱུ་ཡིན་འདུག

གསར་འགོད་པ། དོན་གོ