ཁ་སང་ཕྱི་ཚེས་ ༢༠ ཉིན་ཧི་མ་ཅཱལ་མངའ་ཁུལ་སྤོན་ཊ་ས་སྐྱ་བོད་མིའི་གཞིས་ཆགས་ཀྱི་༼ ས་སྐྱ་མ་དགོན་བཤད་གྲྭ་ཐུབ་བསྟན་རྣམ་རྒྱལ་གླིང་ ༽ དུ། མཚན་སྙན་སྲིད་པ་གསུམ་ན་གྲགས་ཆེ་པའི་བོད་སྔ་རབས་པའི་མཁས་པ་ས་སྐྱ་པཎྜི་ཏ་ཀུན་དགའ་རྒྱལ་མཚན་མཆོག་དགོངས་པ་ཆོས་དབྱིངས་སུ་འཐིམ་སྟེ། ལོ་ཡི་བགྲང་བྱ་ཧྲིལ་བོ་ ༧༦༠ ཙམ་འཁོར་བའི་བཀའ་དྲིན་རྗེས་སུ་དྲན་པའི་བྱེད་སྒོ་ཞིག་སྤེལ་ཡོད་འདུག
ཉིན་དེའི་སྔ་དྲོར་བཤད་གྲྭའི་མཁན་རིན་པོ་ཆེ་དབུ་བཞུགས་ཐོག འཇམ་དབྱངས་བླ་མ་མཆོད་པའི་ཆོ་ག་ཚོགས་ཤིང་འཛིན་གྲྭ་གོང་འོག་གི་སློབ་མ་རྣམས་ཀྱིས་ས་པཎ་མཆོག་གི་མཛད་རྣམ་བགྲོ་གླེང་དང་། སོག་ཡུལ་ནས་ཕེབས་པའི་སློབ་གཉེར་བ་ཞིག་གིས་པཎྜི་ཏ་མཆོག་ནས་ཆེན་པོ་ཧོར་གྱི་ཡུལ་དུ་རླབས་ཆེན་གྱི་མཛད་པ་འཕྲིན་ལས་ཇི་ལྟར་བསྐྱངས་པའི་ཚུལ་ངོ་སྤྲོད་གནང་ཞིང་། དེ་དང་མཉམ་དུ་སློབ་གཉེར་བ་རྣམས་ཀྱིས་ས་པཎ་གྱིས་མཛད་པའི་༼ ཚད་མ་རིགས་གཏེར ༽ དམ་འཇོག་གི་རྩོད་འགྲན་གནང་ཡོད་འདུག
ཉིན་དེའི་ཕྱི་དྲོར་དགོན་པའི་ཁོར་ཡུག་ཀུན་དུ་སྣང་གསལ་མར་མེ་དང་གདུག་སྤོས་མེ་ཏོག དཀར་དམར་གློག་སྒྲོན་སོགས་མཆོད་པ་རྒྱ་ཆེན་པོ་དང་ལྷན་དུ་དགེ་འདུན་པ་རྣམས་ཀྱིས་པཎ་ཆེན་གྱི་བསྟོད་པ་ཤེས་བྱ་མ་དང་ཆོས་རྒྱལ་མ་གཉིས་འུར་འདོན་གནང་བ་དང་སྦྲགས་དམ་བཅའ་ཆེན་པོ་དབུ་འཛུགས་གནང་ཡོད་འདུག དུས་དྲན་དེ་ཁ་སང་དེ་རིང་ཉིན་གཉིས་རིང་སྲུང་གཙི་བྱས་ཡོད་འདུག
ལྔ་ཟུང་རིག་གནས་སྦྱོང་བ་ཅུང་ཟད་ཙམ་གྱིས་མངའ་བརྙེས་ཤིང་།།
རིགས་པའི་ཞལ་ལྕེ་འདར་ཙམ་བྱས་པས་མཁས་ཀུན་ཞུམ་པར་བྱེད།།
ཕྱག་ཟུང་སྨྱུ་གུ་འཁྱུག་ཙམ་གསུང་རབ་རི་བོའི་གཏོས་ལ་མཉམ།།
གངས་ཅན་ལྗོངས་སུ་གཉིས་མེད་ས་སྐྱའི་མགོན་ཉིད་ཡང་ཡང་འདུད།།
ས་སྟེང་འདི་ན་ས་སྐྱ་པཎ་ཆེན་གྲགས་ཤིག་པའི་ཚིག་དུམ་འདིར་བསམ་དུས་བོད་གངས་ཅན་གྱི་ལྗོངས་སུ་རྣམ་དཔྱོད་ཆེ་བ་ཁོང་ལས་ལྷག་པ་ཞིག་མེད་པ་ལྟ་བུ་མངོན།
དེ་འདྲའི་རྗེས་དྲན་མཛད་སྒོ་དེ་བྱེ་བྲག་ས་སྐྱ་པ་གཅིག་པུ་མ་ཡིན་པར་བོད་མི་ཡོངས་ནས་སྲུངས་རྩི་བྱེད་དགོས་ངེས་ཞིག་རེད། གང་ཡིན་ཟེར་ན་བོད་རང་ལ་ཆོས་དང་སྲིད་གཉིས་ཀྱི་ཐད་ནས་དཀའ་དྲིན་ཆེན་པོ་ཡིན་ལ་ཕྱི་ཕྱོགས་སུ་ངོམ་རྒྱུ་ཡོད་པ་ཞིག་ཀྱང་ཡིན་
རྗེ་བཙུན་འཇམ་དཔལ་དབྱངས་དང་གཉིས་སུ་མ་མཆིས་པའི་བླ་མ་དམ་པ་ས་སྐྱ་པཎྜིཏ་ཀུན་དགའ་རྒྱལ་མཚན་དཔལ་བཟང་པོ་ལ་སྒོ་གསུམ་གུས་པའི་ཕྱག་འཚལ་ཞིང་སྐྱབས་སུ་མཆིས་སོ།།
ས་པཎ་གྱི་འདས་མཆོད་སྲུང་བརྩི་ཞུ་བ་ནི་ས་སྐྱ་མ་དགོན་ཙམ་མ་ཟད་བོད་ཕྱི་ནང་དུ་ཆགས་པའི་ས་སྐྱ་པའི་བཤད་གྲུབ་མགོན་པ་མཐོ་སློབ་ལྷ་ཁང་གང་སར་བཀའ་དྲིན་རྗེས་དྲན་གྱི་བྱ་གཞག་ཟབ་རྒྱས་ཞུས་ཡོད་པ་གདོན་མི་ཟ། རྗེས་སུ་ཡི་རངས་ཞུ།
ས་སྐྱ་པན་ཆེན་མཆོག་ལ་གུས་པའི་ཐལ་མོ་སྙིང་ཁར་སྦྱར་ཏེ་ཕྱག་གསུམ་འཚལ། གསར་འགྱུར་འདི་བཙན་བྱོལ་ནང་གི་གསར་ལམ་ཁག་གཞན་དུ་ཡང་སྤེལ་འདུག་ཀྱང་། བོད་ཀྱི་དུས་བབ་གསར་འགྱུར་འབྲི་ཐབས་ལ་འགྲན་ཟླ་མེད་འདུག ང་གི་གསར་འགྱུར་འདི་ལ་ཀློག་སྤྲོ་བ་དང་། ཁ་གསལ་བ་དོན་འདུ་བ་སོགས་ཀྱི་ཁྱད་ཡོན་འདུག
དུས་ཆེན་འདི་ལྟ་བུ་རིན་ཐང་ཅན་འདི་མ་དགོན་བཤད་གྲྭར་སྲུང་བརྩི་ཞུ་གནང་བར་སྙིང་ནས་དགའ་བསུ་ཞུ། མ་ཟད་འདི་གར་གསར་འགོད་པར་གནས་ཚུལ་འབུལ་ཐུབ་པ་དེ་ཡང་དགོས་ངེས་ཀྱི་གསར་འགྱུར་ཞིག་རེད་འདུག
མུ་འཐུད་འདི་ལྟར་ཡོང་བའི་རེ་བ་ཡོད། གནས་ཚུལ་གཏང་མཁན་གྱི་མཚན་གསལ་པོ་ཡོད་ན་ད་དུང་དེ་ལས་ཡག་བ་མངོན།
༄༅། གང་ཞིག་གུས་པ་ཆེན་པོས་ཉེར་བསྟེན་ན།
གནས་སྐབས་མཐར་ཐུག་དགོས་འདོད་མ་ལུས་པ།
འབད་རྩོལ་མེད་པར་མྱུར་དུ་སྩོལ་མཛད་པའི།
ཆོས་རྗེ་རིན་པོ་ཆེ་ལ་གསོལ་བ་འདེབས།
གསོལ་བ་འདེབས་སོ་བླ་མ་རིན་པོ་ཆེ།
གསོལ་བ་འདེབས་སོ་རྗེ་བཙུན་ས་སྐྱ་པ།།
ཁ་བ་གངས་ཅན་གྱི་ལྗོངས་འདིར་ཐོན་མི་གཉིས་པ་ལྟར་བཀའ་དྲིན་ལྷག་ཏུ་ཆེ་བའི་གནས་ལྔ་རིག་པའི་སློབ་དཔོན་ཆེ་མོ་བ་ས་པཎ་ཆེན་པོའི་བཀའ་དྲིན་ཏེ་གསོལ་འདེབས་སོགས་ཞུ་དགོས།
ས་སྟེང་འདི་རུ་ཆེས་སྙན་གྲགས་ཆེ་ཞིང་། ཁ་བ་ཅན་པར་ཧ་ཅང་བཀའ་དྲིན་ཆེ་བའི་མཁས་པའི་དཔང་པོ་ས་སྐྱ་པཎ་ཆེན་མཆོག་ལ་གུས་ཕྱག་འཚལ། རྗེས་བཞུགས་པ་རྣམས་ནས་ཁོང་གི་མཁས་པའི་གསུང་དང་། ཕྱག་རྗེས་རྣམས་མ་བརྗེད་པ་ཞིག་དགོས་གལ།
ཤེས་བྱ་ཐམས་ཅད་གཟིགས་པའི་སྤྱན་ཡངས་པ།།
འགྲོ་ཀུན་དགེ་ལེགས་སྒྲུབ་པའི་ཐུགས་རྗེ་ཅན།།
བསམ་ཡས་འཕྲིན་ལས་མཛད་པའི་སྟོབས་མངའ་བ།།
འཇམ་མགོན་བླ་མའི་ཞབས་ལ་གསོལ་བ་འདེབས།།
བཀྲ་ཤིས་བདེ་ལེགས།
ད་རིང་ས་སྐྱ་པའི་མ་དགོན་ཞིག་ནས་འདྲ་གོ་སྒྲིག་གནང་བ་ནི་དགའ་བ་ཆེ།
ཆོས་རྗེ་ཁོང་མཛད་པ་ལ་ལྟོས་བོད་མི་ཡོངས་ནས་གནང་དགོས་པ་མཐོང་གི་འདུག
ས་སྐྱ་པན་ཆེན་བོད་ལ་བཀའ་དྲིན་ཆེ། བཀའ་དྲིན་སྙིང་ནས་དྲན་ཡོད་དྲིན་ཅན་རྗེ།
འཇམ་མགོན་ཙོང་ཁ་པ་ཆེན་པོས།
རིག་གནས་རྒྱ་མཚོའི་ཕ་རོལ་སོན་གྱུར་པས། །
གསུང་རབ་ནོར་བུའི་གླིང་ལ་མངའ་སྒྱུར་ཞིང་། །
སྙན་གྲགས་ཀུན་གྱི་རྣ་བའི་རྒྱན་གྱུར་པས། །
ངོ་མཚར་བསྔགས་པའི་གནས་གྱུར་ས་སྐྱ་པ། །