སྤྱི་འཐུས་ཤིག་གིས་དགོངས་པ་ཞུས།

སྤྱིར་བཏང་བེ་རི་འཇིགས་མེད་ལགས་ཀྱིས་སྤྱི་འཐུས་ནས་དགོངས་ཞུ་གནང་བ་དེར་ཅུང་ཟད་བློ་ཕམ་བྱུང༌། གང་ཡིན་ཟེར་ན། ཁོང་ནི་ཤེས་འཇོན་རྣམ་དཔྱོད་ལྡན་པའི་སྤྱི་འཐུས་ཤིག་རེད། ཁོང་གི་ཚབས་ལ་ཁོང་ལས་ལྷག་པ་ཞིག་སླེབས་ཨེ་ཡོང་། ཕྱོགས་ཞེན་གྱི་དྲི་མ་བྲལ་བའི་ཆོས་བརྒྱུད་སྤྱི་འཐུས་ཤིག་ཕལ་ཆེར་ཁག་ཚོད་ཡིན། གང་ལྟར་ཁོང་ལའང་རྒྱུ་མཚན་སྣ་མང་ཞིག་ཡོད་ངེས་པས་ཁོང་གི་ཐག་གཅོད་ལའང་གུས་བཀུར་ཞུ་རྒྱུ་ཡིན།

སྤྱིར་བཏང་སློབ་སྦྱོང་ཡོད་མཁན་དང་། ནུས་པ་ལྡན་མཁན་རྣམས་ཀྱི་དགོངས་པ་ཞུ་བཞིན་འདུག
དགོངས་པ་ཞུ་དགོས་པ་དེ་ཚོས་དགོངས་པ་ཞུ་རྒྱུ་རྩ་བ་ནས་མི་འདུག
དགོངས་པ་མ་ཞུས་པ་མ་ཟད་ད་དུང་རྐུབ་སྟེགས་སྲ་བརྟན་དུ་གཏོང་གི་ཡོད།
བློ་ཕམ་དགོས་པ་རང་རེད།

སྔོན་ཆད་ཡིན་ན་ཡང་སློབ་སྦྱོང་ཡོད་མཁན་དང༌། འཇོན་ཐང་སོགས་ཕྱོགས་གང་ཅིའི་ཐད་ནས་ཆ་རྐྱེན་ཡོད་ཚད་ཚང་བསྡད་མཁན་དེ་ཚོ་གཞུང་གི་རྐུབ་སྟེགས་སྒང་ལ་བཞུགས་ཡོད་ན།
༸གོང་ས་མཆོག་ལ་ཕན་རོགས་རྒྱ་ཆེན་པོ་ཐོགས་པ་མ་ཟད་ད་དུང་བཤད་དགོས་ས་ཐུག་ན་ཤོད་ཕོད་པ་དང་། རྩོད་དགོས་ས་ཐུག་ན་རྩོད་ནུས་པའི་འཇོན་ཐང་ཅན་གྱི་ལས་བྱེད་དེ་ཚོར་དམའ་འབེབས་དང་འཕྱ་དམོད་གསོན་གང་ཐུབ་བྱས་ཏེ་རྒྱང་ཕུད་བཏང༌། འཇོན་ཐང་གང་ཡང་མེད་པའི་བླུན་པོ་ཨུ་ཚུགས་ཅན་དང་། ཡི་གེའི་མགོ་རྔ་མི་ཤེས་པའི་སྣ་ཐལ་རང་འཐེན་ནས་འདུག་པའི་དཔོན་ངན་དེ་ཚོས་ཅི་བྱེད།

བློ་ཕམ་དགོས་པ་རང་རེད་འདུག
ཁ་བདེ་པོ་རེ་དང་། སེམས་ཤུགས་ཡོད་མདོག་བྱེད་མཁན་ཁ་ཤས་ཀྱི་གཞུང་གི་རྐུབ་སྟེགས་བཙན་བཟུང་བྱས་ནས་བསྡད་ཡོད་ཙང་། སུས་ཀྱང་དེའི་ཁ་གཏད་གཅོག་འདོད་མེད་པར་རྒྱང་དུ་བཀྱེད་པ་ཡིན་རྒྱུ་རེད་བསམ་རྒྱུ་འདུག

སྤྱིར་བཏང་གི་གཞུང་གི་ལས་བྱེད་པ་དེ་ཚོ་ཕལ་ཆེ་བས་ཁ་ནས་བཤད་དུས་བོད་སྤྱི་བ་དང་། ༸གོང་ས་མཆོག་གི་བཀའ་བཞིན་སྒྲུབ་དགོས་པ་ལས། དེ་ལས་ལྡོག་སྟེ་ལས་ངན་ཞིག་སྒྲུབ་ཀ་ཕོད་ཅེས་གཏམ་རྫིག་པོ་རེ་བཤད་དེ་གཞུང་འབྲེལ་ལས་ཁུངས་ཁག་གི་རྐུབ་སྟེགས་ཧམ་བཟུང་བྱས་ནས་ལོ་ངོ་ག་ཙམ་འདས་ཟིན།

ད་དུང་དེ་ཚོས་གཏོང་རྒྱུ་མིན་པ་འདྲ།
བོད་རིགས་གཞོན་སྐྱེ་ཚོར་གོ་རྟོགས་ཡོད་ན་དེ་ཚོ་རྩ་མེད་བཟོ་དགོས་པ་ནི་ཤིན་ཏུ་ལས་ཀྱང་གལ་ཆེན་དུ་མཐོང་གི་འདུག

དེ་ཚོ་རྩ་མེད་མ་བཟོས་པ་ཡིན་ན། ད་དུང་མུ་མཐུད་དེ་ལོ་བརྒྱད་ཅུ་ལོན་ན་འང་ལས་ཁུངས་ཀྱི་རྐུ་སྟེགས་གཏོང་འདོད་ཡོད་ས་མ་རེད། ང་ཚོས་རང་དབང་རྩོད་ཀྱིན་ཡོད་ཙང་།
རང་དབང་གི་ལམ་ཁ་ལ་བུད་དེ་ལོ་ལོན་ཚོ་རྒན་ཡོལ་ཞུས་བཅུགས་ཏེ་གཞོན་སྐྱེས་དར་མ་སྟག་འདྲ་དེ་ཚོར་གཞུང་ལས་ཁང་གི་རྐུབ་སྟེགས་ཀྱི་ས་མིག་སྤྲད་ན་ཅིས་མ་ཆོག

ལས་ཁུང་ལ་རུལ་དྲི་ཁ་ཡང་ད་དུང་ཨུ་ཚུགས་བྱས་ཏེ་འདུག་མཁན་ལོ་འཁྱོལ་བོ་དེ་ཚོས་ཡུན་ལས་ཡོལ་ཞུས་ཏེ་ཕྱི་མིིའི་ལམ་བྲོ་རེ་སྒྲུབ་ན་མི་བཟང་ངམ། ཁ་བཏོན་དགེ་སྦྱོར་ལ་བརྩོན་ནས་ཕྱག་བསྐོར་དང་མཆོད་མཇལ་མཆོད་འབུལ་ལས་བཟང་པོའི་འགོ་འཛུགས་ཞུ་བ་ཡིན་ཚེ་འདི་ཙམ་མ་ཟད་ཕྱི་མིའི་ལམ་ལ་ཡང་ཧ་ཅང་གི་ཕན་པོ་ཡོད་སྙམ།

ད་ེལྟར་མི་གནང་བར་རང་ལྟ་མཆོག་འཛིན་གྱི་ལྟ་གཡག་གི་རྭ་ལྟ་བུ་དེ་ཁུར་ནས་ལས་ཁུང་ཀ་ཀེ་མོ་ཞིག་གི་རྐུབ་སྟེགས་ཧམ་བས་ཉར་པ་ཡིན་ན་ཕན་པ་ཅི་འདུག

དགེ་བཤེས་བི་རི་འཇིགས་མེད་དབང་རྒྱལ་ལགས་ཀྱིས་སླར་ཡང་ཆོལ་ཞེན་གྱི་ཁེངས་པའི་ཕྱག་འབྲེལ་སྐུ་ངོས་ཚོ་རང་འཇག་སླེབས་ཡོད་པ་ཤེས་ཏེ་ སླར་ཡང་རྙོག་དྲའི་གྲོས་ཚོགས་ཅིག་རང་ཡིན་པ་སེམས་ཏེ། དགོངས་པ་ཞུས་པ་ནི་བཟང་སྤྱོད་ཀྱི་གནས་ཚུལ་ཞིག་ཡིན།

བེ་རི་འཇིགས་མེད་དབང་རྒྱལ། ད་ཐངས་རང་འགུལ་གྱིས་དགོངས་ཞུ་བྱས་པར་ཐུགས་རྗེ་ཆེ།

འདི་ཡང་རང་ཚོད་ཟིན་པའི་གནས་ཚུལ་ལེགས་པོ་ཞིག་ཏུ་བསམ་ཆོག མ་འོངས་པའི་མི་རིགས་ཞབས་འདྲེན་དུ་འགྱུར་འདོད་མེད་ཚེ། འདི་ལྟ་བུའི་སློབ་སྦྱོང་བྱ་ཐུབ་པའི་སྤྱི་འཐུས་རྙིང་བ་རེ་ཟུང་ཡོང་བའི་རེ་བ་ཞིག་ཀྱང་ངང་གིས་ཐལ་སོང་།

དངོས་གནས་སྤྱི་འཐུས་སུ་བཞུགས་ནས་སྤྱི་ཚོགས་ཀྱི་རྙོག་དྲའི་ཁ་དུག་ཉོ་བ་ལས་ཁོང་གིས་འདེམས་པ་ལྟར། རྩོམ་པ་པོ་དང་དགེ་རྒན་ལོ་རྒྱུས་ཞིབ་འཇུག་གི་ངོ་བོའི་ཐོག་ནས་ཕྱག་ལས་གནང་ན་ཧ་ཅང་བཟང་གི འདི་ནི་ཁོང་གི་དྲ་གྲོགས་ཤིག་གི་དྲང་ཐད་ནས་བྲིས་པ་ཡིན། གཞན་ཁོང་གི་བསམ་དོན་ལྟར་ལས་དོན་ལེགས་འགྲུབ་ཡོང་བའི་སྨོན་འདུན་ཞུ།