རྫ་སེར་ཤུལ་དགོན་པའི་དགེ་འདུན་པ་ཚོས་སྐད་ཡིག་སྲུང་སྐྱོབ་ཀྱི་ལས་འགུལ་ཞིག་སྤེལ་བ་དེར། རྒྱ་གཞུང་གིས་ཆབ་སྲིད་དང་འབྲེལ་བ་ཡོད་སྐོར་དང་། ཕྱི་ཕྱོགས་ཁ་བྲལ་བའི་བཀོལ་བྱུས་ཡིན་ཚུལ་གྱི་བསྙོན་འཛུགས་བྱས་ཏེ་བཀག་སྡོམ་བྱས་ཡོད་པ་མ་ཟད། འབྱུང་འགྱུར་ཡང་དེ་འདྲའི་ལས་འགུལ་སྤེལ་མི་ཆོག་པའི་བཙན་བཀའ་བཏང་ཡོད་འདུག
ཟླ་འདིའི་ཕྱི་ཚེས་ ༤ ཉིན་འདི་གའི་གསར་འགོད་པས་ཉེ་ཆར་བོད་ནས་གསར་དུ་འབྱོར་ཞིང་། ད་ལྟ་དབུས་སྣེ་ལེན་ཁང་དུ་བཞུགས་ཡོད་པའི་རྫ་སེར་ཤུལ་དགོན་པའི་གྲྭ་ངག་དབང་རབ་གསལ་ལགས་སུ། ས་བྱི་ཞི་རྒོལ་ཆེན་མོའི་སྔ་ཕྱིར་རྫ་སེར་ཤུལ་ས་ཁུལ་དུ་ཆག་འཇིག་གང་འདྲ་བྱུང་ཡོད་མེད་དང་། ཉེ་ལམ་རྫ་སེར་ཤུལ་དགོན་པའི་གྲྭ་མང་ཚོས་མ་བསྐུལ་དང་བླངས་ཐོག བོད་པའི་སྐད་ཡིག་སྲུང་སྐྱོབ་ཀྱི་བྱེད་སྒོ་ཞིག་སྤེལ་བར་རྒྱ་གཞུང་གིས་བཀག་སྡོམ་བྱས་པའི་སྐོར་ལ་བཅར་འདྲི་ཁག་ཅིག་བྱས་ཡོད།
ཐོག་མར་གྲྭ་ངག་དབང་རབ་གསལ་ལགས་ཀྱིས་ས་བྱི་ཞི་རྒོལ་ཆེན་མོའི་སྐབས་ཀྱི་རྫ་སེར་ཤུལ་དགོན་གྲོང་གཉིས་ཀྱི་གནས་སྟངས་ངོ་སྤྲོད་གནང་དོན། ༢༠༠༨ ལོའི་རྗེས་ཙམ་ལ་ང་ཚོའི་དགོན་སྡེ་དང་ཐག་མི་རིང་བའི་སེར་ཤུལ་གྲོང་དུ་དམག་མི་ ༣༠༠ ལྷག་བསླེབས་ཏེ། ཟླ་བ་གསུམ་རིང་དགོན་གྲོང་གཉིས་ལ་ལྟ་རྟོག་དང་དམ་དྲག་ཤུགས་ཆེན་བྱས་སོང་ལ། དགོན་པ་གཙོ་བྱས་ཏེ་སེར་ཤུལ་རྫོང་འོག་གི་གྲོང་སྡེ་ཁག་ཏུ་༸གོང་ས་མཆོག་གི་སྐུ་པར་བཤམ་མི་ཆོག་པའི་བཙན་བཀའ་བཏང་ཞིང་། གྲོང་སྡེ་ཁག་གི་ཁྱིམ་ཚང་རེ་རེ་བཞིན་སྔོག་བཤེར་བྱས་ཏེ་༧གོང་ས་མཆོག་གི་སྐུ་པར་ཡོད་ཚད་གཞུང་བཞེས་བཏང་ཞིང་། དེ་དང་མཉམ་དུ་མི་མང་པོ་ཞིག་ཀྱང་འཛིན་བཟུང་བྱས་སོང་། དགོན་པའི་ནང་གང་སར་“ཏཱ་ལའི་རུ་ཚོགས་ལ་ངོ་རྒོལ་བྱ་དགོས” བཅས་དང་། “མི་རིགས་ཁ་བྲལ་བར་ངོ་རྒོལ་བྱ་དགོས” ཞེས་པ་སོགས་ཀྱི་སྦྱར་ཡིག་བཀྲམས་ཏེ་སྐྱ་སེར་གཉིས་ལ་དཀའ་ངལ་མང་པོ་བཟོས་སོང་། ཞེས་དང་།
ཁོང་གིས་མུ་མཐུད་དུ་བརྗོད་དོན། ད་ལྟའི་ཆར་རྫ་སེར་ཤུལ་དགོན་པའི་ནང་ལོ་བཅོ་བརྒྱད་མ་སོན་པའི་གྲྭ་བ་གཅིག་ཀྱང་ཞུགས་མི་ཆོག་ལ། སློབ་གྲྭར་འགྲོ་མྱོང་མཁན་ཚོ་ཡང་ཞུགས་ཆོག་གི་ཡོད་པ་མ་རེད། སྲིད་གཞུང་གི་སྟངས་དམ་དྲག་དེའི་དབང་གིས་ད་ཆར་དགོན་པའི་བསླབ་པ་སློབ་གཉེར་གྱི་ཕྱོགས་ནས་འདོན་རྟ་དབྱངས་དང་། ཅོ་ཀ་ཕྱག་ལེན་ཙམ་ལས་བོད་པའི་རིག་གནས་དང་རྒྱལ་རབས་ལོ་རྒྱུས། དེང་རབས་ཀྱི་ཤེས་ཡོན་སོགས་ལ་སློབ་གཉེར་གྱི་གོ་སྐབས་རག་གི་ཡོད་པ་མ་རེད། ཅེས་བརྗོད་བྱུང་།
ཡང་ཁོང་ལ་ཟླ་འགའི་སྔོན་རྫ་སེར་ཤུལ་དགོན་གྲོང་གཉིས་ནས་བོད་པའི་སྐད་ཡིག་ལ་དག་ཐེར་གྱི་བྱ་འགུལ་ཞིག་སྤེལ་བར་རྒྱ་གཞུང་གིས་བཀག་སྡོམ་བྱས་སྐོར་དྲིས་པར་ཁོང་གིས། རྫ་སེར་ཤུལ་དགོས་པའི་གྲྭ་མང་ཚོས་དགོན་པ་རང་ལ་སློབ་གྲྭ་ཞིག་འཛུགས་རྒྱུའི་ཐད་ལོ་བཞིིའི་རིང་འབད་བརྩོན་བྱས་ཀྱང་། གོང་རིམ་ནས་མཆོག་མཆན་ཐོབ་ཡོད་པ་མ་རེད། རྒྱ་གཞུང་གི་དམ་དྲག་དང་ཞེ་ནག་གི་སྲིད་ཇུས་དེ་རྐྱེན་ངན་གྲོགས་ཤར་ལྟ་བུ་ཆགས་ཏེ། དགོན་པའི་གྲྭ་དམངས་ཚོར་སྔར་ལས་ལྷག་པར་སེམས་ཤུགས་དང་ལ་ཞེན་རྒྱས་ཏེ། སྔར་ལོའི་ཕྱི་ཟླ་ ༧ པ་ཡས་མས་སུ་དགོན་པའི་དགེ་འདུན་པ་ཚོས་༼ སྐད་ཡིག་རྒྱུད་འཛིན་ཚོགས་པ ༽ཞེས་པའི་དང་བླངས་ཚོགས་པ་ཞིག་བཙུགས་ཏེ། དགོན་པའི་འདུ་ཁང་དང་གྲོང་སྡེ་ཁག་ནང་སྒམ་ཆུང་རེ་བཞག་ཅིང་། མི་སུ་ཞིག་གིས་༼ སྦྲགས་སྐད ༽ དང་རྒྱ་སྐད། བསྲེས་ལྷད་ཅན་གྱི་སྐད་སོགས་བཤད་ན་རང་འགུལ་ཐོག་སྒོ་ཟུར་ ༥ རེ་སྒམ་ཆུང་དེའི་ནང་འཇོག་དགོས་པའི་སྒྲིག་ལམ་ཞིག་བཟོས་པ་རེད། ཅེས་དང་།
ཁོས་མུ་མཐུད་དོན། དུས་ཡུན་གང་འཚམ་རིང་སྐྱ་སེར་གཉིས་ནས་སྒྲིག་སྲོལ་དེ་ལ་བརྩི་སྲུང་ཡག་པོ་བྱས་ཏེ། བོད་ཡིག་བོད་སྐད་ལ་དག་ཐེར་དང་། བོད་པའི་རིག་གཞུང་ལ་སྲུང་སྐྱོབ་ཀྱི་སེམས་ཤུགས་ཆེན་པོ་སྐྱེས་ཡོད་ཀྱང་། ཕྱི་ཟླ་ ༡༠ བའི་ནང་ས་གནས་ཉེ་རྟོག་པ་མང་པོ་བསླེབས་ཏེ་སྒམ་ཆུང་དེ་དག་བཙན་འཕྲོག་གིས་གཞུང་བཞེས་བཏང་སོང་། ད་དུང་བྱེད་སྟངས་དེ་རིགས་ཆབ་སྲིད་དང་འབྲེལ་བ་ཡོད་སྐོར་གྱི་ཉེས་འཛུགས་ཀྱིས་མང་ཚོགས་ལ་འཇིགས་སྐུལ་ཡང་བཏང་སོང་། སྐབས་དེར་དགོན་པའི་བླ་མ་ལས་སྣེ་མང་པོ་ཞིག་རྫོང་སྲིད་གཞུང་དུ་བསྐྱོད་དེ་གནས་ལུགས་བཤད་ཀྱང་། སྒམ་ཆུང་དེ་དག་ཕྱིར་སྤྲད་མེད་པ་མ་ཟད། ལས་ཀ་དེའི་རྒྱབ་ཏུ་ཕྱི་ཕྱོགས་ཁ་བྲལ་བའི་བཀོད་བྱུས་ཡོད་སྐོར་གྱི་གཞི་མེད་བསྙོན་འཛུགས་བྱས་པ་མ་ཟད། མ་འོངས་པར་ཡང་དགོན་པའི་ནང་དེ་འདྲའི་བྱ་བ་བརྩམ་མི་ཆོག་པའི་བཀའ་རྒྱ་བཏང་སོང་ལ། སྐབས་དེ་ནས་བཟུང་ཟླ་གཅིག་རིང་དགོན་པ་དང་གྲོང་སྡེ་ཁག་ཏུ་ཁ་པར་སོགས་བརྒྱུད་ལམ་ཁག་བཅད་དེ། ཕྱི་ནང་ཀུན་ལ་འབྲེལ་བ་བྱ་མི་ཐུབ་པའི་དམ་དྲག་བྱས་པ་རེད། ཅེས་བརྗོད་བྱུང་།
མཇུག་ཏུ་ཁོ་རང་གི་རེ་འདུན་ཞིག་བརྗོད་དོན། ད་ལྟའི་ཆར་རྩ་བའི་ཆ་ནས་གུ་ཡངས་ཀྱི་རྣམ་པ་ཡོད་ཀྱང་། བོད་ནང་གི་བོད་མི་ཚོར་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། རང་གི་སྐད་དང་ཡི་གེ་བཀོལ་སྤྱོད་ཀྱི་རང་དབང་ཚད་ཧ་ཅང་ཆུང་ཆུང་རེད། དེར་བརྟེན། ད་ཆར་བོད་ཕྱི་ལོགས་ལ་རེ་བ་རྒྱག་དགོས་པ་ཞིག་ཆགས་ཡོད་ཀྱང་། བོད་ཕྱི་ལོགས་ནས་ཀྱང་རང་གི་སྐད་དང་ཡི་གེར་གཅེས་འཛིན་མི་བྱེད་པར་ཕྱི་སྐད་ལ་ཧམ་རྒྱུག་བྱས་བསྡད་ན། མ་འོངས་པའི་དུས་ཡུན་ཐུང་ཐུང་ནང་དཀའ་ངལ་ཆེན་པོ་ཞིག་འཕྲད་ངེས་རེད། བོད་ནང་གི་གཞོན་སྐྱེས་རིགས་ཞེན་ཅན་དག་དང་། ལྷག་པར་དུ་དགོན་སྡེ་ཁག་གི་དགེ་འདུན་པ་ཚོའི་ཁྲོད་དུ་ཡང་གཅིག་མཚུངས་ཀྱི་བློ་འཚབ་འདི་ཡོང་གི་འདུག ཅེས་བརྗོད་བྱུང་།
གསར་འགོད་པ། དོན་གོ
ད་བྱེད་རྒྱུ་གཅིག་ཡོད་རེད། གཞིས་བཞུགས་བྱེས་ལ་མ་རེ། བྱེས་པས་གཞིས་ལ་མ་རེ། རང་སོ་སོའི་ས་ལ་རང་རང་སོ་སོས་བོད་ཡིག་བོད་སྐད་ལ་སྦྱངས་བརྩོན་གྱིས།
ཨ་རོགས་ཚོ། གྲྭ་བ་འདིའི་གཞིས་བཞུགས་སྤུན་ཟླ་ཚོའི་སྐད་ཞིག་འདི་ན་བསྒྲོགས་འདུག་(ད་ཆར་བོད་ཕྱི་ལོགས་ལ་རེ་བ་རྒྱག་དགོས་པ་ཞིག་ཆགས་ཡོད་ཀྱང་། བོད་ཕྱི་ལོགས་ནས་ཀྱང་རང་གི་སྐད་དང་ཡི་གེར་གཅེས་འཛིན་མི་བྱེད་པར་ཕྱི་སྐད་ལ་ཧམ་རྒྱུག་བྱས་བསྡད་ན། མ་འོངས་པའི་དུས་ཡུན་ཐུང་ཐུང་ནང་དཀའ་ངལ་ཆེན་པོ་ཞིག་འཕྲད་ངེས་རེད། བོད་ནང་གི་གཞོན་སྐྱེས་རིགས་ཞེན་ཅན་དག་དང་། ལྷག་པར་དུ་དགོན་སྡེ་ཁག་གི་དགེ་འདུན་པ་ཚོའི་ཁྲོད་དུ་ཡང་གཅིག་མཚུངས་ཀྱི་བློ་འཚབ་འདི་ཡོང་གི་འདུག ) ད་ཅི་བྱེད་རྒྱུ་ཡིན????????????????????????????