ཡུ་རུ་གུའི་ Uruguay བོད་དོན་རྒྱབ་སྐྱོར་བ་སི་ལི་ནི་སི་ལགས་དང་ལྷོ་ཨ་རིའི་བོད་གཞུང་སྐུ་ཚབ་ཚེ་དབང་ཕུན་ཚོགས་གཉིས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༢༢ ཉིན་ནས་ཡུ་རུ་གུའི་རྒྱལ་ཁབ་ཀྱི་སྙན་གྲགས་ཆེ་བའི་མཚོ་འགྲམ་གྱི་ཡུལ་སྐོར་ལྟེ་གནས་ཕིན་ཊ་ཌེལ་ཨེ་སི་ཊི་Punta del Este རུ། དུས་ཡུན་བདུན་ཕྲག་གཅིག་རིང་བོད་དོན་ཤེས་རྟོགས་ཡོང་ཐབས་ཀྱི་ལས་འགུལ་ཞིག་སྤེལ་ཡོད་འདུག་ལ། ཐེངས་འདིའི་ལས་འགུལ་གཙོ་བོ་ཁག་ནི་བོད་ཀྱི་ཐང་ཀ་དང་པར་རིས་གྲེམས་སྟོན། བོད་དོན་གློག་བརྙན། ནང་ཆོས་ངོ་སྤྲོད་སོགས་ཡིན་པར་མ་ཟད། ང་དགུ་ལོར་༧གོང་ས་མཆོག་བཙན་བྱོལ་དུ་ཕེབས་པའི་གནས་སྟངས་སྐོར་གྱི་པར་རིས་ཁག་ཅིག་ཀྱང་འགྲེམས་སྟོན་བྱས་ཡོད་པ་རེད།
