ས་དཀར་བཀྲ་ཤིས།
ཝི་ཀེ་གསང་གྲོལ་དྲ་བའི་ནང་པེ་ཅིན་དུ་ཡོད་པའི་ཨ་རིའི་གཞུང་ཚབ་ཀྱིས་ཝ་ཤིན་ཊོན་ལ་བཏང་བའི་ཏར་འཕྲིན་ཁྲོད། གསང་རིམ་ཨང་ ༠༡ ཅན་གྱི་ཡིག་ཆ་ཞིག་ཡོད་པའི་ནང་ ༢༠༠༨ ལོ་བོད་ནང་ཟིང་འཁྲུག་བྱུང་རྗེས་ཧུའུ་ཅིན་ཐའོ་ཡིས་བོད་ཀྱི་སྲིད་ཇུས་ཐད་དམ་དྲག་དང་། དམར་ཤོག་ནང་ཁུལ་དང་སྤྱི་ཚོགས་སྟེང་ནས་བོད་དོན་སྐོར་ལ་ལྟ་ཚུལ་ཅི་འདྲ་ཡོད་པ་བཅས་བརྗོད་ཡོད་འདུག ཏར་འཕྲིན་འདི་ ༢༠༠༨ ཟླ་ ༤ ཚེས་ ༦ ཉིན་ཨ་རིའི་སྐུ་ཚབ་ Clark T. Randt་ཡིས་མིང་རྟགས་བཀོད་དེ་བཏང་བ་ཞིག་རེད་འདུག་ལ། ནང་དོན་ཁག་གཤམ་གསལ།
ཧུའུ་ཅི་ཐའོ་ཡིས་བོད་དོན་ཐག་གཅོད་ཀྱི་དབང་ཚད་ཆ་ཚང་བཟུང་ཡོད་པ།
༡། ཧུའུ་ཅིན་ཐོ་དང་དམར་ཤོག་འགོ་ཁྲིད་ཚང་མས་བོད་ཀྱི་གནད་དོན་ཐད་ལ་མུ་མཐུད་མཁྲེགས་པོའི་སྲིད་ཇུས་ལག་བསྟར་བྱ་རྒྱུ། དམར་ཤོག་འགོ་ཁྲིད་ཚོའི་བོད་ཀྱི་གནད་དོན་ཐད་ལྟ་ཚུལ་མི་མཐུན་པ་ཡོད་མོད། ཡིན་ནའང་རྩ་བའི་ཆ་ནས་ཁྱད་པར་མེད་པ་རེད། དམར་ཤོག་ཚོགས་པ་ལ་ནུབ་ཕྱོགས་གསར་འགྱུར་བརྒྱུད་ལམ་ཁག་ཕྱོགས་ཞེན་ཅན་དང་ཨོ་ལིམ་རྩེད་འགྲན་དང་འབྲེལ་པའི་ངོ་རྒོལ་ལས་འགུལ་ཁག་གིས་རྒྱལ་ནང་གི་མི་རིགས་རིང་ལུགས་ཡར་འཕར་ཏེ། ཀུན་སྤྱོད་སྟེང་ནས་རྒྱབ་སྐྱོར་ཐོབ་པ་དང་། ཨོ་ལིམ་རྩེད་འགྲན་མཇུག་མ་རྫོགས་བར་ཏུ་དམར་ཤོག་འགོ་ཁྲིད་ཚོས་བོད་ཀྱི་སྲིད་ཇུས་ལ་འགྱུར་བ་གཏོང་མི་སྲིད་པ་རེད།
༢། བདུན་ཕྲག་སྔོན་མར་གཞུང་ཚབ་ཁང་དང་འབྲེལ་ཡོད་མི་སྣའི་བརྗོད་དོན། ཧུའུ་ཅིན་ཐའོ་ཡིས་བོད་ཀྱི་སྲིད་ཇུས་ཐད་རྣམ་འགྱུར་བརྟན་པོ་ཡིན་ལ། པེ་ཅིན་འགོ་ཁྲིད་ཚོའི་ལངས་ཕྱོགས་གཅིག་གྱུར་རེད། ཧུའུ་ཅིན་ཐའོ་རང་ཉིད་བོད་དུ་བསྡད་མྱོང་ཡོད་པ་༼ ལོ་རབས་༨༠ ནང་བོད་རང་སྐྱོང་ལྗོངས་དམར་ཤོག་དྲུང་ཆེ་གནང་བ ༽དང་། དེའི་སྟེང་བོད་ཀྱི་གནད་དོན་ནི་ཤིན་ཏུ་གལ་ཆེན་དང་ཚོར་སྣང་སྐྱེན་པས་འགོ་ཁྲིད་སུ་ཞིག་གིས་ཀྱང་བོད་ཀྱི་གནད་དོན་ཐད་ནས་ཧུའུ་ཅིན་ཐའོ་ལ་ཁ་གཏད་གཅོག་མི་སྲིད།
གཞུང་ཚབ་དང་རྒྱུན་རིང་འབྲེལ་ཡོད་མི་སྣས་བརྗོད་དོན། བོད་དོན་ལྟ་བུའི་ཚོར་ཤུགས་ཆེ་བའི་གནད་དོན་ནི་མི་དགུ་ལས་གྲུབ་པའི་ཆབ་སྲིད་རྒྱུན་ལས་ཨུ་ཡོན་གྱིས་ཐག་གཅོད་བྱེད་ཀྱི་ཡོད་པ་དང་། ཁོང་ཚོའི་ཅི་ལྟར་གྲོས་བསྡུར་བྱེད་ཀྱི་ཡོད་པའི་གནས་ཚུལ་ནི་ཤེས་མི་ཐུབ་ལ། ཧུའུ་ཅིན་ཐའོ་ཡིས་བོད་ཀྱི་གནད་དོན་ཐག་གཅོད་ཀྱི་དབང་ཚད་བཟུང་ཡོད་པ་ནི་གསལ་བོ་ཡིན་པ་དང་། དམར་ཤོག་འགོ་ཁྲིད་ཚོའི་ཁྲོད་སུ་ཡིས་བོད་ཀྱི་གནད་དོན་ཐད་ནས་ཧུའུ་ཅིན་ཐའོ་ལ་ཁ་གཏད་བཅག་ཚེ་དེ་ནི་ཆབ་སྲིད་སྟེང་ནས་རང་ཉིད་ལ་ལྕེབ་ཐག་བསྐོན་པའམ་གཉོམ་དྲགས་པ། ཡང་ན་རྒྱལ་འཚོང་བ་རུ་ངོས་འཛིན་པ་དང་། ཐ་ན་ ༡༩༨༧ ལོ་ཧུའུ་ཡོ་པང་བཞིན་རྩ་མེད་བཟོ་སྲིད་པ་རེད།
༣། མི་སྣ་XXX༼འདི་གནས་ཚུལ་མཁོ་སྤྲོད་པ་འམ་གསང་ཉུལ་བའི་མིང་ཚབ་ཡིན༽ ཡིས་བརྗོད་དོན། རྒྱ་ནག་གི་འགོ་ཁྲིད་ཚོར་མཚོན་ན་བོད་ནི་ཐེ་ཝན་ལས་ཀྱང་གལ་ཆེ། བོད་ཀྱི་གནད་དོན་ཐད་ཆབ་སྲིད་རྒྱུན་ལས་ཨུ་ཡོན་མི་དགུའི་ཁྲོད་མི་སུ་ཡིན་ཡང་ཧུའུ་ཅིན་ཐོ་ནང་བཞིན་ཀྱི་བརྒྱུད་རིམ་ལྡན་པ་དང་དབང་ཤུགས་ཅན་མེད་པ་རེད། ༡༩༨༧ ལོ་དང་ ༡༩༨༩ ལོ་ལ་བོད་ནང་གི་ངོ་རྒོལ་ལས་འགུལ་དྲག་གནོན་བྱས་རྐྱེན་ཧུའུ་ཅིན་ཐའོ་ལ་ཏུན་ཞོ་ཕིན་གྱིས་ཚད་མཐོའི་བསྔགས་བརྗོད་བྱས་བ་དང་། དེ་ནི་ཁོ་རང་ ༡༩༩༢ ལོར་ཆབ་སྲིད་རྒྱུན་ལས་ཨུ་ཡོན་ནང་ཚུད་པའི་རྒྱུ་རྐྱེན་གལ་ཆེན་ཞིག་ཡིན་པ་རེད། འགོ་ཁྲིད་གཞན་པ་ཚོས་ཐེ་ཝན་གནད་དོན་དང་དཔལ་འབྱོར་འཕེལ་རྒྱས། ཡང་ན་ཆབ་སྲིད་བཅོས་བསྒྱུར་གྱི་ཐད་ནས་ཧུའུ་ཅིན་ཐའོ་དང་ལྟ་ཚུལ་མི་མཐུན་པ་འདོན་ཆོག་མོད། ཡིན་ནའང་གནས་ཚུལ་འདི་ལྟ་བུ་བོད་དོན་ཐོག་མི་རན་པ་རེད།
དམར་ཤོག་འགོ་ཁྲིད་ཚོའི་ལྟ་བ་གཅིག་གྱུར་རེད།
༤། XXX ཡིས་བརྗོད་དོན། དམར་ཤོག་ནང་ཁུལ་དང་འབྲིང་རིམ་སྤྱི་ཚོགས་ཁྲོད་བོད་དོན་ལ་ལྟ་ཚུལ་མི་མཐུན་པ་ཡོད་མོད། ཡིན་ནའང་སུ་ཡིས་ཀྱང་མཐོ་རིམ་འགོ་ཁྲིད་ཁྲོད་འགལ་ཟླའི་སྣང་ཚུལ་ཡོད་པ་བསམ་གྱི་མེད། དམར་ཤོག་ནང་ཁུལ་ནས་གང་ཟག་ཞིག་གིས་བོད་དོན་ཐད་ཞི་འཇམ་གྱི་བསམ་འཆར་བཏོན་མོད། དེ་ནི་ཧུའུ་ཅིན་ཐའོ་རྩ་བ་ཉིད་ནས་མིན་ལ། ཧུའུ་ཡིས་བོད་ཀྱི་སྲིད་ཇུས་ཐད་རྦད་དེ་དབང་སྒྱུར་བྱས་ཡོད། པེ་ཅིན་གྱིས་དོན་དངོས་ཐོག་ཨ་རིའི་ཐེ་ཝན་ལ་ཐེ་གཏོགས་བྱེད་བཞིན་པ་ངོས་ལེན་བྱེད་ཀྱི་ཡོད་མོད། འོན་ཀྱང་ཕྱི་རོལ་སྟོབས་ཤུགས་ཀྱིས་བོད་ཀྱི་གནད་དོན་ལ་ཐེ་བྱུས་བྱེད་པར་རྩ་བ་ཉིད་ནས་ངོས་ལེན་བྱེད་ཀྱི་མེད།
ཧུའུ་ཅིན་ཐའོ་ཡིས་མཁྲེགས་འཛིན་སྲིད་ཇུས་ལ་སྐྱོན་བརྗོད་འགའ་རེ་བྱུང་ཡོད། XXX ཡིས་བརྗོད་དོན། ཁོ་རང་ཉིད་ལ་མཚོན་ན་གོ་རིམ་ལྡན་པའི་ངང་བོད་དང་ཐག་ཉེ་སར་བཅར་རྒྱུའི་འདོད་ཚུལ་ཡོད་ལ། དེའི་ནང་ཏྰ་ལའི་བླ་མ་དང་ལྷན་གྲོས་མོལ་གནང་རྒྱུའང་ཚུད་ཡོད། ཏྰ་ལའི་བླ་མས་ད་གཟོད་བོད་ཕྱི་ནང་གཉིས་ཀྱི་བོད་མི་མང་ཆེ་བ་ཆིག་སྒྲིལ་གནང་ཐུབ་ཟེར།
༥ ༽༦།
XXX ཡིས་བརྗོད་དོན། འབྲིང་རིམ་མི་སྣ་མང་པོས་ཏྰ་ལའི་བླ་མར་འཛིན་པའི་སྲིད་ཇུས་ལ་འགྱུར་བ་གཏོང་དགོས་བའི་འབོད་སྐུལ་བྱེད་ཀྱི་ཡོད་ལ། ཏྰ་ལའི་བླ་མ་གདོན་གཟུགས་ཅན་དུ་བསྒྱུར་བ་དང་ཁོང་མཉམ་དུ་གྲོས་མོལ་གནང་རྒྱུར་ངོ་རྒོལ་བྱེད་ཀྱི་ཡོད་པའི་ལངས་ཕྱོགས་ལ་དོགས་སློང་བྱེད་ཀྱི་ཡོད། ཡིན་ནའང་འབྲིང་རིམ་མི་སྣ་དང་ཤེས་ལྡན་མི་སྣ་ཉུང་ཤས་མ་གཏོགས་གཞན་དམར་ཤོག་ཚོགས་མི་དཀྱུས་མ་མང་ཆེ་ཤོས་དང་། མང་ཚོགས་བརྒྱ་ཆའི་༩༨ ཙམ་གྱིས་དམར་ཤོག་གིས་ད་ལྟའི་བོད་ཐོག་འཛིན་པའི་སྲིད་ཇུས་ལ་རྒྱབ་སྐྱོར་བྱེད་ཀྱི་ཡོད་པ་རེད། དམར་ཤོག་ནང་ཁུལ་དུ་བོད་ཀྱི་གནད་དོན་ཐད་འགལ་ཟླའི་ལྟ་ཚུལ་ཆེ་བ་ཞིག་རྩ་བ་ཉིད་ནས་མེད་པ་རེད།
དཔེར་ན། XXX ཡིས་བརྗོད་དོན། ཁོང་ཉིད་ཧུའུ་ཅིན་ཐའོ་དང་ཝུན་ཅ་པོ་གཉིས་བོད་ཀྱི་གནད་དོན་ཐད་ལངས་ཕྱོགས་མི་མཐུན་པ་ཡོད་པར་ཡིད་མི་ཆེས། མི་ཁ་ཤས་ཀྱིས་ཝུན་ཅ་པོ་ཡིས་དབྱིན་ཇིའི་སྲིད་བློན་ལ་ཞི་འཇམ་ཀྱིས་བརྗོད་སྟངས་དང་། Laos རྒྱལ་ཁབ་ནས་གསར་འགོད་པ་ཚོར་བརྗོད་པའི་སྐད་ཆ་གཞི་ལ་བཞག་སྟེ། སྲིན་བློན་ཝུན་ཅ་པོ་ཁྱད་པར་ཅན་ཞིག་ཡིན་པར་འདོད། ཁོང་གིས་ཧུའུ་དང་ཝུན་གཉིས་ནི་ཚོན་མདོག་གཉིས་ལྡན་གྱི་མངར་ཟས་ཤིག་དང་འདྲ་ལ། ཕྱོགས་གཅིག་ནག་པོ་དང་ཕྱོགས་གཅིག་དཀར་པོ་ཡིན་མོད། ཡིན་ནའང་ཕྱོགས་གཉིས་དངོས་བོ་ཆ་ཚང་བ་ཞིག་རེད། XXX ཡིས་བསམ་པར་ཝུན་ཅ་པོ་བོད་ཀྱི་གནད་དོན་ཐད་ཅུང་ཞི་འཇམ་ཅན་ཡིན་པ་ནི་ཝུན་གྱི་གཤིས་སྤྱོད་དེ་ལྟར་ཡིན་པ་ལས་དེ་ནི་གཞུང་གི་གཏན་འབེབས་སྲིད་ཇུས་ལ་ལྟ་ཚུལ་མི་མཐུན་པ་ཞིག་ཡིན་པར་མཚོན་མི་ཐུབ། ཝུན་ཅ་པོ་ནི་མི་ཞི་འཇམ་ཅན་ཞིག་ཡིན་པའི་ཁོ་རང་གནད་དོན་ཕལ་ཆེ་པར་ཞི་འཇམ་གྱི་སྤྱོད་སྟངས་མངོན་ལ། ཁོང་གི་ལྟ་ཚུལ་དེ་གཞུང་འབྲེལ་གྱི་ལམ་ཐིག་དང་ཁྱད་པར་ཆེན་པོ་ཡོད་པ་མཐོང་མི་ཐུབ་པ་རེད།
ལྷོ་ཕྱོགས་གསར་འགྱུར་སྟེང་གི་རྩོམ་ཡིག་དེའི་གཞུང་གི་སྲིད་ཇུས་ལ་རྒྱབ་འགལ་བྱེད་པ་མཚོན་མི་ཐུབ།
༧༽༡༠
ཕྱི་ཟླ་ ༤ ཚེས་ ༣ ཉིན་རྒྱ་ནག་ལྷོ་ཕྱོགས་གྲོང་ཁྱེར་ཚགས་པར་སྟེང་དམར་ཤོག་གིས་བོད་ཀྱི་གནད་དོན་ཐད་དམ་དྲག་ནན་མོ་བྱེད་བཞིན་པར་སྐྱོན་བརྗོད་ཀྱི་རྩོམ་ཡིག་ཞིག་བཀོད་ཡོད་ལ། ལྷོ་ཕྱོགས་གཟའ་འཇུག་ཚགས་པར་སྟེང་ཏྰ་ལའི་བླ་མ་དང་ལྷན་གྲོས་མོལ་གནང་དགོས་བའི་རྩོམ་ཡིག་ཞིག་ཀྱང་བཀོད་ཡོད། ཡིན་ནའང་ PolOffs༼འདི་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་དཔོན་རིགས་སམ་གསང་ཉུལ་བ་ཞིག་གི་བསྡུས་མིང་ཡིན་པ་འདྲ༽དང་གླེང་མོལ་གནང་མཁན་འབྲེལ་ཡོད་ཚང་མའི་བརྗོད་དོན། རྩོམ་ཡིག་དེ་གཉིས་བཀོད་པ་ཙམ་གྱིས་ལྷོ་ཕྱོགས་གསར་ཁང་དེ་གཉིས་ཀྱིས་བོད་ཀྱི་གནད་དོན་ཐད་ནས་ཀྲུང་དབྱང་དང་ལྡོག་ཕྱོགས་ཀྱི་བསམ་ཚུལ་གླེང་བ་མཚོན་མི་ཐུབ་ཟེར།
XXX ཡིས་རྩོམ་ཡིག་འདི་གཉིས་ཀྱིས་འབྲིང་རིམ་མི་སྣ་ཁག་ཅིག་གིས་བོད་ཀྱི་སྲིད་ཇུས་ལ་བསྐྱར་ཞིབ་བྱ་དགོས་བའི་རེ་འདུན་མཚོན་ཡོད་ལ། རྩོམ་ཡིག་གཅིག་ལ་དམར་ཤོག་ནང་ཁུལ་གྱི་མི་སྣ་མང་པོའི་སྐྱོན་བརྗོད་བྱས་མྱོང་ཟེར། རྩོམ་ཡིག་འདི་གཉིས་ནི་གསར་འགོད་ཁང་འདི་གཉིས་ཀྱིས་༼ སྲོལ་རྒྱུན་གྱི་རང་དབང་ཁྱད་ཆོས ༽མཚོན་པ་ཙམ་ལས་ཅི་ཡང་མ་རེད་ལ། ཚགས་ཤོག་འདི་གཉིས་ལ་སྔོན་ཆད་དྲིལ་བསྒྲགས་དཔོན་རིགས་སར་ནས རྙོག་དྲ་ཅི་ཡང་འཕྲད་མེད་པ་རེད། ཧང་སངས་དགོས་བ་ཞིག་ནི་ XXX ཡིས་ཀྱང་ཁོ་ཚོ་ཚོགས་པའི་ཚགས་པར་སྟེང་གི་རྩོམ་ཡིག་དེ་གཉིས་བཀླགས་མི་འདུག་ལ། PolOffs ཀྱིས་རྩོམ་ཡིག་དེ་གཉིས་ཀྱི་ནང་དོན་ཁོ་ལ་ངོ་སྤྲོད་བྱས་རྗེས། ཁོང་གིས་རྩོམ་ཡིག་དེ་གཉིས་ལ་ཆབ་སྲིད་ཀྱི་གལ་ཆེན་རང་བཞིན་ཡོད་པར་ཐེ་ཚོམ་ཆེན་པོ་སྐྱེས་བ་དང་། ཁོང་གིས་བརྗོད་དོན། རྩོམ་ཡིག་འདི་ཚོས་གཅིག་བྱས་ན་དམར་ཤོག་གིས་གསར་འགོད་ཐབས་ཇུས་ལ་ཞུ་དག་གཏོང་དགོས་བའི་རེ་འདུན་མཚོན་ཡོད་པ་རེད། ལྷོ་ཕྱོགས་གསར་ཁང་རྩོམ་སྒྲིག་པ་ལ་དམར་ཤོག་དྲིལ་བསྒྲགས་ལས་ཁུངས་ནས་ཆོག་མཆན་རག་རྗེས་རྩོམ་ཡིག་དེ་བཏོན་པ་ཡིན་པར་སྙམ་ལ། དེ་ལྟར་མིན་ཚེ་རྩོམ་སྒྲིག་པ་ཞིག་གིས་རང་ཉིད་ཀྱི་འདོད་མོས་ལྟར་ཚོར་སྣང་ཆེ་བའི་བརྗོད་གཞི་ཅན་གྱི་རྩོམ་ཡིག་བཀོད་ཚེ་ལམ་སེང་གནས་དབྱུང་གཏོང་ངེས། ཧུའུ་ཅིན་ཐའོ་ཡིས་བོད་ཀྱི་གནད་དོན་དྲིལ་བསྒྲགས་ཀྱི་གཙོ་འགན་འཁུར་ཡོད་པས་རྩོམ་སྒྲིག་པ་སུ་ཞིག་གིས་ཀྱང་གཞུང་གི་ལམ་ཕྱོགས་ལ་ཁ་གཏད་གཅོག་མི་སྲིད་ལ། ཐ་ན་གྲིབ་གཟུགས་ཙམ་ཡང་གླེང་ཕོད་ཀྱི་མ་རེད། དམར་ཤོག་གིས་བོད་ཀྱི་གནད་དོན་ཁྱབ་བསྒྲགས་ཐད་༼ནོར་འཁྲུལ་ཅུང་ཙམ་ཤོར་༽བ་དང་། དེར་བརྟེན་ལྷོ་ཕྱོགས་གཟའ་མཇུག་ཚགས་པར་གྱིས་༼ཞིབ་ཕྲའི་ཁྱད་པར་༽ཙམ་སྤེལ་པར་ཆོག་མཆན་སྤྲད་པ་ཡིན་པར་སྙམ། ཡིན་ནའང་བོད་དོན་འདི་༼ཚོར་ཤུགས་ཧ་ཅང་སྐྱེན་པའི༽ དྲིལ་བསྒྲགས་ཚན་པའི་གནས་ཚུལ་བརྒྱུད་སྒྲོག་ཐད་ལ་༼ཆེས་དམ་དྲག་༽ཆེ་བའི་སྒྲིག་གཞི་བཟོས་ཡོད་པ་རེད།
མི་རིགས་རིང་ལུགས་ཀྱི་བརྩེ་བས་དམར་ཤོག་གི་གོ་གནས་ཇེ་མཐོར་བཏང་བ།
༡༡། XXX ཚང་མས་མི་རིགས་ཀྱི་བརྩེ་ཞེན་འཕར་བ་དེས་དམར་ཤོག་གི་གཤོག་སྒྲོ་རྒྱས་པར་ངོས་འཛིན་བྱས་པ་དང་། ཁོ་ཚོ་ཚང་མས་ PolOffs ལ་རྒྱ་མིས་ནུབ་ཕྱོགས་པ་ཚོའི་བོད་ཀྱི་གནད་དོན་ཐད་༼ དོན་དངོས་འཁྱོག་བརྗོད ༽བྱེད་པར་ཁོང་ཁྲོ་ལངས་པ་ནི་བདེན་པ་དང་ཡོངས་ཁྱབ། རྒྱུན་རིང་ཤུགས་རྐྱེན་ཐེབས་ངེས་པ་ཞིག་ཡིན་པར་ནན་བརྗོད་བྱས། XXX ཡིས་བརྗོད་དོན། ཁོང་གི་ངོ་ཤེས་ཚོ་རེ་རེ་ཡིས་ནུབ་ཕྱོགས་ཀྱི་གསར་འགྱུར་དང་ཨོ་ལིམ་མཛད་སྒོ་བཀག་འགོག་གི་འབོད་སྐུལ། ཁ་ཤས་ཀྱིས་བོད་རང་བཙན་དགོས་བའི་རེ་འདུན་རྗོད་བཞིན་པར་ཁོང་ཁྲོ་སྐྱེ་ཡི་ཡོད་པ་དང་། མང་ཚོགས་ཁྲོད་ནུབ་ཕྱོགས་ཀྱིས་རྒྱ་ནག་ས་ལ་བརྡབ་བཞིན་པའི་ཚོར་སྣང་སྐྱེ་མཁན་ཡང་ཡོད། མི་རིགས་རིང་ལུགས་དེ་འབར་བཞིན་ཡོད་ལ། གཙོ་ཆེར་ལོ་ ༢༥ དང་ ༣༥ ཅན་གྱི་ཁྲོད་རེད།
༡༢། འབྲེལ་ཡོད་ཚོས་བརྗོད་དོན། མི་རིགས་རིང་ལུགས་འབར་བའི་རྒྱུ་རྐྱེན་ཅི་ཞིག་ཡིན་རུང་། དེས་དམར་ཤོག་གི་བོད་ཀྱི་སྲིད་ཇུས་ཐད་ལ་མང་ཚོགས་ནས་རྒྱབ་སྐྱོར་ཚད་མཐོ་རུ་ཕྱིནཔ་དང་། XXX ཡིས་དེ་ནི་རང་བྱུང་གི་མཇུག་འབྲས་ཤིག་ཡིན་ལ་ཉེ་བའི་ལོ་ནས་རྒྱ་མིའི་མི་རིགས་རིང་ལུགས་དྲག་ཏུ་ཕྱིན་པ་དང་། དེ་ནི་རྒྱ་ནག་ཡར་རྒྱས་ཕྱིན་ཚད་མྱུར་པ་ལ་བརྟེན་ནས་བྱུང་བ་རེད། XXX ཡིས་བརྗོད་དོན། དམར་ཤོག་གི་དྲིལ་སྒྲོག་ཡོ་བྱད་ཚང་མས་དམིགས་ཡུལ་ལྡན་པའི་སྒོ་ནས་རྒྱ་ནག་གི་མི་རིགས་རིང་ལུགས་སྐུལ་སློང་བྱས་ཏེ། མང་ཚོགས་ཀྱིས་ཀྲུང་དབྱང་གི་བོད་ཐོག་འཛིན་པའི་སྲིད་ཇུས་ལ་རྒྱབ་སྐྱོར་སྔར་ལས་ཆེ་བ་རག་ཐབས་གནང་བ་དང་། ཕྱོགས་འདི་ལ་ཁོང་ཚོའི་གྲུབ་འབྲས་ཤིན་ཏུ་ཆེན་པོ་བླངས་ཡོད། བོད་ཀྱི་གནད་དོན་གྱིས་རྒྱ་རིགས་མང་ཚོགས་དམར་ཤོག་སྲིད་གཞུང་གི་རྒྱབ་ཏུ་རྡོག་རྩ་གཅིག་སྒྲིལ་བྱུང་ཡོད་ལ། གནས་ཚུལ་དེ་ལྟ་བུ་ནི་ལོ་རབས་༨༠ དང་༩༠ ནང་རྦད་དེ་བསམ་བློའི་ནང་འཁོར་མི་སྲིད་པ་ཞིག་རེད།
ས་དཀར་བཀྲ་ཤིས་ཟེར་བ་ལ་སྙིང་ཐག་པ་ནས་ཐུགས་རྗེ་ཆེ་ཞུ་བ་ཡིན།