དམངས་གཙོ་དོན་གཉེར་བར་མྱ་ངན།

ཁ་སང་ཕྱི་ཚེས་ ༣༠ ཉིན་ཨ་རིའི་ནེའུ་ཡོག་ཏུ་རྟེན་གཞི་བྱས་པའི་རྒྱ་རིགས་ཚོགས་པ་ཁག་དྲུག་གི་གོ་སྒྲིག་འོག ནེའུ་ཡོག་རྒྱ་ནག་གྲོང་སྡེ་ཡི་རྒྱ་རིགས་ཚོས། ཉེ་ལམ་རྒྱ་ནག་དམངས་གཙོ་དོན་གཉེར་བ་སྐུ་ཞབས་སི་ཌི་ཧྭ་  Situhua མཆོག་འདས་གྲོངས་སུ་སོང་བར་མྱ་ངན་ཚོགས་འདུ་ཞིག་སྐོང་ཚོགས་གནང་འདུག

ཚོགས་འདུ་དེར་བོད་གཞུང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཚུད་པའི་ནེའུ་ཡོག་གནས་སྡོད་རྒྱ་རིགས་ཚོགས་སྡེ་ཁག་གི་སྐུ་ཚབ་དང་། དམངས་གཙོ་དོན་གཉེར་བ། ཨ་རིའི་གྲོགས་པོ་སོགས་ཁྱོན་མི་ ༡༠༠ ལྷག་འདུ་འཛོམས་བྱུང་ཡོད་འདུག  མྱ་ངན་རྗེས་དྲན་ཚོགས་འདུ་དེ་ནེའུ་ཡོག་ལས་གཞན་ད་དུང་ཨ་རིའི་གྲོང་ཁྱེར་ཆི་ཁ་གྷོ་དང་ཝ་ཤིན་ཊོན། ཁེ་ཎ་ཌིའི་གྲོང་ཁྱེར་ཊོ་རོན་ཊོ་དང་ཝན་ཁོ་ཝར་སོགས་གྲོང་ཁྱེར་ཁག་དགུའི་ནང་ཉིན་གཅིག་དུས་གཅིག་ལ་ཚོགས་ཡོད་ཅིང་། ཡུལ་ལུང་གཞན་དག་གི་ཚོགས་འདི་དེ་དག་སྟེང་དུ་ཡང་བོད་རིགས་སྤྱི་མཐུན་ཚོགས་པའི་སྐུ་ཚབ་གཙོས་པའི་བོད་པའི་འཐུས་མི་མཉམ་ཞུགས་བྱས་འདུག

སྐུ་ཞབས་སི་ཌི་ཧྭ་ལགས་ནི་ཧོང་ཀོང་དུ་གནས་སྡོད་བྱེད་པའི་དམངས་གཙོ་དང་རང་དབང་། འགྲོ་བ་མིའི་ཐོབ་ཐང་རྩོད་ལེན་མཁན་གྲགས་ཅན་ཞིག་ཡིན་པར་མ་ཟད། རྒྱ་ནག་དམངས་གཙོ་དོན་གཉེར་བ་རྣམས་ཀྱིས་ཐུན་མོང་ཐོག་ངོས་འཛིན་གནང་བཞིན་པའི་དབུ་ཁྲིད་ཅིག་ཀྱང་ཡིན། སི་ཌི་ཧྭ་མཆོག་ལ་སྙུང་གཞི་ལྕི་མོ་ཞིག་ཕོག་པའི་རྐྱེན་གྱིས་ཟླ་འདིའི་ཕྱི་ཚེས་ ༢ ཉིན་ཧོང་ཀོང་དུ་དགོངས་པ་རྫོགས་ཡོད་འདུག་ལ་ད་ལྟ་ཁོང་ལ་དགུང་ལོ་ ༨༠ ཙམ་ཡིན་འདུག  

གསར་འགོད་པ། བནྡེ་སྐྱབས།