རྒྱ་ནག་གི་ཕྱི་སྲིད་བློན་ཆེན་གཞོན་པ་སོན་ཝུ་ཏུང་ཟེར་བར་རྒྱུ་རྐྱེན་གང་ཡང་འགྲེལ་བརྗོད་མེད་པའི་ཐོག་ནས་གོ་གནས་ནས་ཕྱིར་ཕུད་བྱས་འདུག
རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ། སོན་ཝུ་ཏུང་ཕྱི་ལོ་ ༢༠༡༩ ནས་ ༢༠༢༢ བར་རྒྱ་གར་དུ་རྒྱ་ནག་གཞུང་ཚབ་པ་ཡིན་སྐབས། རྒྱ་དཀར་ནག་གི་དམག་མིའི་བར་གྷ་ཝན་ལུང་གཤོངས་སུ་གདོང་ཐུག་བྱུང་སྟེ་རྒྱ་གར་གྱི་དམག་མི་ ༢༠ དང་རྒྱ་ནག་གི་དམག་མི་བཞི་རྐྱེན་འདས་སུ་ཕྱིན་པ་སོགས་རྒྱ་དཀར་ནག་གཉིས་ཀྱི་འབྲེལ་ལམ་ཧ་ཅང་ཞན་པོར་གྱུར་ཡོད་སྐོར་བརྗོད་འདུག་ལ། སོན་ཝུ་ཏུང་གིས་ཕྱི་ལོ་ ༢༠༡༣ ནས་ ༢༠༡༧ བར་པ་ཀི་སི་ཐན་དུ་རྒྱ་ནག་གཞུང་ཚབ་པའི་འགན་འཁུར་བ་དང་། ཟླ་སྔོན་མའི་ནང་པ་ཀི་སི་ཐན་གྱི་གཞུང་ཚབ་པ་དང་། གླིང་ཕྲན་རྒྱལ་ཁབ་བྷིར་ནའེ་དང་མ་ལི་ཞི་ཡའི་གཞུང་ཚབ་པར་ཐུག་འཕྲད་བྱས་པ་དེ་ཁོའི་ཕྱི་འབྲེལ་མཐའ་མ་ཡིན་པ་རེད། དེ་བཞིན། འདས་ལོར་བྱང་ཀོ་རི་ཡའི་སྲིད་འཛིན་ཀེམ་ཇོང་ཨན་རྒྱ་ནག་ཏུ་བསྐྱོད་སྐབས་སོན་ཝུ་ཏུང་ནི་ཀེམ་སྣེ་ལེན་བྱེད་མཁན་གྱི་རྒྱ་ནག་གི་དཔོན་རིགས་གཙོ་གྲས་ཡིན་ཞིང་། དེ་སྔ་ཡང་སོན་ཝུ་ཏུང་བྱང་ཀོ་རི་ཡར་བསྐྱོད་མྱོང་བ་སོགས་ཨེ་ཤ་ཡའི་རྒྱལ་ཁབ་ཁག་གཙོ་བྱས་པའི་འཛམ་གླིང་རྒྱལ་ཁབ་གང་མང་ཞིག་ལ་ཕྱི་འབྲེལ་གྱི་འབྲེལ་ལམ་ཡོད་སྟབས། ཁོ་པ་ཕྱི་ལོ་ ༢༠༢༢ ཟླ་ ༡༡ པར་རྒྱ་ནག་གི་ཕྱི་སྲིད་བློན་ཆེན་གཞོན་པར་བསྐོ་གཞག་བྱས་འདུག
དབྱེ་ཞིབ་པས། སོན་ཝུ་ཏུང་གནས་དབྱུང་བཏང་བ་དེས་པེ་ཅིན་གྱི་མཐོ་རིམ་མགོ་འཁྲིད་ནང་ཁུལ་གྱི་རྩོད་རྙོག་དང་ཆབ་སྲིད་ཀྱི་ཁ་ཕྱོགས་ལ་འགལ་ཟླ་འབྱུང་གི་ཡོད་པ་གསལ་བོ་ཡིན་པ་དང་། ལྷག་པར་དུ་སྟག་དང་སྦྲེང་མ་མཉམ་རྡུང་ཞེས་ཞི་ཅིན་ཕིན་གྱི་ཆབ་སྲིད་ལངས་ཕྱོགས་ལ་རྒྱབ་འགལ་བྱེད་མཁན་གྱི་དཔོན་རིགས་རྣམས་ལྐོག་ཟ་རུལ་སུངས་ཀྱི་ཉེས་མིང་འོག་ཚར་གཅོད་བྱེད་བཞིན་ཡོད་པར་འབྲེལ་བ་ཡོད་པའི་ཚོད་དཔག་བྱེད་བཞིན་འདུག
རྒྱ་ནག་གི་དབུས་སྒྲིག་ཁྲིམས་ཞིབ་བཤེར་ལྷན་ཁང་དང་རྒྱལ་ཡོངས་ལྟ་སྐུལ་ལྷན་ཁང་གི་གནས་ཚུལ་ལྟར་ན། ཞི་ཅིན་ཕིན་གྱི་སྟག་དང་སྦྲེང་མ་མཉམ་རྡུང་གི་སྲིད་ཇུས་ཁྲོད། འདས་ལོ་གཅིག་པུར་རྒྱ་ནག་གིས་ལྐོག་ཟ་རུལ་སུངས་ཀྱི་གྱོད་གཞི་འབུམ་གཅིག་ལྷག་ལ་བརྟག་དཔྱད་བྱས་པ་དང་། མི་གྲངས་ཁྲི་ ༩༣༨༠༠༠ ལ་ཆད་པ་བཅད་ཡོད་ཅིང་། ཆད་པ་བཅད་པའི་ཁྲོད་ཞིང་ཆེན་དང་བློན་ཆེན་རིམ་པའི་ལས་བྱེད་ ༦༩ དང་། འཛིན་སྐྱོང་རིམ་པའི་ལས་བྱེད་ ༤༡༥༥། རྫོང་རིམ་པའི་ལས་བྱེད་ ༣༥༠༠༠། གྲོང་བརྡལ་རིམ་པའི་ལས་བྱེད་ ༡༢༥༠༠༠ བཅས་ཚུད་ཡོད་འདུག
གསར་འགོད་པ། སྐལ་བཟང་སྦྱིན་པ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
