གནས་ཚུལ་བཏང་འབྱོར་བྱུང་བ་ལྟར་ན། བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་སྐབས་བཅུ་བཞི་བའི་བཀའ་ཁྲིའི་ལས་ཡུལ་འཁྱོལ་ལ་ཉེ་སྐབས། རྒྱ་གར་ལྷོ་ཕྱོགས་བོད་མིའི་གཞིས་སྒར་ཁག་དང་གདན་ས་ཁག་ཏུ་གཞུང་འབྲེལ་ཕྱོགས་སྐྱོད་ཅིག་གནང་གིན་ཡོད་ཅིང་། རེས་བཟའ་ཉི་མའི་ཉིན་འབྲས་སྤུངས་བླ་སྤྱིའི་འདུ་ཁང་དུ་འབྲས་སྤུངས་དགོན་པའི་གྲྭ་བ་རྣམས་དང་། ༧གོང་ས་མཆོག་གི་གསུང་ཆོས་ལ་བཅར་མཁན་ཕྱོགས་མཐའ་ཁག་གི་དགེ་འདུན་པ་བཅས་ལགསུང་བཤད་གནང་འདུག བཀའ་ཁྲི་མཆོག་གིས། བཀའ་ཤག་སྐབས་བཅུ་གསུམ་དང་བཅུ་བཞི་བའི་ལོ་ངོ་ ༡༠ རིང་གི་ལས་དོན་ཐོག་ལབ་རྒྱུ་གླེང་རྒྱུ་མ་བྱུང་ཙམ་གྱིས་འགྲོ་ཐུབ་པ་བྱུང་ཡོད། དེ་ནི་༧གོང་ས་མཆོག་གི་ལམ་སྟོན་དང་མང་ཚོགས་ཀྱི་རྒྱབ་སྐྱོར་ཉག་གཅིག་ལ་བརྟེན་ནས་བྱུང་བ་ཆགས་ཡོད་སྟབས། ཐེངས་འདིར་རྒྱ་ཆེའི་མང་ཚོགས་ལ་བཀའ་དྲིན་རྗེས་དྲན་དང་། ཐུགས་རྗེ་ཆེ་ཞུ་བར་བཅར་བ་ཡིན། ཞེས་དང་།
ཁོང་གིས་མུ་མཐུད་དུ་གྲྭ་བཙུན་ཚོ་ཆབ་སྲིད་ནང་མཉམ་ཞུགས་གནང་གལ་ཆེ་སྐོར་གསུངས་དོན། རབ་བྱུང་བ་དང་བཙུན་མ་ཚོས་འོས་ཤོག་གི་ཆ་ཤས་ལེན་དང་ལེན་བཞིན་པ་དེ་ནི། ཆབ་སྲིད་དང་སྤྱི་ཚོགས་ཀྱི་ངོས་ནས་བལྟས་ན་ཡག་པོ་རེད། གྲྭ་བཙུན་སྔགས་འཆང་སུ་ཞིག་ཡིན་རུང་། སོ་སོའི་ཉམས་ལེན་བྱེད་ཕྱོགས་དང་། སྡོམ་པ་བཞེས་ཡོད་མེད་ཙམ་མ་གཏོགས་ཚང་མ་བོད་པ་ཡིན་པ་གཅིག་མཚུངས་རེད་ལ། བོད་བསྟན་པ་ཆབ་སྲིད་ཐོག་འགན་འཁྲི་ཡོད་པ་ཡང་གཅིག་མཚུངས་རེད། ཆབ་སྲིད་ལ་འགན་ལེན་སྐབས། ཆབ་སྲིད་ལས་ཀྱི་སྣེ་མོ་བ་འོས་འདེམས་ཀྱི་ཆ་ཤས་ལེན་རྒྱུ་གལ་ཆེན་ཡིན། སྤྱིར་བོད་མིའི་སྤྱི་ཚོགས་དང་། ལྷག་པར་དུ་བཙན་བྱོལ་སྤྱི་ཚོགས་ལ་མཚོན་ན། གྲྭ་བཙུན་གྱིས་མི་འབོར་གྱི་བརྒྱ་ཆ་མི་ཉུང་བ་ཞིག་བཟུང་ཡོད་སྟབས། གྲངས་ཚད་མང་པོ་ཡོད་པའི་སྡེ་ཚན་ཞིག་གིས་ཆབ་སྲིད་ཀྱི་ལས་རིམ་ནང་གོ་སྐབས་ལེན་རྒྱུ་མེད་པ་ཆགས་ན། ཧ་ཅང་མི་འོས་པ་ཞིག་དང་བོད་པའི་ཆབ་སྲིད་ཀྱི་འཕེལ་རིམ་ཐོག་དོ་ཕོག་འགྲོ་རྒྱུའི་གནས་སྟངས་ཤིག་ཆགས་ཡོད། འོན་ཀྱང་ཆོས་འདུལ་བའི་ཐད་ནས་བཤད་ན་འགྲིག་གི་ཡོད་མེད། མཁས་པ་ཚོས་བརྟག་དཔྱད་གཏོང་དགོས་པ་ཞིག་རེད། ལྷག་པར་དུ་ལོ་ངོ་བཞི་བརྒྱ་མ་ཟིན་ཙམ་གྱི་ལོ་རྒྱུས་ཡོད་པའི་དགའ་ལྡན་ཕོ་བྲང་གཞུང་གི་ལས་དོན་ནང་རབ་བྱུང་བས་ཐེ་ཇུས་མ་བྱས་ན་ཁྱད་མཚར་བོ་ཞིག་ཡིན་ལ། ཆོས་སྲིད་ཟུང་འབྲེལ་ཟེར་བ་འདི་ལ་ཡང་འགྲེལ་བཤད་རྒྱག་མ་ཤེས་པ་ཞིག་དང་། རྐང་པ་ཡ་གཅིག་མེད་པའི་བཟོ་འདྲ་བོ་ཞིག་ཆགས་རྒྱུའི་ཉེན་ཁ་ཡོད། ཅེས་གསུངས་འདུག
མཇུག་ཏུ་ཁོང་གིས་ཐེངས་འདིར་མང་ཚོགས་ལ་ཐུགས་རྗེ་ཆེ་ཞུ་བར་བཅར་བ་དང་མཉམ་དུ། ད་བར་བཀའ་ཤག་གི་ལས་དོན་ཐོག་ནོར་འཁྲུལ་དང་འཐུས་ཤོར། ལེགས་འགྲུབ་མ་བྱུང་བའི་རིགས་ལ་དགོངས་སེལ་ཡང་མཉམ་དུ་ཞུ་དགོས་ཀྱང་། སྔོན་མ་སྤྱི་འཐུས་ཚོགས་གཙོ་ལས་འཁྱོལ་སྐབས། ལོ་བཅུ་ལ་སྤྱི་འཐུས་ཚོགས་གཙོའི་ལས་འགན་འཁྱེར་བའི་རིང་ལས་དོན་མ་འགྲུབ་པའི་རིགས་ལ་བཟོད་གསོལ་ཞུས་ཏེ། འབྱུང་འགྱུར་སྒྲིག་འཛུགས་ཀྱི་ལས་གནས་རྗེས་འབྲེལ་གྱི་ལས་ཀ་ཡོང་ས་མ་རེད་ཅེས་གསལ་བོ་ཞུས་ཡོད་ཀྱང་། མང་ཚོགས་ཀྱིས་དེ་ལ་མ་གསན་པར། བསྐྱར་དུ་བཀའ་བློན་ཁྲི་པར་འོས་བླུགས་པ་རེད། གལ་སྲིད་ནོར་འཁྲུལ་འདྲ་ཕྱིན་ཡོད་ན་ང་ཚོས་མཉམ་དུ་བཟོས་པ་རེད་ལ། དགོངས་སེལ་ཞུ་དགོས་ཀྱང་ཕན་ཚུན་གཉིས་ཀར་ཞུ་རེས་བྱ་དགོས་པ་རེད། ཅེས་གསུངས་སོང་།
བཀའ་ཁྲི་རིན་པོ་ཆེ།
མང་ཚོགས་ལ་ཐུགས་རྗེ་ཆེ་ཞུ་རྒྱུའི་གཞུང་འབྲེལ་ཕྱོགས་བསྐྱོད་མཇུག་བསྒྲིལ་ཏེ་རྡ་སར་ཕེབས་ནས་ད་ལྟ་༧རྒྱལ་བ་ཀརྨ་པ་རིན་པོ་ཆེར་རྒྱ་གར་སྐོར་བསྲུང་བ་དང་གསར་འཕྲིན་འགོད་མཁན་ཚོས་སྐུ་ངལ་བཟོད་བཞིན་འདུག་པར།
མང་ཚོགས་ཡོད་དོ་ཅོག་སར་ཐུགས་རྗེ་ཆེ་ཞུ་རྒྱུ་ཆེད་གཞུང་འབྲེལ་ཕྱོགས་བསྐྱོད་ཞུས་བསྡད་ན་གཞུང་དངུལ་མང་པོ་རྫོགས་ཡོང་།
དེ་ལས་ཏ་གསར་ལམ་ཁག་རྒྱུད་བཀའ་ཤག་གམ་བཀའ་བློན་ཚང་མས་མཚན་ཐོག་ཐུགས་རྗེ་ཆེ་ཞུ་ན་འཐུས་ཡོང་སེམས།
བཀྲིན་བདེ་ལེགས།
མིན་འགྲོ་ཟེར་ཡང་ངས་ལས་ཡིན་ཟེར་བ་ཞིག་བྱུང་ན་འགྲིག་གི་རེད། ངས་ལས་ཀྱི་ཡིན་ཟེར་ཡང་ངས་བྱས་མིན་འགྲོ་ཟེར་མཁན་ཞིག་མི་ཡོང་བའི་ངེས་པ་སུ་ལའང་མེད། ད་ཐེངས་ཀྱི་གསུང་བཤད་ཁ་ཡིག་ལ་བཟོད་གསོལ་ཞུ་རྒྱུ་མེད་ཅེས་འདོགས་པར་འོས་སོ།།
གསར་འགྱུར་འགོད་མཁན་དག་གི་གཟབ་གཟབ་གནང་རྒྱུ་གལ་ཆེ། བློ་གསལ་གླིང་གྲཱ་ཚང་དང་། འབྲས་སྤུངས་བླ་སྤྱིའི་འདུ་ཁང་ཟེར་དགོས་བ་རེད། ད་་་་་དུས་ཚོད་མི་འདུག་མི་གཏོགས་མང་པོ་ཞིག་ཞུ་རྒྱུ་འདུག།
༼སྔོན་མ་སྤྱི་འཐུས་ཚོགས་གཙོ་ལས་འཁྱོལ་སྐབས། ལོ་བཅུ་ལ་སྤྱི་འཐུས་ཚོགས་གཙོའི་ལས་འགན་འཁྱེར་བའི་རིང་ལས་དོན་མ་འགྲུབ་པའི་རིགས་ལ་བཟོད་གསོལ་ཞུས་ཏེ། འབྱུང་འགྱུར་སྒྲིག་འཛུགས་ཀྱི་ལས་གནས་རྗེས་འབྲེལ་གྱི་ལས་ཀ་ཡོང་ས་མ་རེད་ཅེས་གསལ་བོ་ཞུས་ཡོད་ཀྱང་། མང་ཚོགས་ཀྱིས་དེ་ལ་མ་གསན་པར། བསྐྱར་དུ་བཀའ་བློན་ཁྲི་པར་འོས་བླུགས་པ་རེད། གལ་སྲིད་ནོར་འཁྲུལ་འདྲ་ཕྱིན་ཡོད་ན་ང་ཚོས་མཉམ་དུ་བཟོས་པ་རེད་ལ། དགོངས་སེལ་ཞུ་དགོས་ཀྱང་ཕན་ཚུན་གཉིས་ཀར་ཞུ་རེས་བྱ་དགོས་པ་རེད། ཅེས་གསུངས་སོང་། ༽ ལྟོས་དང་ཅི་འདྲ་འདུག་གམ། ༼མིན་འགྲོ༽ལབ་མཁན་ཞིག་གདམ་ག་བྱེད་མི་རུང་ཟེར་དོན་འདི་རེད་ལ། ནོར་འཁྲུལ་ཕྱིར་མང་ཚོགས་ཀྱི་མགོར་གཡུགས་ན་བཙན་བྱོལ་བོད་མི་དེང་ཕྱིན་གཞིས་ལུས་བོད་མིའི་མིག་ནང་དུ་ནག་ཉེས་བཟོ་མཁན་ཆགས་ཟིན་པ་མིན་ནམ།
ད་ཐེངས་ཚང་མ་ལོས་༼ངས་ལས་ཀི་ཡིན༽ཟེར་མཁན་ཞིག་གདམ་ག་བྱེད་གལ་ཆེ་བ་འདི་ལས་གསལ་བོར་བསྟན་ཡོད་ལ། དེའི་དགེ་བ་ནི་མ་འོངས་པར་ནོར་འཁྲུལ་ཁོ་རང་གཅིག་པུ་ལས་མང་ཚོགས་ཀྱིས་ཁུར་དགོས་མེད།