རྒྱ་ནག་དམངས་གཙོར་འགྲོ་རྒྱུ་མིན།

ཕྱི་ཟླ་ ༡ ཚེས་ ༢༤ ཉིན་རྒྱ་ནག་མི་དམངས་ཚོགས་ཁང་ཆེན་མོ་ཟེར་བའི་ནང་། རྒྱ་ནག་རྒྱལ་ཡོངས་མི་དམངས་འཐུས་མིའི་རྒྱུན་ལས་ལྷན་ཚོགས་ཀྱི་གོ་སྒྲིག་འོག ༼རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་ལུགས་མ་ལག་གཞི་གྲུབ་པ། ༽ཞེས་པའི་ཚོགས་འདུ་ཞིག་བསྐངས་ཡོད་ཅིང་། ཚོགས་འདུ་དེར་རྒྱ་ནག་དབུས་གཞུང་གི་མཐོ་རིམ་དཔོན་རིགས་ཁག་ཅིག་དང་། ཞིང་ཆེན་དང་རང་སྐྱོང་ལྗོངས་ཀྱི་འབྲེལ་ཡོད་དཔོན་རིགས། དེ་བཞིན་རྒྱ་ནག་གི་ཆེད་མཁས་པ་སོགས་མི་གྲངས་ ༤༠༠ ལྷག་མཉམ་ཞུགས་བྱས་ཡོད་པ་དང་། ཚོགས་ཐོག་ཏུ་རྒྱ་ནག་མི་དམངས་འཐུས་མིའི་ཚོགས་ཆེན་གྱི་ཚོགས་གཙོ་ཝུའུ་པང་ཀོ་ཡིས། རྒྱ་ནག་དུས་ནམ་ཡང་ཀ་བ་གསུམ་དང་གྲོས་ཚོགས་གཉིས་ལྡན་གྱི་དམངས་གཙོའི་ལམ་སྲོལ་ཐོག་བསྐྱོད་རྒྱུ་མིན་པར། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཐོག་མུ་མཐུད་མདུན་སྐྱོད་བྱ་རྒྱུ་ཡིན། ཞེས་ཚིག་ཐོག་ཆོད་པོས་བསྒྲགས་འདུག  

སྐབས་དེར་ཝུའུ་པང་ཀོ་ཡིས།  ཕྱི་ལོ་ ༡༩༨༢ ལོར་རྒྱ་ནག་གིས་ད་ལྟའི་རྩ་ཁྲིམས་འདི་ལག་སྟར་བྱས་པ་ནས་བཟུང་། སྔ་ཕྱིར་ཐེངས་བཞི་བྱེ་བྲག་གི་ནང་དོན་རེ་ཟུང་ལ་བསྒྱུར་བཅོས་བཏང་སྟེ། ༢༠༡༠ ལོའི་མཇུག་དུ་གཏན་འཁེལ་རང་བཞིན་གྱི་བཅའ་ཁྲིམས་དོན་ཚན་ ༢༣༦ དང་། སྲིད་འཛིན་ཁྲིམས་སྲོལ་ ༦༩༠ ། ས་གནས་རང་བཞིན་གྱི་ཁྲིམས་སྲོལ་ ༨༦༠༠ ལྷག་ཕྱོགས་སྒྲིག་བྱས་ཏེ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་ལུགས་མ་ལག་ཆ་ཚང་བ་ཞིག་དངོས་འབེབས་བྱུང་ཡོད། ད་ལྟ་རྒྱ་གཞུང་གིས་མ་ཁི་སི་རིང་ལུགས་ཀྱི་གཞི་རྩའི་ལྟ་གྲུབ་དང་རྒྱ་ནག་གི་དངོས་ཡོད་གནས་སྟངས་གཉིས་མཉམ་འབྲེལ་གྱིས་རང་ཉིད་ཀྱི་ལམ་ཁར་བསྐྱོད་དེ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དམངས་གཙོའི་ལམ་ལུགས་ཤིག་འཛུགས་སྐྲུན་བྱ་རྒྱུ་ཡིན་ལ།  དེ་ནི་དམར་ཤོག་རིང་ལུགས་པའི་ཕྱོགས་ཡོངས་ཀྱི་ལོ་རྒྱུས་ཉམས་མྱོང་ལས་ཐོབ་པའི་མཇུག་སྡོམ་ཡིན་སྟབས། རྒྱ་ནག་དུས་ནམ་ཡང་ཀ་བ་གསུམ་དང་གྲོས་ཚོགས་གཉིས་ལྡན་གྱི་དམངས་གཙོའི་ལམ་ལུགས་དང་། ཆབ་སྲིད་ཤོག་ཁག་མང་པོའི་དམངས་གཙོའི་ལམ་ལུགས། རྒྱལ་ཕྲན་མཉམ་འབྲེལ་གྱི་དམངས་གཙོའི་ལམ་ལུགས། དེ་བཞིན་དཔལ་འབྱོར་སྒེར་བདག་དང་བསམ་བློའི་མཛུབ་སྟོན་སྣ་མང་ཅན་གྱི་ལམ་ཕྱོགས་བཅས་སུ་བསྐྱོད་རྒྱུ་མིན། ཞེས་བརྗོད་འདུག 

ལོ་སྔོན་མར་སྲིད་བློན་ཝུན་ཅ་པའོ་ཡིས་རྒྱ་ནག་གི་ཆབ་སྲིད་ལམ་ལུགས་བཅོས་བསྒྱུར་བྱ་དགོས་སྐོར་སྔ་ཕྱི་ཐེངས་ ༩ ལ་གླེང་སློང་བྱས་ཡོད་པར་མ་ཟད། རྒྱ་ནག་ཏུ་དམངས་གཙོས་བཅོས་བསྒྱུར་མ་བྱུང་ཚེ་སྔར་ཡོད་གྲུབ་འབྲས་མཐའ་དག་ཤུལ་མེད་དུ་འགྲོ་རྒྱུ་ཡིན་པ་ནན་བརྗོད་བྱས་ཡོད་ལ། ཐེངས་འདིར་ཝུའུ་པང་ཀོ་ཡིས་དེ་ལས་ལྡོག་སྟེ། རྒྱ་ནག་དུས་གཏན་དུ་དམར་ཤོག་པས་དབུ་འཁྲིད་པའི་སྤྱི་ཚོགས་རིང་ལུགས་ཀྱི་ལམ་དུ་མ་བསྐྱོད་ཚེ། གཞི་རྩའི་ལམ་ལུགས་ཀྱི་རྩ་དོན་ལ་གཡོ་འགུལ་ཐེབས་ཏེ་རྒྱ་ནག་ནང་ཁུལ་རྙོག་ཟིང་འབྱུང་རྒྱུ་ཡིན་པར་མ་ཟད། ད་ལྟའི་འཕེལ་རྒྱས་ཡོད་ཚད་ལྷག་མེད་དུ་འགྲོ་རྒྱུ་ཡིན་སྐོར་བརྗོད་ཡོད།  ཝུན་དང་ཝུའུ་གཉིས་ཀྱི་རྩ་བའི་ལྟ་གྲུབ་འགལ་ཟླར་གྱུར་ཡོད་ནའང་། ད་ལྟའི་རྒྱ་ནག་ནི་འཆི་གསོན་གྱི་དཀྱོགས་མཚམས་ཤིག་ལ་བསླེབས་ཡོད་པའི་སེམས་འཚབ་གཅིག་མཚུངས་སུ་ཐོན་ཡོད་པ་རེད། 

རྒྱ་ནག་སྤྱི་ཚོགས་ཚན་རིག་ཁང་གི་མགོ་གཙོ་ལིས་ལེན་གྱིས། ཁྲིམས་ལུགས་ཀྱི་མ་ལག་གྲུབ་པ་ཙམ་གྱིས་ཁྲིམས་སྲིད་ལམ་ལུགས་ཀྱི་ཚད་གཞི་མཐོན་པོར་བསླེབས་པ་མཚོན་མི་ཐུབ་པ་དང་། ནམ་རྒྱུན་རྒྱ་ནག་གཅིག་ཅེས་བརྗོད་སྐབས་སྐམ་ས་ཆེན་པོ་གཙོས་པའི་ཧོང་ཀོང་དང་ཨོ་མིན། ཐེ་ཝན་བཅས་འདུས་ཡོད་པ་རེད། ཡིན་ནའང་། ཁྲིམས་ལུགས་མ་ལག་དེའི་ཁྲོད་ ༼རྒྱལ་ཁབ་གཅིག་ལ་ལམ་ལུགས་གཉིས༽ཀྱི་དམིགས་བསལ་སྲིད་འཛིན་ལམ་ལུགས་ཚུད་མེད་པས།  རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་ལུགས་མ་ལག་དེར་ད་དུང་བསྐྱར་ཞིབ་དང་བསམ་གཞིག་གཏོང་དགོས། ཞེས་བརྗོད་ཡོད་འདུག 

 གསར་འགོད་པ། ཚེ་རིང་རྒྱལ།