བུད་མེད་ཀྱི་མཛེས་བ་ངོ་མ་ཡ་རབས་སེམས་བཟང་ཡིན།

ཁྱེད་ཅག་བུད་མེད་ཀྱི་སློབ་གྲྭ་ཞིག་ཡིན་སྟབས། ང་ལ་དམིགས་བསལ་གྱི་སྐད་ཆ་ཞིག་ཤོད་རྒྱུ་ཡོད་པ་ནི། བུད་མེད་ཚོས་ཕྱིའི་མཛེས་སྡུག་གཅིག་པུར་དོ་སྣང་སྤྲོད་རྒྱུ་ཙམ་མིན་པར། ནང་གི་མཛེས་སྡུག་ལའང་བསམ་བློ་བཏང་སྟེ་སེམས་བཟང་པོ་དང་ཡ་རབས་ལྡན་པ་ཞིག་བྱུང་ན་དོན་དམ་གྱི་མཛེས་སྡུག་དེ་ཡོད་པ་རེད། ཅེས་༧གོང་ས་མཆོག་གིས་གསུངས།

༧གོང་ས་མཆོག་གིས་རྒྱ་གར་ལྷོ་ཕྱོགས་འབྲས་སྤུངས་དང་དགའ་ལྡན་བཅས་ཀྱི་བཀའ་ཆོས་གྲུབ་རྗེས་རཱ་ཇི་སི་ཐན་དུ་མཛད་འཕྲིན་སྐྱོང་བཞིན་པ་དང་། ཕྱི་ཚེས་ ༨ ཉིན་ཁུལ་དེའི་རྒྱལ་པོའི་སྐུ་འཁོར་དང་ཇོ་ཌ་པུར་གྲོང་ཁྱེར་ཧིན་བོད་མཛའ་འབྲེལ་ཚོགས་པ་དང་ས་གནས་བོད་རིགས་སུད་འཚོང་བའི་སྐུ་ཚབ་རྣམས་ཀྱི་ཕེབས་བསུའི་འོག ཇོ་ཌ་པུར་རྒྱལ་པོའི་གཟིམ་ཁང་དུ་ཆིབས་བསྒྱུར་བསྐྱངས་ཡོད་ཅིང་། ཕྱི་ཚེས་ ༩ ཉིན་ཇོ་ཌ་པུར་ཨ་ར་ཝ་ལི་སློབ་ཁང་དུ་རྒྱལ་པོའི་སྐུ་འཁོར་དང་ཨ་ར་ཝ་ལི་སློབ་ཕྲུག་སོགས་མི་ ༤༠༠ ཙམ་ལ་ནང་སེམས་སུ་བདེ་སྐྱིད་བསྐྲུན་ཐབས་སྐོར་ལ་བཀའ་གནང་དོན།  རྒྱ་གར་དུ་སྲོལ་རྒྱུན་ནས་དར་བའི་ཆོས་ལུགས་མཐུན་སྒྲིལ་དང་། འཚེ་བ་མེད་པའི་ལྟ་གྲུབ་དེ་ད་ཆར་འཛམ་གླིང་སྟེང་ཧ་ཅང་འབྲེལ་བ་ཆེན་པོ་ཆགས་ཡོད། རྒྱ་གར་དང་བོད་ཀྱི་འབྲེལ་བ་ནི་དགེ་རྒན་དགེ་ཕྲུག་གི་འབྲེལ་བ་ཡིན་ལ། ང་ཚོ་རྒྱ་གར་གྱིས་བློས་འགལ་ཆོག་པའི་དགེ་ཕྲུག་ཡིན། གང་ཡིན་ཟེར་ན། རྒྱ་གར་དུ་སངས་རྒྱས་བསྟན་པར་འཕེལ་འགྲིབ་སྣ་ཚོགས་བྱུང་ཡོད་ཀྱང་། བོད་པ་ཚོས་དཔལ་ནཱ་ལེནྡྲའི་སྲོལ་རྒྱུན་ནས་དར་བའི་བསྟན་པ་འཛིན་སྐྱོང་སྤེལ་གསུམ་བྱེད་ཐུབ་ཡོད། ཅེས་དང་།

ཡང་ཁོང་གིས་སློབ་ཕྲུག་ཚོར་བཀའ་གནང་དོན། ཁྱེད་ཚོ་དུས་རབས ༢༡ པའི་མི་རབས་ཆགས་ཡོད་སྟབས། དུས་རབས་ཉེར་གཅིག་པ་འདི་གྲོས་མོལ་གྱི་དུས་རབས་ཤིག་བཟོ་དགོས། དཀའ་ངལ་ནི་མིའི་རིགས་ནམ་གནས་བར་ལྷག་རྒྱུ་ཡིན་སྟབས། དཀའ་ངལ་དེ་གྲོས་མོལ་དང་བསམ་ཤེས་ཀྱི་ཐོག་སེལ་རྒྱུ་ཧ་ཅང་གལ་ཆེན་ཆགས་ཡོད། ཅེས་དང་།  ང་ཚོར་འཛམ་གླིང་འདི་གཅིག་པུ་ལས་ཡོད་པ་མ་རེད། ཟླ་བའི་ཁང་བཟང་ཞེས་སྙན་ངག་འབྲི་དུས་མཛེས་པའི་དཔེ་མཚོན་ཙམ་དུ་འགོད་རྒྱུ་ཡོད་ཀྱང་། ཟླ་བའི་སྟེང་གསོན་པོར་འཚོ་རྒྱུའི་གཞི་རྟེན་ཡོད་པ་མ་རེད། ད་ལྟ་ང་ཚོ་དང་ཁོང་ཚོ་ཞེས་རང་རྒྱལ་གཞན་ཕམ་གྱི་བསམ་བློ་གཏོང་རྒྱུའི་དུས་ཚོད་ཡོལ་ཟིན་པ་རེད། དེ་ལས་ལྡོག་སྟེ། འཛམ་གླིང་ཧྲིལ་པོར་སྡོད་མཁན་འགྲོ་བ་མིའི་རིགས་ཚང་མས་གཅིག་གྱུར་གྱི་འདུ་ཤེས་འཛིན་དགོས་པའི་དུས་ལ་བབས་ཡོད། ཅེས་གསུངས་འདུག

ཕྱི་ཚེས་ ༩ ཉིན་༧གོང་ས་མཆོག་རྒྱལ་པོ་ག་ཇ་སིངྒ་གི་མཧཱ་ལཀ་ཤི་མིན་བུད་མེད་སློབ་གྲྭར་ཕེབས་ཏེ་བཀའ་གནང་དོན། བུད་མེད་སློབ་གྲྭ་འདི་ལྟ་བུ་ཞིག་བཙུགས་པ་དེས་བུད་མེད་ནུས་ཤུགས་གོང་མཐོར་གཏོང་རྒྱུར་ཕན་ཐོགས་ཆེན་པོ་བྱུང་ཡོད། མི་ཚེ་བདེ་སྐྱིད་ལྡན་པ་ཞིག་ཡོང་བར་བྱམས་བརྩེ་དགོས་རྒྱུ་ཧ་ཅང་གལ་ཆེན་རེད། ཁྱེད་ཅག་བུད་མེད་སློབ་གྲྭ་ཞིག་ཆགས་ཡོད་སྟབས། ང་ལ་དམིགས་བསལ་སྐད་ཆ་ཞིག་ཤོད་རྒྱུ་ཡོད་པ་ནི། བུད་མེད་ཚོས་ཕྱིའི་མཛེས་སྡུག་གཅིག་པུར་དོ་སྣང་སྤྲོད་རྒྱུ་ཙམ་མིན་པར། ནང་གི་མཛེས་སྡུག་ལའང་བསམ་བློ་བཏང་སྟེ་སེམས་བཟང་པོ་དང་ཡ་རབས་ལྡན་པ་ཞིག་བྱུང་ན་དོན་དམ་གྱི་མཛེས་སྡུག་དེ་ཡོད་པ་རེད། ཚན་རིག་པ་མང་པོ་ཞིག་གིས་རིག་པས་བརྟག་དཔྱད་བྱས་ཏེ་ཅི་ཙམ་གྱི་བསམ་བློ་བག་ཕེབས་ཡོད་པ་དེ་ཙམ་གྱིས་མིའི་ལུས་པོ་བདེ་ཐང་ཡིན་པར་མ་ཟད། ལུས་ཀྱི་ཟུངས་བཅུད་ཀྱང་ཡག་པོ་ཡོད་པ་ར་འཕྲོད་བྱུང་ཡོད། ཕ་མ་གཉིས་ལས་གཞན་གྱི་སྡུག་བསྔལ་ལ་ཚོར་ཤུགས་སུ་ཆེ་མིན་གཤིབ་བསྡུར་བྱས་ན། ཕ་ལས་མ་རྦད་དེ་ཚོར་བ་ཤུགས་ཆེ་བ་ཡོད་ལ། དེ་ནི་ལྷན་སྐྱེས་ཤིག་ཀྱང་རེད། ཅེས་གསུངས་འདུག

ར་ཇི་སི་ཐན་བོད་མི་སུད་འཚོང་བ་དང་ས་གནས་ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག ཕྱི་ཚེས་ ༡༠ ཉིན་༧གོང་ས་མཆོག་གིས་ཁུལ་དེའི་ཧ་རི་ཏཱ་ཇི་མགྲོན་ཁང་དུ། ཇོ་ཌ་པུར་རྒྱལ་པོའི་འཁོར་དང་། རྒྱ་གར་གྲོས་ཚོགས་འཐུས་མི། ཇོ་ཌ་པུར་གྲོང་ཁྱེར་སྤྱི་ཁྱབ། བོད་མི་སུད་ཚོང་བ་བཅས་མི་གྲངས་ ༤༠༠ ལྷག་ལ་བཀའ་སློབ་གནང་ཡོད་འདུག་ལ། སྐབས་དེར། གྲོང་ཁྱེར་སྤྱི་ཁྱབ་པས་༧གོང་ས་མཆོག་གི་མཛད་འཕྲིན་ལ་བསྟོད་བསྔགས་བྱས་དོན། ༧ཏཱ་ལའི་བླ་མ་མཆོག་ཇོ་ཌ་པུར་ས་གནས་སུ་ཆིབས་སྒྱུར་བསྐྱངས་པ་དེ་ནི་ས་གནས་མང་ཚོགས་ཀྱི་བསོད་ནམས་ཀྱི་བགོ་སྐལ་ཡིན་ལ། སྐུ་ཉིད་ནི་འཛམ་གླིང་སྟེང་སྙན་གྲགས་ཅན་ཞིག་ཡིན་པ་མ་ཟད། སྐུ་ཉིད་ཀྱི་མཛད་འཕྲིན་ལ་འཛམ་གླིང་མི་མང་ཚོས་བསྔགས་བརྗོད་ཆེན་པོ་ཐོབ་ཡོད། ལྷག་པར་དུ། སྐུ་ཉིད་ཀྱི་བླ་ན་མེད་པའི་མཛད་རྗེས་ལ་བལྟས་ན་ནོ་བྷེལ་ཞི་བདེའི་གཟེངས་རྟགས་དེ་ཆུང་ཆུང་ཞིག་ཆགས་ཡོད། རྒྱ་གཞུང་གིས་བོད་དབང་བསྒྱུར་བྱས་ཡོད་ཀྱང་༧སྐྱེས་ཆེན་དམ་པ་ཏཱ་ལའི་བླ་མ་མཆོག་སྐུ་འཚོ་བཞུགས་རིང་བོད་མི་ཚོར་རང་དབང་འཐོབ་རྒྱུ་ཡིན་པར་ང་ལ་ཡིད་ཆེས་བརྟན་པོ་ཡོད། ཅེས་བརྗོད་འདུག  

མཇུག་ཏུ་༧གོང་ས་མཆོག་གིས་ས་གནས་བོད་རིགས་སུད་འཚོང་བར་བཀའ་གནང་དོན། ང་ཚོ་བོད་པ་བཙན་བྱོལ་བ་ཆགས་ཏེ་མི་ལོ་ ༥༢ ཙམ་འགྲོ་བཞིན་ཡོད། ང་ཚོ་བཙན་བྱོལ་བ་ཆགས་དགོས་དོན་སོ་སོའི་ལུང་པའི་ནང་ཁྲིམས་འགལ་གྱི་ལས་ཀ་བྱས་པ་དང་རང་བྱུང་གོད་ཆག་བྱུང་བ་གང་ཡང་མ་རེད། བཙན་བྱོལ་བ་ཆགས་དོན་ནི། བོད་ནང་དཔོན་པོ་གསར་པ་ཞིག་བསླེབས་ཏེ་ང་ཚོར་བཀའ་བཏང་སྟབས། ང་ཚོ་འུ་ཐུག་སྟེ་ ༡༩༥༩ ལོར་བཙན་བྱོལ་དུ་ཡོང་དགོས་བྱུང་བ་རེད། འདས་པའི་ལོ་དེ་དག་གི་རིང་གཞིས་ལུས་རྒྱ་ཆེའི་མི་མང་སེམས་ཤུགས་མ་ཆག་པར་གནས་ཡོད་ལ། ༢༠༠༨ ལོར་བོད་ས་ཡོངས་སུ་བོད་མི་ཚོས་རྒྱ་གཞུང་ལ་ཞི་བའི་ངོ་རྒོལ་བྱས་ཡོད། ང་ཚོས་རང་དབང་ལུང་པར་གཞིས་ལུས་རྒྱ་ཆེའི་མི་མང་གི་ཚབ་བྱས་ཏེ་འབད་བརྩོན་བྱེད་བཞིན་ཡོད་པ་རེད། ཅེས་དང་། ཡང་༧གོང་ས་མཆོག་གིས་མུ་མཐུད་དོན། བཙན་བྱོལ་བོད་མིའི་འཚོ་རྟེན་གཙོ་བོ་ཞིང་ལས་ཆགས་ཡོད་ཀྱང་དེས་འདང་གི་མེད་པར་བརྟེན། སུད་ཚོང་རྒྱག་དགོས་པའི་གནས་སྟངས་བྱུང་ཡོད། རྒྱ་གར་ས་གནས་འབྲེལ་ཡོད་ཚོས་བོད་པ་ཚོར་མཐུན་འགྱུར་གནང་རྒྱུའི་ཁས་ལེན་གནང་ཡོད་སྟབས། གོ་སྐབས་འདི་བཟུང་སྟེ་ཁྱེད་རྣམ་པར་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། བོད་མི་གཞོན་སྐྱེས་ཚོས་སྤྱིར་སློབ་སྦྱོང་དང་ཡང་སྒོས་ནང་ཆོས་ལ་འབད་བརྩོན་སློབ་གཉེར་བྱ་དགོས་ཀྱི་འདུག བོད་རང་བཙན་ཤོར་པའི་རྒྱུ་རྐྱེན་གཙོ་བོ་གཅིག་དེང་གི་ཤེས་ཡོན་གྱིོས་མ་འདང་བ་ཡིན་སྟབས། ཤེས་ཡོན་སྦྱོང་རྒྱུར་འཐུས་ཤོར་ནམ་ཡང་གཏོང་མི་རུང་། ཕ་མ་ཚོས་གང་ཐུབ་ཀྱིས་ཕྲུ་གུ་ཚོར་ཤེས་ཡོན་སྤྲོད་དགོས་པ་རེད།

གསར་འགོད་པ། དཔལ་ལྡན།