རྒྱ་གཞུང་གིས་ཉེ་བའི་ལོ་འགའི་ནང་གཞི་རིམ་ས་ཁུལ་གྱི་སློབ་ཆུང་རྣམས་རྫོང་དང་གྲོང་རྡལ་དུ་གཅིག་སྡུད་བྱས་ཏེ་རྒྱ་བོད་སློབ་ཕྲུག་མཉམ་བསྲེས་ཀྱི་སློབ་གྲྭར་བསྒྱུར་ཅིང་། ད་ལོ་ནས་བཟུང་༼ ཕྱི་ལོ་ ༢༠༡༠ ནས་ ༢༠༡༡ ལོའི་བོད་ཁུལ་གཞི་རིམ་སྐད་གཉིས་བྱིས་གཉོར་སློབ་གསོ ༽ ཟེར་བ་གཏན་འབེབས་བྱས་ཏེ། བོད་ཁུལ་གྱི་གཞི་རིམ་ས་ཁུལ་ཡོངས་སུ་སྡོད་ཁང་དང་ཟས་རིན། སློབ་ཡོན་བཅས་རིན་མེད་ཐོག་སྐད་གཉིས་ཀྱི་བྱིས་གཉོར་སློབ་གསོ་སྤེལ་མགོ་བརྩམས་ཡོད་པར་མ་ཟད། ཕྱི་ལོ་ ༢༠༡༥ ལོའི་བར་སྐད་གཉིས་ཀྱི་བྱིས་གཉོར་སློབ་གསོ་མྱོང་མཁན་གྱི་བྱིས་པའི་གྲངས་ཚད་བརྒྱ་ཆ་ ༦༠ ལ་བསླེབ་དགོས་པའི་འཆར་གཞི་བཟོས་ཡོད་པ་རེད།
ཉེ་སྔོན་འདི་གའི་གསར་འགོད་པས་དབུས་སྣེ་ལེན་ཁང་ལ་གསར་དུ་འབྱོར་བའི་མདོ་དབུས་ཁམས་གསུམ་གྱི་སློབ་ཕྲུག་ཁག་ཅིག་ལ་བཅར་འདྲི་བརྒྱུད་ད་ལྟའི་བོད་ནང་གི་ས་ཁུལ་སོ་སོའི་སློབ་གསོའི་གནས་སྟངས་རྒྱུས་ལོན་བྱུང་བ་ལྟར་ན། རྒྱ་གཞུང་གིས་བོད་ཀྱི་ས་ཁུལ་སོ་སོའི་གནས་སྟངས་ལ་བལྟས་ཏེ་བོད་སྐད་ཡིག་སློབ་གསོ་རྩ་མེད་བཟོ་བའི་ཐབས་ཇུས་འདྲ་མིན་འདིང་གི་ཡོད་པ་མངོན་གསལ་རེད།
ལྷ་ས་གྲོང་ཁྱེར་ནི་རྒྱ་ཡིག་གཙོ་བོར་འཛིན་པའི་སྐད་གཉིས་སློབ་གསོ་དང་། བོད་ཀྱི་སློབ་ཕྲུག་རྒྱ་ནག་ནང་གནས་སྤོར་གྱིས་རྒྱའི་སློབ་གསོ་སྤེལ་བའི་དུས་ཡུན་སྔ་ཤོས་དེ་ཆགས་ཡོད། ལྷ་ས་གྲོང་ཁྱེར་ནས་ཡིན་པའི་སློབ་བུ་རིན་བཟང་ལགས་ཀྱིས་དེ་གའི་སློབ་གྲྭའི་གནས་སྟངས་སྐོར་ངོ་སྤྲོད་གནང་དོན། ངས་བྱིས་གཉོར་ཁང་ནས་བཟུང་རྒྱ་ཡིག་སློབ་མགོ་བརྩམས་པ་ཡིན། དེ་རྗེས་ལྷ་ས་ཧེ་ཧྲིན་སློབ་ཆུང་དུའང་ལོ་རིམ་གསུམ་པའི་རྗེས་ནས་བཟུང་། བོད་ཡིག་མ་གཏོགས་སློབ་དེབ་གཞན་ཚང་མ་རྒྱ་ཡིག་རྒྱ་སྐད་སྟེང་ཁྲིད་ཀྱིན་འདུག ང་ཚོའི་སློབ་གྲྭའི་ནང་སློབ་མ་མང་ཤོས་བོད་རིགས་ཡིན་ནའང་། དགེ་རྒན་མང་ཤོས་རྒྱ་མི་རེད། སློབ་གྲྭའི་ཁོར་ཡུག་ཏུ་རྒྱ་ཡིག་གི་དུས་དེབ་དང་ཚགས་པར་མང་པོ་ཀློག་རྒྱུ་ཡོད་མོད། བོད་ཡིག་གི་དུས་དེབ་ཚགས་པར་མཐོང་རྒྱུ་མི་འདུག དུས་རྒྱུན་སློབ་མ་རྣམས་ཀྱིས་ཕན་ཚུན་ལ་སྐད་ཆ་བཤད་སྐབས་ཀྱང་རྒྱ་སྐད་ཤུགས་ཆེ་བ་ཡོད། ད་དུང་རྒྱ་ཡིག་འཛིན་གྲྭའི་ནང་བོད་སྐད་མི་ཤེས་པའི་བོད་རིགས་སློབ་མའང་མང་པོ་འདུག ད་ལྟ་ངས་ཀྱང་བོད་ཡིག་ཀློག་ཐུབ་པ་ཙམ་ལས་དོན་གོ་ཁག་པོ་འདུག ཡིན་ནའང་། རྒྱ་ཡིག་རྒྱ་སྐད་ཡག་པོ་ཤེས་ཀྱིན་ཡོད། རྒྱ་ཡིག་ཡག་པོ་མ་བསླབ་ན་རྒྱ་ནང་གི་སློབ་ཆེན་ཡག་གྲས་ཁག་ནང་འགྲོ་ཐུབ་པ་མ་རེད། ལྷ་སར་བོད་རིགས་སློབ་ཆེན་གཉིས་ཡོད་མོད། དེ་གར་སློབ་མཐར་ཕྱིན་པ་རྣམས་ལ་བྱ་བ་རག་ཁག་པོ་རེད། ཅེས་བརྗོད་བྱུང་།
འདས་པའི་ལོ་འགའི་རིང་ཁམས་དཀར་མཛེས་ཁུལ་དུ་ཕྱོགས་ཡོངས་ནས་རྒྱ་ཡིག་གཙོ་བོར་འཛིན་པའི་འཛིན་གྲྭ་དང་སློབ་གྲྭ་བཙུགས་ཏེ། བོད་སྐད་ཡིག་གི་སློབ་གསོར་བཀག་སྡོམ་བྱས་ཡོད་པར་མ་ཟད། སློབ་གྲྭ་རེ་འགའི་ནང་བོད་ལྭ་གྱོན་མི་ཆོག་པ་དང་བོད་སྐད་བཤད་མི་ཆོག་པའི་སྒྲིག་ཁྲིམས་ཀྱང་བཟོས་ཡོད་འདུག ཁམས་དཀར་མཛེས་བྲག་མགོ་རྫོང་ནས་ཡིན་པའི་སློབ་བུ་ཐུབ་བསྟན་ལགས་ཀྱིས་བརྗོད་རྒྱུར། ང་རང་བྲག་མགོ་རྫོང་མཁར་གྲོང་སློབ་ཆུང་དང་སློབ་འབྲིང་གཉིས་སུ་ཕྱིན་པ་ཡིན། སློབ་ཆུང་ལོ་རིམ་དང་པོ་ནས་བཟུང་རྒྱ་ཡིག་བསླབ་མགོ་བརྩམས་པ་ཡིན། སློབ་ཆུང་ལ་སློབ་མ་ ༩༠༠ ཡོད་པ་ཕལ་ཆེ་བ་བོད་རིགས་རེད། དགེ་རྒན་ ༨༠ ལྷག་ཡོད་པའི་ནང་དགེ་རྒན་བོད་པ་ ༢༠ མ་གཏོགས་མི་འདུག སློབ་འབྲིང་ནང་སློབ་མ་ ༡༠༠༠ ལྷག་ཡོད་པ་མང་ཆེ་བ་རྒྱ་རིགས་རེད། ང་ཚོ་སློབ་གྲྭའི་ནང་བོད་ཡིག་མ་གཏོགས་གཞན་ཚང་མ་རྒྱ་ཡིག་སྟེང་ཁྲིད་ཀྱིན་ཡོད་ལ། སློབ་གྲྭའི་ནང་སློབ་མ་ཚོས་བོད་ལྭ་གྱོན་མི་ཆོག་ལ། བོད་སྐད་ཀྱང་བཤད་མི་ཆོག བོད་ཡིག་སློབ་ཐུན་ཁོ་ན་མ་གཏོགས་གཞན་པའི་སློབ་ཐུན་གྱི་སྐབས་དང་། སློབ་གསེང་སྐབས་ཚང་མར་ཕན་ཚུན་བར་རྒྱ་སྐད་བཤད་དགོས། བོད་སྐད་ཐོག་ཁ་བརྡ་བྱེད་བཞིན་པ་དགེ་རྒན་གྱིས་མཐོང་ཚེ་སློབ་མར་གཅར་རྡུང་དང་། ཕ་མར་དངུལ་གྱི་ཆད་པ་གཅོད་ཀྱིན་འདུག ད་ལྟ་ངས་རྒྱ་སྐད་བོད་སྐད་འདྲེས་མ་ཙམ་མ་གཏོགས་བོད་སྐད་གཙང་མ་བཤད་ཐུབ་ཀྱི་མེད། འདི་སློབ་གྲྭ་དང་སློབ་གྲྭའི་དགེ་རྒན་ཚོས་བཟོས་པ་རེད། ཅེས་བརྗོད་བྱུང་།
དེང་སྐབས་བོད་སྐད་ཡིག་གི་སློབ་གསོ་སྤེལ་བཞིན་པའི་ས་ཁུལ་གཙོ་ཆེ་ཤོས་དེ་མཚོ་སྔོན་ཆགས་ཡོད། ཡིན་ནའང་། ལོ་སྔོན་མ་ནས་བཟུང་རྒྱ་ཡིག་གཙོ་བོ་ཡིན་པའི་སྐད་གཉིས་སློབ་གསོ་སྤེལ་མགོ་བརྩམས་པར་བརྟེན། སློབ་གྲྭ་ཆེ་འབྲིང་ཆུང་གསུམ་གྱི་སློབ་མ་གཙོས་པའི་ཡུལ་མི་ཁྱིམ་བདག་ཚང་མས་སྲིད་ཇུས་དེར་ངོ་རྒོལ་གྱི་རྣམ་པ་ཤུགས་ཆེན་སྟོན་བཞིན་ཡོད་ཀྱང་། ཉེ་སྔོན་༼མཚོ་སྔོན་བོད་ཁུལ་བྱིས་གཉོར་སྐད་གཉིས་སློབ་གསོའི་ལས་གཞི་འཆར་འགོད་༽ཅེས་པ་གཏན་འབེབས་བྱས་ཏེ། མཚོ་སྔོན་ཞིང་ཆེན་ཁོང་གཏོགས་ཀྱི་སློབ་གྲྭ་ཆུང་འབྲིང་ཕྱོགས་བསྡུས་བྱས་ཏེ། རྫོང་དང་གྲོང་རྡལ་དུ་གནས་སྤོར་བྱས་རྗེས་ས་གནས་གྲོང་སྡེ་ཁག་ཏུ་བྱིས་གཉོར་ཁང་གསར་འཛུགས་ཀྱིས་བྱིས་པའི་དུས་སྐབས་ནས་སྐད་གཉིས་སློབ་གསོར་གྲ་སྒྲིག་བྱེད་བཞིན་ཡོད། འདིའི་ཐད་མཚོ་བྱང་རྐང་ཚ་ནས་ཡིན་པའི་སློབ་བུ་སངས་རྒྱས་ལགས་ཀྱིས་རང་ཉིད་ཀྱིས་བརྒྱུད་མྱོང་བའི་སློབ་གྲྭའི་གནས་སྟངས་སྐོར་བརྗོད་དོན། ང་རང་མཚོ་སྔོན་རྐང་ཚའི་བཅའ་སྡོད་སློབ་ཆུང་དང་རྫོང་སློབ་འབྲིང་གཉིས་སུ་སོང་མྱོང་ཞིང་། སློབ་གྲྭ་དེ་གཉིས་ཀྱི་སློབ་མ་ཚང་མ་བོད་རིགས་ཡིན་ལ། དགེ་རྒན་ཕལ་ཆེ་བའང་བོད་པ་རེད། སློབ་ཆུང་སྐབས་བོད་ཡིག་མ་གཏོགས་བསླབ་དེབ་གཞན་ཚང་མ་རྒྱ་ཡིག་རེད། ཡིན་ནའང་། དགེ་རྒན་གྱིས་བོད་སྐད་ཐོག་འགྲེལ་བཤད་གནང་བ་ལ་བརྟེན་ནས་བསླབ་ཚན་དག་ཡག་པོ་ཤེས་ཀྱི་འདུག སློབ་འབྲིང་ནང་བོད་ཡིག་འཛིན་གྲྭ་དང་རྒྱ་ཡིག་འཛིན་གྲྭ་རིགས་གཉིས་སུ་བགར་འདུག བོད་ཡིག་འཛིན་གྲྭའི་ནང་རྒྱ་ཡིག་མ་གཏོགས་བསླབ་དེབ་གཞན་ཚང་མ་བོད་ཡིག་ཐོག་ཁྲིད་ཀྱི་ཡོད་པ་དང་། རྒྱ་ཡིག་འཛིན་གྲྭའི་ནང་བོད་ཡིག་མ་གཏོགས་བསླབ་དེབ་གཞན་ཚང་མ་རྒྱ་ཡིག་ཐོག་ཁྲིད་ཀྱི་ཡོད་པ་རེད། སློབ་མ་ཚང་མ་འབྲོག་ཕྱོགས་ནས་ཡོང་བ་ཤ་སྟག་ཡིན་པར་བརྟེན་རྒྱ་སྐད་ཐོག་སློབ་ཁྲིད་བྱས་ན་གོ་ཁག་པོ་འདུག བསླབ་དེབ་དག་ལས་ཆེས་ཁག་ཤོས་དེ་རྒྱ་ཡིག་རེད། དེར་མ་ཟད། མཐོ་འབྲིང་དང་སློབ་ཆེན་སྐབས་སློབ་ཡོན་ཧ་ཅང་མཐོན་པོ་དགོས་པས་མུ་མཐུད་སློབ་གྲྭར་བསྐྱོད་རྒྱུར་དཀའ་ཁག་ཆེན་པོ་འདུག ཅེས་བརྗོད་བྱུང་།
ཐེངས་འདིར་གསར་འགོད་པའི་བོད་ནང་གི་སློབ་རའི་གནས་ཚུལ་ལ་རྒྱུས་ལོན་བྱས་པའི་གོ་རིམ་ཁྲོད། བོད་ནང་སློབ་གྲྭར་སྐྱོད་མཚམས་བཞག་སྟེ། དབུས་སྣེ་ལེན་ཁང་ལ་གསར་དུ་འབྱོར་ཡོད་པའི་བྱིས་པ་བཅུ་གྲངས་ཤིག་འདུག་ལ། ཁོ་ཚོ་ནི་དབུས་གཙང་དང་མདོ་སྟོད་སྨད་སོགས་བོད་ཀྱི་ས་ཁུལ་འདྲ་མིན་ནས་རེད། ཁོ་ཚོའི་ཁྲོད་བོད་སྐད་གཙང་མ་བཤད་ཐུབ་མཁན་ཧ་ཅང་ཉུང་ཉུང་རེད། ཡིན་ནའང་། ཁོ་ཚོར་སྤྱི་མཐུན་གྱི་སྐད་ཆ་གཅིག་ཡོད་པ་ནི། ང་ཚོ་རང་གི་ཕ་མ་དང་བྲལ་ཏེ་འདིར་བྲོས་བྱོལ་དུ་ཡོང་དོན་ནི་བོད་ཡིག་ཡག་པོ་ཞིག་སློབ་སྦྱོང་བྱ་ཆེད་ཡིན་ཟེར།
གསར་འགོད་པ། ཚེ་རིང་རྒྱལ།
སྙིང་རྗེ་སློབ་ཕྲུག་ཚོ་ས་འདི་ན་ཡང་ཁྱོད་ཚོས་དོན་དུ་མཉེར་བའི་བོད་ཡིག་ལ་རིན་ཐང་གང་ཡང་མེད། གང་དྲག་བོད་མི་རིག་འདི་མཆི་ལམ་ནས་སྐྱབས་ཐུབ་རྒྱུའི་རེ་བ་མེད་པ་འདྲ། སྔོན་ལས་ཤིག་ཡིན་ནམ་ཡང་ན་འཕྲལ་རྐྱེན་ཞིག་ཡིན།
མཐུན་འབྲལ་ཡོད་ན་སྤྱི་སྐད་ཞོར་ནས་ཡོངས་་་
བོད་ཀྱི་རིག་གཞུང་ཉམས་རྒྱུད་ལས་དར་ཁྱབ་དང། དར་ཁྱབ་ལས་ལས་ཉམས་རྒྱུད་དུ་འགྲོ་བཞིན་ཡོད་པའི་སྐབས་འདི་ལ། ང་ཚོ་བོད་སྤྱིའི་ཁ་སྐད་སློབ་དེབ་ཞིག་གཏན་འབེབས་བྱེད་ཐུབ་སྲིད་རུང། དེ་ལ་རྒྱུན་འཁྱོངས་བྱེད་མཁན་ཧ་ཅང་གི་དཀོན་པོ་རེད་བསམ་གི། དེ་ལས་བོད་རིགས་སྤྱི་ཡོངས་ནས་བོད་ཀྱི་སྐད་ཡིག་འདིར་ཤུགས་རྦྱབ་སྟེ་འདིའི་་སྟེང་དུ་སྦྱངས་བ་མི་དམན་པ་བྱས་ཐུབ་ན། བོད་རིགས་ཡོངས་ཀྱི་སྐད་ཡིག་གཅིག་གྱུར་ནས་ཁ་སྐད་གཅིག་གྱུར་ཏུ་འགྲོ་བར་རེ་བ་ཆེ་གི།
དྲ་གྲོགས་ཀརྨ་རྡོ་རྗེ་ལགས། བོད་ལ་སྤྱི་སྐད་གཏན་ཁེལ་ཞིག་མེད་པས་བོད་སྤྱིའི་ཁ་སྐད་ཀྱི་སློབ་དེབ་གཏན་འབེབས་བྱ་རྒྱུ་དེ་ཅུང་ཁག་པོ་རེད། བོད་ཕྱི་ནང་གཉིས་ཀར་བོད་སྐད་ཡིག་གི་སློབ་དེབ་ཡོད་མོད། བོད་སྤྱིའི་ཁ་སྐད་ཀྱི་སློབ་དེབ་ཟེར་བ་དེ་འདྲ་ད་བར་མཐོང་ཐོས་མ་བྱུང་། ལྷ་སའི་སྐད་དང་ཨ་མདོའི་ཁ་སྐད་སྦྱོང་དེབ་ཟེར་བ་དེ་འདྲ་འདུག
བོད་སྤྱིའི་ཁ་སྐད་ཀྱི་སློབ་དེབ་གཏན་འབེབས་བྱུང་མིན་དེ་བོད་ལ་སྤྱི་སྐད་དགོས་མིན་དང་སྤྱི་སྐད་འབྱུང་མིན་ལ་ཐུག་ཡོད་པར་སེམས།
དེ་ནི་རྩོམ་པ་པོའི་རྣམ་དཔྱོད་ཙམ་ལས་གྲུབ་ཐུབ་པ་ཞིག་མིན་ཏེ། བོད་ཆོལ་ཁ་གསུམ་དང་དེ་དག་གི་མངའ་ཁོངས་ལུང་ཚན་བྱེ་བྲག་པ་སོ་སོའི་ཁ་སྐད་ཀྱི་རིན་ཐང་ངོས་འཛིན་བྱ་སྟངས་དང་། མི་དམངས་ཀྱི་དགོས་མཁོར་ཐུག་ཡོད་པ་ཞིག་མིན་ནམ་སྙམ།
བོད་གཞིས་བྱེས་གཉིས་ནང་གི་སློབ་གྲྭའི་ནང་ལ། བོད་སྤྱིའི་ཁ་སྐད་ཀྱི་སློབ་དེབ་ཅིག་གཏན་འབེབས་བྱུང་ཐུབ་ཡོད་དམ།