གླིང་གེ་སར་འཁྲུངས་ལོ་དང་མདོ་སྨད་ལོ་རྒྱུས་ཆེན་མོ།
གེ་སར་ཞིབ་འཇུག་པ་རྨེ་སྲིབ་ནོར།
སྤྱིར་གནའ་དེང་བོད་ཀྱི་དཔྱད་ཞིབ་པའི་ཁྲོད་དུ་གླིང་གེ་སར་ནི་ལོ་རྒྱུས་མི་སྣ་རུ་བཞེད་མིན་གཉིས་ཡོད་ཅིང་། ལོ་རྒྱུས་མི་སྣར་འདོད་མཁན་རྣམས་ལ་ཡང་གེ་སར་གྱི་འཁྲུངས་འདས་སྐོར་ལ་བཞེད་ཚུལ་མི་མཐུན་པ་སྣ་ཚོགས་ཤིག་ཡོད། འགའ་ཞིག་གིས་གླིང་སྒྲུང་སྒྱུ་རྩོམ་དང་གླིང་སྒྲུང་ལོ་རྒྱུས་གཉིས་སོ་སོར་དབྱེ་ཞིབ་མ་བྱས་པར། ཇི་ལྟར་སྒྱུ་རྩལ་རྩོམ་རིག་གིས་ཡིད་སྤྲུལ་བྱས་པ་དེ་ལྟར་ཚད་འཛིན་བྱས་ཏེ། གླིང་དུས་ནི་ཡ་ཐོག་བསྐལ་བའི་ཀློང་རིང་ཞིག་ཏུ་འདོད། ཡང་ཁག་ཅིག་གིས་གླིང་སྒྲུང་ལ་ལོ་རྒྱུས་རིག་པའི་ལྟ་ཚུལ་སྤྱད་དེ། གེ་སར་བྱོན་དུས་རླངས་ཀྱི་པོ་ཏི་བསེ་རུ་རྩ་འཛིན་ཐོག་རླངས་བྱང་ཆུབ་ཨ་མི་འདྲེ་བཀོལ་དང་དུས་མཉམ་ཡིན་པར་འདོད། འོན་ཀྱང་རླངས་ཀྱི་པོ་ཏི་བསེ་རུར་གེ་སར་གྱི་ཚེ་ཚད་ ༨༨ ཅེས་ལུང་ཚིག་ལྟར་རྩིས་ལུགས་ཤིག་དང་། ཡང་གྱ་གཅིག་ཐོག་འདས་ཚུལ་བཤད་ལུགས་གཉིས་མི་མཐུན་པའི་དབང་གིས་གེ་སར་འཁྲུངས་ལོའི་ཐད་ལོ་བཅུ་སྐོར་ཡས་མས་ཤིག་གི་མི་མཐུན་པའི་ཁྱད་པར་བྱུང་ཡོད། གསར་དར་གླིང་སྒྲུང་ཞིབ་འཇུག་པ་དག་གིས་གེ་སར་འཁྲུངས་འདས་ནི་བདུད་འཇོམས་ཆོས་འབྱུང་ཀྱི་བཞེད་ལུགས་ལྟར་འདོད་བཞིན་ཡོད། བཞེད་དོན་དེ་ནི་རླངས་ཀྱི་པོ་ཏི་བསེ་རུ་དང་། བོད་ཀྱི་ལོ་རྒྱུས་ཀྱི་འགྱུར་རིམ། འཁྲུངས་གླིང་བཅས་གསུམ་དང་མཐུན་པས་ཡིན།
ཧོར་གཙང་འཇིགས་མེད་ཀྱིས་བརྩམས་པའི་མདོ་སྨད་ལོ་རྒྱུས་སྤྱིའི་གཞུང་ཤིང་། (བོད་ཀྱི་དཔེ་མཛོད་ཁང་གིས་དཔར་སྐྲུན་བྱས) ཤོག་གྲངས་ ༤༠༤ རུ་“གེ་སར་འཁྲུངས་ལོ་ནི་བདུད་འཇོམས་སྤྲུལ་སྐུས་རབ་བྱུང་མ་ཚུགས་པའི་སྔོན་གྱི་ས་སྟག་སྟེ་སྤྱི་ལོ་ ༩༧༨ ལོར་བཞེད་ཅིང་། བཞེད་ཚུལ་འདི་རྒྱུ་མཚན་དང་ཐག་ཉེ་ཤོས་ལྟ་བུ་དང་།“ཞེས་འཁོད་འདུག བཞེད་ཚུལ་དེ་ནི་རྗེ་དམི་དགེ་བསམ་གཏན་གྱི་འདོད་ལུགས་ཡིན་པ་ལས། བདུད་འཇོམས་སྤྲུལ་སྐུའི་བཞེད་ལུགས་མིན།
བདུད་འཇོམས་ཡེ་ཤེས་རྡོ་རྗེས་བརྩམས་པའི་བདུད་འཇོམས་ཆོས་འབྱུང་།(སི་ཁྲིན་མི་རིགས་དཔེ་སྐྲུན་ཁང་གིས་དཔར་སྐྲུན་བྱས) ཤོག་གྲངས་ ༦༤༡ ཏུ་“རབ་བྱུང་གཉིས་པ་ཤར་བ་ན། མ་གཅིག་ལབ་སྒྲོན་ལྕགས་ལུག་ང་བདུན། གླིང་རྗེ་གེ་སར་ས་སྟག་ལྔ་བཅུ་ཐམ་པ།“ཞེས་འཁོད་ཡོད་ལ། རབ་བྱུང་གཉིས་པ་ཤར་ལོ་ཕྱི་ལོ་ ༡༠༨༧ ནས་ཡར་ལོ་ལྔ་བཅུ་བརྩིས་ན་ཕྱི་ལོ་ ༡༠༣༨ ཡིན་པ་ལས་ཕྱི་ལོ་༩༧༨ ལ་འབབ་སྲོལ་མེད། དོན་གནད་དེ་ནི་ཁོང་ཉིད་ཀྱི་རྩ་འཛིན་བྱས་པའི་དཔྱད་གཞིའི་ཡིག་ཆ་དང་ཟུར་བལྟའི་ཡིག་རིགས་གཉིས་དཔྱད་བསྡུར་མ་བྱས་པར་ཟུར་བལྟའི་ཡིག་ཆ་ལ་ཆ་འཇོག་བྱས་པའི་རྐྱེན་ཡིན་ནམ་སྙམ།
དཔྱད་གཞི་དེའི་རྩི་ལུགས་རང་དངོས་སུ་དཔྱད་ཞིབ་བྱས་པ་ནི། བོད་ནང་ནི་གླིང་སྒྲུང་གི་ལོ་རྒྱུས་ཞིབ་འཇུག་པ་བློ་གྲོས་རྒྱ་མཚོའི་༼སེང་ཆེན་ཉི་མ་འདྲེན་པའི་སྐྱ་རེངས༽ (བོད་ལྗོངས་མི་དམངས་དཔེ་སྐྲུན་ཁང་དཔར་སྐྲུན་བྱས) ཤོག་གྲངས་ ༨༥ ནང་“བདུད་འཇོམས་སྐུ་ཕྲེང་གཉིས་པའི་རྙིང་མའི་ཆོས་འབྱུང་དུ། བོད་རབ་བྱུང་དང་པོའི་ས་ཕོ་སྟག་གི་ལོ་སྟེ། སྤྱི་ལོ་ ༡༠༣༨ ལོ་ལ་གླིང་རྗེ་གེ་སར་རྒྱལ་པོ་སྐུ་འཁྲུངས། ལོ་འདིར་མཉམ་མེད་ཇོ་བོ་ཆེན་པོ་དགུང་ལོ་ ༥༩ ལོན། ཙོང་ཁའི་རྒྱལ་པོ་ཁྲི་ནམས་ལྡེའུ་བཙན་དགུང་ལོ་ ༤༢ ལོན“ཞེས་གསལ་བ་ལྟར། ལོ་རྒྱུས་དཔྱད་ཞིབ་ཀྱི་དོན་གནད་གང་ཡིན་ལ་དཔྱད་གཞི་རང་དངོས་སུ་དཔྱོད་བསྡུར་བྱྲ་རྒྱུ་ལས་ཟུར་བལྟའི་ཡིག་རིགས་ནས་གང་བཤད་ལྟར་དུ་བཞག་ན་ལོ་རྒྱུས་དཔྱད་ཞིབ་བྱ་ཐབས་ཀྱི་སྐྱོན་ཆ་ཆེས་ཆེ་ཤོས་ཤིག་རེད། གེ་སར་ཞིབ་འཇུག་པ་རྨེ་སྲིབ་ནོར།
མདོ་སྨད་ལོ་རྒྱུས་ཆེན་མོ་གླེགས་བམ་དང་པོ་ནི་བསྒྲིགས་པ་ཞིག་མ་རེད། བརྩམས་པ་ཞིག་རེད། གླེགས་བམ་གཉིས་པ་ནས་དྲུག་པ་བར་གྱི་དེབ་ལྔ་ནི་བརྩམས་པ་ཞིག་མ་རེད། ཕྱོགས་ཡར་མར་ནས་བཏུས་ཤིང་བསྒྲིགས་པ་ཞིག་རེད། མ་གཞི་ནས་ཚིག་མཛོད་དང་མིང་མཛོད་ནི་རྣམ་པ་འདི་འདྲ་ཞིག་ཡིན།
ཅི་ཞིག་རེད་དང་ཅི་ཞིག་མ་རེད་ལབ་སྟངས་ཀྱིས་ཚད་བརྒྱབ་པ་ཡིན་ན། འདི་འདྲ་ཞིག་རེད། དེ་ནི་མདོ་སྨད་ལོ་རྒྱུས་ཆེན་མོ་ཁོ་རང་གིས་ཚུར་བསྟན་པ་ལས། ངས་ཕར་སྐྱོན་གླེང་བྱས་པ་མིན། ཡིད་མི་ཆེས་མཁན་ཡོད་སྲིད་ན། དེ་དག་གིས་མདོ་སྨད་ལོ་རྒྱུས་ཆེན་མོ་ལ་གཟིགས་རོགས། གཅིག་བྱས་ན། ངའི་ལྟ་སྟངས་འདི་ནོར་ཡོད་སྲིད། ཡིན་ནའང་། གླེགས་བམ་ཚང་མའི་དབུ་ཤོག་ན་གསལ་བ་ནི། བརྩམས་ཞེས་པའི་བྱ་ཚིག་འདི་རེད། ལར་ནས་བསྒྲིགས་ཞེས་བྲིས་པ་ཡིན་ནའང་བྱ་བ་སྟོན་པའི་ཚིག་རེད།
དཔེར་ན། ༼མདོ་སྨད་ལོ་རྒྱུས་ཆེན་མོའི་བྱུང་རིམ༽ནང་། གླེགས་བམ་ལྔ་པའི་སྐོར་བཤད་སྐབས། ༼དགོན་སྡེ་དེ་དག་གི་བཏབ་ལོ་དང་། འདེབས་མཁན། བཏབ་ཡུལ། ཆོས་རྒྱུད་བཅས་གང་ངེས་གསལ་འབྲི་དང་། ཟུར་བརྗོད་ཀྱི་ལམ་ནས་དགོན་སྡེ་དག་དང་འབྲེལ་བའི་ལོ་རྒྱུས་ཀྱི་གནད་དོན་གལ་ཆེན་ཁག་ཧ་ཅང་མདོར་བསྡུས་སུ་བྲིས་ཡོད་པས་ལྟ་ཀློག་བྱེད་མཁན་རྣམས་ལ་སུན་སྣང་མི་སྐྱེས་པ་དང་། ལོ་ཚིགས་སོགས་འཕྲལ་དུ་བློ་ངེས་འབྱུང་ཐུབ་པའི་ཕན་འབྲས་མི་དམན་པ་ཡོད་པ་ཡིན།༽ཞེས་དང་། གླེགས་བམ་དྲུག་པ་གླེང་སྐབས། ༼ཁོང་རྣམས་ཀྱི་མཚན་དང་། འཁྲུངས་ཡུལ། འཁྲུངས་ལོ། འདས་ལོ། ཆོས་རྒྱུད་བཅས་ལག་ཏུ་གང་ཆུད་གསལ་འགོད་བྱས་ཡོད།༽ཅེས་འདུག འདི་ནི་གླེགས་བམ་ཕྱི་མ་དག་ཚིག་མཛོད་ཀྱི་རྣམ་པར་ཡོད་པའི་གསལ་བཤད་ཀྱང་རེད། མིང་མཛོད་འདི་བསྒྲིགས་པར་རྩོམ་པ་པོས་དེབ་རིགས་ཆེ་ཆུང་བརྒྱ་ཕྲག་ལྔ་བརྒལ་བ་ལྟ་ཀློག་གནང་འདུག་པར་བསམས་ན། རྩོམ་པའི་དབང་དུ་བཏང་ནའང་ལེགས་པ་ཞིག་ཡོང་ངེས་སུ་འདུག་སྟེ། རྩོམ་པ་པོས་དགོས་དབང་མང་པོར་གཟིགས་ནས་མིང་མཛོད་ཀྱི་ངོ་བོ་ནས་ཕྱོགས་བསྒྲིགས་གནང་རྒྱུ་འདེམས་འདུག་པ་འདིར་ལེགས་ཚོགས་མང་པོ་ཡོད་སྲིད། ཡང་ན། ༼ལོ་རྒྱུས་ཞིག་འཇུག་བྱེད་སྟངས་ཀྱི་ཐབས་ལམ་ནི་ཕྱི་རྒྱལ་གྱི་རིག་གཞུང་ཞིབ་འཇུག་པ་དག་གིས་ཞིབ་འཇུག་བྱེད་སྟངས་ཀྱི་ཐབས་ལམ་བེད་སྤྱོད་གཏོང་ཐུབ་ན་ཡག་ཤོས་རེད༽ཅེས་གོང་ས་མཆོག་གིས་རྩོམ་པ་པོར་དངོས་སུ་གསུངས་ཡོད་སྐད་དེར་རྩ་འཛིན་བྱས་པས་ཀྱང་འབབ་ས་འདི་འདྲ་ཞིག་ལ་བབས་པ་ཡིན་སྲིད། ད་རེས་རྨེ་སྲིབ་ནོར་བུ་ལགས་ཀྱིས་གླེགས་བམ་དང་པོའི་ནོར་འཁྲུལ་གཅིག་ཐེར་འདོན་བྱས་པ་འདི་ཡག་པོ་རེད། སྤུས་ཀ་ཇེ་དག་ཏུ་གཏོང་དགོས་ན། འདི་ལྟར་གནང་དགོས་པ་གལ་ཆེ། ཕན་ཚུན་ལ་དམའ་འབེབས་རེས་མི་བྱེད་པར་གུ་ཡང་དཀྱེལ་ཆེའི་སྒོ་ནས་འདི་ལྟར་གླེང་སློང་གནང་བ་ཡིན་ན། འདོན་ཐེངས་གཉིས་པའི་སྐབས་ལ་ལེགས་བཅོས་གནང་བར་ཕན་གྱི་རེད། སྐུ་ཞབས་ཧོར་གཙང་འཇིགས་མེད་ལགས་ཀྱིས་དཀའ་ལས་མང་པོ་བརྒྱབ་ཡོད་པ་དེར་གུས་བརྩི་ཡོད།
གེ་སར་འཁྲུངས་འདས་ནམ་ཡིན་ཐག་གཅོད་དཀའ། གེ་སར་ལྷ་མི་འདྲེ་ཡིན་ངོས་འཛིན་དཀའ།
གེ་སར་ལོ་རྒྱུས་གསང་གསུམ་ཤེས་པ་དཀའ། གེ་སར་ལོ་རྒྱུས་དོན་སྙིང་ཤེས་པ་དཀའ།
ཚུར་རྒོལ་ཡན་པོར་མི་གཏོང་གེ་སར་ཡིན། རྒྱལ་ངན་ཚར་གཅོད་ཕོད་པའང་གེ་སར་ཡིན།
འབངས་ལ་བདེ་སྐྱིད་སྐྲུན་པ་གེ་སར་ཡིན། འཛམ་གླིང་ཞི་བདེར་སྒྱུར་བའང་གེ་སར་ཡིན།
གེ་སར་ཞི་དང་དྲག་པ་ཡིན། གེ་སར་དབང་དང་རྒྱས་པའང་ཡིན།
གེ་སར་བོད་མིའི་མཚོན་བྱེད་ཡིན། གེ་སར་ཡོད་ན་བོད་མི་ཡོད།
དེ་བས་བོད་མི་རེ་རེ་ནས། གེ་སར་རྗེས་འཇུག་བྱེད་པ་བརྩོན།
ཧོར་འཇིགས་ལ་ལོ་རྒྱུས་ཉམས་ཞིབ་པའི་མིང་འདི་ཇི་ལྟར་ཐོག་་་་་་་ནམ་ཡང་ཐོག་མི་སྲིད་་་་་་་་་ལོ་རྒྱུས་ཉམས་ཞིབ་པ་ཞིག་ཡིན་ན་ངེས་པར་དུ་མི་གཞི་དྲང་བོ་ཞིག་དགོས་པ་ནི་རྩ་བ་ཡིན་རུང་་་་་་་ཧོར་འཇིགས་ཀྱི་མི་གཞི་ནི་ཡ་ཡོ་འཁྱག་འཁྱོག་ལས་དྲང་བོ་ཞིག་མིན་པ་ཁོའི་མདོ་སྨད་ལོ་རྒྱུས་ཆེན་མོ་ལས་གསལ་བོ་ཤེས་ཐུབ།
ཧོར་འཇིགས་ལགས། དེ་ནི་མཁས་པ་འཆུག་ན་འདོམ་གང་ཟེར་བ་དེ་རེད།