ཨི་ཇིབ་ཡར་ལངས་ཀྱི་ཉིན་ ༡༨ ཀྱི་རྗེས་ཏེ། ཟླ་འདིའི་ཕྱི་ཚེས་ ༡༡ ཉིན་ཨི་ཇིབ་སྲིད་འཛིན་མུ་བྷ་རག་འུ་ཐུག་ཐབས་ཟད་ཐོག་སྲིད་འཛིན་ལས་དགོངས་པ་ཞུ་དགོས་བྱུང་ཡོད་ཅིང་། ད་ཆར་ཨི་ཇིབ་རྒྱལ་ས་གཙོས་པའི་གྲོང་ཁྱེར་ཆེ་ཁག་གི་ངོ་རྒོལ་བྱེད་མཁན་གྱི་ནང་ཚོགས་ཚོས་རྒྱལ་ཁའི་གླུ་དབྱངས་ལེན་བཞིན་ཕྱིར་རང་རང་གི་ས་གནས་སུ་ལོག་བཞིན་ཡོད་འདུག
སྲིད་དབང་སྒེར་གཅོད་པ་མུ་བྷ་རག་སྲིད་འཛིན་ལས་ཕྱིར་འཕུད་བཏང་རྗེས། ཨི་ཇིབ་ཀྱི་སྲིད་གཞུང་གསར་བ་གཏན་འཁེལ་མ་བྱུང་བར་རྒྱལ་ཁབ་ཀྱི་དབང་ཚད་དེ་དམག་དཔུང་གིས་འཛིན་རྒྱུ་བྱས་ཡོད་འདུག་ལ། ཨི་ཇིབ་མི་མང་ཚོས་དམངས་གཙོའི་ལམ་སྲོལ་ཐོག་ནས་གང་མགྱོགས་གཞུང་གསར་པ་འཛུགས་རྒྱུར་རེ་སྒུག་བྱས་ཡོད་འདུག
ཐེངས་འདིར་ཨི་ཇིབ་སྲིད་གཞུང་མགོ་རྟིང་སློག་པ་དེས་དཀྱིལ་ཤར་ཡུལ་གྲུའི་ཆབ་སྲིད་ཀྱི་འགྱུར་འགྲོས་ཆེན་པོ་ཞིག་མཚོན་ཡོད་པ་མ་ཟད། སྲིད་དབང་སྒེར་གཅོད་འོག་ཡོད་པའི་མི་རིགས་དང་མང་ཚོགས་དཀྱུས་མ་མང་པོ་ཞིག་ལ་སེམས་ཤུགས་ཆེན་པོ་བསླངས་ཡོད་འདུག ཁ་སང་ཕྱི་ཚེས་ ༡༣ ཉིན་ཨི་ཇིབ་དམག་མིའི་བར་བརྒལ་གཞུང་གི་མགོ་ཁྲིད་ཚོས་ཨི་ཇིབ་གྲོས་ཚོགས་ཕྱིར་འཐེན་དང་དེ་སྔའི་རྩ་ཁྲིམས་ཕྱིར་བསྡུ་བྱས་ཏེ། མང་ཚོགས་ཀྱི་མངོན་འདོད་ལྟར་འབྱུར་འགྱུར་ཟླ་ ༦ ནང་ཚུན་དུ་དམངས་གཙོའི་སྲིད་གཞུང་གསར་པའི་མགོ་ཁྲིད་འོས་བསྡུ་གནང་ཐུབ་པ་བྱ་རྒྱུའི་ཁས་ལེན་བྱས་འདུག
སྲིད་འཛིན་མུ་བྷ་རག་གི་དགོངས་པ་ཞུས་ཏེ་མི་གཅིག་དབང་འཛིན་ལམ་ལུགས་ཀྱི་ཨི་ཇིབ་གཞུང་འཕོ་འགྱུར་ཕྱིན་པ་དེར། ཨ་རིའི་སྲིད་འཛིན་ཨོ་བྷ་མ་དང་མཉམ་འབྲེལ་རྒྱལ་ཚོགས་ཕྱི་སྲིད་དྲུང་ཆེ། ཨ་རབ་གནའ་མཐུན་དྲུང་ཆེ། དབྱིན་ཇིའི་སྲིད་བློན། ཧྥ་རན་སིའི་སྲིད་འཛིན་སོགས་རྒྱལ་ཁབ་ཁག་གི་སྲིད་འཛིན་དང་སྲིད་བློན་མང་པོ་ཞིག་གིས་དགའ་བསུ་ཞུས་ཡོད་པ་དང་། ད་ལྟའི་ཨི་ཇིབ་བར་བརྒལ་དམག་མིའི་གཞུང་གིས་གང་མགྱོགས་དམངས་གཙོའི་ལམ་སྲོལ་ཐོག མང་ཚོགས་ཀྱི་འདོད་མོས་ལྟར་སྲིད་གཞུང་གསར་པའི་འོས་བསྡུ་དྲང་བདེན་དང་ཕྱི་གསལ་ནང་གསལ་ཡོང་རྒྱུར་འབོད་སྐུལ་ཞུས་འདུག
ཐེངས་འདིའི་ཨི་ཇིབ་མི་མང་གི་ཡར་ལངས་ལམ་ལྷོངས་བྱུང་སྟེ། སྲིད་འཛིན་མུ་བྷ་རག་གིས་དགོངས་པ་ཞུ་དགོས་བྱུང་པ་དེར། ཨི་ཇིབ་རྒྱལ་ཁོངས་གཙོས་པའི་འཛམ་གླིང་གང་སར་དགའ་འབོད་ཤུགས་ཆེན་བྱེད་ཀྱིན་ཡོད་ཅིང་། ཉེ་ཆར་ཊོ་ནེ་ཤེ་ཡའི Tuisia ཡར་ལངས་ཀྱིས་ཨི་ཇིབ་ཡར་ལངས་ལ་ཤུགས་རྐྱེན་ཐེབས་ཡོད་པ་དང་། ཐེངས་འདིར་ཨི་ཇིབ་གཞུང་མགོ་རྟིང་སློག་པ་འདིས་ཡེ་མན་ Yemen དང་ཨལ་ཇི་རི་ཡ། ཨེ་རན་བཅས་ལའང་ཤུགས་རྐྱེན་ཐེབས་ཏེ། ཁ་སང་ཕྱི་ཚེས་ ༡༢ ཉིན་ཨལ་ཇི་རི་ཡའི་ནང་ཡང་མང་ཚོགས་ཀྱི་ཡར་ལངས་གཞི་རྒྱ་ཆེན་པོ་ཞིག་བྱས་ཡོད་འདུག
གསར་འགོད་པ། བནྡེ་སྐྱབས།
གལ་ཏེ་འོས་ཤོག་ལྡུག་པ་ཡི། ཐོབ་ཐང་བོད་ལ་ལྡན་གྱུར་ན།
རང་བཙན་ཉིན་མོ་གཅིག་ཡིན་ཡང། རྨི་ལམ་མངོན་དུ་འགྱུར་བ་དཀོན།
ཆོལ་གསུམ་ལར་ཞེན་གཅིག་གྱུར་ངང། མུ་མཐུད་རང་ཉིད་སྲུང་ཐུབ་ན།
ནམ་ཞིག་རང་བཙན་མ་ལོན་ཡང། རང་སྐྱོང་ཆེན་མོ་ལག་པར་གནས།
རང་སྐྱོང་རང་བཙན་ཐོབ་པ་དཀའ། དེ་བས་ཀྱང་ནི་སྐྱོང་ཐབས་དཀའ།
རང་གཞན་ཀུན་ལ་སྨན་ངེས་ན། རང་སྐྱོང་གཞན་སྐྱོང་ཁྱད་པར་མེད།
བོད་ལ་ཡོད་པ་ས་གཞི་གཅིག ཚང་ལ་མ་ནོར་དམ་ཆོས་གཉིས།
ལེགས་པར་བསམ་ན་འདི་དག་ཀྱང། ཐུན་མོང་ལ་ནི་དབང་འོས་ཆོས།
གོ་ལ་ཆག་གྲུམ་འཆོར་བའི་དུས། ཇོ་མོ་གླང་མ་ཇི་ལྟར་བརྟན།
མིའི་རིགས་ནད་ཀྱིས་ཐེབས་པ་ན། བོད་རིགས་བདེ་ཐང་ཇི་ལྟར་གནས།
སྐྱིད་ཀྱི་རྟ་བོ་མཉམ་ཞོན་དང། སྡུག་གི་ཁུར་བོ་མཉམ་འཁུར་དེ།
བྱེ་བྲག་ཀུན་ལ་འོས་ན་ཡང། དོན་དམ་འཛམ་གླིང་སྐྱིད་སྡུག་ཉིད།
ཨེ་ཇཻབ་ མིདམངས་ཀྱིས་ཡར་ལང་གིས་རྒྱལ་ལ་འཚམས་དྲིན་བཀྲ་ཤིས་བདེ་ལེགས་ཞུ་། གུང་ཁྲན་དེ་ཡང་དེ་བཞིན་མཐའ་སྒྲོལ་ཏོང་དགོས།་ གང་མགྱོག་།།
དཔེ་མེད་ཅིག་རེད་་་་་་
བོད་པ་ཚོས་ད་དུང་ཞི་བའི་མི་མང་མདུན་སྐྱོད་ཆེན་མོ་ཞིག་ལྷར་གསོ་དགོས་ཀྱི་འདུག ཨི་ཇིབ་ཡར་ལངས་ཀྱི་རྣམ་པ་ལ་མིག་དཔེ་ལེན་དགོས།