སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༡ པ་དེ། ༢༠༡༡ ལོའི་ཕྱི་ཟླ་ ༣ ཚེས་ ༡༤ ནས་ ༢༥ བར་གྱི་ཉིན་བཅུ་གཉིས་རིང་འཚོགས་རྒྱུ་ཡིན་ཞིང་། སྐབས་དེར་གཙོ་བོ་ཕྱི་ལོ་ ༢༠༡༡ དང་ ༢༠༡༢ ལོའི་བཙན་བྱོལ་བོད་གཞུང་གི་ལོ་འཁོར་གཅིག་གི་སྔོན་རྩིས་གཏན་འབེབས་བྱ་འཆར་ཡོད་འདུག
བོད་མི་མང་སྤྱི་འཐུས་ལྷན་ཚོགས་ཀྱི་སྐབས་བཅུ་བཞི་བའི་གྲོས་ཚོགས་ཚོགས་དུས་བཅུ་གཅིག་པ་འཚོགས་ལ་ཉེ་སྐབས། འདི་གའི་གསར་འགོད་པས་བོད་མི་མང་སྤྱི་འཐུས་ཚོགས་དྲུང་སྟོབས་རྒྱལ་ལགས་སུ། གྲོས་ཚོགས་ཀྱི་མཛད་རིམ་སྐོར་ལ་བཅར་འདྲི་ཞུས་པར་ཁོང་གིས་ལན་བསྐྱོན་དོན། སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པ་དེ་འབྱུང་འགྱུར་ཕྱི་ཟླ་ ༣ ཚེས་ ༡༤ ནས་ ༢༥ བར་འཚོགས་རྒྱུ་གྲ་སྒྲིག་ཟིན་པ་རེད། སྐབས་དེར་གཙོ་བོ་ཕྱི་ལོ་ ༢༠༡༡ དང་ ༢༠༡༢ ལོའི་བཙན་བྱོལ་བོད་གཞུང་གི་ལས་ཁུངས་མ་ལག་དང་བཅས་པའི་ལོ་འཁོར་གཅིག་གི་སྔོན་རྩིས་གཏན་འབེབས་ཐོག་བགྲོ་གླེང་ཐག་གཅོད་ཡོང་གི་རེད། དེ་དང་མཉམ་དུ་ཆབ་སྲིད་སྐོར་དང་ཉེ་ལམ་ལྷོ་ཕྱོགས་ནས་ཚོགས་པའི་བོད་རྒྱལ་ཡོངས་གཞུང་མང་ཚོགས་ཆེན་སྟེང་གི་སྙན་ཐོ་དང་འབྲེལ་བའི་བཅའ་སྒྲིག་བསྐྱར་བཅོས་དགོས་རིགས་དང་དེ་མིན་གྱི་བསམ་འཆར་ཁག་གི་ཐོག་བཀའ་བསྡུར་གནང་གི་རེད། ཅེས་བརྗོད་བྱུང་།
ཡང་ཁོང་ལ་ཉེ་སྔོན་༧གོང་ས་མཆོག་གིས་ཁོང་གིས་བགྲེས་ཡོལ་ཆ་ཚང་གནང་རྒྱུ་ཡིན་སྐོར་དང་། གནད་དོན་དེ་ཐེངས་འདིའི་གྲོས་ཚོགས་ནང་བཀའ་ཕེབས་འཆར་ཡོད་སྐོར་གསུངས་ཡོད་སྟབས། འདི་དང་བསྟུན་ཏེ་༧གོང་ས་མཆོག་གྲོས་ཚོགས་ནང་དངོས་སུ་ཕེབས་རྒྱུའི་གྲྭ་སྒྲིག་འདྲ་ཡོད་མེད་དྲིས་པར་ཁོང་གིས། ༧གོང་ས་མཆོག་གིས་བགྲེས་ཡོལ་དུ་ཕེབས་རྒྱུའི་སྐོར་བཀའ་སློབ་ཐེངས་མང་གནང་ཡོད་ཀྱང་། བཀའ་སློབ་ཕེབས་པ་མ་གཏོགས་ད་སྔ་གཞུང་འབྲེལ་ཐོག་སྤྱི་འཐུས་ལྷན་ཁང་ལ་དངོས་སུ་ཕྱག་བྲིས་གང་ཡང་གནང་མེད། གལ་སྲིད་ཕྱག་བྲིས་གནང་ཚེ་དེར་དཔག་པའི་བཀའ་བསྡུར་སོགས་ཞུ་དགོས་ཀྱི་ཡོད་པ་རེད། ༧གོང་ས་མཆོག་འཛམ་གླིང་གང་སར་ཕེབས་ཏེ་མཛད་འཆར་ཧ་ཅང་བྲེལ་བ་ཆེ་སྟབས། གྲོས་ཚོགས་ཚོགས་དུས་སུ་ཕེབས་ཐུབ་མིན་ང་ཚོས་བཤད་ཚོད་ཐུབ་པ་ཞིག་མིན་པར་དེ་ནི་ཁོང་གིས་མཛད་འཆར་ལ་རག་ལས་པ་ཞིག་རེད། དེ་ལྟ་ནའང་ང་ཚོས་སྐུ་མདུན་གྲོས་ཚོགས་སུ་ཕེབས་ཐུབ་རྒྱུར་རེ་བ་ཆེན་པོ་བྱེད་ཀྱི་ཡོད། ཅེས་བརྗོད་བྱུང་།
འདི་ལོའི་གྲོས་ཚོགས་ཚོགས་དུས་སྐབས་སྦེལ་ཀོབ་ཏུ་སྤྱི་མོས་བྱུང་བའི་གལ་གནད་ཅན་གྱི་གྲོས་དོན་ཁག་ཇི་ལྟར་ཐག་གཅོད་ཡོང་མིན་དྲིས་པར། བོད་རྒྱལ་ཡོངས་གཞུང་མང་ཚོགས་ཆེན་གྱི་ཕྱོགས་བསྡོམས་བསམ་འཆར་ཡིག་ཆ་རྣམས། སྤྱི་འཐུས་ལྷན་ཚོགས་ཀྱི་ལག་ཏུ་ཡོད་སྟབས་སྤྱི་འཐུས་ཀྱིས་བསྒྲུབ་དགོས་པ་དང་། བཀའ་ཤག་དང་འོས་བསྡུ་ལས་ཁུངས་ཀྱིས་བསྒྲུབ་དགོས་པ་ཁག་སྤྱི་འཐུས་རྒྱུན་ལས་ཀྱིས་དབྱེ་བསྲེས་བྱས་ཏེ། བཀའ་ཤག་དང་འོས་བསྡུ་ལས་ཁུངས་སུ་སྤྲད་ཡོད་པར་མ་ཟད། སྤྱི་འཐུས་ཀྱི་བསྒྲུབ་དགོས་པ་ཁག་སྤྱི་འཐུས་ཀྱིས་ལག་བསྟར་བྱེད་ཀྱིན་ཡོད། བཀའ་སྤྱི་ཐུན་མོང་གིས་བསྒྲུབ་དགོས་པའི་གནད་དོན་ཐོག་ཕྱི་ཟླ་ ༡ ཚེས་ ༡༥ ཉིན། བཀའ་སྤྱི་ལྷན་ཚོགས་ཤིག་ཚོགས་ཏེ་དོན་ཚན་ ༡༢ ཐོག་བཀའ་བསྡུར་གནང་སྟེ་ཐག་གཅོད་བྱུང་ཡོད་ལ། ཐག་གཅོད་བྱུང་བ་ལྟར་ལག་བསྟར་ཡང་བྱེད་བཞིན་ཡོད་པ་རེད། ཅེས་བརྗོད་སོང་།
གསར་འགོད་པ། དཔལ་ལྡན།
གྲ་སྒྲིགས་ལེགས་པོ་ཞིག་བྱེད་དགོས་རེད་ལ་གྲུབ་འབྲས་ཀྱང་ལེགས་པོ་ཞིག་ཐོན་དགོས་རེད།
སྤྱི་འཐུས་ཚོར་ལྟ་སྟངས་སྐོར་ལ་རྩོམ་འཆལ་ཞིག་བྲིས་ཡོད་མོད། དེ་རིང་འདིར་དེ་འབྲེལ་གླེང་ས་ཞིག་འདུག་པས། ང་ཚོས་བཀའ་ཁྲི་ཅུང་ཙམ་བཞག་ནས་སྤྱི་འཐུས་ཚོའང་ཅུང་ཙམ་གླེང་དགོས་པར་གདའ།
མང་པོ་ཤོད་རྒྱུ་མི་འདུག་སྟེ། སྤྱི་འཐུས་སྤྱི་པའི་འཐུས་མི་ཡིན་མིན་ཡོང་ཁུངས་ནས་ཤོད་མི་ཐུབ་ཀྱང་། ཕྱག་ལས་གནང་ཕྱོགས་ཀྱིས་སྤྱི་པའི་འཐུས་མི་ཡིན་མིན་གསལ་བོ་སྟོན་ཐུབ་ཀྱི་རེད་མོད། ང་ཚོས་དེ་དག་ལ་ད་བར་རྗེས་འདེད་གཏོང་རྒྱུའི་ཧུར་བརྩོན་བསྟེན་གྱི་མེད་ཙང་། ལོ་ཁོར་མོ་ཡུག་གཅིག་ཏུ་ཉིན་བཅུ་གྲངས་ཤིག་གི་ཚོགས་འདུར་ཞུགས་རྗེས། ཕལ་ཆེར་ལས་དོན་གཞན་སྤྱི་བྱིངས་ལ་མེད་པ་རེད། དེའང་འཚམས་གཟིགས་སྐབས་གནས་ཚུལ་རེ་རྡོག་སྒྲུབ་རྒྱབ་པ་གྲོས་ཚོགས་སུ་ཕར་གཡུག་ཚུར་གཡུག་བྱེད་རྒྱུ་ལས། ཉིན་རེའི་རང་གི་སྒེར་དོན་ལྟར་སྤྱི་པའི་ལས་ཀར་ཁ་ལག་གཉིས་ཀས་ལྟ་རྟོགས་བྱེད་མཁན་དང་དེ་འབྲེལ་གྱི་དྲི་བ་ཁྱེར་ཡོང་མཁན་ཉུང་ཉུང་ཡིན་ནི་རེད།
ང་ཚོའི་སྤྱི་འཐུས་ལ་ལུང་པ་གཞན་ལྟར་དཔལ་འབྱོར་མཐུན་རྐྱེན་ལྷུག་གཏོང་གིས་རང་དབང་གིས་མི་མང་གི་ལས་དོན་བྱེད་རྒྱུར་དཀའ་ངལ་ཡོད་ནའང་། ང་ཚོའི་སྤྱི་འཐུས་ཚོའི་ལས་དོན་གྱི་ངོ་བོ་ཉེན་རྟོག་པ་འདྲ་བོ་ཞིག་རེད། དེས་གང་ན་དཀའ་ངལ་དང་སྐྱོན་ལྷག་གི་ཡོད་མེད་ལ་ལྟ་རྒྱུ་ལས་གཞན་བྱེད་ཡ་ཕལ་ཆེར་མེད་པ་འདྲ་བོ་རེད། གནས་ཚུལ་རེ་རེག་སོང་ན་གྲོས་ཚོགས་ནང་སྙན་སྒྲོན་ཞུ་རྒྱུ་དེ་རེད།
འོ་ན། ང་ཚོས་ཉེན་རྟོག་པའི་ལས་དོན་འདིའི་ཐོག་སྤྱི་འཐུས་ཚོས་ཅི་ལྟར་ཤུགས་རྒྱག་གི་ཡོད་མེད་བསྐྱར་སེམས་རེ་བྱས་ན། དེའང་ཧ་ཅང་གསལ་བོ་མིན་པ་ཞིག་མ་རེད།
ང་ཚོའི་སྤྱི་འཐུས་ཚོའི་ཡོང་ཁུངས་བྱེ་བྲག་པ་ཞིག་ལ། དེ་ལས་ཀྱང་བྱེ་བྲག་གཞན་ཞིག་ནི། ༡ ཁྱིམ་བརྒྱུད་སྤྱི་འཐུས། ༢ དཔལ་འབྱོར་སྤྱི་འཐུས། ༣ རྐང་པ་ཉིས་འཛུགས་ཀྱི་སྤྱི་འཐུས་བཅས་རེད། འདི་གསུམ་གྱི་ཁོངས་སུ་སྤྱི་འཐུས་མང་ཆེ་བ་ཚུད་སོང་ན།
ལས་དོན་གྱི་ཐོག ༡ ལྷ་སྐུ་ལྟ་བུའི་སྤྱི་འཐུས། ༢ ཁ་དབང་ཅན་གྱི་སྤྱི་འཐུས། ༣ ཕྱོགས་ཁག་ཅན་གྱི་སྤྱི་འཐུས་གསུམ་མངོན་སུམ་དུ་ཐོན་འདུག་པས།
དེའི་ནང་མ་ཚུད་པས། ཉམས་ཆུང། དྲངས་ཚུགས། ཤེས་ཡོན་ཅན་གྱི་སྤྱི་འཐུས་རྣམས་ངོས་གཞན་ཞིག་ཏུ་དེད་དེ་རང་བཞིན་གྱིས་ནུས་མེད་ཆགས་འགྲོ་བ་ཞིག་ནི་ཟུར་ལྟོས་ལེབ་མཐོང་ཡིན་པས།
ང་ཚོས་རྐུབ་སྟེགས་མཚན་སྙན་གྲགས་སོགས་དོན་གཉེར་བྱེད་པོ་དག་ལ་རང་བཞིན་གྱིས་དགོངས་པ་མ་སྤྲད་ན་གྲོས་ཚོགས་ཀྱི་ནུས་པ་ཁྲིམས་བཟོའི་ཐོག་འདིང་རྒྱུར་དོན་དམ་གྱི་ཤུགས་ཇེ་ཞན་ལ་འགྲོ་བར་སེམས།
ཞིབ་ཏུ་རྗེས་ནས་གླེང། དེ་རིང་འདི་ཙམ་ཡིན།
ངོས་ཀྱི་བསམ་པ་ལ་སྔོན་མའི་སྤྱི་མཐུས་ཀྱི་གྲོས་ཚོགས་ནང་གང་ཟག་གཅིག་གི་དོན་རྐྱེན་བརྗོད་གཞིར་བཟུང་ནས་ཅུང་ཙམ་ལབ་གླེང་བྱུང་བ་ནི་བོད་སྤྱི་པའི་ཞབས་འདྲེན་ཞིག་རྩ་བ་ཉིད་ནས་མིན། སྨྲ་བརྗོད་ལ་རང་དབང་ཞེས་པ་ནི་དེ་འདྲ་ཞིག་ལ་བརྗོད་པ་ཡིན་དེ་ནི་སྤྱི་མཐུས་རྣམས་ཀྱི་བློ་གྲོས་ལ་ཤེས་རབ་ཀྱི་འོད་སྣང་སྦར་ས་དང་བོད་རྒྱལ་ཁབ་འདི་ཕྱི་གསལ་ནང་གསལ་གྱི་ལམ་ཁ་གསལ་པོ་ཡིན་ཞེས་བརྗོད་པ་དེ་དོན་ལ་གནས་པ་མ་ཚད་ཁ་གསལ་སྟིང་གསལ་ངོ་མ་དེ་བྱུང་བ་རེད། གང་ཡིན་ཞུ་ན་རང་དབང་དང་དྲང་བདེན་ཡིན་མིན་གྱི་གྲོས་ཆོད་དེ་གྲོས་ཚོགས་ནང་དགོས་ཀྱི་ལྐོག་ལྐོག་སུད་སུད་དུ་བསྒྲང་སྡད་ན་དོན་འབྲས་གང་ཡང་མི་འབྱུང་བ་མ་ཚད་ཆོལ་ཁ་དང་ཆོས་ལུགས་གང་སར་བྱད་ཁ་སྡུག་ཤོས་དེ་དེ་ཡིན་པ་ཀུན་གྱིས་ཤེས་དགོས། དཔེར་ན་རྒྱ་མི་གུང་ཁྲན་ལྟ་བུ་ཡིན་ན་གྲོས་ཚོགས་ཀྱི་སྐབས་སུ་ཕལ་ཆེར་མི་གཅིག་གི་བསམ་བློ་རྟ་གཅིག་གི་འགྲོས་གོམ་ལྟ་བུ་འཇམ་ཅག་གེར་གནས་ནས་མཐུན་མདོག་གི་ཚོས་གཞི་བབ་ཆག་པོ་ཞིག་བསྟན་པ་འདི་དག་གི་གང་མཚོན་གྱི་ཡོད་ཞེ་ན། བསམ་འཆར་ཉེས་ན་མགོ་ཁྲིད་དེ་དག་གི་རྒྱབ་ལྗོངས་སུ་བཙོན་ཁང་དང་གནས་དབྱུང་གཉིས་ལས་འགྲོ་ས་གསུམ་པ་མེད་པ་དང་། བསམ་འཆར་འདོན་པའི་དབང་ཆ་མེད་པ། སྒེར་གཅོད་ཀྱི་གྲོས་ཆོད་ལ་བཙན་ཤད་ཀྱིས་ཉན་དགོས་པ། མི་དགའ་དགའ་མདོག་མི་སྤྲོ་སྤྲོ་མདོག་མ་བྱེད་རང་བྱེད་ཆག་པ་བཅས་གྲོས་ཚོགས་ཀྱི་ཚོགས་དུས་ལ་ལྟས་པ་ཙམ་གྱི་ཀུན་ཀྱི་ཤེས་གསལ་འདི་རེད། ཨ་རི། རྒྱ་གར། ཐེ་ཝན། ལྷོ་ཀོ་རི་ཡ། སོགས་ཀྱི་མང་གཙོ་རང་དབང་གི་རྒྱལ་ཁབ་གང་སར་ཚོགས་པ་ཕན་ཚུན་འཛིང་རེས་འདི་དག་མང་གཙོའི་གྲོས་ར་དངོས་སུ་མཚོན་པ། རང་དབང་དང་ཞི་བདེ། འགྲོ་བ་མི་ཡི་ཐོབ་ཐང་ལག་ཏུ་བེད་སྤྱོད་པ་ཞིག་ལས་ཞབ་འདྲེན་ཞེས་པ་དེ་རྩ་བ་ཉིད་ནས་མ་ཡིན། ཞབས་འདྲེན་ཞེས་པ་དེ་དཔེར་ན་བྱུས་ཕྱི་ནང་བརྗེ་བ། དགྲ་བོ་ལ་ངོས་དགའ་སྤྲེལ་ལེད་འཁྲབ་པ། སྒོར་མོའི་དོན་དུ་རྐུ་བཤོ་རྫུན་སོགས་ཚད་ལས་བརྒལ་བའི་བྱ་སྤྱོད་དེ་ཚོ་ཐམས་ཅད་ངོ་མ་བོད་གངས་ཅན་པའི་ཞབས་འདྲེན་དང་། མི་རིགས་ཀྱི་སོན་རྩ་རུལ་བའི་བྱ་བ་ཁོ་ན་ཡིན། སྤྱི་མཐུས་ཞིག་ཡིན་ནས་བཟུང་མི་མངས་མང་འོས་ཀྱི་ཐོག་ནས་ཐད་ཀར་བསྐོ་བའི་མི་ཞིག་ཡིན་ཙང་ཤེས་ཡོན་ཅན་ཞིག་དང་། དྲང་བདེན་ཅན། ལ་རྒྱ་ཅན་ཞིག་ཡིན་པ་ལ་ཐེ་ཚོམ་མེད་པས་གནས་དོན་དེ་ཚོ་ལས་ལེགས་ཆ་ཉེས་འགོག་ཚད་དང་ལྡན་པ་ལེན་ཐུབ་པ་མ་ཚད་འབྱུང་འགྱུར་ཆོལ་ཁ་དང་ཆོས་ལུགས་ཀྱི་འཐེན་ཁྱེར་ལ་དགེ་མཚན་ཡོད་མེད་ཀྱི་གོ་བ་ཡང་དེ་བས་གཏིང་ཟབ་བོའི་བསམ་བློ་འབྱུང་ཐུབ། གནས་ཚུལ་བཟང་ངན་གང་བྱུང་ན་ཕན་ཚུན་རྒྱུས་ལེན་དང་ལེགས་སྤེལ་ཉེས་འགོག་སོགས་དཔྱིས་ཕྱིན་པས་ད་རེས་ཀྱི་གྲོས་ཚོགས་འདི་རྒྱལ་ཁའི་ངང་གྲོལ་ཐུབ་པའི་ཡིད་ཆེས་ཡོད། ན་ལོ་གི་དོན་རྐྱེན་དེ་གཟི་བརྗིད་ཞིག་ལས་ཞབས་འདྲེན་རྩ་བ་ནས་མིན། སྐྱ་སེར་ཡོད་ཚད་གྲོས་ཚོགས་ལ་དོ་སྣང་དང་གོ་བ་གཏིང་ཟབ་བོ་ཞིག་བྱུང་སོང།
ངས་བལྟས་ན་ད་རེས་ཀྱི་སྤྱི་འཐུས་ཚོགས་དུས་དེ་གལ་ཆེ་དོན་ཆེ་ཞིག་ཏུ་མཐོང་གི་འདུག གང་ཡིན་ཞེས་ན། ༸གོང་ས་མཆོག་གིས་༸མགོན་པོ་མཆོག་བགྲེས་ཡོལ་ཆ་ཚང་གནང་རྒྱུའི་སྐོར་ཡིག་ཐོག་ནས་གྲོས་ཚོགས་ལ་གནང་གི་ཡིན་གསུངས་སྟབས། ༸མགོན་པོ་མཆོག་བགྲེས་ཡོལ་ཕེབས་ཚེ་འཕྲལ་ཕུགས་རྒྱང་གསུམ་ལ་ཕན་གནོད་ཇི་འདྲ་ཞིག་ཡོང་མིན་ཐོག་བཀའ་བསྡུར་ལྷུགས་པོ་དང་ཞིབ་འཇུག་མཐིལ་ཕྱིན་པ་གནང་རྒྱུ་ཤིན་ཏུ་གལ་ཆེ།
གོང་དུ་༼ བར་གྱི་ཉི་བཅུ་གཉིང་འཚོགས་རྒྱུ་ཡིན་ཞིང་༽བཟོ་བཅོས་བརྒྱབས་ན་འགྲིག
འདི་ནི་གསུབ་དགོས། མཆན་མིན
ཡག་པོ་རེད། ཡིན་ཡང་ལོ་སྔོན་མའི་སྤྱི་འཐུས་འཐུས་ཞབས་འདྲེན་པ་དེ་ཚོས་ད་ལོ་ཡང་་་་་་་?