ཕྱི་ཚེས་ ༤ ཉིན་ཏེ་བོད་ཀྱི་ལོ་གསར་གྱི་གནམ་གང་དགོང་མོར་ཡུ་རོབ་བོད་རྒྱ་མཛའ་འབྲེལ་ཚོགས་པའི་གོ་སྒྲིག་འོག བྷེལ་རྗམ་གྱི་གྲོང་ཁྱེར་ཨན་ཌི་ཝུ་པན་དུ། ཧྥ་རན་སི་དང་ཧོ་ལན་ནས་ཕེབས་པའི་རྒྱ་ནག་དམངས་གཙོ་དོན་གཉེར་བ་དང་། རྒྱ་ནག་སྐམ་ས་ཆེན་པོ་ནས་ཧྥ་རན་སིར་སློབ་སྦྱོང་བྱེད་པར་ཡོང་མཁན་གྱི་སློབ་མ་ཁག་ཅིག དེ་བཞིན། སྦེལ་ཇམ་ས་ཁུལ་བོད་དོན་རྒྱབ་སྐྱོར་ཚོགས་པ་དང་། བོད་ཀྱི་གྲོགས་པོ་ཚོགས་པ། འཇར་མན་བོད་དོན་རྒྱབ་སྐྱོར་ཚོགས་པའི་ནང་ལས་ཀ་བྱེད་བཞིན་པའི་མི་སྣ་དང་ས་གནས་བོད་མི་ཁག་ཅིག་བཅས་ཀྱིས་བོད་པའི་ལོ་གསར་དགའ་སྟོན་དང་། བོད་ཀྱི་རིག་གཞུང་ངོ་སྤྲོད་ཀྱི་མཛད་སྒོ་ཞིག་ཚོགས་ཡོད་འདུག
ལོ་གསར་མཛད་སྒོ་དེའི་ཐོག་མར་སྐུ་མགྲོན་ཡོངས་ཀྱིས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་ཤིང་། དེའི་རྗེས་གྲོ་སོ་ཕྱེ་མར་དང་འབྲས་སིལ་གདེགས་འབུལ་ཞུ་བ་དང་ཆབས་ཅིག་དུས་ཡུན་སྐར་མ་ཉི་ཤུ་ཅན་གྱི་རྒྱ་སྐད་ནང་བཟོས་པའི་བོད་ཀྱི་ལོ་གསར་སྐོར་གྱི་བརྙན་འཕྲིན་ཞིག་གཟིགས་འབུལ་ཞུས་ཡོད་འདུག
དེ་ནས་སྐུ་མགྲོན་དག་གིས་བོད་པའི་ལོ་གསར་ལ་འཚམས་འདྲི་ཞུས་པ་དང་སྦྲགས། མ་འོངས་པའི་ཆར་ཁོང་རྣམ་པས་བོད་དོན་ཐོག་སྔར་ལས་ལྷག་པའི་རྒྱབ་སྐྱོར་བྱ་འདུན་ཡོད་སྐོར་གྱི་གཏམ་བཤད་གནང་སྟེ། བོད་མི་རིགས་ཀྱི་རིག་གཞུང་དང་བོད་མིའི་ཡ་རབས་བཟང་སྤྱོད་དག་ནི། རྒྱ་ནག་གཞུང་གི་དྲིལ་བསྒྲགས་དང་ཡོངས་སུ་རྒྱབ་འགལ་ཞིག་ཡིན་ཚུལ་དང་། དེང་སྐབས་རེས་གཟའ་ཉི་མ་རྟག་པར་རྒྱ་ནག་གི་གྲོང་ཁྱེར་ཆེ་ཁག་དང་། བོད་ཀྱི་རྒྱལ་ས་ལྷ་ས་སོགས་སུ་མེ་ཏོག་བ་སྤྲུའི་གསར་བརྗེ་ལས་འགུལ་སྤེལ་གྱིན་པ་དེར་བསྔགས་བརྗོད་དང་འབྲེལ་ལས་འགུལ་དེའི་སྔ་ཕྱིའི་བྱུང་རིམ་དང་མཇུག་འབྲས་སོགས་ལ་ཚོད་དཔག་གིས་གཏམ་གླེང་བྱས་ཡོད་འདུག མཐར་བྷེལ་རྗམ་ཁུལ་དུ་སློབ་སྦྱོང་བྱེད་བཞིན་པའི་བོད་ཕྲུག་ཁག་ཅིག་གིས་རང་གི་སྐད་ཡིག་དང་། རང་གི་རིག་གཞུང་ལ་གདུང་སེམས་མཚོན་གླུ་གཞས་སོགས་བཏང་ཡོད་འདུག
