ཉིས་སྟོང་བརྒྱད་ལོར་འདི་གའི་གསར་ཁང་གིས་བཙན་བྱོལ་ནང་རེག་དུག་ན་ཚ་ཡོད་མཁན་ ༣༠༠ ལྷག་ཡོད་ཚུལ་ཕྱིར་བསྒྲགས་བྱས་སྐབས། མི་མང་པོ་ཞིག་ལ་འཇིགས་ཡེར་བའི་ཚོར་སྣང་ཞིག་དང་། དུས་ཡུན་གང་འཚམ་རིང་གླེང་གཞི་གཙོ་གྲས་ཤིག་ཏུ་གྱུར་ཡོད། འོན་ཀྱང་ཉམས་ཞིབ་པ་དང་ཆེད་ལས་སྨན་པ་ཚོའི་ཚོད་དཔག་ལྟར་ན། ཉིས་སྟོང་དགུ་དང་བཅུ་གཉིས་ལ་བཙན་བྱོལ་སྤྱི་ཚོགས་ནང་རེག་དུག་ནད་པའི་གྲངས་ཚད་སྔར་ལས་འཕར་ཡོད་པ་མ་ཟད། སློབ་གྲྭ་ཁག་ཏུ་རང་ལོ་ ༡༥ ནས་ ༢༠ བར་གྱི་སློབ་ཕྲུག་ཚོའི་ཁྲོད་མྱོས་རྫས་ཁྱབ་གདལ་དུ་འགྲོ་བཞིན་ཡོད་པའི་གནས་ཚུལ་ཐོན་ཡོད།
ཕྱི་ཚེས་ ༣ ཉིན་འདི་གའི་གསར་འགོད་པས་ཀུན་ཕན་ཚོགས་པའི་འགན་འཛིན་བསྟན་འཛིན་ལེགས་འཕེལ་ལགས་སུ་འདས་པའི་ལོ་གཉིས་རིང་བཙན་བྱོལ་སྤྱི་ཚོགས་ཁྲོད། རེག་དུག་ན་ཚའི་འཕེལ་འགྲིབ་གང་འདྲ་ཆགས་ཡོད་མེད་སྐོར་བཅར་འདྲི་ཞུས་པར་ཁོང་གིས། རེག་དུག་ན་ཚ་དེ་ནི་འགོ་ནད་ཀྱི་རིགས་ཤིག་ཡིན་ཞིང་། ན་ཚ་དེ་མིའི་ལུས་སྟེང་དུ་ཁྱབ་པ་ནས་བཟུང་དྲག་སྐྱེད་ཡོང་རྒྱུ་ཧ་ཅང་ཁག་པོ་ཆགས་ཡོད་སྟབས། ༢༠༠༨ལོ་ཚུན་གྱི་ལོ་གཉིས་རིང་རེག་དུག་ནད་པའི་གྲངས་ཚད་ཡར་འཕར་བ་ལས་ཇེ་ཉུང་དུ་སོང་མེད་པ་ཁ་ཚོན་བཅད་དེ་བཤད་ཐུབ་པ་ཞིག་རེད། གང་ཡིན་ཞེ་ན། ༢༠༠༨ ལོར་རེག་དུག་ན་ཚ་ཅན་གྱི་མི་ ༣༠༠ དེ་ནི་སྐབས་དེའི་ཡར་སྔོན་ནས་མི་མང་པོ་ཞིག་གིས་རང་ཉིད་ལ་རེག་དུག་གི་ན་ཚ་ཡོད་མེད་ཀྱི་ཐེ་ཚོམ་འོག་བརྟག་དཔྱད་བྱས་ཏེ་ཤེས་རྟོགས་བྱུང་བ་ཞིག་རེད།
ང་ཚོའི་སྤྱི་ཚོགས་ཁྲོད་བརྟག་དཔྱད་མ་བྱས་པར་ལྷག་བསྡད་པ་དང་། གདེང་ཚོད་མེད་པར་བརྟག་དཔྱད་གཏོང་ཕོད་ཀྱི་མེད་མཁན།སོ་སོས་ན་ཚ་དེ་ཕོག་ཡོད་པ་གསལ་བོ་ཧ་གོ་སྟེ་སྨན་ཁང་དུ་ཕྱིན་མེད་པ་བཅས་རིགས་མང་པོ་ཞིག་ཡོད།ང་ཚོས་ཀྱང་ལོ་རེའི་ནང་རེག་དུག་ན་ཚ་གྲངས་འབོར་འཕེལ་བཞིན་ཡོད་པ་ཙམ་ལས་སྤྱིའི་གྲངས་འབོར་གང་འདྲ་ཞིག་ཏུ་བསླེབས་ཡོད་པ་གསལ་བོ་ཤེས་ཐུབ་ཀྱི་མི་འདུག ན་ཚ་དེ་ཡོད་བཞིན་དུ་གཞན་ལ་ལུས་འབྲེལ་བྱས་དང་།མྱོས་རྫས་རིགས་འདྲ་མིན་བེད་སྤྱོད་བྱེད་པ་གཉིས་ན་ཚ་དེ་འགོས་ཁྱབ་ཀྱི་བརྒྱུད་ལམ་གཙོ་བོ་གཉིས་ཆགས་འདུག གལ་སྲིད། ང་ཚོའི་མི་མང་གིས་འདིའི་ཐད་ལ་དོ་སྣང་དང་སྔོན་འགོག་གི་ཐབས་ལམ་འདྲ་མིན་མ་སྤེལ་ཚེ། ང་ཚོ་གནས་ཚང་རྒྱ་གར་ལ་མཚོན་ནའང་ད་ལྟའི་ཆར་རྒྱལ་སྤྱིའི་ནང་རེག་དུག་ན་ཚ་དར་ཁྱབ་ཆེ་ཤོས་ཨང་གཉིས་པ་རེད། རྒྱལ་སྤྱིའི་རེག་དུག་ཉམས་ཞིབ་པ་དང་མཁས་དབང་མང་པོ་ཞིག་གིས་མ་འོངས་པར་རྒྱ་གར་འཛམ་གླིང་ནང་རེག་དུག་གི་ན་ཚ་ཁྱབ་ཆེ་ཤོས་ཨང་དང་པོ་ཆགས་རྒྱུའི་ཉེན་ཁ་ཡོད་སྐོར་བརྗོད་ཀྱི་ཡོད། འདི་ལ་བསམ་བློ་བཏང་ན། སྐྱབས་བཅོལ་བོད་པ་ཚོ་ཡང་དངངས་སྐྲག་ཆེན་པོ་སྐྱེ་དགོས་པ་ཞིག་ཆགས་ཡོད།
ད་བར་བཙན་བྱོལ་སྤྱི་ཚོགས་ནང་ན་ཚ་འདི་ཁྱབ་གདལ་ཆེ་ཤོས་ངྷ་རམ་ས་ལ་དང་ལྡི་ལི་གཉིས་ཆགས་ཡོད་ཀྱང་། ད་ཆར་གཞིས་ཆགས་ཆེ་ཁག་གཞན་དག་ཀྱང་ཛ་དྲག་ཆགས་ཡོང་གི་འདུག རྒྱ་གར་གྱི་གྲོང་གསེབ་ཁག་ཏུ་ཡང་ན་ཚ་འདི་ཁྱབ་གདལ་ཆེན་པོ་ཕྱིན་ཡོད་སྟབས། མ་འོངས་པར་བཙན་བྱོལ་བོད་མི་འདུས་སྡོད་ཀྱི་ས་གནས་ཚང་མར་ཁྱབ་གདལ་དུ་འགྲོ་རྒྱུའི་ཉེན་ཁ་ཆེན་པོ་རེད།ན་ཚ་འདི་སྔོན་འགོག་བྱ་རྒྱུར་གཙོ་བོ་མི་སོ་སོའི་ངོས་ནས་གཟབ་ནན་དང་།བརྟག་དཔྱད་སྨན་བཅོས་ལ་དོ་འཁུར་བྱ་རྒྱུ་གལ་ཆེན་པོ་རེད། དེ་དང་མཉམ་དུ་བོད་གཞུང་འཕྲོད་བསྟེན་ལས་ཁུངས་དང་ཀུན་ཕན་ཚོགས་པ། གདམ་ཀ་ཚོགས་པ་སོགས་སུ་བཅར་དེ་གནས་ཚུལ་ཞིབ་འདྲི་བྱ་དགོས་པར་མ་ཟད། ལྷག་པར་དུ་ན་ཚ་ཡོད་མཁན་ཚོས་ལས་ཁུངས་འདི་དག་ལ་འབྲེལ་བ་བྱས་ཏེ། མི་གཞན་ལ་མི་གནོད་པའི་ལམ་ཁ་བཙལ་རྒྱུ་གལ་ཆེ་ཤོས་རེད། ཅེས་བརྗོད་བྱུང་།
ཡང་ཁོང་གིས་མྱོས་རྫས་བེད་སྤྱོད་ཀྱི་ཐད་ནས་བརྗོད་དོན། བཙན་བྱོལ་སྤྱི་ཚོགས་ཁྲོད་ཀྱི་རེག་དུག་གི་ན་ཚའི་འབྱུང་ཁུངས་གཙོ་བོ་ཞིག་མྱོས་རྫས་རིགས་བེད་སྤྱོད་གཏོང་མཁན་ཚོ་ཆགས་འདུགངྷ་རམ་ས་ལ་དང་ལྡི་ལི་གཉིས་བོད་པའི་སྤྱི་ཚོགས་ཁྲོད་ཀྱི་མྱོས་རྫས་སྤྱོད་མཁན་མང་ཤོས་སུ་ངོས་འཛིན་བྱེད་ཀྱི་ཡོད་ཀྱང་། ད་ཆར་ཨ་རུ་ན་ཅཱལ་མངའ་སྡེའི་མེའོ་ཆོས་འཕེལ་གླིང་དང་ཏེ་ཛུ་དར་རྒྱས་གླིང་བོད་མིའི་གཞིས་ཆགས་སོགས་སུ་ཡང་མྱོས་རྫས་སྤྱོད་མཁན་ཇེ་མང་དུ་འགྲོ་བཞིན་འདུག རྒྱ་གར་བྱང་ཕྱོགས་སུ་ཡོད་པའི་གཞིས་ཆགས་དེ་དག་བྷང་ལ་ངྷེ་ཤི་སོགས་མྱོས་རྫས་ཐོན་ཁུངས་དང་ས་འབྲེལ་ཡིན་སྟབས།མྱོས་རྫས་རིགས་གསར་པ་མང་པོ་ཞིག་འཐོན་ཡོང་གི་འདུག ད་ལྟའི་ཆར་མྱོས་རྫས་སྤྱོད་མཁན་རྒན་པ་མང་པོ་ཞིག་གིས་མཚམས་འཇོག་བྱེད་ཀྱི་ཡོད་ཀྱང་།སློབ་གྲྭ་ཁག་ཏུ་རང་ལོ་༡༥ནས་༢༠བར་གྱི་གཞོན་སྐྱེས་ཚོའི་ཁྲོད་ཇེ་མང་དུ་འགྲོ་བཞིན་འདུགཅེས་བརྗོད་བྱུང་།
སྐབས་དེར་གསར་འགོད་པས་ཁོང་ལ།སློབ་གྲྭ་ཁག་གི་གཞོན་སྐྱེས་ཚོའི་ཁྲོད་མྱོས་རྫས་ཁྱབ་གདལ་དུ་འགྲོ་རྐྱེན་གང་ཡིན་སྐོར་དྲིས་པར་ཁོང་གིས་ལན་བསྐྱོན་དོན།དེ་སློབ་གྲྭའི་འཛིན་སྐྱོང་དང་དགེ་རྒན་ཚོའི་བདག་པོ་རྒྱག་སྟངས་ལ་འབྲེལ་བ་ཡོད་སྲིད་ཀྱང་།གཙོ་བོ་གུང་གསེང་གི་སྐབས་སོགས་ལ་ཕ་མ་ཚོས་རྔན་པར་སྤྲད་པའི་དངུལ་དེ་དག་རོགས་པ་འདྲ་མིན་དང་མཉམ་དུ་ལོག་ལམ་དུ་བེད་སྤྱོད་གཏོང་གི་འདུགམྱོས་རྫས་ངན་གོམས་སུ་སོང་བ་ཡིན་ན།མི་སོ་སོ་འཕྲོ་བརླག་ཏུ་འགྲོ་བ་ཙམ་དུ་མ་ཟད།མྱོས་རྫས་དེ་རེག་དུག་ན་ཚའི་འབྱུང་ཁུངས་གཙོ་གྲས་ཤིག་ཆགས་ཡོད་སྟབས།འདི་མི་སྒེར་བ་རེ་གཉིས་ཀྱི་དཀའ་ངལ་ཙམ་མིན་པར། སྤྱི་ཚོགས་ཁྱོན་ཡོངས་ཀྱི་དཀའ་ངལ་ཞིག་ཆགས་ཡོད།བོད་གཞུང་དང་འཕྲོད་བསྟེན་སྨན་ཁང་ཁགདེ་བཞིན་སློབ་གྲྭའི་འཛིན་སྐྱོང་དང་དགེ་རྒན།སློབ་ཕྲུག་གི་ཕ་མ་སོགས་ཕྱོགས་ཡོངས་ནས་ཡིད་གཟབ་བྱ་དགོས་པའི་དུས་ཚོད་ཅིག་ལ་བསླེབས་འདུག
མཐར་ཁོང་ལ་ཀུན་ཕན་ཚོགས་པའི་ངོས་ནས་བཙན་སྤྱི་ཚོགས་ཁྲོད་ཀྱི་དཀའ་ངལ་འདི་རིགས་སེལ་ཐབས་སུ་ཕྱག་ལས་གང་འདྲ་གནང་གི་ཡོད་མེད་དྲིས་པར། འདས་པའི་ལོ་ལྔའི་རིང་ང་ཚོའི་ཚོགས་པས་རེག་དུག་ནད་པ་དང་མྱོས་རྫས་སྤྱོད་མཁན་ ༡༥༠ ལྷག་ལ་བརྟག་དཔྱད་སྨན་བཅོས་བྱས་ཤིང་། དེའི་ཁྲོད་ཀྱི་མྱོས་རྫས་སྤྱོད་མཁན་བརྒྱ་ཆ་ ༤༠ ལྷག་དྲག་སྐྱེད་བྱུང་སོང་། ཉེ་བའི་དུས་ནས་ང་ཚོས་རེག་དུག་ན་ཚ་ཡོད་རིགས་ལ་འགྱིག་ཤུབ་དང་།མྱོས་རྫས་སྤྱོད་མཁན་ལ་ཁབ་གསར་བ་སྤྲད་དེ་ཐབས་ཤེས་བྱེད་ཀྱི་ཡོད། མ་འོངས་པར་སྣེ་ལེན་ཁང་ཉེ་འགྲམ་དུ་ཁང་པ་བརྒྱབ་སྟེ།རེག་དུག་ན་ཚ་ཡོད་རིགས་ཟུར་འཇོག་གིས་སྨན་བཅོས་བྱ་འཆར་ཡོད། ཅེས་བརྗོད་བྱུང་།
གསར་འགོད་པ། དོན་གོ
དེང་དུས་བོད་སྐད་ནང་ལ།
ཁོ་ཨེཌྶ་འགོས་ནད་ན་ནས་མ་གྲོང་གོང་ལ། མོ་ལ་ཡང་ཧིཝ་ནད་འབུ་བགོས་ཚར་འདུག ཨ་ཁ། གང་དྲག རང་རིགས་ཚོ། ལྟ་བུ་མི་དགོས་སམ། བོད་སྐད་འབྲི་སྟངས་ཞལ་འདེབས་བརྒྱབ་པའི་ཁུལ་ཡིན་ཡང་་་་་
རེག་དུག་ན་ཚ་ཞེས་བྲིས་པ་འདི། ཨེཌ་འགོ་ནད་ལ་ཟེར་འདོད་ཡོད་པ་ཡིན་ནམ།
ང་ཚོའི་གསོ་རིག་ལས་གསུངས་པའི་ཁྱད་དུ་འཕགས་པའི་ལམ་སྟོན་ཟབ་མོ། ཟས་དང་སྤྱོད་ལམ་སྐོར་ཞིབ་གསལ་ལམ་སྟོན་རྒྱུད་མངའ་ཤུགས་ཆེར་སྤེལ་དགོས་པར་འདོད།
རྫོགས་ཆེན་སྨན་སྤྲུལ་དགེ་གྲགས་མཆོག་གིས་༢༠༡༠ ལོར་ནད་ངན་འདི་སྔོན་འགོག་བྱེད་ཐབས་ཀྱི་དེབ་ཆུང་ཞིག་ཚར་ཁྲི་བཅུ་པར་ནས་བོད་ཀྱི་ས་ཆ་བརྒྱད་ཅུ་ལྷག་ལ་རིན་མེད་ཐོག་བཀྲམ་འདུག །
འདི་ནི་དངོས་གནས་ཉེན་ཁ་ཞིག་རེད།