༧གོང་ས་མཆོག་གིས་ཐེ་ལན་ཌིའི་མི་མང་ལ་བཀའ་ཆོས་བསྩལ་བ།

༧གོང་ས་མཆོག་གིས་ཐེ་ལན་ཌིའི་ནང་པ་གཙོས་པའི་ཕྱི་ནང་དད་ལྡན་པ་༧༠༠༠ ལྷག་ལ་སྒོམ་རིམ་བར་མ་དང་རྒྱལ་སྲས་ལག་ལེན་སོ་བདུན་མའི་འཆད་ཁྲིད་གནང་མགོ་བཙུགས་ཡོད་འདུག

ཐེ་ལན་ཌི་ནང་པའི་མི་མང་གིས་ཇི་ལྟར་གསོལ་འདེབས་ཞུས་དོན་ལྟར། ཕྱི་ཚེས་༡༤ཉིན་གྱི་ཞོགས་པའི་ཆུ་ཚོད་དགུ་དང་ཕྱེད་ཀའི་སྟེང་།བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་གིས་དུས་ཡུན་ཉིན་གཉིས་རིང་ཐེ་ལན་ཌིའི་ཆོས་ཞུ་བ ༡༡༠གཙོས་པའི་འཛམ་གླིང་རྒྱལ་ཁབ་ཁག་༦༡ཙམ་ནས་ཕེབས་པའི་ཕྱི་རྒྱལ་མི་རིགས་དང་བོད་རིགས་མང་ཚོགས་བདུན་སྟོང་༧༠༠༠བརྒལ་བར། རྒྱ་གར་སློབ་དཔོན་ཀ་མ་ལ་ཤིས་མཛད་པའི་སྒོམ་རིམ་བར་མ་དང་། སློབ་དཔོན་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མ་གཉིས་འཆད་ཁྲིད་གནང་མགོ་ཚུགས་ཡོད་པར་མ་ཟད། ཐེངས་འདིའི་གསུང་ཆོས་དེ་དབྱིན་རྒྱ་སྐད་ཡིག་གཉིས་གཙོས་པའི་སྐད་ཡིག་ཁག་ཅིག་ནང་ཐད་གཏོང་བྱས་ཡོད།

གསུང་ཆོས་མགོ་མ་བཙུགས་གོང་༧གོང་ས་མཆོག་གིས་ཐེ་ལན་ཌི་གཙོས་པའི་ཆོས་ཞུ་བ་ཚོར་བཀའ་གནང་དོན། འབར་མ་དང་ཐེ་ལན་ཌི། ཁམ་པོ་ཌི་ཡ་སོགས་ནང་པའི་རྒྱལ་ཁབ་ནང་འདུལ་བའི་ཉམས་ལེན་ཧ་ཅང་ཡག་པོ་ཡོད།ཕྱི་ལོ་ཆིག་སྟོང་དགུ་བརྒྱ་དྲུག་བཅུ་རེ་གྲངས་ནང་ང་རང་ཐེ་ལན་ཌིར་ཐེངས་ཁ་ཤས་བསླེབས་ཐུབ་བྱུང་ཡོད་ལ་སྐབས་དེའི་དགེ་འདུན་པའི་འདུལ་བའི་ཉམས་ལེན་ཡག་པོ་མཐོང་བྱུང་། མ་གཞི་དགེ་སློང་འབུམ་ཕྲག་མང་པོ་ཡོད་པའི་ནང་ཞབས་འདྲེན་ཞུ་མཁན་རེ་ཟུང་ཡོང་གིན་ཡོད་ཀྱང་སྤྱི་ཡོངས་ཀྱི་ཆ་ནས་ཞེ་དྲག་ཡག་པོ་འདུགདེ་གར་དགེ་འདུན་པ་ཚོ་གསོལ་སྙོམས་སུ་ཕེབས་ཀྱིན་ཡོད་པ་ལྟར་རེ་ཞིག་ངོས་རང་ཡང་གསོལ་སྙོམས་སུ་ཕྱིན་པ་ཡིན། བཅོམ་ལྡན་འདས་ཞལ་བཞུགས་སྐབས་དེ་ལྟ་བུ་ཞིག་ཡིན་རྒྱུ་རེད་བསམ་སྟེ་ངོ་མཚར་ཆེན་པོ་སྐྱེས་སོང་ཞེས་དང་། ཁྱེད་རང་ཚོ་ལུང་པ་དེ་ནས་ཕེབས་པ་ཞིག་རེད་ལ་ཁྱེད་ཚོས་པ་ལིའི་གཞུང་རྩ་བར་བཞག་སྟེ་ཆོས་འཆད་ཉན་གནང་གི་ཡོད་ལ། བོད་གངས་ཅན་གྱི་ཆོས་རྒྱུད་དེ་ཆོས་རྒྱལ་ཁྲི་སྲོང་ལྡེའུ་བཙན་གྱིས་གདན་ཞུས་ལྟར། མཁན་ཆེན་ཞི་བ་འཚོ་བོད་དུ་ཕེབས་ཏེ་བསྟན་པའི་རྨང་གཞི་བཙུགས་པ་ཞིག་ཡིན། ཁོ་རང་འདུལ་བ་འཛིན་པ་ཞིག་དང་། པ་ལིའི་གཞུང་དང་ཐུན་མོང་ཐོག་འདུལ་བའི་ཉམས་ལེན་བྱས་མྱོང་བའི་མངོན་པའི་གཞུང་ཆེན་མཁས་པ་ཞིག་ཡིན་ལ། ལེགས་སྦྱར་ནང་ཡོད་པའི་གཏན་ཚིགས་རིག་པའི་སྐོར་ལའང་མཁས་པར་སོན་པ་ཞིག་ཀྱང་རེད། ཁོང་གིས་གསར་བཏོད་བྱས་པའི་ནང་ཆོས་ཀྱི་ཆོས་རྒྱུད་དང་བོད་གངས་ཅན་གྱི་ཆོས་རྒྱུད་དེ་དག་དཔལ་ན་ལེནྜ་ནས་བརྒྱུད་པའི་ཆོས་རྒྱུད་ཅིག་ཆགས་ཡོད་ཅེས་ངོས་ནས་རྒྱུན་དུ་བཤད་ཀྱིན་ཡོད། ཅེས་གསུངས་བྱུང་།

ཐེ་ལན་ཌིའི་ནང་པར་ཆོས་འབྲེལ་གནང་དོན་སྐོར་ལ་༧གོང་ས་མཆོག་གིས་མུ་མཐུད་གསུང་དོན། སྤྱིར་བདེན་བཞིའི་མདོ་ཡོད་ལ་དེ་ཐུན་མོང་བའི་མདོ་རེད། པ་ལིའི་ནང་དུའང་ཡོད་བསྡད་པ་ཞིག་རེད། ཁྱེད་ཚོ་དོན་གཉེར་ཆེན་པོས་ས་ཐག་རིང་པོ་ནས་འདིར་ཕེབས་དུས། གཞུང་གསར་པ་ཞིག་གཟིགས་ཐུབ་ན་བློ་བསྐྱེད་འདྲ་མིན་ཡོང་གི་རེད་དྲན་སོང་། སློབ་དཔོན་ཀ་མ་ལ་ཤི་མཆོག་གིས་མཁན་ཆེན་ཞི་བ་འཚོས་བཀའ་གཞིར་བཟུང་བོད་ལ་ཕེབས་ཡོད་ཅིང་། ཁོང་རྒྱ་གར་དུ་བཞུགས་རིང་བསྟན་བཅོས་དུ་མ་ཞིག་མཛད་ཡོད་ལ། བོད་དུ་ཕེབས་རྗེས་སུའང་སྒོམ་རིམ་ཐོག་མཐའ་བར་གསུམ་སོགས་ལོ་རྒྱུས་ཐོག་ཧ་ཅང་གསལ་པོ་ཡོད་དུས། དེ་རིང་ངོས་ཀྱིས་སྒོམ་རིམ་སྐོར་ཞུ་ཐུབ་ན་ཡག་པོ་ཡོད་ཀྱི་རེད་བསམས་སོང་ཅེས་དང་།བོད་དང་ལ་དྭགས་གཙོས་པའི་ཧི་མ་ལ་ཡའི་རི་རྒྱུད་ཁག་དང་། ཕྱི་རྒྱལ་མི་རིགས་ནང་སྒོམ་རིམ་སྐོར་ཚར་མང་པོ་གོ་མྱོང་ཡོད་པ་དེ་འདྲ་ཡོད་སྲིད་ཀྱི་རེད། མ་གཞི་དཔེ་ཆ་འདི་ཁྱེད་ཚོར་རྒྱུས་ཡོད་པ་ལྟ་བུ་ཞིག་ཡིན་ཀྱང་འདུལ་བའི་གླེགས་བམ་ལྟ་བུར་ཉན་ན། ལོ་རྒྱུས་རང་གསུངས་ཀྱི་ཡོད་དུས་ཚར་གཅིག་ཉན་ཏེ་གཡུག་འཇོག་རྒྱུའི་བཟོ་འདྲ་པོ་རེད། ཡིན་ནའང་། གཞུང་དེ་ཚོ་ཡང་ནས་ཡང་དུ་བསམ་དགོས་པ་དང་སྒོམ་དགོས་པ་ཞིག་ཡིན་པའི་ཆ་ནས། ཚར་བཅུ་ཉི་ཤུ་ལྷག་བལྟ་ཐུབ་ཀྱང་ཚིམས་པ་མེད་པར་ངེས་པར་བལྟ་དགོས་པ་ཞིག་ཆགས་ཡོད་པ་རེད། ཅེས་གསུངས་བྱུང་།

ཉི་ཧོང་གི་གོད་ཆག་སྐོར་ལ་༧གོང་ས་མཆོག་གིས་ཐུགས་སྨོན་གནང་བཞིན་ཡོད་སྐོར་གསུངས་དོན། བར་སྐབས་ནས་འབྱུང་བའི་གནོད་འཚེ་འོག་ཨོ་སི་ཊོ་ལི་ཡར་ཆུ་ལོགས་རྒྱུཊ་པ་དང་ནེའུ་ཛི་ལན་ཌིར་ས་ཡོམ་བརྒྱབ་པ། ལྷག་པར་དུ་ཉེ་ཆར་ཉི་ཧོང་དུ་ས་ཡོམ་དང་མཚོ་རླབས་ཀྱི་རྐྱེན་པས་མང་ཚོགས་ལ་གོད་ཆག་ཆེན་པོ་ཞིག་བྱུང་ཡོད། སྤྱི་ཡོངས་ཀྱི་ཐོག་བཤད་ན་ཉི་ཧོང་ནི་ནང་པའི་རྒྱལ་ཁབ་ཅིག་ཡོད་ཆགས་ཡོད་ལ། ངོས་རང་སྒེར་ལ་ཆ་བཞག་ཀྱང་ཉི་ཧོང་བའི་གྲོགས་པོ་ཧ་ཅང་མང་པོ་ཡོད།ཐེངས་འདིར་རྐྱེན་ངན་བྱུང་སྐབས་ང་ཚོས་སྨོན་ལམ་རྒྱག་རྒྱུ་མ་གཏོགས་ཐབས་གཞན་ཅི་ཡང་མི་འདུག་མོད། ཁ་སང་ངོས་ཀྱིས་གདན་ས་གསུམ་གཙོས་པའི་པའི་དགོན་སྡེ་ཁག་ཏུ་ཤེས་རབ་སྙིང་པོ་ཆིག་འབུམ་ལྷག་གསོག་དགོས་པའི་འབོད་སྐུལ་ཞུས་ཡོད་ལ། འབོད་སྐུལ་ཞུས་དོན་ལྟར་ཞབས་རིམ་སྒྲུབ་མགོ་བཙུགས་ཡོད། དེ་རིང་འདིར་ང་ཚོས་འདས་པོ་རྣམས་ཀྱི་ཆེད་ཤེས་རབ་སྙིང་པོ་ཚར་གསུམ་བཏོན་ཏེ་སྨོན་ལམ་རྒྱག་ཅེས། བཀའ་བསྩལ་སོང་།

༧གོང་ས་མཆོག་གིས་བདེན་བཞིའི་སྐོར་ལ་ངོ་སྤྲོད་ཀྱི་ཚུལ་དུ། སྤྱོད་འཇུག་ལས། སྡུག་བསྔལ་འདོར་འདོད་བློ་ཡོད་ཀྱང་།། སྡུག་བསྔལ་ཉིད་ལ་མངོན་པར་རྒྱུགས།། བདེ་བ་འདོད་ཀྱང་གཏི་མུག་པས།། རང་གི་བདེ་བ་དགྲ་ལྟར་འཇོམས། ཞེས་པ་ལྟར། མ་ཤེས་པའི་དབང་གིས་སྡུག་བསྔལ་གྱི་རྒྱུ་འདོར་མི་ཤེས་ཞིང་བདེ་བའི་རྒྱུ་བསྒྲུབ་མ་ཤེས་པའི་སྟབས་ཀྱིས། བདེ་སྡུག་ཟེར་བ་རྒྱུ་མེད་ལས་བྱུང་བ་ཞིག་མིན་ལ་རྟག་པའི་རྒྱུ་ལས་བྱུང་བ་མ་རེད།དཀོན་མཆོག་གི་བློ་ཡི་དབྱེ་བ་སྔོན་དུ་འགྲོ་བའི་ཐོག་འགྲོ་བའང་མིན་པར། དེ་ནི་རང་རང་གི་རྒྱུ་དང་རྐྱེན་ལ་བརྟེན་ནས་བྱུང་བ་ཞིག་རེད། ཅེས་དང་། བཅོམ་ལྡན་འདས་ཀྱི་བདེན་བཞིའི་རྣམ་གཞག་གསུངས་པ་ལྟར། ཆོས་རབ་ཏུ་རྣམ་པར་འབྱེད་པའི་ཤེས་རབ་དེས། བདེ་བ་དང་སྡུག་བསྔལ་ནི་རྒྱུ་དང་རྐྱེན་གང་ལ་བརྟེན་ནས་བྱུང་བ་དང་རྒྱུ་རྐྱེན་དེ་སེལ་ཐུབ་རྒྱུ་ཡོད་མེད། སྡུག་བསྔལ་གྱི་རྒྱུ་བཀག་པའི་སྒོ་ནས་སྡུག་བསྔལ་སྤངས་པའི་འབྲས་བུ་འཐོབ་རྒྱུ་ཡོད་མེད་སོགས་ལ་དཔྱད་པ་བྱས་སྐབས། དཔྱད་གཞིའི་ཡུལ་བདེན་པ་དེ་གསུངས་པ་རེད། བདེན་བཞི་གསུང་སྟངས་འདི་ནི་སྡུག་བསྔལ་འཕགས་པའི་བདེན་པའོ། འདི་ནི་ཀུན་འབྱུང་འཕགས་པའི་བདེན་པའོ་ཞེས། བདེན་བཞིའི་ངོ་བོ་ལས་འདས་པར་བྱས་ཏེ། དངོས་པོའི་གནས་ཚུལ་སྡུག་བསྔལ་ཟེར་བ་དེའི་རྒྱུ་གསུངས་ཤིང་སྡུག་བསྔལ་སྤངས་པའི་ཡོན་ཏན་ཡོད་མེད་རྩད་གཅོད་ཀྱིས། རྒྱུ་སྤངས་པའི་སྒོ་ནས་སྡུག་བསྔལ་བྲལ་བའི་འགོག་བདེན་དེ་གསུངས། འགོག་བདེན་དེའང་སྡུག་བསྔལ་གྱི་རྒྱུ་གཉེན་པོ་བསྟེན་ཏེ་སྤངས་པ་ཞིག་ཡིན་སྟབས། གཉེན་པོ་གང་འདྲ་ཡིན་པ་ལམ་གྱི་བདེན་པས་གསུངས་ཏེ་བདེན་པ་བཞི་གསུངས་ཤིང་། དེ་ནི་ཤེས་རབ་ཀྱི་བསླབ་པ་ཡིན་སྟབས་བདེན་བཞིའི་རྣམ་གཞག་ལ་སེམས་རྩེ་གཅིག་གིས་དཔྱད་དེ། དེའི་ཐོག་ནས་སེམས་ལ་འགྱུར་བ་ཐེབས་པ་ཞིག་བཟོ་དགོས།ཞེས་གསུངས་བྱུང་།

གསར་འགོད་པ་དཔལ་ལྡན།