རྒྱ་ནག་སྲིད་གཞུང་གིས་བསམ་ཤེས་བྱས་ཏེ་གཉིས་ཕན་གྱི་ལམ་ནས་བོད་ཀྱི་གནད་དོན་དེ་མ་སེལ་བར། གཞིས་བྱེས་གཉིས་ཀྱི་བོད་མི་ཡོངས་ལ་མུ་མཐུད་དཀའ་སྡུག་མྱོང་དུ་བཅུག་ཚེ། རྒྱལ་སྤྱིའི་མིག་ནང་གི་ཚེར་མ་ལྟ་བུར་འགྱུར་མི་སྲིད་པ་མིན། ཞེས་ཧྤ་རན་སིའི་གྲོས་ཚོགས་གོང་མའི་ཚོགས་གཙོ་མཆོག་གིས་གསུངས་ཡོད།
སྒྲོན་མེ་རྩོམ་སྒྲིག་པས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༠ཉིན་གྱི་གསུམ་བཅུའི་དུས་དྲན་ཐེངས་ ༥༢ པ་དང་སྟབས་བསྟུན་ཏེ། རྒྱལ་ས་ཕ་རེ་སིར་རྟེན་གཞི་བྱས་པའི་བོད་ཀྱི་བྱམས་བརྩེ་ཁང་གིས་ཧྥ་རན་སིའི་གྲོས་ཚོགས་གོང་མའི་ཚོགས་ཁང་དུ་༼བོར་བཞིན་པའི་བོད༽ཅེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་གནང་ཡོད་ཅིང་། བགྲོ་གླེང་ཐོག་ཧྥ་རན་སིའི་གྲོས་ཚོགས་གོང་མའི་བོད་དོན་དམིགས་བསལ་སྐུ་ཚབ་དང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཇོན་སྤོང་སའོ་བའི་གཙོས། གྲོས་ཚོགས་ཀྱི་འཐུས་མི་རྣམས་དང་བོད་ཀྱི་བྱམས་བརྩེ་ཁང་གི་འགན་འཛིན་ཚ་དབང་སུམ་གྱང་སྤྲུལ་སྐུ་བཅས་མཉམ་ཞུགས་གནང་སྟེ་བརྗོད་གཞི་དང་འབྲེལ་བའི་གཏམ་བཤད་གནང་ཡོད་པ་རེད།
སྐབས་དེར་ཧྥ་རན་སིའི་གྲོས་ཚོགས་གོང་མིའི་ཚོགས་གཙོ་མཆོག་གིས་གསུང་དོན། བོད་ཀྱི་གནད་དོན་ནི་མི་རིགས་ཤིག་གི་གནད་དོན་ལས་བརྒལ་དེ་རྒྱལ་སྤྱི་རང་བཞིན་གྱི་གནད་དོན་གལ་ཆེན་ཞིག་ཆགས་ཡོད། གལ་སྲིད། རྒྱ་ནག་སྲིད་གཞུང་གིས་བསམ་ཤེས་བྱས་ཏེ་གཉིས་ཕན་གྱི་ལམ་ནས་བོད་ཀྱི་གནད་དོན་དེ་མ་སེལ་བར། གཞིས་བྱེས་བོད་མི་ཡོངས་ལ་མུ་མཐུད་དཀའ་སྡུག་མྱོང་དུ་བཅུག་ཚེ། རྒྱལ་སྤྱིའི་མིག་ནང་གི་ཚེར་མ་ལྟ་བུར་འགྱུར་མི་སྲིད་པ་མིན། སྐབས་དེར་རྒྱ་ནག་གཞུང་གིས་ཧམ་བཤད་ཇི་ལྟར་བྱས་ཀྱང་རྒྱ་ནག་གི་དཔལ་འབྱོར་གྱི་མ་རྩ་དེ་ནུབ་ཕྱོགས་རྒྱལ་ཁབ་ཚོས་འཇོག་གིན་ཡོད་སྟབས། ལེ་སྦེ་ཡའི་གཞུང་ལ་ཨ་རིའི་དཔལ་འབྱོར་གྱིས་ཉེས་ཆད་བཅད་པ་ལྟར། རྒྱ་ནག་སྔར་བཞིན་ཕྱོགས་གང་ཅིའི་ཐད་ནས་སྐྱོ་ངལ་གྱི་གནས་སུ་ལྷུང་རྒྱུ་ཁོ་ན་ཡིན་ལ། རྒྱ་ནག་ཆེན་པོ་དེ་རང་ཤུགས་ཀྱིས་འཐོར་ཞིག་ཏུ་འགྲོ་སྲིད་པ་རེད། གནས་སྟངས་དེ་དག་ལ་གཞིགས་ཏེ་མ་འོངས་པར་རྒྱ་ནག་གཞུང་གིས་ཕན་ཚུན་ལ་བསམ་ཤེས་གུ་ཡངས་དང་ཏཱ་ལའི་བླ་མས་བཏོན་པའི་དབུ་མའི་ལམ་དེ་དམིགས་འཛིན་བྱ་རྒྱུ་དང་། ༸གོང་ས་མཆོག་གི་སྐུ་ཚབ་དང་ལྷན་དུ་མིང་དོན་མཚུངས་པའིི་གྲོས་མོལ་བྱ་རྒྱུ་གལ་ཆེན་རེད། ཅེས་གཏམ་བཤད་གནང་ཡོད་འདུག 
དེ་བཞིན། རྒྱལ་ས་ཕ་རེ་སིར་རྟེན་གཞི་བྱས་པའི་བོད་ཀྱི་བྱམས་བརྩེ་ཁང་གི་འགན་འཛིན་ཚ་དབང་སུམ་གྱང་སྤྲུལ་སྐུ་མཆོག་གིས་ཀྱང་། དེ་རིང་གི་ཉིན་མོ་འདི་བོད་པ་ལས་གཞན་པའི་རྒྱལ་ཁབ་རྣམས་ལ་མཚོན་ན། ཆེས་སྤྱིར་བཏང་གི་ཉིན་མོ་ཞིག་ཡིན་ནའང་། ང་ཚོ་བོད་པའི་ཆུང་བྱིས་པ་ནས་རྒན་མགོ་དཀར་ཡོངས་ཀྱིས་བརྗེད་མི་ཐུབ་པའི་ཉིན་མོ་ཞིག་ཡིན་པར་མ་ཟད། ང་ཚོའི་དཀའ་སྡུག་གི་ལོ་རྒྱུས་ལ་ཕྱིར་དྲན་བྱེད་པའི་ཉིན་མོ་ཞིག་ཀྱང་ཆགས་ཡོད། ༢༠༡༠ ལོ་ནས་བཟུང་རྒྱ་ནག་དབུས་གསང་བའི་ལས་ཁུངས་ཀྱི་སྲིད་བྱུས་ཉམས་ཞིབ་པ་ཚོས་གུ་ཡངས་མཉམ་འབྲེལ་བྱ་རྒྱུ་ལས་ལྡོག་ཏེ། བོད་ཐོག་འཛིན་པའི་ཀླད་ཀོར་སྲིད་བྱུས་དེ་དུས་དང་གནས་ལུགས་ལ་ལྟོས་ཏེ་འགྱུར་ལྡོག་ཅི་ཡང་མ་བཏང་བར་མ་ཟད། ཀླད་ཀོར་སྲིད་བྱུས་ཀྱི་སྦྱོར་བ་ཇེ་རྩུབ་ཇེ་སྡུག་ཏུ་བཏང་སྟེ་སློབ་གསོའི་སྲིད་བྱུས་ཞེས་པའི་འབོད་སྒྲའི་འོག བོད་ཀྱི་སྐད་དང་ཡི་གེ་རྩ་མེད་བཟོ་རྒྱུའི་འཆར་གཞི་བཏང་ཡོད་ལ། བོད་མི་རིགས་དང་དེའི་རྩ་ཆེ་བའི་ཆོས་དང་རིག་གཞུང་གིས་མཚོན་པའི་མི་རིགས་ཀྱི་ངོ་བོ་མཚོན་པའི་རིག་གནས་རྣམས་རྩ་སྟོང་དུ་འགྲོ་ཐབས་སུ་ཞི་དྲག་སྣ་ཚོགས་ཀྱིས་ཐབས་ལམ་བཀོལ་བཞིན་ཡོད་པ་མིག་མཐོང་ལག་ཟིན་གྱི་གནས་སུ་གྱུར་ཡོད། ཁོ་ཚོས་དེ་འདྲའི་སྲིད་བྱུས་ཤིག་བཟུང་བའི་རྒྱབ་ལྗོངས་གཙོ་བོ། དེ་སྔ་མན་ཇི་མི་རིགས་ཀྱི་ཐོག་ལ་ཐབས་ལམ་དེ་སྤྱད་ནས་གྲུབ་འབྲས་དང་ནུས་བ་ཐོན་ཡོད་པ་ལ་བརྟེན་ནས། གྲངས་ཉུང་མི་རིགས་དུ་གྱུར་བའི་བོད་དེ་མི་གྲངས་མང་བའི་རྒྱ་རིགས་ཁྲོད་སིམ་ཡལ་དུ་འགྱུར་ཐབས་སུ་འཇམ་རྩུབ་སྣ་ཚོགས་ཀྱི་ཐབས་ལམ་སྤྱད་དང་སྤྱོད་བཞིན་ཡོད། ཅེས་གསུངས་ཡོད་འདུག ཐེངས་འདིའི་བགྲོ་གླེང་ཚོགས་འདུའི་སྟེང་ཧྥ་རན་སིའི་གྲོས་ཚོགས་གོང་མའི་བོད་དོན་དམིགས་བསལ་སྐུ་ཚབ་དང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གཙོས། གྲོས་ཚོགས་གོང་མའི་གནད་ཡོད་མི་སྣ་དང་ཕ་རེ་སི་བོད་གཞུང་སྐུ་ཚབ་དོན་གཅོད་དབང་པོ་མཆོག ཧྥ་རན་སིའི་ནང་སྲིད་ལས་ཁུངས་ཨེ་ཤ་ཡའི་སྡེ་ཚན་གྱི་མི་སྣ། བདེ་སྲུང་ལས་ཁུངས་གྱི་སྐྱབས་བཅོལ་ལྟ་སྐྱོང་སྡེ་ཚན་གྱི་མི་སྣ་དང་བོད་མི་ཤེས་ཡོན་པ་བཅས་མི་ ༢༠༠ ལྷག་འདུ་འཛོམས་ཀྱིས་༼བོར་བཞིན་པའི་བོད༽ཅེས་པའི་བརྗོད་གཞིའི་ཐོག་གཏམ་བཤད་དང་བགྲོ་གླེང་སོགས་གནང་ཡོད་པ་རེད།
གསར་འགོད་པ་དོན་གོ།
