གྲོས་ཚོགས་འཐུས་མི་ནི་མི་མང་གི་སྐུ་ཚབ་ཡིན་སྟབས། མི་མང་གི་མངོན་འདོད་གཞིར་བཞག་ཐོག་གསོལ་བ་ཕུར་ཚུགས་སུ་འདེབས་པའི་གྲོས་ཆོད་ཅིག་འཇོག་ཐུབ་པ་དེ་ནི། ལོ་རྒྱུས་ནང་གལ་གནད་ཆེན་པོ་ཞིག་ཆགས་ཡོད་པར་ངོས་འཛིན་ཞུ་བཞིན་ཡོད། ཅེས་སྤྱི་འཐུས་ཚོགས་གཙོས་གསུངས།
ཁ་སང་ཕྱི་ཚེས་ ༢༥ ཉིན་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པ་ཡོངས་སུ་མཇུག་བསྒྲིལ་ཡོད་ཅིང་། ཐེངས་འདིའི་གྲོས་ཚོགས་ནང་༧གོང་ས་མཆོག་གི་བགྲེས་ཡོལ་དང་འབྲེལ་ཏེ། བཙན་བྱོལ་བོད་མིའི་བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་དང་འབྲེལ་བའི་ཐོག་བགྲོ་གླེང་ཡང་ཡང་བྱས་མཐར་གྲོས་ཚོགས་ཀྱིས་རྒྱབ་གཉེར་གནང་སྟེ། མི་འགྱང་པའི་དུས་ཡུན་ནང་བཀའ་སྤྱི་གཉིས་ལས་གྲུབ་པའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བཙུགས་ཏེ། ཕྱི་ཟླ་ ༥ ཚེས་ ༢༡ ནང་ཚུན་དུ་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་དེ་འཚོགས་བསྐངས་ཏེ་མང་ཚོགས་ལ་དགོངས་འཆར་བསྡུ་རྒྱུར་སྤྱི་མོས་གྲོས་ཆོད་བཞག་སོང་།
ཁ་སང་ཕྱི་དྲོར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གྲོས་ཚོགས་ཚོགས་དུས་བཅུ་གཅིག་པའི་མཇུག་བསྡོམས་གཏམ་བཤད་གནང་དོན། ཐེངས་འདིའི་གྲོས་ཚོགས་ཀྱི་ལས་རིམ་གཙོ་བོ་༸གོང་ས་མཆོག་གི་གསུང་འཕྲིན་ཐོག་ཉིན་བརྒྱད་ཀྱི་དུས་ཚོད་བཏང་སྟེ། ཚོགས་ཆུང་ཁག་གི་སྙན་ཐོ་དང་དྲི་བ་དྲིས་ལན། ཐུག་སྣང་གཞེན་སྐུལ་བཅས་དུས་ཚོད་ཏག་ཏག་ཞིག་གི་ནང་འགྲུབ་ཐུབ་པ་དེ་གཙོ་བོ་འཛིན་སྐྱོང་བཀའ་ཤག་དང་སྤྱི་འཐུས་རྣམ་པའི་མཐུན་འགྱུར་ལས་བྱུང་སྟབས་ཐུགས་རྗེ་ཞུ་རྒྱུ་ཡིན། ད་རེབ་༸གོང་ས་མཆོག་གིས་གྲོས་ཚོགས་སུ་ཕེབས་པའི་གསུང་འཕྲིན་དེ་ནི། བོད་མི་སུ་འདྲ་ཞིག་ཡིན་རུང་སེམས་ནང་མ་ཤོང་བ་ཞིག་དང་། གང་འདྲ་ཞིག་ཆགས་ཡོངས་ན་བསམ་པའི་བློ་འཚབ་ཀྱི་རང་བཞིན་ཞིག་ཆགས་ཡོད་སྟབས། གྲོས་ཚོགས་ཚོགས་བཞིན་དུ་མང་ཚོགས་ཀྱི་ཁྲོད་ནས་ཡི་གེ་མང་པོ་ཞིག་འབྱོར་བསྡད་ཀྱི་འདུག་ལ། དེ་བཞིན་ས་གནས་ཁག་དང་མི་སྒེར་བ་བཅས་ཀྱི་བསམ་ཚུལ་མི་འདྲ་ཐོན་ཡོད་ཀྱང་། ད་ལྟའི་ཆབ་སྲིད་འཕོ་འགྱུར་གྱི་གནས་སྟངས་འདི་འདྲའི་སྐབས་སུ་ཐུགས་འཁུར་ཆེན་པོ་བཞེས་ཏེ་གྲོས་ཚོགས་དང་སྐུ་སྒེར་ཡིག་ཚང་། བཀའ་ཤག་བཅས་ལ་ཕུལ་བའི་གནས་སྟངས་ཆགས་ཡོད་སྟབས། མི་མང་གི་ངོས་ནས་བོད་པའི་ཆབ་སྲིད་ལ་ཐུགས་འགན་བཞེས་པར་ཐུགས་རྗེ་ཆེ་ཞུས་བ་ཡིན། ཞེས་དང་།
ཡང་ཁོང་གིས་མུ་མཐུད་དོན། ༸གོང་ས་མཆོག་གི་གསུང་འཕྲིན་གྲོས་ཚོགས་ནང་སྙན་སྒྲོན་ཞུས་པར། བཙན་བྱོལ་གྱི་མང་ཚོགས་དང་གྲོས་ཚོགས་འཐུས་མི། འཛིན་སྐྱོང་བཀའ་ཤག་བཅས་ཚང་མ་སེམས་སྡུག་གི་དབང་གིས་གསུང་འཕྲིན་ལ་དགའ་བསུ་ཞུ་མ་ཐུབ་པའི་གནས་སྟངས་ཆགས་ཡོད། གསུང་འཕྲིན་ལ་ཞིབ་ཚགས་པོའི་ཐོག་ནས་དཔྱད་ཞིབ་གནང་ཆེད་ཉིན་མཐའ་མར་དུས་ཚོད་སྟོང་པ་དང་། ཚེས་ ༡༥ ཉིན་གང་བོར་གསུང་འཕྲིན་ཐོག་དགོངས་ཚུལ་གསུངས་བའི་གོ་སྐབས་གནང་སྟེ་ཚོགས་མི་བརྒྱ་ཆའི་ ༩༠ ལྷག་གིས་མུ་མཐུད་ཆབ་སྲིད་ཀྱི་ཐུགས་འགན་བཞེས་དགོས་པའི་མངོན་འདོད་དང་། སྤྱི་འཐུས་སྒེར་གྱི་དགོངས་ཚུལ་གཞིར་བཅོལ་ཏེ་དགོངས་ཚུལ་གསུངས་ཡོད། ཡིན་ནའང་། གསུང་འཕྲིན་དེ་གལ་གནད་ཆེན་པོ་དང་ལོ་རྒྱུས་ཀྱི་དོན་སྙིང་ལྡན་པའི་གནས་ཚུལ་ཞིག་ཡིན་སྟབས། ཡང་བསྐྱར་ཚེས་ ༡༦ དང་ ༡༧ བཅས་ཉིན་གཉིས་རིང་གོ་བསྡུར་སྦྱང་བཤད་གནང་ཡང་། ཆབ་སྲིད་ཀྱི་ཐུགས་འགན་མུ་མཐུད་བཞེས་དགོས་ཞེས་བསྟན་བསྡད་པ་རེད། ཅེས་དང་།
ཕྱི་ཚེས་ ༡༨ ཉིན་བསྐྱར་དུ་གཞུང་འབྲེལ་གྲོས་ཆོད་གྲོས་འཆར་གྲོས་ཚོགས་སུ་ཕེབས་ཏེ། ཉིན་གང་བོར་བགྲོ་གླེང་བྱས་མཐར་གྲོས་ཆོད་དོན་ཚན་གསུམ་གྱི་གཙོ་བོ། ༸གོང་ས་མཆོག་ལ་ཆབ་སྲིད་དང་འཛིན་སྐྱོང་གི་ཐུགས་འགན་མུ་མཐུད་བཞེས་དགོས་ཀྱི་འདུག་ཅེས་གསོལ་བ་ཕུར་ཚུགས་སུ་འདེབས་དགོས། ཞེས་བསྟན་ཡོད་ཀྱང་། སྤྱི་ཚོགས་ནང་༸གོང་ས་མཆོག་གི་གསུང་འཕྲིན་ལ་གྲོས་ཚོགས་ཀྱིས་བདག་པོ་མ་བརྒྱབ་པར་གསོལ་བ་ཕུར་ཚུགས་སུ་བཏབ་པ་རེད་ཅེས་བཤད་ཡོད། བཤད་སྟངས་དེར་ལྟ་སྟངས་མི་འདྲ་བ་ཞིག་དང་སྡུག་ས་ཞིག་ནས་བལྟས་པའི་གནས་སྟངས་ཤིག་རེད། ཚོགས་གཙོ་སྦྲེལ་པོ་དང་གྲོས་ཚོགས་འཐུས་མིའི་གོ་བསྡུར་སྐབས་ང་ཚོས་འདི་ནི་ལོ་རྒྱུས་ལྡན་པ་ཞིག་བྱུང་སོང་བསམ་པ་དང་། གྲོས་ཚོགས་འཐུས་མི་ནི་མི་མང་གི་སྐུ་ཚབ་ཡིན་སྟབས། མི་མང་གི་མངོན་འདོད་གཞིར་བཞག་ཐོག་གསོལ་བ་ཕུར་ཚུགས་སུ་འདེབས་པའི་གྲོས་ཆོད་ཅིག་འཇོག་ཐུབ་པ་དེ་ནི། ལོ་རྒྱུས་ནང་གལ་གནད་ཆེན་པོ་ཞིག་ཆགས་ཡོད་པར་ངོས་འཛིན་ཞུ་བཞིན་ཡོད། ཅེས་གསུངས་སོང་།
༧གོང་ས་མཆོག་གི་དགོངས་དོན་ཐག་གཅོད་གནང་སྟངས་ཐད། ཕྱི་ཚེས་ ༡༩ ཉིན་གྲོས་ཆོད་གང་བཞག་པ་དེ་སྐུ་སྒེར་དྲུང་ཆེ་བརྒྱུད་༸གོང་ས་མཆོག་ལ་སྙན་སེང་ཞུས་པ་དང་། ༸གོང་ས་མཆོག་གིས་གྲོས་ཆོད་དེ་ངོས་ལེན་མ་གནང་བའི་ཐོག་ནས་གསུང་འཕྲིན་རིན་པོ་ཆེའི་ནང་གང་འཁོད་པ་དེར་འགྱུར་བ་མེད་ཅེས་བཀའ་ཕེབས་པའི་ཐོག ཕྱི་ལོགས་སུ་སྒྲོ་བཏགས་ཏེ་༸གོང་ས་མཆོག་གིས་ཆབ་སྲིད་ཀྱི་རྩེད་མོ་རྩེད་བ་དང་ཟློས་གར་འཁྲབ་བཞིན་པའི་སྐོར་བཤད་པ་མ་ཡིན་པར། ༸གོང་ས་མཆོག་སྐུ་སྒེར་ངོས་ནས་ཐུགས་ཐག་ཆོད་པོས་ཐོག་ནས་བཀའ་ཕེབས་ཡོད་སྟབས། གྲོས་ཚོགས་ཀྱི་ངོས་ནས་གྲོས་ཆོད་ལ་བསྐྱར་ཞིབ་མི་བྱ་ཐབས་མེད་བྱུང་བ་ལས། གྲོས་ཚོགས་དང་བཀའ་ཤག་གི་ངོས་ནས་དགའ་དགའ་སྤྲོ་སྤྲོའི་ཐོག་ནས་དང་ལེན་ཞུས་པ་ཞིག་རྩ་བ་ནས་ཆགས་མེད། ཅེས་གསུང་བྱུང་།
མཐའ་མར་ཁོང་གིས། ཕྱོགས་གཅིག་ནས་༸གོང་ས་མཆོག་བགྲེས་ཡོལ་དུ་ཕེབས་པའི་དགོངས་གཞི་དེར་ང་ཚོ་བློ་ཕམ་ཆེན་པོ་ཡོད་པ་ཞིག་དང་། ཕྱོགས་གཞན་ཞིག་ནས་སྐབས་བཅུ་བཞི་པའི་འགན་འཁུར་དགོས་པ་དེ་འཁུར་ཐུབ་སོང་བསམ་པའི་ཚོར་སྣང་ཐོག་མཇུག་བསྡུ་བའི་མཚམས་སུ་བསླེབས་ཡོད་ཀྱང་། ད་ལྟའང་ལས་རིམ་དེ་མཇུག་སྒྲིལ་མེད་པར། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བསྐྱར་དུ་བཙུགས་ཏེ། ཕྱི་ཟླ་ ༤ པའི་ཚེས་ ༡༡ ལ་ཚོགས་དྲུང་ལས་ཁུངས་སུ་འབུལ་ཐུབ་པ་དགོས་པ་དང་། དེའི་ཐོག་སྤྱི་འཐུས་རྒྱུན་ལས་དང་བཀའ་ཤག་ལྷན་རྒྱས་ལ་གོ་བསྡུར་ཞུ་དགོས་པ་ཞུས་ཏེ། གྲོས་ཆོད་བཞག་པ་གཞིར་བཟུང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་དེ་ཕྱི་ཟླ་ ༥ པའི་བདུན་ཕྲག་གསུམ་པའི་ནང་ཚུན་འཚོགས་ཐུབ་རྒྱུར་ཚོགས་གཙོ་སྦྲེལ་པོ་དང་ཚོགས་དྲུང་ལས་ཁུངས་ཀྱིས་ཧུར་བརྩོན་བྱ་རྒྱུ་ཡིན། དེའི་བྱུང་རིམ་ཆ་ཚང་མང་ཚོགས་ནང་མཁྱེན་རྟོགས་ཡོང་ཆེད། བཀའ་ཤག་གི་ངོས་ནས་གང་མགྱོགས་༸གོང་ས་མཆོག་གིས་གསུང་འཕྲིན་ཕེབས་པའི་ལོ་རྒྱུས་སྙིང་བསྡུས་ཤིག་དེབ་ཐེར་དུ་བཀོད་དེ། ས་གནས་ཚང་མར་འགྲེམས་ཐུབ་པ་དང་བོད་ནང་གི་བོད་མི་ཚོར་གསལ་བོ་བཟོ་ཐུབ་པ་བྱ་རྒྱུ་དང་། གྲོས་ཚོགས་ནང་གི་གནད་དོན་མང་པོ་ཞིག་མང་མོས་བྱེད་ཐུབ་ཀྱི་མེད་པའི་གནས་སྟངས་ལ་གཟིགས་ཏེ། མ་འོངས་གྲོས་ཚོགས་ཚོགས་དུས་འཕར་མའི་སྟེང་སྤྱི་འཐུས་ཚང་མས་ཆ་ཤས་ལེན་རྒྱུ་དང་འཛོམ་ཐུབ་པ་བྱ་རྒྱུར་འབོད་སྐུལ་ཞུ་བཞིན་ཡོད། ཅེས་གསུངས་སོང་།
གསར་འགོད་པ། དོན་གོ
མི་བོ་སུ་ཞིག་གི་རྩོམ་ཡིག་དྲྭ་བསྐུར་བྱུང་ན། རྩོམ་རང་ངོས་ལ་བལྟ་དགོས་པ་ལས་རྩོམ་པ་པོ་སུ་ཞིག་ཡིན་མིན་ལ་བལྟས་ན་དེ་ནོར་བ་ཡིན།
ཚོགས་གཙོའི་སྐད་ཆར་ནང་འགལ་དང་རང་བདེན་ཙམ་ལས་བདེན་ལུགས་དེ་ཙམ་མི་འདུག འོན་གྱང་བོད་མི་མང་ལ་འགན་མ་ཁུར་བ་ཞིག་ཀྱང་ཡིན་མི་སྲིད།
དེ་བདེན་པ་རེད། འགན་འཁུར་ཐུབ་ཚོད་ཅིག་ལས་ཅི་ཞིག་འཁུར།
རང་གིས་གང་འཇོན་དང་། གང་ཤེས་སྒྲུབ་པ་དང་བྱས་ན་ང་ཚོར་མདུན་ལམ་ལོས་ཡོད། རང་ཉིད་་ལྟོ་གོས་གཏམ་གསུམ་ལ་མགོ་འཁོར་ནས། གཞན་ལ་སྐྱོན་བརྗོད་རྐྱང་བྱས་བསྡད་ན་༸གོང་ས་མཆོག་གིས་བཀའ་གང་གནང་ཀྱང་སྟོང་བ་ཆགས་འགྲོ་ལ། དེ་དུས་ང་ཚོ་མུ་འཐུད་ནས་ཡར་རྒྱས་གང་ཡང་མེད། ༸གོང་ས་མཆོག་གིས་ཀྱང་གླང་ཆེན་གྱི་ཁལ་བྱི་ལར་ཁུར་གསུང་གི་མེད།
ཉེ་སྔོན་༧གོང་ས་མཆོག་གིས་བགྲེས་ཡོལ་གནང་རྒྱུར་མོས་མཐུན་ཡོད་མེད་ས་རྟགས་བསྡུ་རུབ་བྱེད་སྐབས་བདག་གིས་བགྲེས་ཡོལ་གནང་རྒྱུར་མོས་མཐུན་བྱས་ཏེ་མུ་མཐུད་དུ་ཐུགས་འགན་འཁུར་དགོས་ཞེས་ས་རྟགས་བརྒྱབ་མེད། དེར་རྒྱུ་མཚན་དང་དགོས་པ་མེད་པར་རང་དགར་བྱས་པ་ཞིག་མིན། འོན་ཀྱང་ད་དུང་ཐུགས་འགན་འཁུར་དགོས་ཟེར་མཁན་དག་ལའང་རྒྱུ་མཚན་མི་འདུག་ཅེས་བསམ་མྱོང་མེད། རང་རེའི་སྤྱི་ཚོགས་ཀྱི་ད་ལྟའི་གནས་བབ་ལ་ངེས་པར་དུ་ཕྱོགས་འདི་གཉིས་ཀ་དགོས་ཀྱི་འདུག ༧གོང་ས་མཆོག་གིས་ཡང་ཡང་བཀའ་གནང་བ་དང་མི་མང་དང་སྤྱི་འཐུས་གྲོས་ཚོགས་ཀྱིས་ཀྱང་མང་མོས་ཐོག་ཡང་ཡང་གསོལ་འདེབས་ཞུས་པ་དེ་ཡང་དགོས་ངེས་ཤིག་རེད། འདིར་དགོས་ངེས་ཀྱི་ལོ་རྒྱུས་རང་བཞིན་དང་འཐབ་རྩོད་ཀྱི་བྱེད་ཐབས་རང་བཞིན་ཡང་དག་པ་ཞིག་ལྡན་པ་འདུག
ཚོགས་གཙོ་སྤེན་ཚེ་དང་། བཀའ་ཁྲི་ཟམ་གདོང་གཉིས་ནི་ལོ་རྒྱྲུས་ཐོག་ནག་ཉེས་ཆེས་གྲས་ཀྱི་བོད་པའི་འགོ་འཁྲིད་གཉིས་རེད། ཁོང་གཉིས་ཀྱི་གཙོ་སྐྱོང་ཆོལ་ཁའི་རྙོག་གྲས་གྲོས་ཚོགས་འཚོག་མི་ཐུབ་དང་། བོད་མི་རྣམས་སེམས་ཤུགས་ཆགས་པ། རྒྱལ་དབང་མཆོག་ནས་ཀྱང་ཆབ་སྲིད་འགན་དབང་མཚམས་འཇོག་བྱས་པ་སོགས་གང་ལྟར་ནམ་མཁར་མི་གཤོང་བའི་ནག་ཉེས་བསགས་པ་རེད། ད་དུང་སྐད་ཆ་བརྫིག་པོ་འདྲ་རེ་བཤད་རྒྱུར་ངོ་མི་ཚ་བའི་ཨོ་ཙམ་རེད།
ངས་མི་གཅིག་གི་གླ་ཟེར་བ་གྲོས་ཚོགས་ཚོགས་དུས་བརྒྱད་པའི་རྙོག་དྲ་ལས་འཕྲོས་ཏེ་བཤད་པ་མ་གཏོགས་སེ་རའི་གླ་འགོར་གྱི་རྙོག་དྲ་ལ་ཟེར་གྱི་མེད། གལ་སྲིད་རྡོ་རྗེས་དེ་ལ་འཁྲུལ་ན་གསལ་བཤད་ཡིན།
སེ་རའི་གླ་འཁོར་གྱི་རྙོག་དྲ་དེ་སེལ་ཐུབ་མཁན་ནི་ཧི་མ་ལ་ཡའི་རིགས་རྒྱུད་ཀྱི་གྲྭ་བ་རྣམས་ལས་གཞན་སུ་གཅིག་ཀྱང་མེད། ཧི་མ་ལ་ཡའི་རིགས་རྒྱུད་གྱི་གྲྭ་བ་རྣམས་གྱིས་ད་སོ་སོའི་ཐོབ་ཐང་རྩོད་པའི་དུས་ལ་སླེབས་པ་རེད། སོ་སོ་རྒྱ་གར་གྱི་ཡུལ་མི་ཞིག་ཡིན་པའི་ངོས་ནས་སོ་སོའི་ཐོབ་ཐང་རྩོད་དགོས། ཧི་མ་ལ་ཡའི་རིགས་རྒྱུད་རྣམས་གྱིས་བོད་དང་མཉམ་དུ་བརྙས་བཅོས་འཁུར་དགོས་དོན་མེད་པས་སོ་སོའི་ཐོབ་ཐང་རྩོད་ཞིག། ཁྱོད་ཚོ་ཅི་ཞིག་ལ་རྒྱ་གར་བ་ལ་སྐྲག་དགོས་བ་རེད།
ཁྱེད་ཅག་གིས་བསམ་ན་བཀའ་ཁྲིའི་རྒྱལ་ཁ་དེ་སུས་ཐོབ་བམ། བློ་སེང་ངམ། བཀྲས་མཐོང་། ཡང་ན་བཀྲ་ཤིས་དབང་འདུས། སྤྱི་འཐུས་འོས་གཞིའི་ནང་སྐབས་སྔ་མའི་དེ་ཚོ་ཙམ་ལས་འགྱུར་བ་ཆུང་བས་མི་གཅིག་གི་གླ་ལ་རྩོད་གླེང་གིས་དུས་ཚོད་བསྐྱེལ་བར་ངེས། ད་ལྟའི་ཚོགས་གཙོ་མཆོག་ནི་གསར་རྙིང་གཉིས་ཀས་ལྟ་བ་ཡོད་ལ་ཤེས་འབྱོན་ཡང་མི་དམན་པའི་ཐོགས་ལས་དོན་ཧུར་ཐག་བསྒྲུབས་སོང་སྙམ།
འགན་འཁུར་དགོས་པ་དེ། འཁུར་ཐུབ་སོང་བསམ་ཡོད། ཅེས་པའི་འགོ་བརྗོད་འོག་གི ནང་གསལ། ལག་ལེན་དང་། བསམས་པ་གཉིས་ཀ་ལ། ང་ནི། དགའ་སྤོབས་ཅུང་ཟད་སྐྱེས་བྱུང་བས། བཀའ་དྲིན་ཆེ་ལགས།