དེ་རིང་སྔོ་དྲོར་ངྷ་ས་དགུ་བཅུ་གསུམ་ཚོགས་པས་གསར་འགོད་གསལ་བསྒྲགས་ཤིག་བསྐྱངས་ཏེ། ཚོགས་གཞོན་ཀླུ་མཁར་བྱམས་ལགས་དང་དྲུང་ཆེ་གངས་ལྷ་མོ་གཉིས་ཀྱིས། ཕྱི་ཚེས་ ༡༡ ཉིན་ཉི་ཧོང་ནང་ས་འགུལ་མཚོ་འཁྱོམ་གྱི་དོན་རྐྱེན་བྱུང་སྟེ། ད་ཆར་མི་ ༡༠༨༠༠ ལྷག་རྐྱེན་འདས་དང་། མི་ ༡༦༢༤༠ ཙམ་བོར་བརླག མི་ ༡༩༠༠༠༠ ལྷག་གི་སྡོད་གནས་མེད་པར་གྱུར་ཡོད། རྡུལ་ཕྲན་རྟེན་གཞིར་གནོད་སྐྱོན་ཐེབས་ཏེ་ཉིང་རྡུལ་རླབས་ཤུགས་ཕྱི་རུ་ཁྱབ་ནས་སྐྱེས་འགྲོའི་ཚེ་སྲོག་ལ་ཉེན་འཚབ་འཕྲད་བཞིན་ཡོད། ང་ཚོ་དགུ་བཅུ་གསུམ་ཚོགས་པས་ཉི་ཧོང་གནོད་ཐེབས་ས་ཁུལ་གྱི་འདས་གསོན་ཚོའི་ཆེད་ཕྱི་ཚེས་ ༡༣ ཉིན་ངྷ་སའི་ཐེག་ཆེན་ཆོས་གླིང་གཙུག་ལག་ཁང་དུ་ཆོད་འབུལ་བསྔོ་སྨོན་ཞིག་ཕུལ་ཡོད། ཅེས་དང་།
ཕྱི་ཚེས་ ༡༥ དང་ ༡༦ ཉིན་གཉིས་རིང་དགུ་བཅུ་གསུམ་ཚོགས་པའི་སྣེ་ཁྲིད་འོག་སྤུན་ཟླ་ཉི་ཧོང་བ་ཁག་ཅིག་དང་མཉམ་དུ་ངྷ་སའི་མེག་ལོར་ཁྲོམ་གཞུང་ནས་ཉི་ཧོང་གནོད་ཐེབས་མི་མང་སྐྱོབ་གསོའི་ཆེད་ཞལ་འདེབས་བསྡུ་རུབ་བྱས་པར་ཧིན་སྒོར་ ༡༡༧༠༠༠ བྱུང་བ་དག་དེ་རིང་དངུལ་བྱང་བརྒྱུད་ཉི་ཧོང་སྲིད་བློན་སྐུ་ཞབས་ནཱ་ཐོ་ཁན་མཆོག་གི་མཚན་ཐོག་ལ་ཐུགས་གསོའི་འཚམས་འཕྲིན་དང་བཅས་ཕུལ་ཡོད། ཐེངས་འདིའི་ཞལ་འདེབས་གཞི་རྩའི་ཉུང་ངུ་ཞིག་ལས་མེད་ཀྱང་དེ་ནི་མེ་ཏོག་ཆུང་ཡང་མཆོད་རྫས་ཞེས་པའི་དཔེ་ལྟར། མི་སེར་དཀྱུས་མ་རྣམས་ཀྱིས་མི་ཆོས་རིང་ལུགས་ཀྱི་ལྟ་སྤྱོད་རྣམ་དག་གིས་ཕུལ་བ་ཞིག་དང་། ལྷག་པར་བོད་མི་རྣམས་ལ་མཚོན་ན་སྤུན་ཟླ་ཉི་ཧོང་བ་རྣམས་གཙོས་ཁྱིམ་མཚེས་རྒྱལ་ཁབ་དག་དང་མཉམ་དུ་སྐྱིད་སྡུག་མཉམ་མྱོང་དང་། དར་རྒུད་སྣ་ཚོགས་བརྒྱུད་ནས་ཡོང་བའི་མི་རིགས་སྤུན་ཟླ་ཡིན་པར་བརྟེན། ཁྱིམ་མཚེས་ཡུལ་ལུང་དག་ཏུ་གོད་ཆག་བྱུང་སྐབས། གདུང་སེམས་མཉམ་སྐྱེད་མཚོན་ཕྱིར་བོད་ཀྱི་ཚོགས་སྐྱིད་ཅིག་གི་མིང་ཐོག་ནས་དགེ་ཕྱོགས་ཀྱི་བྱ་བ་ཕྲན་བུ་ཞིག་བསྒྲུབས་ཐུབ་པར་དགའ་ཚོར་བྱུང་ཞེས་བསྟན་འདུག
གསར་འགོད་པ། བནྡེ་སྐྱབས།
རྡོ་རྗེ་ཚེ་རིང་ལགས་བསམ་དགོངས་ཚུལ་གསུངས་པར་ཐུགས་རྗེ་ཆེ། མ་གཞི་ནས་ལས་འགུལ་གང་ཞིག་སྤེལ་ཡང་དཔལ་འབྱོར་དགོས་ཀྱི་རེད་པ། དཔལ་འབྱོར་དང་ལག་ལེན་གཉིས་ཀའི་ཐད་དུ་ངས་ཐུབ་པ་མི་འདུག་ག་ཧཧཧ་་་་་
རྗེས་སུ་ཡིད་རང་ཡོད། འོན་ཀྱང་མཁས་བཙུན་ཁྱེད་རང་སྐད་ཡིག་གི་ཆེད་དུ་ལས་འགུལ་ཞིག་ཟེར་ནས་མགོ་བསྐོར་མ་གཏོང་། དང་པོ་སོ་སོས་སྐད་ཡིག་སྲུང་སྐྱོབ་བམ་ལས་གཞིའི་དེའི་ཆེད་དུ་ལས་ཀ་ཞིག་གྱིས་དང་། ལམ་སེང་སོ་སོའི་གྲོད་ཁོག་བསམ་ནས་ཞལ་འདེབས་ལབ་ན་ཏོག་ཙམ་འགྲིག་གི་མིན་འདུག
ལས་ཀ་རླབས་ཆེན་རེད། འདི་ནི་བོད་དོན་ཐད་ཀྱི་གོ་སྐབས་འཛིན་སྟངས་ཤིག་རེད་ལ། སུས་ཀྱང་དགག་མི་ཐུབ་པའི་ལམ་ཁ་ཡན་གར་བ་ཞིག་རེད། ཐུགས་རྗེ་ཆེ་ཞུ་འདུན་བྱུང་སོང་།
དེ་སྔོན་ངས་ཞལ་འདེབས་བསྡུ་ཡག་གི་ལས་གཞི་འདི་ནི་བསྡུ་མཁན་དང་། རྒྱག་མཁན་ཕྱོགས་གཉིས་ཀའི་ངོས་སུ་གྱོང་གུད་མེད་པ་ཞིག་ཚོར་མྱོང་། འོན་ཀྱང་ད་གིན་ངའི་རོགས་པ་ཞིག་ལ་ང་ན་རེ་སང་གནངས་ཉིན་ངས་བོད་ཀྱི་སྐད་ཡིག་གི་ཆེད་དུ་ལས་འགུལ་ཞིག་སྤེལ་རྩིས་ཡོད། འོན་ཀྱང་དཔལ་འབྱོར་ནི་མི་མང་གི་ལག་ནས་ཞལ་འདེབས་བསྡུ་གི་ཡིན། ཞེས་ལབ་པ་ཡིན། རེད་དེ་ཁོང་ན་རེ་སེམས་ཤུགས་ཡོད་ན། དངུལ་ཁྱེད་རང་གིས་སྟོན་ན་འགྲིག་གི་རེད་པ། གསུངས་སོང་ལ་རྣམ་འགྱུར་ཡང་ཡག་པོ་ཞིག་བསྟན་མ་སོང་། དྲྭ་གཉེར་བ་ཚོ་དེའི་ཐད་ལ་དགོངས་ཚུལ་ཅི་འདྲ་ཡོད་དམ།