ཁྲག་དང་བེམ་རོས་ཁེངས་པའི་དུར་ས་ཞིག་ཆགས་སྲིད་པ་རེད།

ང་ཚོའི་ངོས་ནས་གནས་སྟངས་འདིའི་འོག་དགེ་འདུན་པ་རྣམས་ཀྱིས་དུས་ཚོད་ག་ཚོད་ཅིག་ལ་བཟོད་བསྲན་བྱ་ཐུབ་ན་སྙམ་པའི་བློ་འཚབ་འོང་གི་འདུག གལ་སྲིད་མི་གཅིག་གིས་བཟོད་བསྲན་མ་ཐུབ་པའི་གནས་ཚུལ་བྱུང་བ་ཡིན་ན། མི་གསོད་ཁྲག་སྦྱོར་གྱི་གནས་ཚུལ་འབྱུང་ཆོག་ཆོག་རེད་ཟེར།

དེ་རིང་ཕྱི་དྲོའི་ཆུ་ཚོད་ ༣ པའི་སྟེང་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་བོད་ཀྱི་འགྲོ་བ་མིའི་ཐོབ་ཐང་མང་གཙོ་འཕེལ་རྒྱས་ལྟེ་གནས་ཁང་གིས། ཉེ་ཆར་རྔ་པ་ཀིརྟི་དགོན་པའི་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ངོ་རྒོལ་བྱས་པ་ནས་བཟུང་རྒྱ་ནག་གཞུང་གིས་རྔ་པ་ཀིརྟི་དགོན་གྲོང་གཉིས་ལ་དམ་དྲག་བྱེད་བཞིན་པའི་གནས་ཚུལ་སྐོར་གསར་འགོད་གསལ་བསྒྲགས་ཤིག་སྤེལ་ཡོད་ཅིང་། གསལ་བསྒྲགས་དེའི་ཐོག་བཞུགས་སྒར་ཀིརྟི་གྲྭ་ཚང་གི་གྲྭ་ཚེ་རིང་ལགས་དང་གྲྭ་བློ་བཟང་ཡེ་ཤེས་ལགས་གཉིས་ཀྱིས་ཉེ་བའི་དུས་ཡུན་རིང་གི་རྔ་པ་ས་ཁུལ་གྱི་གནས་ཚུལ་ངོ་སྤྲོད་གནང་སོང་།   

སྐབས་དེར་གྲྭ་བློ་བཟང་ཡེ་ཤེས་ལགས་ཀྱིས་རྔ་པ་ཁུལ་གྱི་ལས་འགུལ་གྱི་བརྒྱུད་རིམ་དང་འབྲེལ་བརྗོད་དོན། ད་ཆར་ཀིརྟི་དགོན་པའི་ཕྱོགས་ཡོངས་རྒྱ་དམག་གིས་བསྐོར་ཏེ། དགོན་པའི་གླིང་མདོའི་སྒོ་ཆེན་གཙོས་ཕྱོགས་བཞི་རུ་ཡོད་པའི་སྒོ་ཚང་མ་ཟྭ་བརྒྱབ་སྟེ། དགེ་འདུན་པ་ཚོ་ནང་མིར་ཐུག་འཕྲད་དང་ཛ་དྲག་གི་སྨན་བཅོས་བྱ་དགོས་རིགས་ཀྱང་འཛིན་གྲྭའི་རྒན་བདག་གི་ཁག་ཐེག་ས་ཡིག་དང་དགོན་པའི་དགེ་བསྐོས་དང་ལས་སྣེ་བའི་ས་ཡིག གཞན་དགོན་པའི་ནང་ཡོད་པའི་གཞུང་འབྲེལ་ལས་བྱེད་ཀྱི་དགོངས་འཁྲོལ་མ་བརྒྱུད་པར་གཅིག་ཀྱང་འགྲོ་སྐྱོད་བྱ་མི་ཆོག་པ་བཟོས་འདུག ཅེས་དང་།

ཆོས་ལུགས་ཀྱི་བྱེད་སྒོ་གཅིག་ཀྱང་སྤེལ་མི་ཆོག་པར་བཟོས་ཏེ། དགོན་པའི་ཆོས་ཕྱོགས་ཀྱི་བྱེད་སྒོ་ཁག་དང་གྲྭ་བ་ ༢༥༠༠ ལྷག་གི་ནམ་རྒྱུན་གྱི་དཔེ་ཁྲིད་ཀྱང་མཚམས་བཞག་པའི་གནས་སྟངས་ཆགས་འདུག ད་ལྟའི་བར་གྲྭ་བ་ ༡༧ འཛིན་བཟུང་བྱས་འདུག་ལ། དེའི་ཁྲོད་ཀྱི་ཁག་ཅིག་ཀློད་གྲོལ་བཏང་ཡོད་ཀྱང་། ད་ལྟའི་ཆར་ཀིརྟི་དགོན་པ་རང་གི་གྲྭ་བ་ ༨ དང་རྨེ་རུ་མ་ནས་ཡིན་པའི་མི་སྐྱ་ཕུན་ཚོགས་ཟེར་བ་ཞིག་བཅས་བཀག་ཉར་བྱེད་མུས་རེད། ཉེ་བའི་ ༢༠ ལྷག་གི་རིང་དགོན་པའི་གྲྭ་བ་རྣམས་དམ་དྲག་འོག་ལྷག་ཏེ་བཟའ་ཆས་དཀའ་ངལ་འཕྲད་སྟབས། མི་མང་གི་ངོས་ནས་མར་དང་རྩམ་པ་མང་པོ་དགོན་པར་སྐྱེལ་སྐབས། དགོན་པའི་ངོས་ནས་གྲྭ་བ་རྣམས་ཐོ་འགོད་ཀྱིས་བཟའ་ཆས་སྤྲད་དེ་དཀའ་ངལ་ཏོག་ཙམ་སེལ་ཐུབ་ཡོད་ནའང་། ད་ལྟའི་ཆར་དམག་མིས་མི་མང་ལ་ཟ་མ་སྣ་གཅིག་ཀྱང་དགོན་པར་སྤྲོད་མ་བཅུག་པར་གྲྭ་བ་རྣམས་བཟང་བཙོན་ལྟ་བུའི་འོག་བཞག་འདུག ཅེས་བརྗོད་བྱུང་།

ཁོང་གིས་མུ་མཐུད་དུ་བརྗོད་དོན། ༢༠༠༨ ལོའི་རྗེས་སུ་རྒྱ་ནག་གཞུང་གིས་ཀིརྟི་དགོན་པའི་ཕྱི་སྐོར་ཡོངས་ལ་ལྕགས་ཚེར་གྱིས་སྐོར་ཡོད་ཀྱང་། ད་ཆར་བསྐྱར་དུ་དགོན་པའི་མཐའ་ཡོངས་སུ་སོ་ཕག་གིས་རྭ་གསར་བ་བརྒྱབ་སྟེ། གྲྭ་བ་རྣམས་ཀྱི་ནང་མི་གཉེན་འབྲེལ་དང་མཆོད་མཇལ་བ་སོགས་གཅིག་ཀྱང་དགོན་པར་འགྲོ་སྐྱོད་མི་ཆོག་པ་བཟོས་ཏེ། ནང་ལོགས་སུ་གྲྭ་བ་ཡོངས་ལ་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་གྱིན་འདུག ཅེས་དང་།   

གལ་སྲིད་རྒྱ་གཞུང་གིས་གྲྭ་ཕུན་ཚོགས་ལགས་ཀྱི་ངོ་རྒོལ་དེ་ནག་ཉེས་ཤིག་ཏུ་རྩི་བཞིན་ན། ད་ཆར་ཁོང་གྲོངས་ཚར་བ་རེད་ལ། དེ་དང་མཉམ་དུ་ཁོང་གི་ནག་ཉེས་ཀྱང་མཇུག་སྒྲིལ་ཚར་ཡོད། འོན་ཀྱང་རྒྱ་གཞུང་གིས་ཉེས་མེད་ཀྱི་དགེ་འདུན་པ་རྣམས་ལ་སྡུག་སྦྱོར་མནར་གཅོད་བཏང་སྟེ། མུ་མཐུད་དྲག་གནོན་བྱེད་ཀྱིན་འདུག ང་ཚོའི་ངོས་ནས་གནས་སྟངས་འདིའི་འོག་དགེ་འདུན་པ་རྣམས་ཀྱིས་དུས་ཚོད་ག་ཚོད་ཅིག་ལ་བཟོད་བསྲན་བྱ་ཐུབ་ན་སྙམ་པའི་བློ་འཚབ་འོང་གི་འདུག གལ་སྲིད་མི་གཅིག་གིས་བཟོད་བསྲན་མ་ཐུབ་པའི་གནས་ཚུལ་བྱུང་བ་ཡིན་ན། མི་གསོད་ཁྲག་སྦྱོར་གྱི་གནས་ཚུལ་འབྱུང་ཆོག་ཆོག་རེད་ལ། མང་ཚོགས་ཁྲི་ཕྲག་མང་པོས་དགོན་པར་བལྟས་ཡོད་སྟབས། གནས་ཚུལ་མི་ལེགས་པ་ཞིག་བྱུང་བ་ཡིན་ན། ང་ཚོའི་ངུར་སྨྲིག་གི་ཞིང་སའམ་ཆོས་ཀྱི་སྡེ་ཆེན་པོ་དེ་སང་ཉིན་མིའི་ཁྲག་དང་བེམ་པོའི་ཁེངས་པའི་དུར་ས་ཆེན་པོ་ཞིག་ཆགས་སྲིད་པ་རེད། ཅེས་བརྗོད་བྱུང་།

ཡང་ཁོང་གཉིས་བོད་ནང་གི་མི་མང་དང་འབྲེལ་བ་ཡོད་མཁན་ཞིག་དང་། ཐེངས་འདིའི་གནས་ཚུལ་མཁོ་གཏོང་བ་ཡིན་པའི་ཆ་ནས། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་པ་ཁག་དང་ཆོས་ལུགས་རང་དབང་གི་ཚོགས་སྡེ་ཁག རྒྱལ་སྤྱིའི་སྲིད་གཞུང་ཁག་བཅས་ཀྱིས་དམ་དྲག་འཕྲལ་དུ་མཚམས་འཇོག་དང་། བཙོན་པ་རྣམས་གང་མགྱོགས་ཀློད་གྲོལ་ཡོང་རྒྱུར་རྒྱ་གཞུང་ལ་འབོད་སྐུལ་ཞུ་དགོས་པའི་རེ་བ་ཡང་བཏོན་སོང་།

མཇུག་ཏུ་གྲྭ་ཚེ་རིང་ལགས་ཀྱིིས།  ཟླ་འདིར་ཕྱི་ཚེས་ ༨ ཉིན་རྔ་པ་འཛམ་ཐང་རྫོང་བར་མ་ཞང་གི་མངགས་གཏོང་ཁང་གི་སྒོ་འགྲམ་དུ་བོད་མི་ ༢༠ ལྷག་གིས་ངོ་རྒོལ་སྐད་འབོད་བྱས་སྐབས། རྒྱ་རོང་ནས་ཡིན་པའི་གཞོན་སྐྱེས་ཤིག་འདས་གྲོངས་དང་བོད་མི་གསུམ་འཛིན་བཟུང་བྱས་འདུག དུས་དེ་ནས་བཟུང་ས་གནས་དེར་དམ་དྲག་ཆེན་པོ་བྱས་འདུག ཅེས་དང་། ཟླ་འདིའི་ཕྱི་ཚེས་ ༩ ཉིན་རྔ་བ་རྫོང་ཐོག་ཏུ་ཡང་བསྐྱར་དམག་མི་ ༨༠༠ ལྷག་གསར་དུ་འགྲེམས་འཇོག་བྱས་འདུག་ལ། ཁ་སང་ནས་བཟུང་རྒྱ་གཞུང་གི་མི་སྣས་དགེ་འདུན་པ་ཚོར་ཚོགས་འདུ་བསྐངས་ཏེ། གྲྭ་བ་ཚོས་རྣམ་འགྱུར་ཡག་པོ་བསྟན་པ་ཡིན་ན་ཟླ་གཉིས་ནང་སློབ་གསོ་མཚམས་འཇོག་བྱ་རྒྱུ་དང་། གལ་ཏེ། རྣམ་འགྱུར་ཡག་པོ་མ་བསྟན་པ་ཡིན་ན་མུ་མཐུད་རྒྱལ་གཅེས་སློབ་གསོ་སྤེལ་རྒྱུ་ཡིན་སྐོར་བརྗོད་འདུག ཅེས་ངོ་སྤྲོད་གནང་བྱུང་།

གསར་འགོད་པ། དོན་གོ