ཕྱི་ཚེས་ ༢༢ ཉིན་རྒྱ་ནག་གི་སྲིད་བློན་ཟུར་པ་ཀྲུའུ་རོང་ཅི་སྔོན་ཆད་རང་ཉིད་སློབ་མཐར་ཕྱིན་སའི་ཆིན་ཧྭ་སློབ་ཆེན་དུ་སོང་སྟེ། ད་ལྟའི་རྒྱ་ནག་སྲིད་འཛིན་དཔོན་རིགས་ཚོའི་བྱ་སྤྱོད་ལ་ཁ་རྡུང་སྐྱོན་བརྗོད་བྱས་ཡོད་པ་རེད། འདི་ནི་ཁོ་རང་སྲིད་སྟེགས་ནས་ཕབས་རྗེས་ཀྱི་ལོ་ ༩ ནང་ཡོངས་གྲགས་ཐོག་སྤྱི་ཚོགས་གར་སྟེགས་སྟེང་ཐོན་པ་ཐེངས་གཉིས་པ་དེ་ཆགས་ཡོད་ལ། ཐེངས་འདིར་ཁོའི་འགྲོ་རོགས་སུ་ད་ལྟའི་རྒྱ་ནག་ཆབ་སྲིད་ལྷན་ཁང་གི་རྒྱུན་ལས་ལིག་ཡན་ཏུང་དང་། སློབ་གསོ་སྡེ་ཁག་གི་མགོ་གཙོ་ཡོན་ཀོས་རན་སོགས་གནད་ཡོད་མི་སྣ་འགའ་ཡང་མཉམ་དུ་ཡོད་འདུག
ཀྲུའུ་རོང་ཅི་ཡིས་གཏམ་བཤད་སྐབས། ཁོ་རང་གིས་འཆར་ཅན་གྱི་དགོང་མོའི་ཆུ་ཚོད་ ༧ ནས་ ༧།༣༠ བར་རྒྱ་ནག་དབུས་བརྙན་འཕྲིན་ཁང་གི་ལེ་ཚན་ནང་། ད་སྐབས་ཁོ་ཚོས་ཉོག་གཏམ་ཅི་ཞིག་བཤད་ཀྱིན་ཡོད་མེད་ལ་ལྟ་བཞིན་ཡོད་སྐོར་དང་། ཉེ་སྔོན་ཁོ་ཚོས་བརྗོད་ཀྱིན་པའི་རྒྱལ་ཁབ་ཀྱི་དུས་རིམ་འབྲིང་རིང་གི་སློབ་གསོའི་འཆར་གཞི་ཞེས་པ་དེ་ནི་སྟོང་བཤད་ཅིག་ཡིན་པའི་བསྐྱོན་བརྗོད་ཀྱང་བྱས་ཡོད་པར་མ་ཟད། ད་ལྟ་རྒྱ་ནག་ནང་རང་བྱུང་གོད་ཆགས་ལས་ཀྱང་མིས་བསླངས་པའི་སྤྱི་ཚོགས་གནོད་སྐྱོན་ཚབས་ཆེ་བ་ཡོད་སྐོར་ཐེར་འདོན་དང་། དགེ་སློབ་རྣམས་ལ་སྐད་ཆ་བདེན་པ་དང་གནས་ལུགས་དྲང་པོར་བརྗོད་དགོས་སྐོར་ནན་བཤད་བྱས་ཡོད་འདུག གཞན་ཡང་། ཁོས་ཉེ་སྔོན་རྒྱ་ནག་ནང་བཀག་སྡོམ་བྱས་ཡོད་པའི་ ༼རྒྱ་ནག་གི་ཞིང་པ་མི་སེར་སྐོར་གྱི་ཞིབ་བཤེར༽ ཞེས་པའི་དེབ་དེ་གླེང་སློང་དང་སྦྲགས། ཉེ་ཆར་འགྲེམས་སྤེལ་བྱ་འཆར་ཡོད་པའི་༼ཀྲུའུ་རོང་ཅི་ཡི་གཏམ་བཤད་ཟིན་ཐོ༽ ཞེས་པའི་ཁོ་རང་གི་དཔེ་དེབ་ཀྱི་མ་ཡིག་ཅིག་སློབ་གྲྭ་དེ་གའི་དཔེ་མཛོད་ཁང་ལ་སྤྲད་དེ། དགེ་སློབ་རྣམས་ཀྱིས་དངོས་ཡོད་གནས་ཚུལ་དང་བསྡུར་ཏེ་ངའི་བཤད་པའི་སྐད་ཆ་དྲང་མོ་དང་བདེན་པ་ཡིན་མིན་གཤིབ་བསྡུར་དགོས་པའི་རེ་བ་བཏོན་ཡོད་འདུག གསར་ལམ་ཁག་ཏུ་གནས་ཚུལ་བཀོད་པ་ལྟར་ན། ཀྲུའུ་རོང་ཅི་ཡི་ཉིན་དེའི་གཏམ་བཤད་ཀྱི་ནང་དོན་ནི་ད་ལྟ་གསར་ལམ་ཁག་ཏུ་ཐོན་པའི་གནས་ཚུལ་དག་ལས་ཀྱང་ལྡབ་འགྱུར་གྱི་རྣོ་ངར་ལྡན་པ་ཞིག་ཡོད་པར་མ་ཟད། ཆིན་ཧྭ་སློབ་ཆེན་དཔལ་འབྱོར་དོ་དམ་སློབ་གླིང་གི་དགེ་སློབ་རྣམས་དང་ལྷན་དུ་མཉམ་སྒྲོན་གྱི་འདྲ་པར་ལེན་སྐབས་ཀྱང་། ཀྲུའུ་རོང་ཅི་ཡིས་ཀུ་རེ་དང་སྦྲགས་ཏེ་མཉམ་སྒྲོན་གྱི་པར་ལེན་པ་ནི་ད་ལྟའི་སྲིད་བློན་གྱི་དགའ་ཕྱོགས་རེད་ཅེས།ཝུན་ཇ་པའོ་ལའང་ཟུར་ཟ་བྱས་ཡོད་པར་མ་ཟད། མཇུག་མཐར་སློབ་གྲྭ་དང་ཁ་གྱེས་སྐབས་ཀྱང་དགེ་སློབ་རྣམས་ལ་གདོང་ཕྱོགས་ཏེ། དེ་རིང་ཁོས་བཤད་པའི་སྐད་ཆ་རྣམས་ཕྱི་ལོག་ཏུ་བརྒྱུད་སྒྲོག་བྱེད་རོགས།ཅེས་འབོད་སྐུལ་བྱས་ཡོད་འདུག
ཉེ་ལམ་ཆིན་ཧྭ་སློབ་ཆེན་གྱི་མཛད་སྒོའི་དང་སྟབས་བསྟུན་ནས། སྔོན་ཆད་སློབ་གྲྭ་དེའི་ནང་སློབ་མཐར་ཕྱིན་པའི་རྒྱ་ནག་གི་མཐོ་རིམ་དཔོན་རིགས་ཧའོ་ཅིན་ཐོ་དང་། ཝུའུ་པང་ཀོ ཞི་ཅིན་ཕེན་སོགས་སྔ་རྗེས་སུ་སློབ་གྲྭའི་ནང་སོང་སྟེ་འཚམས་འདྲིའི་ལྟ་སྐོར་བྱས་ཡོད་པར་མ་ཟད། ཕྱི་ཚེས་༢༤ཉིན་གྱི་ཆིན་ཧྭ་སློབ་ཆེན་བཙུགས་ནས་ལོ་༡༠༠འཁོར་བའི་དུས་དྲན་མཛད་སྒོ་དེའང་། རྒྱ་ནག་གི་ཚོགས་ཆེན་གཉིས་དང་འདྲ་བར་ཆབ་སྲིད་ཀྱི་རྣམ་པའི་ཐོག་ནས་རྒྱ་ནག་མི་དམངས་ཚོགས་ཁང་ཆེན་མོ་ཟེར་བའི་ནང་ཚོགས་ཡོད་པ་རེད། ཆབ་སྲིད་དབྱེ་ཞིབ་པ་དག་གིས།ཐེངས་འདིའི་ཀྲུའུ་རོང་ཅི་ཡི་གཏམ་བཤད་དང་། ཆིན་ཧྭ་སློབ་ཆེན་གྱི་དུས་སྟོན་གྱི་རྣམ་འགྱུར་དེས་ད་ལྟ་རྒྱ་ནག་མཐོ་རིམ་དཔོན་རིགས་ཚོའི་བར་འགལ་བ་སྔར་བའི་ཇེ་དྲག་ཏུ་འགྱུར་བཞིན་པ་གསལ་བོ་མཚོན་ཡོད་སྐོར་བརྗོད་འདུག
གསར་འགོད་པ། ཚེ་རིང་རྒྱལ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
རྒྱ་རྒན་ཁོ་ལ་དབང་ཆ་ཡོད་སྐབས་ཀྱི་བྱས་ངན་དག་ད་ལྟ་མི་དམངས་ཀྱིས་བརྗེད་ཟིན་པ་འདྲ།
འབྱུང་འགྱུར་ལོ་བཅུ་ཕྲག་ནང་རྒྱ་ནག་གི་ཕམ་ཁ།
རྒྱ་ནག་དམར་གཞུང་གི་དབང་འཛིན་པ་རྣམས་ཀྱིས་མིང་དང་དབང་ཆ་སྒོར་མོ་གསུམ་གྱི་ཆེད་དུ་མི་མང་གི་བསམ་བློ་འགྱུར་འགྲོ་དང་།འབྱུང་བ་འཁྲུག་ལོག་གནམ་གཤིས་འགྱུར་ལྡོག་གི་ཉེན་ཁ་གང་ལ་ཡང་མི་འཛེམས་པར།མིང་གི་ཆེད་དུ་དུས་རབས་དང་མང་མོས་སྔོན་ཐོན་གྱི་བསམ་བློ་དང་འཚམ་པའི་ཆབ་སྲིད་ལ་འགྱུར་བ་གཏོང་མི་ཕོད་པ་དང་།དབང་ཆ་དང་རང་ཉིད་སྲུང་སྐྱོབ་ཀྱི་ཆེད་དུ་མིའི་རང་དབང་དང་ཁྲིམས་ལུགས་ལ་རྩིས་མེད་གཏོང་བ།མི་དམངས་ཀྱི་བདེ་སྐྱིད་དང་འཚོ་བ་ལ་མིང་དོན་མཚུངས་པའི་འགན་སྲུང་མེད་པ།འཛམ་གླིང་གི་གད་སྙིགས་རྣམས་ཅ་དངོས་སུ་བཟོ་བསྐྲུན་བྱེད་སའི་བཟོ་གྲྭ་ཡོད་ཚད་ནང་འདྲེན་བྱས་པ།སྐྱེས་སྒོ་འགོག་པ།ཁྲིམས་ལུགས་ལྟར་ཕྱི་གསལ་ནང་གསལ་གྱི་ལས་ཀ་བྱེད་མི་ཕོད་པ།ཚུལ་མིན་གྱི་ཁྲིམས་ལུགས་འདྲ་མིན་བེད་སྤྱོད་བྱེད་བཞིན་པ།དངུལ་གྱི་ཆེད་དུ་གཙང་ཞིང་ཡིད་དུ་འོང་བའི་གཙང་པོ་ཡོད་ཚད་ལ་ཆུ་མཛོད་རྒྱག་པ་དང་མཛེས་ཤིང་ལྟ་ན་སྡུག་པའི་ཤིང་ནགས་ཡོད་ཚད་གང་འདོད་གཅོད་པ།བརྗིད་ཆགས་ལྡན་པའི་གནས་རི་དང་རི་བོ་རྣམས་ལས་གཏེར་ཁ་གང་བྱུང་སྔོག་འདོན་བྱེད་པ།མདོར་ན་ས་སྟེང་གི་རྩི་ཤིང་རྣམས་གཅོད་འབྲེག་དང་གཙང་པོ་རྣམས་ལ་ཆུ་རགས་བརྒྱབ་པ།ས་འོག་གི་གསེར་དངུལ་ཟངས་ལྕགས་གཏེར་ཁ་ཡོད་ཚད་སྔོག་པ་སོགས་བྱས་ངན་དེ་དག་ལ་བརྟེན་ནས་ལོ་༡༠་ཕྲག་གི་ནང་རྒྱ་ནག་ལ་ཉེན་ཁ་ཆེན་པོ་༦་མི་འདོད་བཞིན་དུ་མགྲོན་དུ་འབོད་པ་ལྟར་འབྱུང་ངེས་ཡིན།
༡་མི་དམངས་གྱེན་ལོག་གིས་རྒྱལ་ཁབ་མགོ་རྟིང་སློག་པའི་ཉེན་ཁ།
༢དཔོན་རིགས་བར་ལྟ་གྲུབ་མི་མཐུན་པས་ཕན་ཚུན་ཕམ་ཉེས་ཀྱི་སྦོ་ལུགས་པའི་ཉེན་ཁ།
༣་འབྱུང་བ་འཁྲུགས་པ་ལ་བརྟེན་ནས་ས་གཡོས་ཀྱིས་ཆུ་མཛོད་རྣམས་འབར་གས་ཀྱི་ཉེན་ཁ།
༤གནམ་གཤིས་འགྱུར་ལྡོག་གིས་ཆུ་ལོག་འབྱུང་བའི་ཉེན་ཁ།
༥མཁའ་རླུང་བརྩོག་པ་དང་དུག་རླངས་ཀྱིས་བཅོས་ཐབས་བྲལ་བའི་ནད་ཡམས་འབྱུང་བའི་ཉེན་ཁ།
༦གཞོན་སྐྱེས་ཉུང་བས་རྒན་ཁོག་རྣམས་ལ་ལྟ་རྟོག་བྱེད་ཐབས་བྲལ་བའི་ཉེན་ཁ།
ཉེན་ཁ་དེ་དག་མཐོང་བཞིན་དུ་ཆེད་གཉེར་གྱིས་ལས་ངན་དེ་རྣམས་བརྩམས་པ་ནི་དམར་གཞུང་གི་དཔོན་རིགས་རྣམས་ལྟ་རྒྱ་དང་ཐོས་རྒྱ་མེད་པ་མཐོང་རྒྱ་ཆུང་བ་བསམ་རྒྱ་དོག་དྲགས་པ་སོགས་ཀྱི་རྒྱུ་ལ་བརྟེན་ནས་འབྲས་བུ་དཔོག་མི་ནུས་པ།འབྲས་བུ་ལ་བརྟེན་ནས་རྒྱུ་དཔོག་མི་ཤེས་པས་ལྟ་བ་དང་བསམ་བློ་ལོག་པ།
སྲིད་བྱུས་དང་ཐབས་ལམ་ལོག་པ།དམིགས་ཡུལ་དང་འབྲས་བུ་ལོག་པ་སོགས་ལ་འཇུག་བཞིན་པ་དེ་དག་རེད།
དྲག་པོའི་དམག་ཤུགས་ཀྱི་དབང་བསྒྱུར།
སྲིད་བྱུས་ངན་པའི་ཐབས་བརྒྱ་བྱུས་སྟོང་།
འབྱོར་ལྡན་གྱི་སྟོབས་ཤུགས་སོགས་ལ་བརྟེན་ན་ཡང་ཉེན་ཁ་དེ་རྣམས་ལས་རྒྱལ་ཐབས་གཏན་ནས་མེད་པ་ནི་ཕམ་ཁ་རེད།
ཕམ་ཁ་དེ་ལ་བརྟེན་ནས་བོད་པ་ཚང་ལ་ཁེ་བཟང་ལོས་ཡོད།
ཕྲན་གྱི་རྟོག་འཆར་གྱི་ཡིག་གེ་ཐུང་ངུ་འདི་བསམ་ཚུལ་ལ་འགོད་རོགས་གནང།
ཁོང་གིས་སློབ་ཆེན་སློབ་མའི་རྒྱབ་རྟེན་འཚོལ་སྟངས་འདི་ངོ་མ་རེ་བ་ཡོད་པའི་ལམ་ཞིག་རེད། སྔ་བཞི་ལས་འགུལ་དེ་སླར་ཡང་མི་བསླངས་པའི་ངེས་པ་མེད། ང་ཚོ་བོད་མི་ཚོས་འཇོན་པ་ནི་རང་གི་རང་གཟུགས་འགྱུར་དུ་མི་འཇུག་པ་འདི་ཡིན། འདི་ནི་སྒྱུར་བཅོས་ཀྱིས་སྒྱུར་དཀའ་ཡང་རང་བཞིན་གྱིས་འགྱུར་སླ། འགྱུར་བཞིན་པ་ཚང་མས་ལོས་མཐོང།