རྒྱ་གཞུང་གིས་བཙན་ཁྲིད་འོག་གར་སོང་ཆ་མེད་དུ་འགྲོ་བཞིན་པ་དང་། ཁྲིམས་འགལ་གྱིས་བཀག་ཉར་དང་འཛིན་བཟུང་། ཁྲིམས་ཐག་གཅོད་བཞིན་པ་བཅས་ཀྱི་གནད་དོན་ཐད་གླེང་མོལ་བྱ་རྒྱུ་ཡིན་ཟེར།
ཉེ་ཆར་ཨ་རིའི་རྒྱལ་སྲིད་ལྷན་ཁང་གིས་གནས་ཚུལ་སྤེལ་ཏེ། ཕྱི་ཚེས་ ༢༧ ནས་ ༢༨ བར་རྒྱ་ནག་པེ་ཅིན་ཏུ་ཨ་རྒྱའི་བར་འགྲོ་བ་མིའི་ཐོབ་ཐང་གྲོས་མོལ་བྱ་རྒྱུ་ཡིན་སྐོར་གསལ་བསྒྲགས་བྱས་ཡོད་པ་ལྟར། དེ་རིང་པེ་ཅིན་དུ་གྲོས་མོལ་དངོས་སུ་མགོ་འཛུགས་བྱས་ཡོད་པ་དང་། ཉེ་ཆར་གྱི་ཨ་རིའི་ཕྱོགས་ཀྱི་གསལ་བསྒྲགས་ལྟར་ན། ཐེངས་འདིའི་གྲོས་མོལ་གྱི་ནང་དོན་གཙོ་བོ་ནི། རྒྱ་ནག་གིས་ཁྲིམས་འགལ་གྱིས་བཀག་ཉར་དང་འཛིན་བཟུང་། ཆོས་ལུགས་དད་མོས་རང་དབང་སྐོར་ཡིན་ཚུལ་བརྗོད་འདུག་ལ། རྒྱ་ནག་གི་གསར་ལམ་ཁག་ཏུ། ཐེངས་འདིའི་གྲོས་མོལ་དེར་ཨ་རིའི་འགྲོ་བ་མིའི་ཐོབ་ཐང་དང་དམངས་གཙོ། ངལ་རྩོལ་བཅས་ཀྱི་རྒྱལ་དོན་དྲུང་ཆེ་ཕྱག་རོགས་མའེ་ཆལ་ཕའོ་སི་ནེར་(Michael Posner)ལགས་ཀྱི་སྣེ་ཁྲིད་པའི་ཨ་རིའི་ཕོ་བྲང་དཀར་པོ་དང་། ཁྲིམས་སྲིད་ལྷན་ཁང་། ངལ་རྩོལ་ལྷན་ཁག དཔལ་འབྱོར་སྡེ་ཁག་བཅས་ཡིན་ཞིང་། རྒྱ་ནག་གི་ཕྱོགས་ནས་ཕྱི་འབྲེལ་ལྷན་ཁང་རྒྱལ་སྤྱིའི་སྡེ་ཁག་གི་མགོ་གཙོ་ཁྲིན་ཞི་ཀོང་གིས་སྣེ་ཁྲིད་པའི་རྒྱ་ནག་འཐབ་ཕྱོགས་གཅིག་གྱུར་ཁང་དང་། ཆེས་མཐོའི་ཁྲིམས་ཁང་། སྤྱི་བདེ་ཁང་། རྒྱལ་སྲིད་སྤྱི་ཁྱབ་ཁང་གསར་འགྱུར་ལས་ཁུངས། རྒྱལ་ཁབ་ཆོས་ལུགས་སྡེ་ཁག་བཅས་མཉམ་ཞུགས་བྱ་རྒྱུ་ཡིན་ཚུལ་ཙམ་བཀོད་འདུག
ཨ་རིའི་ཕྱི་སྲིད་བློན་ཆེན་ཧེ་ལི་རེ་ཁི་ལོན་ཌོན་ལགས་ཀྱིས་ཀྱང་། ཐེངས་འདིའི་གྲོས་མོལ་གྱི་གླེང་གཞི་གཙོ་བོ་ནི། ཉེ་སྔོན་རྒྱ་ནག་ནང་འབྱུང་བཞིན་པའི་བཙན་ཁྲིད་འོག་གར་སོང་ཆ་མེད་དུ་འགྲོ་བཞིན་པ་དང་། ཁྲིམས་འགལ་གྱིས་བཀག་ཉར་དང་འཛིན་བཟུང་། ཁྲིམས་ཐག་གཅོད་བཞིན་པ་བཅས་འགྲོ་བ་མིའི་ཐོབ་ཐང་སྔར་ལྷག་ཉམས་ཉེས་ལ་འགྲོ་བཞིན་པའི་གནད་དོན་དང་། དེ་མིན་ཁྲིམས་སྲིད་དང་། ཆོས་ལུགས་རང་དབང་། སྨྲ་བརྗོད་རང་དབང་། ངལ་རྩོལ་ཁེ་དབང་། གྲངས་ཉུང་མི་རིགས་ཀྱི་ཁེ་དབང་བཅས་ཕྱོགས་ཡོངས་ཀྱི་འགྲོ་བ་མིའི་ཐོབ་ཐང་གནད་དོན་སོགས་ཚུད་ཡོད། ཅེས་བརྗོད་འདུག
ཉིན་དེར་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཧོང་ཧྲིས་གསར་འགོད་པའི་དྲི་བར་ལན་འདེབས་སྐབས། ཨ་རྒྱ་གཉིས་བར་འགྲོ་བ་མིའི་ཐོབ་ཐང་གྲོས་མོལ་དང་ཁྲིམས་ལུགས་ཆེད་མཁས་པའི་གླེང་མོལ་བྱ་འཆར་ཡོད་པ་དང་། ཕྱི་ཚེས་ ༢༠ ཉིན་ཨ་རིའི་གྲོས་ཚོགས་གོང་མིའི་འཐུས་མི་རའེ་ཏིག་(Reid) ལགས་ཀྱིས་སྣེ་ཁྲིད་པའི་གཟིགས་སྐོར་ཚོགས་པར་རྒྱ་ནག་རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ་ཝང་ཀྲི་ཧྲན་དང་། ཕྱི་འབྲེལ་ལྷན་ཁང་གི་ཚོགས་གཙོ་ཡང་ཅེ་ཀྲི་གཉིས་ཀྱིས་སྣེ་ལེན་སྐབས། ཝང་ཀྲི་ཧྲན་གྱིས་རྒྱལ་ཁབ་གཉིས་ཀྱི་ལོ་རྒྱུས་རིག་གནས་དང་དཔལ་འབྱོར་འཕེལ་རྒྱས་གནས་རིམ་གྱི་བར་ཆད་ལ་གཞིགས་ཏེ་མུ་མཐུད་ཤུགས་སྣོན་དང་རྒྱུས་ལོན་བྱ་དགོས་པ་དང་། དཔལ་འབྱོར་གྱི་གནད་དོན་ཆབ་སྲིད་ཀྱི་ངོ་བོར་མི་བསྒྱུར་རྒྱུ་བརྗོད་ཡོད་སྐོར་དང་། ཕྱི་ཚེས་ ༢༡ ཉིན་ཝུའུ་པང་ཀོ་དང་ཞི་ཅིན་པེན་གཉིས་ཀྱིས་སོ་སོར་སྣེ་ལེན་ཐུག་ཕྲད་བྱ་རྒྱུ་ཡིན་སྐོར་བརྗོད་འདུག
ཐེངས་འདིའི་ཨ་རྒྱ་བར་གྱི་འགྲོ་བ་མིའི་ཐོབ་ཐང་གྲོས་མོལ་དེ་ནི། ད་ལོ་ཕྱི་ཟླ་ ༡ ཚེས་ ༡༩ ཉིན་རྒྱ་ནག་གི་སྲིད་འཛིན་ཧའོ་ཨ་རིར་རྒྱལ་དོན་ལྟ་སྐོར་སྐབས། ཨ་རྒྱ་གཉིས་བར་འཐབ་ཇུས་དང་དཔལ་འབྱོར་ཐད་ཀྱི་གྲོས་མོལ་ཐེངས་གསུམ་པ་མ་བྱས་སྔོན་ལ། འགྲོ་བ་མིའི་ཐོབ་ཐང་གྲོས་མོལ་དེ་འཚོགས་རྒྱུ་གཏན་ཁེལ་བ་ཞིག་ཡིན་མོད། ༢༠༡༠ ལོའི་ཨ་རྒྱ་གཉིས་བར་འགྲོ་བ་མིའི་ཐོབ་ཐང་གྲོས་མོལ་རྗེས་དང་། ལྷག་པར་དུ་ཕྱི་ཟླ་ ༢ པའི་ནང་དཀྱིལ་ཤར་ཡུལ་གྲུའི་ནང་དམངས་གཙོའི་གསར་བརྗེ་ལས་འགུལ་བྱུང་རྗེས། རྒྱ་གཞུང་གིས་སྔར་ལས་ལྷག་པར་འགྲོ་བ་མིའི་ཐོབ་ཐང་དང་དམངས་གཙོ་དོན་གཉེར་བའི་ཐོག་དྲག་གནོན་བྱེད་ཤུགས་ཆེ་རུ་བཏང་ཡོད།
ཉེ་སྔོན་ཨ་རི་གཞུང་གིས་ ༢༠༡༡ ལོའི་འཛམ་གླིང་འགྲོ་བ་མིའི་ཐོབ་ཐང་སྙན་ཐོ་བཏོན་ཏེ། རྒྱ་ནག་ནང་འགྲོ་བ་མིའི་ཐོབ་ཉམས་ཉེས་སུ་འགྲོ་བཞིན་པའི་གནས་སྟངས་ཐད་སྐྱོན་བརྗོད་བྱས་པར། རྒྱ་གཞུང་གིས་ཨ་རིའི་འགྲོ་བ་མིའི་ཐོབ་ཐང་སྐོར་ལ་ཡིག་ཆ་ཞིག་བཀྲམས་ཏེ་ཁ་གཏད་གཅོག་ཐབས་བྱས་པར་བརྟེན། རྒྱལ་ཚོགས་དང་ཨུ་རོབ་ཀྱི་འགྲོ་བ་མིའི་ཐོབ་ཐང་སྡེ་ཚན་ཁག་གཙོས་པའི་དམངས་གཙོའི་རྒྱལ་ཁབ་ཁག་གིས་ཀྱང་རིམ་པར་སྐྱོན་བརྗོད་བྱས་ཡོད་ཅིང་། ཐེངས་འདིའི་ཨ་རྒྱ་གཉིས་ཀྱི་འགྲོ་བ་མིའི་ཐོབ་ཐང་གྲོས་མོལ་ཐད་རྒྱལ་སྤྱིའི་སྒང་དོ་སྣང་བྱེད་ཤུགས་ཆེ་རུ་ཕྱིན་ཡོད།
རྒྱ་གཞུང་གི་ཁྲིམས་འོག་ཏུ་ལོ་ ༢༢ རང་བསྡད་མྱོང་བའི་དམངས་གཙོ་དོན་གཉེར་བ་ཆིན་ཡུང་མེན་གྱིས་རེ་སྐུལ་ཞུས་དོན། ཕྱིའི་རྒྱལ་ཁབ་ཁག་གི་གཞུང་འབྲེལ་དང་གཞུང་འབྲེལ་མ་ཡིན་པ། ཡང་ན་རྒྱལ་སྤྱིའི་མཛའ་འབྲེལ་ཚོགས་སྡེ་བཅས་ཀྱི་མི་སྣ་ཚང་མའི་ངོས་ནས། རྒྱ་ནག་གི་འགྲོ་བ་མིའི་ཐོབ་ཐང་ཐད་རྒྱ་གཞུང་ལ་ལངས་ཕྱོགས་བརྟན་པོ་དང་བསམ་ཚུལ་གསལ་བོ་བཏོན་ཏེ་གནོན་ཤུགས་སྤྱོད་ཐུབ་པ་ཡིན་ན་དེ་ལ་དགེ་མཚན་ཆེན་པོ་ཡོད། ཐེངས་འདིའི་གྲོས་མོལ་སྐབས་ཨ་རིའི་ཕྱོགས་ནས་མ་མཐའ་ཡང་རྒྱ་ནག་གཞུང་རང་ངོས་ནས་ངོས་ལེན་མིང་རྟགས་བཀོད་ཟིན་པའི་འགྲོ་བ་མིའི་ཐོབ་ཐང་རྩ་འཛིན་གྱི་གཏན་འབེབས་གཞིར་བཟུང་། ད་ལྟ་རྒྱ་ནག་ནང་ཡོངས་ཁྱབ་ཏུ་འབྱུང་བཞིན་པའི་ཁྲིམས་འགལ་གྱི་བྱ་སྤྱོད་དག་མཚམས་འཇོག་དགོས་པའི་གནོན་ཤུགས་སྤྲོད་ཐུབ་དགོས། ཞེས་བརྗོད་འདུག
གསར་འགོད་པ། ཚེ་རིང་རྒྱལ།
སུ་ཡིན་ནའང་རང་དབང་དང་ཐོབ་ཐང་དགོས་ངས་རེད།
ཨ་ཁ་ཡང་བོད་མི་ཚོར་མགོ་སྐོར་གཏོང་སྟངས་གཞན་ཞིག
རྒྱ་ནག་གིས་དང་པོ་བོད་བཙན་པོ་ལ་རྒྱ་མོ་ཕུལ་ནས་བསླུ་ཁྲིད་གཅིག་བྱས།
དེ་ནས་བླ་ཆེན་མི་དཔོན་ཚོར་བེར་གོས་སྤྲད་དེ་མགོ་སྐོར་ཞིག་བཏངས།
དེ་ནས་བླ་ཆེན་ཚོར་ཞྭ་མོ་དང་ཐེམ་ཀ་སྤྲད་དེ་མགོ་སྐོར་ཅིག་བཏངས།
དེ་ནས་གྷོར་དམག་བོད་ལ་ཡོང་དུས་ལས་སོགས་ཕྱི་དམག་ནང་དུ་ཡོང་དུས་ཁོང་ཙོས་རོགས་པ་བྱེད་ཁར་ཡོང་གི་ཡིན་ཟེར་ནས་མགོ་སྐོར་ཅིག་བཏངས།
དེ་ནས་དྷ་དབྱངས་རྒྱ་དངུལ་གྱིས་ཆར་ཕབས་ཏེ་མགོ་སྐོར་ཅིག་བཏངས།
དེ་ནས་དམངས་གཙོ་བསྒྱུར་དགོས་ཟེར་ནས་ཕྱི་སྡོད་རྒྱ་རིགས་དེ་ཚོས་
མགོ་སྐོར་ཅིག་བཏངས།
དེ་ནས་རྒྱ་ནག་ནང་འགྲོ་བ་མི་ཡི་ཐོབ་ཐང་ཟེར་ནས་མགོ་སྐོར་ལས་སོགས་སྣ་མང་གིས་སྒོ་ནས་སམ་ཐབས་བརྒྱ་ཇུས་སྟོང་གིས་བོད་མིར་མགོ་སྐོར་གཏོང་སྟངས་ཤིག་སླེབ་བཞིན་འདུག
གཟབ་གཟབ་དགོས།
སྔར་གྱི་བོད་ཀྱི་རྒྱལ་བློན་དེ་ཚོར་མགོ་སྐོར་བཏངས་བ་བཞིན་ཡོང་ཉེན་ཡོད།
ནུབ་ཕྱོགས་པའི་འགྲོ་བ་མིའི་ཐོབ་ཐང་ཞེས་པའི་སྟོང་བཤད་དེ་ལ་ཡི་ཐང་ཆད་སོང་།
ཨ་རྒྱ་གཉིས་ཀྱི་འགྲོ་བ་མི་ཡི་ཐོབ་ཐང་སྐོར་ལ་སྐད་ཤོད་རྒྱུ་ཟེར་བ་ནི་གོང་དུ་དྲྭ་གྲོགས་པ་འགས་བཤད་པ་དེ་ག་རང་རེད།
བོད་ཀྱི་གནད་དོན་ལས་སོགས་འགྲོ་བ་མི་ཡི་ཐོབ་ཐང་ལས་སོགས་ཡུལ་གཉིས་ཀྱི་དབར་གྱི་མ་རྩའི་ཁྲོམ་རྐང་ཡོད་ན་མེད་ན་དེ་རེད།
ཁ་ནས་འགྲོ་བ་མི་ཡི་ཐོབ་ཐང་དོན་དུ་གྲོས་མོལ་བྱེད་ཀྱིན་སྡད་ནས་ཚོང་ཀྱི་འགྲེལ་བ་བྱས་ཏེ་ཚོང་དོན་གྲོས་ཆོད་རྐྱང་བཞག་ཡོད་རེད།
དེ་བཞིན་ནུབ་ཕྱགས་དེ་ཚོའང་གཅིག་པ་རེད།
བོད་ལ་སེམས་པ་དཀར་ནས་བྱེད་པ་ཞིག་རྩ་བ་ཉིད་ནས་མ་རེད།
ཁོང་ཚོས་འདི་ལྟར་བྱེད་དེ་མི་དམངས་ལ་མགོ་སྐོར་རྐྱང་བཏངས་ནས་ཉིན་མ་ཁྱོལ་ཐབས་བྱེད་ཀྱི་རེད།
ཁོང་ཚོས་བོད་ལ་ཕན་སེམས་ཡོད་ན་སྐྱབས་བཅོལ་ལག་འཁྱེར་ཡོད་སྡད་པའི་མི་བུ་དེ་ཚོར་སོ་སོའི་ཡུལ་གྲུར་བསྡོད་ཆོག་པའི་མཐོང་ཆེན་མི་སྤྲོད་པའི་རྒྱུ་མཚན་གང་རེད།
ད་ལྟ་ནི་སྐྱབས་བཅོལ་ལག་ཁྱེར་གྱི་ཐོག་དམ་དྲག་ཇེ་ཆེར་གཏོང་བཞིན་པ་རེད།
དེ་མིན་བལ་པོ་འབྲུག་ནས་ཡིན་པ་མི་སེར་འབུམ་ལྷག་མགྲོན་འབོད་བྱེད་དེ་ཉར་ཡོད།
བོད་མི་སྟོང་ཕྲག་ཡ་ཟུང་ཞིག་ལ་སྡང་ཟུག་བྱེད་དགོས་པ་མེད།
ནུབ་ཕྱོགས་པ་ནི་ཁ་མཇེ༹ས་ཁོག་རྩུབ་ཀྱི་བྱ་བ་བྱེད་ཀྱི་འདུག
དེ་ཚོར་ཡིད་ཆེས་མེད།
མི་ཚོས་ཁོང་ཚོར་ཡིད་ཆེས་རིམ་བཞིན་བརླག་འགྲོ་གི་ཡོད།
ཨ་རྒྱ་གཉིས་བར་གྱི་འགྲོ་བ་མིའི་ཐོབ་ཐང་གྲོས་མོལ་བྱེད་བཞིན་པ་འདི་ནི་འཇ༹མ་གླིང་མི་མང་མགོ་སྐོར་གཏོང་ཐབས་ཀྱི་ཕྱི་ཚུལ་གྱི་ཟློས་གར་ཙམ་ལས་གཞན་ལག་ལེན་གྱི་གྲུབ་འབྲས་གང་ཡང་ཡོང་མི་སྲིད། གང་ཡིན་ཟེར་ན་རྒྱལ་ཁབ་འདི་གཉིས་ནི་དཔལ་འབྱོར་གྱིས་དབང་རྩ་རུལ་བའི་ར་ཞ་ཡིན། འདི་ལ་རེ་བ་བྱེད་མཁན་གྱི་མི་དག་ནི་ངས་ད་དུང་གཉིད་ལས་སད་མི་འདུག་ཅེས་བཤད་ཀྱི་ཡིན།
དེང་སྐབས་ནུབ་ཕྱོགས་པས་ཁ་ནས་འགྲོ་བ་མིའི་ཐོབ་ཐང་དང་། ཁོག་པའི་ནང་དུ་དངུལ་དངོས་བསྒོམ་ཡོད་པས། ནུས་པ་ཆེར་མ་ཐོན་ཡང་བརྗེད་མེད་པའི་རྟགས་ཤིག་རེད། དེ་ལ་ཡི་རངས་བྱེད་ཆོག་པ་འདྲ།