ཐེ་ཝན་སྲིད་འཛིན་མ་ཡཱན་ཅིག་གིས་འཛམ་གླིང་འཕྲོད་བསྟེན་རྩ་འཛུགས་ཀྱི་ཡིག་ཆའི་ནང་།ཐེ་ཝན་ནི་རྒྱ་ནག་གི་ཞིང་ཆེན་ཞིག་ཏུ་ངོས་འཛིན་བྱས་པར་རྒོལ་གཏམ་བསྒྲགས་འདུག
ཕྱི་ཚེས་༡༠ཉིན་ཐེ་ཝན་སྲིད་འཛིན་མ་ཡཱན་ཅིག་གིས་ཆེད་དུ་གསར་འགོད་གསལ་བསྒྲགས་ཤིག་ཚོགས་ཏེ། རྒྱ་ནག་གི་ལྐོག་གཡོ་ངན་ཇུས་དང་དངོས་ཤུགས་བརྒྱུད་གསུམ་གྱི་གནོན་ཤུགས་ལ་བརྟེན་ནས།འཛམ་གླིང་འཕྲོད་བསྟེན་རྩ་འཛུགས་ཀྱིས་ཐེ་ཝན་སྲིད་བྱུས་ཀྱི་ཐད་མངོན་ལྐོག་རྒྱབ་མདུན་གྱི་ལས་ཀ་སྒྲུབ་པར་སྐྱོན་བརྗོད་བྱས་ཡོད་པར་མ་ཟད། ཐེ་ཝན་ཕྱི་འབྲེལ་ལྷན་ཁང་དང་འཕྲོད་བསྟེན་སྡེ་ཁག་ལ་བཀའ་རྒྱ་བཏང་སྟེ། འཛམ་གླིང་འཕྲོད་བསྟེན་རྩ་འཛུགས་དང་རྒྱ་གཞུང་གཉིས་ལ་ངོ་རྒོལ་ཤུགས་ཆེན་བྱེད་དགོས་པར་ནན་སྐུལ་བྱས་འདུག
ཐེ་ཝན་སྲིད་འཛིན་མ་ཡཱན་ཅིག་གིས་བརྗོད་དོན། འཛམ་གླིང་འཕྲོད་བསྟེན་རྩ་འཛུགས་ཀྱིས་ཕྱི་ལོགས་ལ་ཡོངས་གྲགས་སུ་༼ ཀྲུང་ཧྭ་ཐེ་པའེ ༽ཞེས་འབོད་ཞོར་དུ། ནང་ཁུལ་ཡིག་ཆའི་ནང་༼རྒྱ་ནག་ཐེ་ཝན་ཞིང་ཆེན༽ཞེས་བཀོད་པ་དེ་ནི། དོན་དངོས་གནས་ལུགས་དང་མཐུན་ཐབས་བྲལ་བའི་མངོན་ལྐོག་རྒྱབ་མདུན་གྱི་བྱེད་ཐབས་སྐྱུག་བྲོ་བ་ཞིག་རེད་ཅེས་བརྗོད་འདུག ད་དུང་ཁོས་གསར་འགོད་གསལ་བསྒྲགས་དེའི་སྐབས། ཁོ་རང་ཐེ་ཝན་གྱི་སྲིད་འཛིན་ཡིན་པའི་ངོས་ཐད་ནས། སྤྱི་ཚོགས་ཀྱི་གར་སྟེགས་ག་འདྲ་ཞིག་ཏུ་ཞུགས་ཀྱང་རུང་།ཀྲུང་ཧྭ་མི་སེར་རྒྱལ་ཁབ་ཀྱི་བདག་དབང་བརྟན་སྲུང་དང་།ཐེ་ཝན་གྱི་བདེ་འཇགས་ལ་འགན་ལེན།དེ་བཞིན་ཐེ་ཝན་མི་དམངས་ཀྱི་རང་བརྩི་ལ་མཐའ་གཅིག་ཏུ་རྒྱབ་སྐྱོར་བྱེད་དགོས་ངེས་ཆགས་ཡོད་ལ། གཞན་ཡང་། ཁོས་ཐོག་མར་ཐེ་ཝན་སྲིད་འཛིན་གྱི་ལས་ཁུར་ལེན་སྐབས་ཀྱང་། གལ་སྲིད་རྒྱལ་སྤྱིའི་སྤྱི་ཚོགས་བརྒྱུད་ཐེ་ཝན་ལ་གནོན་ཤུགས་སྤྲད་པ་ཡིན་ན།མཚོ་འགག་གཉིས་ཀྱི་འབྲེལ་བ་ཡར་རྒྱས་ཡོང་ཐབས་བྲལ་བའི་སྐོར་རྒྱ་གཞུང་ལ་གསལ་བཤད་བྱས་ཡོད་སྐོར་བསྐྱར་དུ་ནན་བརྗོད་བྱས་འདུག
ཕྱི་ལོ་༢༠༠༥ལོར་འཛམ་གླིང་འཕྲོད་བསྟེན་རྩ་འཛུགས་དང་རྒྱ་གཞུང་གཉིས་བར་ཐེ་ཝན་གྱི་གནས་བབ་ཐད་ཡོངས་གྲགས་མ་ཡིན་པའི་གསང་བའི་འཆར་ཟིན་ཡིག་ཆ་ཞིག་བཞག་ཡོད་པ་དང་། ༢༠༠༩ལོར་རྒྱ་ནག་གི་མོས་མཐུན་ཡོད་པའི་སྒོ་ནས། ལྟ་རྟོག་ཚོགས་ཞུགས་པའི་མིང་ཐོག་ནས་ཐེ་ཝན་ཐོག་དང་པོར་འཛམ་གླིང་འཕྲོད་བསྟེན་རྩ་འཛུགས་ཁྲོད་མཉམ་ཞུགས་ཐུབ་པ་བྱུང་ཡོད། ཡིན་ནའང་།གནས་བབ་ག་འདྲ་ཞིག་གི་སྟེང་ནས་མཉམ་ཞུགས་ཐུབ་མིན་གྱི་དོགས་གཞི་དེ་ནི།ཐེ་ཝན་ནང་ཁུལ་ཏུའང་བློ་འཚབ་བྱ་ཡུལ་ཞིག་ཆགས་ཡོད་མོད། མ་ཡཱན་ཅིག་སྲིད་གཞུང་གིས་ད་ལྟའི་བར་དེའི་ཐད་ཡོངས་གྲགས་ཀྱི་གསལ་བཤད་ཅི་ཡང་བྱས་མེད།ཉེ་སྔོན་ཡིག་ཆའི་ནང་བཀོད་ཡོད་པའི་ཐེ་ཝན་གྱི་གནས་བབ་ཕྱིར་བསྒྲགས་བྱུང་རྗེས། མ་ཡཱན་ཅིག་སྲིད་གཞུང་གི་ངོས་ནང་ཀྱང་ངོ་རྒོལ་གྱི་རྣམ་འགྱུར་བསྟན་ཡོད་པ་རེད།
ཐེ་ཝན་དམངས་གཙོ་ཡར་ཐོན་ཚོགས་པ་ངོས་ནས། ཐེ་ཝན་གྱིས་རྒྱ་ནག་གཅིག་གི་ལངས་ཕྱོགས་དང་།ཧོང་ཀོང་གི་གནས་བབ་དང་གཅིག་མཚུངས་ཐོག་ནས་རྒྱལ་སྤྱིའི་སྤྱི་ཚོགས་ཀྱི་བྱ་འགུལ་ཁྲོད་ཞུགས་པ་དེ་ནི། རྒྱལ་ཁབ་ཀྱི་གོ་བབ་བློ་གཏོང་གིས་ཧོང་ཀོང་དང་ཨོ་མཱན་གྱི་གནས་བབ་ལྟ་བུར་བསྒྱུར་བ་ཞིག་ཆགས་ཡོད་ལ། གལ་སྲིད་རྒྱལ་སྤྱིའི་སྤྱི་ཚོགས་ཁྲོད་ངོས་འཛིན་དེ་ཡོངས་གྲགས་ཆགས་ཚར་རྗེས།བསྐྱར་དུ་རྒྱལ་ཁབ་ཀྱི་གནས་བབ་རྩོད་ལེན་བྱ་རྒྱུ་ཧ་ཅང་ཁག་པོ་ཡིན་པས་བློ་འཚབ་ཆེན་པོ་ཡོད་ལུགས་བརྗོད་འདུག
སྤྱི་ཚོགས་དཔྱད་བརྗོད་པ་དག་གིས་ཀྱང་།ཐེངས་འདིའི་གནས་ཚུལ་གྱིས་ཐེངས་རྗེས་མིའི་ཐེ་ཝན་སྲིད་འཛིན་འགྲན་རྩོད་ཁྲོད། མ་ཡཱན་ཅིག་ལ་བསྐྱར་དུ་སྲིད་འཛིན་རྒྱལ་ཁ་ཐོབ་རྒྱུར་འགོག་རྐྱེན་ཆེན་པོ་ཐེབས་རྒྱུ་ཡིན་པར་ངོས་འཛིན་བྱས་ཡོད།
གསར་འགོད་པ། ཚེ་རིང་རྒྱལ།
གོ་ཐོས་ཡིན་ན། རྒྱ་རྒན་འདིའི་ཕ་རྒན་གྲོངས་ཁར་ཁ་ཆེམས་གཅིག་ཡོད་པ་ནི་རྒྱ་ནག་གཅིག་གྱུར་ཡོང་རྒྱུ་དེ་ཡིན་པས། རྒྱ་རྒན་འདིས་ཐའེ་ཝན་གཡོ་ཚོང་བྱེད་ཞོར་འཁྲབ་སྟོན་སྣ་ཚོགས་བྱེད་ཀྱིན་པ་ནི་ཚང་མ་ལོས་ཤེས་དགོས་པ་ཞིག་རེད་ལ། རང་རེའི་ཁ་བ་ཅན་ལ་མི་འདི་འདྲ་ཡོད་མེད་ལའང་ཞིབ་གཤེར་དག་ཐེར་གནང་རུང་དུ་བཤད་ཆོག་པར་སྣང་། ཚང་མ་ལོས་བཤད་ན་དེ་འདྲ་ཞིག་རེད་དམ།