བོད་ཞི་བའི་བཅིངས་འགྲོལ་བཏང་སྟེ། ལོ་ངོ་དྲུག་ཅུ་འཁོར་ཡོད་ཡང་བོད་མི་ཚོ་ད་ལྟའང་སྲོག་ལ་མ་འཛེམས་པར། ཕྱི་རྒྱལ་རང་དབང་ལུང་པར་འབྲོ་ཐབས་བྱེད་ཀྱི་ཡོད། ཅེས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུངས་ཡོད།
དེ་རིང་ནི་ཕྱི་ལོ་ ༡༩༥༡ ལོའི་ཟླ་ ༥ ཚེས་ ༢༣ ཉིན་བོད་རྒྱ་སྲིད་གཞུང་གཉིས་བར་གྲོས་མཐུན་དོན་ཚན་བཅུ་བདུན་ལ་མིང་རྟགས་བཀོད་དེ། མི་ལོ་ཧྲིལ་པོ་དྲུག་བཅུ་འཁོར་བའི་དུས་དྲན་གྱི་ཉིན་མོ་རེད། ཉིན་མོ་འདི་ནི་ ཕྱོགས་གཉིས་ཀྱི་ངོས་ནས་ལོ་རྒྱུས་ཀྱི་དཀྱོགས་མཚམས་གལ་ཆེན་ཞིག་ཆགས་ཡོད་སྟབས། རྒྱ་ཕྱོགས་ནས་ཉིན་མོ་འདིར་ “ བོད་ས་གནས་སྲིད་གཞུང་གི་ཏཱ་ལའི་བླ་མའི་སྐུ་ཚབ་དང་ཀྲུང་དབྱང་དབུས་གཞུང་གི་འཐུས་མའི་བར་ཞི་བའི་གྲོས་འཆར་དོན་ཚན་བཅུ་བདུན་ལ་མིང་རྟགས་བཀོད་པའི་ཉིན་མོ ” ཞེས་གཙིགས་ཆེན་བྱས་ཏེ། བོད་རང་སྐྱོང་ལྗོངས་ལྷ་ས་གྲོང་འཁྱེར་དང་པེ་ཅིན་དུ་ཡོད་པའི་བོད་རིག་པའི་སྡེ་ཚན་ཁག་ཏུ་སྤྲོ་སྐྱིད་ཀྱི་མཛད་སྒོ་བསྡུ་བར་སྐུལ་ཅིང་། བཙན་བྱོལ་བོད་གཞུང་གི་ཕྱོགས་ནས་ཉིན་མོ་འདིར་ “ ཆབ་མདོ་ནས་བཙན་ཁྲིད་བྱས་པའི་ང་ཕོད་དང་ལྷ་ས་ནས་ཕེབས་པའི་སྐུ་ཚབ་ཁག་ཅིག་ལ་པེ་ཅིན་ནས་བཙན་གནོན་དང་འཇིགས་སྐུལ་འོག་གྲོས་འཆར་དོན་ཚན་བཅུ་བདུན་ལ་མིང་རྟགས་བཀོད་དུ་བཅུག་པའི་ཉིན་མོ། ” ཞེས་ཆེས་མུན་ནག་གི་ཉིན་མོ་ཞིག་ཏུ་བགྲངས་ཏེ། རྒྱ་གཞུང་ལ་ངོ་རྒོལ་ཁྲོམ་སྐོར་དང་ཆབ་སྲིད་དང་འབྲེལ་བའི་གནད་དོན་རིགས་ལ་གསལ་བཤད་ཐེར་འདོན་བྱེད།
དེ་རིང་ཕྱི་དྲོར་བོད་གཞུང་ཕྱི་དྲིལ་ལས་ཁུངས་དུ། བོད་མི་མང་སྤྱི་འཐུས་ལྷན་ཚོགས་ཀྱིས་གནད་དོན་དེའི་ཐོག་གསར་འགོད་གསལ་བསྒྲགས་ཤིག་བསྐྱངས་སོང་། གསར་འགོད་གསལ་བསྒྲགས་སྟེང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བསྒྲགས་གཏམ་སྒྲོག་སྦྱང་གནང་དོན། ༢༠༡༡ ལོའི་ཟླ་ ༥ ཚེས་ ༢༣ ཉིན་བོད་རྒྱའི་བར་གྲོས་མཐུན་དོན་ཚན་ བཅུ་བདུན་ཞེས་པ་བཞག་པའི་དུས་དྲན་རེད། རྩོད་རྙོག་ཅན་གྱི་ཡིག་ཆ་དེར་རྒྱ་ དམར་གྱིས་བོད་གཞུང་གི་སྐུ་ཚབ་ཚོས་མིང་རྟགས་མ་བཀོད་ན། བོད་ལ་དྲག་པོའི་བཙན་འཛུལ་བྱ་རྒྱུ་ཡིན་ཞེས་སྡིགས་ར་བསྐུལ་བ་རེད། ཡིག་ཆ་དེར་བོད་ཀྱི་སྐུ་ཚབ་ཚོས་བཙན་ཤུགས་ཀྱི་འོག་ནས་གྲོས་མཐུན་ལ་མིང་རྟགས་འགོད་དགོས་བྱུང་ཡོད་ཀྱང་། ༧གོང་ས་མཆོག་གིས་དེའི་ནང་དོན་ལག་ལེན་ཡོང་རྒྱུར་འབད་བརྩོན་ཡོད་རྒུ་རྩལ་དཀྲུགས་གནང་ཡང་། རྒྱ་ཕྱོཊ་ནས་ཡིག་ཆ་དེའི་ནང་ཆ་ཚང་རྡོག་རོལ་དུ་བཏང་སྟེ། དྲག་པོའི་བཙན་གནོན་འོག་བོད་དང་བོད་མིའི་ངོ་བོ་རྩ་བ་ནས་མེད་པ་བཟོས་དང་བཟོ་བཞིན་ཡོད་པ་རེད། ཅེས་གསུངས་སོང་།
སྤེན་པ་ཚེ་རིང་མཆོག་གིས་མུ་མཐུད་དུ་སྒྲོག་སྦྱང་གནང་དོན། ཕྱི་ལོ་ ༡༩༥༩ ལོར་རྒྱ་གཞུང་གི་བཙན་གནོན་ལ་བོད་མིས་ངོ་རྒོལ་བྱས་པའི་སྟབས་ཀྱིས་བོད་མི་ཁྲི་ཕྲག་མང་པོ་དམར་གསོད་བཏང་ཡོད་ལ། གནས་སྟངས་དེའི་རྐྱེན་པས་༧གོང་ས་མཆོག་དང་བོད་མི་མང་པོ་ཞིག་བཙན་བྱོལ་དུ་ཕེབས་དགོས་བྱུང་བ་རེད། ༡༩༥༩ ཟླ་ ༤ ཚེས་ ༡༨ ཉིན་༧གོང་ས་མཆོག་རྒྱ་གར་ལ་ཕེབས་རྗེས་གྲོས་མཐུན་དོན་ཚན་བཅུ་བདུན་ངོས་ལེན་མེད་པའི་ཡོངས་ཁྱབ་གསལ་བསྒྲགས་གནང་ཡོད་ལ། རྒྱ་གར་དབྱིན་གཞུང་སྐུ་ཚབ་དང་། རྒྱ་གར་རང་བཙན་རྒྱལ་ཁབ་ཀྱི་སྐུ་ཚབ་བོད་དུ་ལོ་དགུ་ཙམ་བཞུགས་མྱོང་མཁན་སྐུ་ཞབས་ཧུའུ་རི་ཅར་ཊི་སོན་ལགས་ཀྱིས་བརྩམས་པའི་བོད་དང་བོད་ཀྱི་ལོ་རྒྱུས་ཞེས་པའི་ནང་། རྒྱ་གཞུང་གིས་འཁྱོག་བཤད་བྱས་ཏེ། ལོ་རྒྱུས་རྫུན་བཟོ་དང་གྲོས་མཐུན་གྱི་རྫུན་འབག་གྱོན་པ་དེས་བོད་ནི་ནམ་ཡང་རྒྱལ་ཁབ་ཐ་དད་ཡིན་པ་མེད་པ་བཟོ་ཐབས་མེད། རྒྱ་གཞུང་གིས་བོད་ལ་བཙན་འཛུལ་མ་བྱས་གོང་ཞིང་བྲན་ལམ་ལུགས་དང་ས་ཞིང་བགོ་འགྲེམས་ཆེད་ཞི་བའི་བཅིངས་འགྲོལ་བཏང་བའི་འཁྱོག་བཤད་དྲིལ་བསྒྲགས་བྱས་ཡོད་ནའང་༧གོང་ས་མཆོག་གིས་བོད་ཀྱིོ་འཛིན་སྐྱོང་ནང་བཅོས་བསྒྱུར་དང་ས་ཞིང་བགོ་འགྲེམས་ལ་ལེགས་བཅོས་ཆེན་པོ་གནང་འཆར་ཡོད་པ་རྣམས་རྒྱ་གཞུང་གིས་བཀག་ཡོད་པ་རེད། ༧གོང་ས་མཆོག་གིས་དགོན་སྡེ་དང་ཞིང་གྲོང་ཆེ་ཁག་ནས་ས་ཆ་ཉོས་ཏེ། ཉམ་ཐག་ཚོར་བགོ་འཆར་ལེགས་བཅོས་ལས་ཁུངས་ཞིག་གསར་འཛུགས་གནང་བ་རེད། ཅེས་བཀོད་འདུག
ཡང་གསལ་བསྒྲགས་དེའི་ནང་མུ་མཐུད་དོན། རྒྱ་གཞུང་གིས་བོད་ནང་ཡར་རྒྱས་བཏང་ཡོད་སྐོར་གྱི་འཁྱོག་བཤད་དྲིལ་བསྒྲགས་ལ་རྒྱ་ནག་གི་དབུ་ཁྲིད་ཧུའུ་ཡའོ་པང་གིས་ཐེར་འདོན་བྱས་པ་རེད། ༡༩༨༠ ལོར་ཧུའུ་ཡའོ་པང་བོད་ལ་གཟིགས་སྐོར་དུ་བསྐྱོད་སྐབས། བོད་དབུས་སུ་ཉམ་ཐག་པའི་གནས་སྟངས་ཤེས་རྟོགས་ཡོང་རྗེས། བོད་ནང་གི་དཔལ་འབྱོར་གནས་སྟངས་དེ་ཕྱི་ལོ་ ༡༩༥༩ ལས་སྐྱོ་བོ་འདུག་ཅེས་སྡོམ་ཚིག་བརྒྱབ་ཡོད་པ་རེད། ༡༩༨༠ ལོའི་སྐབས་དང་ལྷག་དོན་དུ་ ༢༠༠༨ ལོར་བོད་ནང་དུ་གཞི་རྒྱ་ཆེ་བའི་ཞི་བའི་ངོ་རྒོལ་བྱས་པ་དེ་དག་གིས་རྒྱ་གཞུང་གི་སྲིད་བྱུས་ཡང་དག་པ་མིན་པ་གསལ་པོ་བསྟན་ཡོད་ཀྱང་། དེ་ལས་ལྡོག་སྟེ། རྒྱ་གཞུང་གིས་ད་དུང་ཡང་བོད་ནང་དུ་འཛུགས་བསྐྲུན་དང་བོད་མི་རྣམས་སྐྱིད་པོ་ཡོད་ཅེས་འུད་ཤོད་བྱེད་ཀྱིན་ཡོད་པ་རེད། ད་ལྟ་བོད་སྤྱི་དང་ལྷག་པར་དུ་མདོ་སྨད་རྔ་པ་ཀརྟི་དགོན་པར་འབྱུང་བཞིན་པའི་གནས་ཚུལ་རིགས་ཀྱིས། རྒྱ་གཞུང་གིས་ཀིརྟི་དགོན་པ་ཞི་འཇགས་ཡིན་ཟེར་བ་དང་། བོད་ནང་གི་བོད་མི་ཚོ་སྐྱིད་པོ་ཡོད་ཟེར་བ་རྫུན་གཏམ་ར་སྤྲོད་གསལ་པོ་བྱུང་ཡོད་པ་རེད། ཅེས་དང་།
གལ་སྲིད་རྒྱ་གཞུང་གིས་བཤད་པ་དོན་དངོས་ཡིན་ན། རྒྱ་གཞུང་གིས་བོད་ནང་རྒྱལ་སྤྱིའི་གསར་འགོད་པ་དང་། དངོས་ཡོད་གནས་སྟངས་རྟོག་ཞིབ་མཁན་སོགས་འགྲོ་བསྐྱོད་ཆོག་པ་ངེས་པར་དུ་བཟོ་དགོས་པ་ཞིག་རེད། བློ་ཕམ་པ་ཞིག་ལ་རྒྱ་གཞུང་གིས་དུས་དྲན་བེད་སྤྱད་ཀྱིས་བོད་ནང་ཡར་རྒྱས་བཏང་ཡོད་ཚུལ་ངོམས་སོ་བྱས་ཏེ། ཁོང་ཚོས་བོད་བཙན་བཟུང་བྱས་པ་དེ་དྲང་བདེན་ ཞིག་ཏུ་བཟོ་ཐབས་བྱེད་ཀྱི་ཡོད། རྒྱ་མིའི་དྲག་གནོན་འོག་བཞག་པའི་གྲོས་མཐུན་དོན་ཚན་བཅུ་བདུན་ལ་ལོ་ངོ་ ༦༠ འཁོར་བའི་དུས་དྲན་སྲུང་བརྩི་གཟབ་རྒྱས་བྱེད་ཀྱི་ཡོད་ཀྱང་། དངོས་ཡོད་ཀྱི་ཐོག་ནས་བཤད་ན། འདས་པའི་ལོ་ངོ་དྲུག་ཅུའི་རིང་བོད་མིའི་འཐབ་རྩོད་དེ་དག་སྔོན་མ་ལས་ཤུགས་ཆེ་རུ་ཕྱིན་ཡོད། ཆིགས་ཡིག་བཞག་སྟེ་ལོ་ངོ་དྲུག་ཅུ་འཁོར་བའི་དུས་དྲན་སྲུང་བརྩི་བྱས་ནས་ད་བར་བོད་མིར་མནར་གཅོད་བཏང་བ་རྣམས་ནག་བསུབ་གཏོང་ཐབས་མེད། བོད་ཞི་བའི་བཅིངས་འགྲོལ་བཏང་སྟེ། ལོ་ངོ་དྲུག་ཅུ་འཁོར་ཡོད་ཡང་བོད་མི་ཚོ་ད་ལྟའང་རང་སྲོག་ལ་མ་འཛེམས་པར་ཕྱི་རྒྱལ་རང་དབང་ ལུང་པར་འབྲོ་ཐབས་བྱེད་ཀྱི་ཡོད་ལ། གནས་ཚུལ་དེ་ཚོ་བོད་མིའི་འཐབ་རྩོད་དང་སེམས་ཤུགས་རྫོགས་མེད་པ་གསལ་པོར་བསྟན་པ་མ་ཟད། བོད་མིའི་ཆོས་དང་རིག་གཞུང་། སྐད་ཡིགཁོར་ཡུག དེ་བཞིན་བོད་མི་ཚོ་རང་ཡུལ་དུ་རང་དབང་དང་སྤོབས་པའི་ངང་འཚོ་གནས་ཐུབ་ཐབས་སུ་ལས་འགུལ་མང་དུ་འགྲོ་བཞིན་ཡོད། ཅེས་སྒྲོག་སྦྱོང་གནང་སོང་།
གསར་འགོད་པ། དཔལ་ལྡན།
ཕོ་ཤི་རེ་ཁ། ཉིན་མོ་འདི་ནི་རང་རེ་གངས་ཅན་པ་རྣམས་མུན་ནག་ནང་འཇུག་པའི་དུས་ཡིན་པའི་མཆོག་གསུམ་ལ་གསོལ་འདེབས་སོགས་མཛད་ནས་སླར་ཡང་ཡངས་པའི་ཞིང་དུ་བདེ་སྐྱིད་ཀྱི་ཉི་མ་ཤར་བའི་སྨོན་ལམ་བྱེད་དུ་རེམ།