གསུང་འཕྲིན་ཁྲིམས་གྱི་བརྗོད་གཞིའི་ནང་འཇོག་པའི་ལམ་སྲོལ་མེད།

གྲོས་ཚོགས་འཕར་མའི་མཇུག་བསྡོམས་དང་བསྟུན་ཏེ་བཀའ་ཁྲི་མཆོག་གིས་༧གོང་ས་མཆོག་གི་གསུང་འཕྲིན་ནང་འུ་དུམ་བཙན་པོ་ཆོལ་གསུམ་བོད་ལ་དབང་སྒྱུར་བའི་གྲས་སུ་བཞག་མེད་པ་དོན་དང་འགལ་མེད་ཚུལ་དང་། ཧོར་དམག་འོག་བོད་ཁམས་ཡོངས་ཚུད་པ་དངོས་འབྲེལ་ཡིན་པ་བཅས་ཀྱི་སྒྲུབ་བྱེད་བཏང་སོང་།  

ཕྱི་ཚེས་ ༢༨ ཉིན་གྱི་དགུང་མོའི་ཆུ་ཚོད་ ༡༡ ཐོག་སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་འཕར་མའི་མཇུག་བསྡོམས་ཐོག བཀའ་ཁྲི་ཟམ་གདོང་རིན་པོ་ཆེ་མཆོག་གིས་བཀའ་ཤག་གི་གསལ་བཤད་གནང་དོན། ཉིན་འདི་དག་ནང་བསམ་བློའི་ནང་དགའ་སྐྱོའི་ཚོར་བ་མང་པོ་ཞིག་བསླེབ་དགོས་པའི་གནས་སྟངས་ཆགས་སོང་། དགའ་སྐྱོ་ཟུང་འབྲེལ་བྱུང་དགོས་པའི་གནས་སྟངས་གང་རེད་ཟེར་ན། ༸གོང་ས་མཆོག་གིས་དུས་ཡུན་རིང་པོར་ཐུགས་ལ་བརྣག་པའི་ཆབ་སྲིད་དང་འབྲེལ་བའི་སྐུ་དབང་ཡོངས་རྫོགས་འོས་བསྡུ་བྱས་པའི་མགོ་ཁྲིད་ལ་རྩིས་སྤྲོད་གནང་བའི་ཐུགས་དགོངས་ད་རེས་འགྲུབ་པ་རེད། བོད་མིའི་མང་ཚོགས་ཀྱི་ངོས་ནས་རང་གི་རྐང་པའི་ཐོག་ལ་རང་ཉིད་ལངས་ཐུབ་རྒྱུར་འབད་བརྩོན་དང་སྦྱོང་བརྡར་མཉམ་འགྲོ་བྱེད་པའི་གོ་སྐབས་ཤིག་༸གོང་ས་མཆོག་སྐུ་གཟུགས་གསལ་ཐང་དང་གསེར་ཞལ་འཚོ་བཞུགས་སྐབས་བྱུང་བ་དེ་ང་ཚོའི་ངེས་པར་དུ་ཆུད་ཟོས་སུ་མ་བཏང་བར་བཀའ་དགོངས་དང་མཐུན་པའི་ཕྱག་ལས་གནང་རྒྱུ་གལ་ཆེན་རེད།

སེམས་སྐྱོ་བའི་ཚོར་བ་བྱུང་ཞེས་བཤད་དགོས་པའི་རྒྱུ་མཚན་གང་ཡིན་ཞེ་ན། ང་ཚོས་ཕྱོགས་གཅིག་ནས་༸གོང་ས་མཆོག་ལ་སྐུ་དབང་རྩིས་སྤྲོད་མ་གནང་རོགས། ཞེས་གསོལ་བ་ཕུར་ཚུགས་སུ་འདེབས་དགོས་ཀྱི་འདུག་ཟེར་བ་དང་། གལ་སྲིད་སྐུ་དབང་རྩིས་སྤྲོད་གནང་བ་ཡིན་ན་དབྱིན་ཇིའི་རྒྱལ་པོ་ལྟ་བུ་བྱས་ཏེ་རྒྱལ་ཁབ་ཀྱི་དབུ་ཁྲིད་ལ་ངེས་པར་དུ་བཞུགས་རོགས་གནང་ཞེས་གསོལ་བ་འདེབས་མཁན་མང་པོ་བྱུང་བ་རེད། ཡིན་ནའང་།༸གོང་ས་མཆོག་གི་བཀའ་དགོངས་ཚུལ་བཞིན་བསྒྲུབ་པར་འབད་བརྩོན་གནང་མཁན་ཉུང་ཉུང་ཞིག་རེད། མཐོང་ཚུལ་དེའི་དབང་གིས་བསམ་བློའི་ནང་ན་ཟུག་ཆེན་པོ་ཞིག་དང་འགྱུར་བ་ཆེན་པོ་ཞིག་ཕྱིན་སོང་།

ཟམ་གདོང་རིན་པོ་ཆེ་མཆོ་གིས་བཅའ་ཁྲིམས་ཀྱི་སྔོན་གླེང་ནང་༧གོང་ས་མཆོག་གི་གསུང་འཕྲིན་བཅུག་པ་འགྲིག་མེད་སྐོར་གསུངས་དོན། སྤྱིར་བཏང་གནས་ཚུལ་འདི་དག་རྫོགས་ཚར་བའི་བྱ་བ་ཞིག་ཡིན་ཡང་། བྱུང་རབས་ནང་གནས་ཚུལ་དེ་དག་གསལ་བོ་སྡོད་དགོས་ཀྱི་ཡོད་སྟབས། བགྲོ་གླེང་སྐབས་བྱུང་བའི་གནས་ཚུལ་ཁ་ཤས་ཐོག་བཀའ་ཤག་གི་ངོས་ནས་གསལ་བཤད་ཅིག་མ་ཞུས་ན། ད་ལྟ་ང་ཚོ་༸གོང་ས་མཆོག་གི་བཀའ་ཤག་ལྷན་ཚོགས་དང་། གཞུང་དགའ་ལྡན་ཕོ་བྲང་གི་བཀའ་ཤག་ལྷན་ཚོགས་དེ་བཅའ་ཁྲིམས་བསྐྱར་བཅོས་ལ་༧གོང་ས་མཆོག་གིས་མཚན་རྟགས་མ་བཏབས་བར། ༸གོང་ས་མཆོག་གི་དགོངས་གཞི་དང་བཀའ་ཡི་ཕེབས་སྒོ་ཡོངས་སུ་རྫོགས་པ་ཡང་དག་པ་ཡིན་པར་སྲུང་སྐྱོབ་ཞུ་རྒྱུ་དེ་ང་དང་ངའི་ལས་རོགས་ཚང་མས་དམིགས་སུ་བཀར་བའི་ལས་འགན་ཡིན་སྟབས། ཟིན་བྲིས་ཚོགས་ཆུང་གི་སྔོན་གླེང་ནང་བྱུང་རབས་དང་འབྲེལ་བའི་གནས་ཚུལ་མ་ཚང་བ་མེད་པ་ཞིག་དང་། དེ་ལས་མང་བ་མེད་ནའང་ང་ཚོའི་ཁྲིམས་མཐུན་གྱི་གནས་བབ་རྒྱུན་ནས་ཡོང་བར་མ་ཆད་པ་ཞིག་ཡོད་བསམ་པ་ཞིག་བྱས་ཡོད། ཡིན་ནའང་༸གོང་ས་མཆོག་གིས་གྲོས་ཚོགས་ལ་ཕེབས་པའི་གསུང་འཕྲིན་ཆ་ཚང་སྔོན་གླེང་ནང་འཇུག་དགོས་ཀྱི་འདུག ཅེས་མང་པོ་ཞིག་གིས་དགོངས་འཆར་བཏོན་སོང་། དེ་ཚོགས་ཆེན་དང་གྲོས་ཚོགས་གཉིས་ཀའི་ནང་གནང་སོང་། དགོངས་འཆར་དེ་དག་ཡང་དག་པ་མ་རེད་ཞུ་ཡི་མེད། སྤྱིར་བཏང་གསུང་འཕྲིན་ཁྲིམས་ཀྱི་བརྗོད་གཞིའི་ནང་འཁྱེར་ཡོང་བའི་ལམ་སྲོལ་མེད་པ་དེ་ཚོགས་ཆེན་མཇུག་བསྡོམས་ཐོག་ཏུ་ཞུས་ཡོད་ཀྱང་། ད་དུང་འཁྱེར་ཡོང་དགོས་པའི་ཐུགས་གལ་ཆེན་པོར་གཟིགས་པ་རེད།  དེ་ཚུར་བསྣམས་ཕེབས་པའི་རྗེས་ལ་ཡང་གསུང་འཕྲིན་ནང་མ་དག་པ་དང་དངོས་དོན་མ་ཡིན་པ་ཡོད་པའི་བཀའ་གནང་སོང་། ཕྱོགས་གཞན་ཞིག་ནས་བལྟས་ན། ཆེད་མངགས་དེ་ལ་དགག་པ་སྐྱོན་པའི་ཆེད་བསྣམས་ཕེབས་པ་ཞིག་དང་། དེའི་ནང་དུ་ཡང་དག་པ་མ་ཡིན་པའི་རིགས་ཐེར་འདོན་གནང་བའི་ཆེད་དུ་བསྣམས་ཕེབས་པ་མིན་འགྲོ་སྙམ་པའི་དོགས་པ་བྱུང་སོང་། ཞེས་གསུངས་བྱུང་།

འདི་དང་མཉམ་དུ་བཀའ་ཁྲི་མཆོག་གིས་ཐེངས་འདིར་བཅའ་ཁྲིམས་ཀྱི་སྔོན་གླེང་ནང་བཅུག་ཟིན་པའི་༧གོང་ས་མཆོག་གིས་གྲོས་ཚོགས་ལ་བསྩལ་བའི་གསུང་འཕྲིན་ལས་ “ཡོངས་གྲགས་སུ་ཕྱི་ལོའི་གོང་གི་བརྒྱ་ཕྲག་གཉིས་པའི་ནང་བོད་རྒྱལ་ཐོག་མ་གཉའ་ཁྲི་བཙན་པོ་ནས་དབུ་ཚུགས་ཏེ། ཕྱི་ལོ་བརྒྱ་ཕྲག་དགུ་བའི་ནང་མངའ་བདག་ཁྲི་རལ་པ་ཅན་གྱི་བར་ལོ་ཆིག་སྟོང་བརྒལ་བའི་རིང་བོད་རྒྱལ་གདུང་རབས་ཞེ་གཉིས་ཀྱིས་རིམ་པས་ཆོལ་གསུམ་བོད་ལྗོངས་ཡོངས་ལ་མངའ་དབང་བསྒྱུར” ཞེས་བཀོད་ཡོད་པ་དེ་དང་། ཡང་“ ཕྱི་ལོ་བརྒྱ་ཕྲག་བཅུ་གསུམ་པའི་མགོ་བཙུགས་ཏེ་ཇིང་གེ་སི་ཁཱན་གྱི་ཧོར་དམག་འོག་རྒྱ་ནག་ཙམ་མ་ཟད། བོད་ཁམས་ཡོངས་རྫོགས་ཀྱང་ཚུད” ཞེས་བཀོད་ཡོད་པ་དེ་གཉིས་ཡང་དག་པ་ཡིན་པ་དང་། ནོར་འཁྲིལ་མེད་པའི་སྒྲུབ་བྱེད་རིང་པོ་ཞིག་ཀྱང་གསུངས་པ་དང་སྦྲགས། དེབ་ཐེར་ནང་ཕྱོགས་གཉིས་ཀའི་མཐོང་ཚུལ་འགོད་དགོས་པའི་བསམ་ཚུལ་བཏོན་སོང་།   

བཀའ་ཁྲི་མཆོག་གིས་མུ་མཐུ་དུ་གསུངས་དོན། ༸གོང་ས་མཆོག་གིས་དགོངས་པ་དང་རྒྱུ་མཚན་རླབས་ཆེན་ཞིག་ལ་གཟིགས་ཏེ། བཙན་བྱོལ་སྒྲིག་འཛུགས་ཀྱི་གནས་བབ་ཡག་པོ་ཞིག་སྲུང་སྐྱོབ་བྱ་དགོས་ན། ཚིག་ལ་མ་རྟོན་པར་དོན་ལ་རྟོན་དགོས་ཀྱི་ཡོད་པ་གལ་ཆེན་པོར་གཟིགས་པ་རེད། གྲོས་ཚོགས་ལ་བསྩལ་བའི་གསུང་འཕྲིན་སྔ་ཕྱིའི་ནང་རྟོན་བཞིའི་མཇུག་ལྡོག་མ་ནོར་བ་དགོས་པ་རེད་གསུངས་པ་དེ། ད་ལྟ་གཞི་ནས་ངེས་པ་རྙེད་ཀྱི་འདུག ང་ཚོའི་སྒྲིག་འཛུགས་འདི་དགའ་ལྡན་ཕོ་བྲང་ནས་བརྒྱུད་ཅིང་། ༡༦༤༢ ནས་ཡོང་བསྡད་པའི་ཆོལ་གསུམ་བོད་རིགས་ཡོངས་ཀྱི་ཁྲིམས་མཐུན་གྱི་གཞུང་གི་ཁྲིམས་མཐུན་གྱི་གནས་བབ་དེ་ཇི་སྲིད་བོད་དོན་བདེན་མཐའ་མ་གསལ་བར་དུ་ངོ་བོ་སྲུང་སྐྱོབ་བྱ་རྒྱུ་གལ་ཆེན་པོ་རེད་དམ། དེའི་མིང་ཚིག་སྲུང་སྐྱོབ་བྱ་རྒྱུ་གལ་ཆེན་པོ་རེད། མིང་གང་འདྲ་ཞིག་བཏགས་མིན་ལ་མ་ལྟོས་པར་དོན་གལ་ཆེན་པོ་གནང་རྒྱུ་ཞེ་དྲག་གལ་ཆེན་པོ་རེད། ལྷག་པར་དུ་ད་ལྟའི་གནས་སྐབས་ལ་༸གོང་ས་མཆོག་གིས་ཅིའི་ཕྱིར་འདིའི་སྐོར་ལ་འཛེམ་ཟོམ་མེད་པའི་བཀའ་སློབ་གནང་དགོས་པ་རེད། འདིའི་གནད་འགག་ཚང་མས་རྟོགས་ཀྱི་ཡོད་ན་བསམ་པའི་ཐེ་ཚོམ་ཡོད། ཅེས་དང་གསུངས་སོང་།

བཀའ་ཁྲི་མཆོག་གིས་མུ་མཐུད་དུ་གསུངས་དོན། ལྔ་བཅུ་ང་དགུ་ནས་ད་ལྟའི་བར་དུ་བཙན་བྱོལ་སྒྲིག་འཛུགས་འདི་དབུས་བོད་ཀྱི་འཛིན་སྐྱོང་གི་མིང་ཐོག་ཡིན་ན་འདྲ་ལ། བཙན་བྱོལ་བོད་གཞུང་གི་མིང་ཐོག་ནས་ཡིན་ནའང་འདྲ། ཁ་ཤས་ཀྱིས་མངོན་གསལ་དོད་པོ་དང་། ཁ་ཤས་ཀྱིས་མངོན་གསལ་དོད་པོ་མ་ཡིན་པའི་ཐོག་ནས་ངོས་ལེན་ཡོད་པ་རེད་ལ། འབྲེལ་བ་ཡང་གནང་བ་རེད། ལས་ཁུངས་ནང་མ་ཐུབ་པ་ཡིན་ནའང་གྲངས་ཀྱི་ནང་དུ་ཚུད་ཡོད་པ་རེད། འདི་༸གོང་ས་མཆོག་གི་ཧ་ཅང་གཟི་བརྗིད་ལྡན་པའི་འོད་སྣང་གི་མཁའ་དབྱིངས་ཆེན་པོ་དེའི་ནང་ང་ཚོར་གོ་སྐབས་དེ་རག་པ་རེད། ད་ལྟ་སྲིད་དོན་གྱི་ཐོག་ནས་འགྱུར་བ་ཕྱིན་ཏེ། ༧གོང་ས་མཆོག་བཙན་བྱོལ་སྒྲིག་འཛུགས་ཀྱི་ཆབ་སྲིད་དང་འཛིན་སྐྱོང་གི་དབུ་ཁྲིད་གནང་རྒྱུ་མཚམས་འཇོག་བྱས་པ་རེད། དེའི་རྗེས་ལ་ང་ཚོའི་ངོས་འཛིན་དང་འབྲེལ་བ། ང་ཚོའི་གཟུགས་བརྙན་དེ་ང་ཚོ་རང་གིས་བཟོ་དགོས་པ་ལས། ༸གོང་ས་མཆོག་གི་སྐུ་མཚན་བརྒྱུད་ནས་འགྲོ་བའི་དུས་རྫོགས་པ་རེད། ང་ཚོ་རང་ཉིད་འགྲོ་བའི་སྐབས་སུ་མིང་ཙམ་འཁུར་ནས་ཕྱིན་པ་ཡིན་ན། ང་ཚོ་གང་དུ་བསླེབས་ཐུབ་པ་རེད། ཇི་ལྟར་ང་ཚོའི་གནས་བབ་དེ་རྒྱལ་སྤྱིའི་ནང་སྟོན་ཐུབ་པ་ཞིག་བཟོ་རྒྱུ་ཡིན། དེ་ཚོར་དགོངས་པ་མ་བཞེས་པ་དང་རྣམ་དཔྱོད་ཀྱི་ཤེས་རབ་ཕར་བཞག་ཏེ་སེམས་ཤུགས་རྐྱང་པའི་རྗེས་ལ་ཕེབས་པ་ཡིན་ན། གྱོང་ཞིག་རག་པ་ཡིན་ན་གྱོང་དེ་བཀའ་ཤག་དང་སྤྱི་འཐུས་ཀྱི་ཐོག་ནས་འདུག་གི་མ་རེད། གཞིས་བྱེས་བོད་མི་ཡོངས་རྫོགས་ལ་གྱོང་རག་གི་རེད། ལོ་ལྔ་བཅུ་ང་གཉིས་ལ་སྐུ་ངལ་མ་འཕྲད་པར་མ་འོངས་པར་དཀའ་ངལ་འཕྲད་ཀྱི་མ་རེད་གསུངས་པ་དེ་ཡང་དག་པའི་རྒྱུ་མཚན་མ་རེད། ཅེས་གསུངས་སོང་།

མཐར་བཀའ་ཁྲི་མཆོག་གིས་ནན་གྱིས་གསུངས་དོན། ༸གོང་ས་མཆོག་གི་བཀའ་གནང་བ་དེ་འགྲིག་གི་མི་འདུག་ཅེས་ཚིག་གསལ་བོའི་ཐོག་ནས་ཞུ་མཁན་དང་ཕྱག་ཡིག་ཕུལ་མཁན་ཡོང་བསྡད་ཀྱི་འདུག་ལ། གྲོས་ཚོགས་ནང་དུའང་གསུང་གི་ཡོད་པ་རེད། ༸གོང་ས་མཆོག་དགོས་ཀྱི་ཡོད་པ་ཞིག་དང་༸གོང་ས་མཆོག་གི་གསུང་མི་དགོས་པའི་དུས་ཚོད་ཅིག་ལ་བསླེབས་ཡོད་པ་ཡིན་ན། ༸གོང་ས་མཆོག་དགོས་ཀྱི་ཡོད་གསུངས་པ་དེ་གཅིག་བྱས་ནས་ཚུལ་ཆོས་རེད། གཅིག་བྱས་ན་བཙན་དབང་རེད། དེ་ཡང་དག་པ་ཞིག་མིན་སྟབས་སེམས་སྐྱོ་བོའི་ཚོར་སྣང་བྱུང་བ་རེད། ཅེས་གསལ་བཤད་གནང་བྱུང་། 

གསར་འགོད་པ། དོན་གོ