ནང་དོན་གཙོ་བོ་དང་ཐ་སྙད་ཕལ་བར་འཇོག་དགོས།

དམངས་གཙོའི་ཀ་བ་གསུམ་གྱི་གནས་བབ་ལ་འགྱུར་བ་སྤུ་ཙམ་ཡང་མེད་པར་ཡར་རྒྱས་ཀྱི་གོམ་པ་རྒྱག་བཞིན་ཡོད། ད་རེས་གྲོས་ཚོགས་ཀྱི་དཀྱིལ་འཁོར་ནང་དམངས་གཙོ་ཀ་བ་གསུམ་གྱི་ཁྲིམས་མཐུན་གྱི་སྒྲིག་འཛུགས་དང་བཅའ་ཁྲིམས་ཀྱི་དགོངས་དོན་གང་ཡོད་པ་དེ་གྲ་མ་ཉམས་གྲུ་མ་ཞིག་པར་གནས་ཡོད་པ་བཀའ་བློན་ཁྲི་པས་ཚིག་ཐག་ཆོད་པོས་ཞུས་པ་ཡིན་ཟེར།

ཁ་སང་ཕྱི་ཚེས་ ༢ ཉིན་སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཉིན་གཉིས་པའི་སྟེང་། བཀའ་ཁྲི་ཟམ་གདོང་རིན་པོ་ཆེ་མཆོག་གིས་དེང་སྐབས་སྤྱི་ཚོགས་ནང་བཅའ་ཁྲིམས་བསྐྱར་བཅོས་དང་འབྲེལ་བའི་གླེང་སློང་མང་པོ་ཞིག་ཡོང་གི་ཡོད་པའི་གནད་དོན་ཁག་ཅིག་གི་ཐད་གསལ་བཤད་གནང་སོང་། སྐབས་དེར་བཀའ་ཁྲི་མཆོག་གིས་གསུངས་རྒྱུར། ད་རེས་བྱུང་རབས་ཀྱི་འགྱུར་མཚམས་ཆེན་པོ་ཞིག་གི་སྐབས་སུ་སྐབས་བཅུ་བཞི་པའི་སྤྱི་འཐུས་རྣམ་པས་བཅའ་ཁྲིམས་བསྐྱར་བཅོས་ཀྱི་ཕྱག་ལས་ལམ་ལྷོང་ལྡན་པའི་ཐོག་གནང་ཐུབ་པ་དེ་གཟི་བརྗིད་དང་ལྡན་པ་ཞིག་དང་དགའ་བསུ་ཞུ་འོས་པ་ཞིག་རེད། དེའི་ཐད་གཞིས་བཞུགས་བོད་མི་མཁྱེན་ལྡན་ཚོའི་ཁྲོད་དུའང་བཅའ་ཁྲིམས་བསྐྱར་བཅོས་ཡག་པོ་བྱུང་འདུག་ཅེས་དགོངས་ཚུལ་གསུང་མཁན་རབ་དང་རིམ་པ་བྱུང་སོང་། ཕྱག་ལས་ཡག་པོ་དང་བྱུང་རབས་ཀྱི་དོན་སྙིང་ལྡན་པའི་གནད་དོན་གང་ཡིན་ཡང་འགྱུར་བ་ཞིག་དང་གསར་གཏོད་ཅིག  གསར་བརྗེ་ཞིག་བྱུང་སྐབས་དེ་ལ་འདོད་པ་མ་ཁེངས་པ་དང་འགྲིག་མི་འདུག་ཅེས་བཤད་པ་དེ་བོད་པའི་ཐུན་མོང་མ་ཡིན་པའི་ཁྱད་ཆོས་མིན་པར་འཇིག་རྟེན་སྤྱིའི་འགྲོ་སྟངས་ཤིག་ཆགས་ཡོད་སྟབས། དེར་ང་ཚོ་ཧ་ལས་པ་དང་ཧང་སངས་དགོས་པ་ཤིག་ཆགས་མེད། བདུན་ཕྲག་ཁ་ཤས་ནང་འགན་འཁུར་མི་དགོས་པའི་ཐོག་ནས་བརྒྱུད་ལམ་ཁག་ཏུ་སྐད་ཆ་འདྲ་མིན་གསུང་ངེས་ཀྱང་། བར་མཚམས་ཤིག་ནས་རང་བཞིན་གྱི་ཡལ་འགྲོ་ངེས་རེད། ཅེས་གསུངས་སོང་།

ཁོང་གིས་མུ་མཐུད་དུ་གསུངས་དོན། མང་ཚོགས་ནང་དང་ལྷག་པར་དུ་བརྒྱུད་ལམ་ཁག་ཏུ་དངོས་ཡོད་མ་ཡིན་པའི་གཞི་མེད་ཀྱི་ཐ་སྙད་དང་ཚིག་མང་པོ་བེད་སྤྱོད་བཏང་ནས་མི་མང་ལ་མགོ་སྐོར་དང་མགོ་རྨོངས་སུ་འཇུག་པའི་གནས་ཚུལ་ཡོང་གི་འདུག དེ་ཚོ་བསམ་བཞིན་དུ་གནང་བ་མིན་པར་སོ་སོའི་མགོ་མ་འཚོས་པར་བྱས་པ་ཞིག་རེད་བསམ་གྱི་ཡོད། ལྷག་པར་དུ་སྙན་གྲགས་ཡོད་པའི་བརྒྱུད་ལམ་ཁ་ཤས་ནང་ཕྱི་ཚེས་ ༢༩ ཉིན་ནས་བཅའ་ཁྲིམས་གསར་བ་གཏན་འབེབས་བྱས་རྗེས་བཅའ་ཁྲིམས་གསར་བའི་འོག་ཕྱག་ལས་གནང་གི་རེད་ཅེས་གསུང་གི་འདུག  དེ་མི་ཕལ་བ་ཞིག་གིས་ཀྱང་མགོ་འཚོས་པའི་གནས་སྟངས་ཤིག་རེད། ང་ཚོས་བཅའ་ཁྲིམས་གསར་བ་ཞིག་དུས་ནམ་ཡང་བཟོས་མེད། ༡༩༩༡ ལོར་སྐབས་བཅུ་གཅིག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གཏན་ལ་ཕབ་པའི་བཅའ་ཁྲིམས་དེའི་ལེའུ་བཅུ་གཅིག་པའི་འཆར་ཅན་གྱི་འོག་ནས་ཁྲིམས་དང་འགྲོ་ལུགས་ལ་མཐུན་པར་བྱས་ཏེ་བསྐྱར་བཅོས་གནང་ཡོད། ཅེས་གསུངས་སོང་།
 

ཟམ་གདོང་རིན་པོ་ཆེ་མཆོག་གིས་དམངས་གཙོའི་ཀ་བ་གསུམ་གྱི་སྐུ་དབང་ལ་དོ་ཕོག་སྣ་གཅིག་ཀྱང་སོང་མེད་པར། སྔར་ལས་ཡར་རྒྱས་སུ་འགྲོ་བཞིན་ཡོད་སྐོར་གསུངས་དོན། སྤྱི་ཚོགས་ནང་བཙན་བྱོལ་བོད་གཞུང་དང་བོད་གཞུང་ཕྱིར་བསྡུ་གནང་བ་རེད། ཅེས་སྔོན་མ་ནས་གསུང་གི་འདུག་ལ་བརྒྱུད་ལམ་ཁག་ལའང་ཐོན་འདུག ༡༩༥༩ ལོར་བོད་ཀྱི་རྒྱལ་ས་ལྷ་ས་ནས་ལྷུན་རྩེ་རྫོང་དུ་གནས་སྤོར་གནང་བའི་དགའ་ལྡན་ཕོ་བྲང་གི་གཞུང་དང་མུ་མཐུད་རྒྱ་གར་ནང་བསྐྱར་དུ་གོ་འཛུགས་གནང་བའི་བཙན་བྱོལ་བོད་གཞུང་དེ། འདས་པའི་ལོ་ ༥༢ རིང་དམངས་གཙོའི་འཕེལ་རིམ་ཚད་དང་ལྡན་པ་ཞིག་གི་ཐོག་ནས་བཅའ་ཁྲིམས་དང་ལྡན་པའི་དམངས་གཙོའི་གཞུང་ཞིག་དང་། ཁྲིམས་ལུགས་དབང་འཛིན་དང་ཁྲིམས་བཟོ་ལྷན་ཚོགས། འཛིན་སྐྱོང་དབང་འཛིན། དབང་ཚད་འཆར་འགོད་དང་ལྗིད་ཉམས་སྟངས་འཛིན་གྱི་ཆ་རྐྱེན་ཡོངས་སུ་རྫོགས་པའི་དམངས་གཙོའི་གཞུང་ཆ་ཚང་བ་དེ་ ༡༩༤༢ ལོ་ནས་བར་མ་ཆད་པའི་བོད་ཀྱི་ཁྲིམས་མཐུན་གྱི་གཞུང་དེ་ཕྱིར་བསྡུ་བྱས་མེད། ཅེས་གསུངས་བྱུང་།

བཀའ་ཁྲི་མཆོག་གིས་མུ་མཐུད་དུ་གསུངས་དོན། ད་ལྟའི་ཆར་ཚོགས་མི་ ༤༣ ལས་གྲུབ་པའི་སྤྱི་འཐུས་ལྷན་ཚོགས་ཞལ་ཁྲ་རིག་རིག་བྱས་ཏེ་འདིར་བཞུགས་བཞིན་པ་རེད། ཁྲིམས་དོན་གྱི་ཕྱག་ལས་ཡང་གནང་བཞིན་པ་རེད། དེའི་ནང་ནས་མི་གཅིག་ཉུང་དུ་བཏང་མེད་ལ་ཕྱག་ལས་གནང་བའི་ལམ་སྲོལ་ལའང་འགྱུར་བ་སྤུ་ཙམ་ཡང་ཕྱིན་མེད། ཚོགས་འདུ་རྒྱུན་དུ་ཚོགས་ཀྱི་ཡོད་པ་རེད། ཚོགས་དུས་གཉིས་པའི་སྐབས་སུ་འདི་གནང་གི་ཡིན་ཞེས་འཆར་གཞི་འདིང་བཞིན་པ་རེད། ཁྲིམས་བཟོ་ལྷན་ཚོགས་ཀྱི་ཐོག་ཏུ་ཡར་རྒྱས་འགྲོ་བ་ལས་ཕྱིར་བསྡུ་དང་འགྱུར་བ་ཕྱིན་མེད། འཛིན་སྐྱོང་ལ་མཚོན་ནའང་། གསར་བརྗེ་དང་ཡར་ཐོན་གྱི་ཐོག་ནས་འཛིན་སྐྱོང་གི་དབུ་འཁྲིད་མང་ཚོགས་ཀྱིས་འོས་བསྡུ་འདེམས་གནང་ཡོད། ལས་དོན་གནང་ཕྱོགས་དང་སྐུའི་དབང་ཚད། སྔར་ལས་ཆེ་རུ་ཕྱིན་པ་ལས་སྣ་གཅིག་ཀྱང་ཆུང་དུ་ཕྱིན་མེད། ཁྲིམས་ལུགས་དབང་འཛིན་ཡང་། སྔོན་མ་གང་ཡོད་པའི་ཐོག་༸གོང་ས་མཆོག་གིས་རྒྱལ་ཁབ་དབུ་ཁྲིད་ཀྱི་མཚན་ཐོག་ནས་གནང་དགོས་པའི་ལས་དོན་མང་པོ་ཞིག་ད་ཆར་ཁྲིམས་ལུགས་དབང་འཛིན་གྱིས་གནང་དགོས་པ་ཆགས་ཡོད། ལྷག་པར་དུ་ ༢༠༡༡ ལོ་ནས་བཟུང་རྒྱ་བལ་འབྲུག་གསུམ་དུ་ཡོད་པའི་བོད་མི་འདུས་སྡོད་ཀྱི་ས་གནས་ཡོངས་ལ་བཙན་བྱོལ་བོད་མིའི་ཁྲིམས་དོན་ཟབ་སྦྱོང་དང་ཁྲིམས་བཟོའི་ལས་གཞི་རྒྱ་ཆེན་པོ་ཞིག་བརྩམ་འཆར་ཡོད་སྟབས། དམངས་གཙོའི་ཀ་བ་གསུམ་གྱི་གནས་བབ་ལ་འགྱུར་བ་སྤུ་ཙམ་ཡང་མེད་པར་ཡར་རྒྱས་ཀྱི་གོམ་པ་རྒྱག་བཞིན་ཡོད། ད་རེས་གྲོས་ཚོགས་ཀྱི་དཀྱིལ་འཁོར་ནང་དམངས་གཙོ་ཀ་བ་གསུམ་གྱི་ཁྲིམས་མཐུན་གྱི་སྒྲིག་འཛུགས་དང་བཅའ་ཁྲིམས་ཀྱི་དགོངས་དོན་གང་ཡོད་པ་དེ་གྲ་མ་ཉམས་གྲུ་མ་ཞིག་པར་གནས་ཡོད་པ་བཀའ་བློན་ཁྲི་པས་ཚིག་ཐག་ཆོད་པོས་ཞུས་པ་ཡིན། ཞེས་གསུངས་བྱུང་།

བཀའ་ཁྲི་མཆོག་གིས་ཐེངས་འདིར་བཙན་བྱོལ་བོད་གཞུང་གི་མིང་ལ་བསྒྱུར་བཅོས་བཏང་བའི་ཐད་གསུངས་དོན། ད་ལྟའི་ཕན་ལ་༸གོང་ས་མཆོག་གི་མཚན་གྱི་གཟི་བྱིན་འོག་མིང་དང་ཐ་སྙད་འདྲ་མིན་མཐར་འགྲོ་བཞིན་ཡོད། བསྙོན་འཛུགས་བྱེད་མཁན་ཡོད་ཀྱང་༸གོང་ས་མཆོག་གི་མཚན་གྱི་གཟི་བརྗིད་ལ་བརྟེན་ནས་སེལ་ཐུབ་པ་ཞིག་རེད།༸གོང་ས་མཆོག་གིས་བྱུང་རིམ་གྱི་ཆབ་སྲིད་དང་འཛིན་སྐྱོང་གི་སྐུ་དབང་རྩིས་སྤྲོད་གནང་བའི་རྗེས་སུ་ཐ་སྙད་ལ་བརྟེན་ནས་ང་ཚོར་དཀའ་ངལ་འཕྲད་པ་ཡིན་ན་ཡག་པོ་མི་འདུག་ཅེས་༸གོང་ས་མཆོག་གིས་དགོངས་པ་བཞེས་ཡོད་པ་ཚང་མས་བསམ་གྱི་ཡོད་པ་རེད། དོན་མི་གཙོ་བར་ཐ་སྙད་གཙོ་བོར་བཞག་པ་དེ་ཆབ་སྲིད་ཀྱི་འཆར་གཞི་ཡོད་པའི་བསམ་བློ་གཏོང་སྟངས་ཤིག་ཆགས་ཀྱི་མེད། ཐབས་ཇུས་ལྡན་པའི་ཆབ་སྲིད་ཀྱི་དགོངས་པ་བཞེས་མཁན་ཞིག་ཡིན་ན། ནང་དོན་གཙོ་བོ་དང་ཐ་སྙད་ཕལ་བར་འཇོག་དགོས། ཞེས་གསུངས་བྱུང་།  

བཀའ་ཁྲི་མཆོག་གིས། སྤྱི་ཚོགས་ཁྲོད་ཐེངས་འདིའི་བཅའ་ཁྲིམས་བསྐྱར་བཅོས་དེ་༸གོང་ས་མཆོག་ལ་ཕྱི་ནང་གི་གནོན་ཤུགས་སྤྲད་པར་བརྟེན་བཀའ་གནང་དགོས་ཆགས་པ་རེད་ཅེས་དགོངས་མཁན་དང་བཀའ་གནང་མཁན་བྱུང་ཡང་། ༸གོང་ས་མཆོག་གི་སྐུའི་གསང་བ་གསུམ་གྱི་ཡོན་ཏན་དང་མཛད་པ་འཕྲིན་ལས་མ་རྟོགས་པའི་དབང་གིས་༸གོང་ས་སྐུ་ཕྲེང་བཅུ་བཞི་བ་མཆོག་ཕྱི་དང་ནང་གི་གནོན་ཤུགས་འོག་ལ་ཕེབས་མཁན་ཞིག་ཡིན་པར་ངོས་འཛིན་གནང་བ་དེར་བློ་ཕམ་ཆེན་པོ་བྱུང་། ལྷག་པར་དུ་རྒྱ་མིས་གནོན་ཤུགས་དང་རྒྱ་གར་གྱི་གནོན་ཤུགས། ཡང་ན་བོད་རྒྱལ་འབྲེལ་མོལ་ལ་རེ་བ་བརྒྱབ་པ་རེད་ཟེར་བ་དེ་དག་དངོས་ཡོད་ཀྱི་གནས་ཚུལ་དང་ལེ་བར་སྟོང་ཕྲག་མང་པོས་རྒྱང་ཕུད་བྱས་ཡོད་པ་ཞིག་རེད། ཅེས་གསུངས་བྱུང་།

གསར་འགོད་པ། དོན་གོ