ཟླ་ཕྱེད་རིང་༧གོང་ས་མཆོག་གིས་ནེའི་ཛི་ལན་ཌི་དང་ཨོ་སི་ཊི་ལི་ཡ་བཅས་སུ་ཆོས་ཕྱོགས་ཀྱི་མཛད་འཕྲིན་བསྐྱང་འཆར་ཡོད་པ་ལྟར། ཉེ་ལམ་ནེའི་ཛི་ལན་ཌིའི་ནང་ས་ཡོམ་བརྒྱབ་ཡུལ་གྱི་མི་མང་ལ་ཐུགས་གསོའི་བཀའ་སློབ་གནང་གྲུབ་སྟེ། ཉིན་འདི་འགར་ཨོ་སི་ཊི་ལའི་ནང་མཛད་འཕྲིན་སྐྱོང་བཞིན་ཡོད་འདུག
ཨོ་སི་ཊོ་ལི་ཡ་དང་ནེའི་ཛི་ལན་ཌིིའི་ཡུལ་གཉིས་ཀྱི་གཞུང་འབྲེལ་མིན་པའི་ཚོགས་པ་ཁག་གི་གདན་ཞུ་ལྟར། ༧གོང་ས་མཆོག་ཟླ་འདིའི་ཕྱི་ཚེས་ ༥ ཉིན་བཞུགས་སྒར་ནས་ཕེབས་ཐོན་གྱིས་རྒྱལ་ས་ལྡི་ལིའི་མཁའ་ལམ་བརྒྱུད། ཨོ་སི་ཊོ་ལི་ཡ་དང་ནེའུ་ཛི་ལན་ཌིའི་རྒྱལ་ཁབ་གཉིས་ནང་། དུས་ཡུན་ཟླ་ཕྱེད་རིང་གི་ཆིབས་བསྒྱུར་བསྐྱང་མགོ་བཙུགས་ཡོད་ཅིང་། ཕྱི་ཚེས་ ༦ ཉིན་༧གོང་ས་མཆོག་ཉེ་ཆར་ནེའུ་ཛི་ལན་ཌིའི་ནང་ས་ཡོམ་གྱི་གནོད་འཚེ་ཚབས་ཆེན་ཕོག་ཡུལ་ཁིར་སི་ཆར་ཅི་ (Christchurch ) གྲོང་ཁྱེར་གནམ་ཐང་དུ་ཞབས་སོར་འཁོད་སྐབས། ས་གནས་དེའི་དད་ལྡན་མང་ཚོགས་ ༥༠ ལྷག་གིས་རང་ཉིད་ཀྱི་ལག་ཏུ་སྤོས་དང་མཇལ་དར། དེ་བཞིན། བོད་ཀྱི་རྒྱལ་དར་སོགས་བསྣམས་ཏེ་ཕེབས་བསུ་གཟབ་རྒྱས་ཞུས་ཡོད་འདུག སྐབས་དེར་༧གོང་ས་མཆོག་གིས་གསར་འགོད་པ་ཚོར་གསུངས་དོན། ངོས་རང་ས་གནས་འདིར་འབྱོར་ཐུབ་པར་ཧ་ཅང་དགའ་བོ་བྱུང་། ངོས་ནས་ས་ཁུལ་འདིའི་མི་མང་ཚོས་སེམས་ཁྲལ་བྱས་ཏེ་མི་སྡོད་པར། སྙིང་སྟོབས་བསྐྱེད་དེ་དཀའ་ངལ་ལས་རྣམ་པར་རྒྱལ་ཐུབ་དགོས་རྒྱུ་དང་། ས་ཡོམ་གོད་ཆག་ཁྲོད་རྩ་གཏོར་དུ་ཕྱིན་པའི་ཁང་ཁྱིམ་དག་བསྐྱར་གསོ་བྱ་རྒྱུར་འབད་བརྩོན་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་གསུངས་ཡོད།
ས་གནས་དེར་གནས་སྡོད་བྱེད་པའི་ལྕམ་སྐུ་ཨི་ལེན་ཌོབ་སོན་ Elain Dobson ལགས་ཀྱིས། ༧གོང་ས་ཏཱ་ལའི་བླ་མ་མཆོག་གྲོང་ཁྱེར་འདིར་༧ཞབས་སོར་འཁོད་པ་ནི་གྲོང་ཁྱེར་འདིའི་མང་ཚོགས་ཀྱི་བསོད་ནམས་ཡིན་ཞིང་། ཁོང་ཉིད་འཛམ་གླིང་འདིའི་སྟེང་ཁྱད་དུ་འཕགས་པའི་སྐྱེས་བུ་ཞིག་ཡིན་པ་མ་ཟད། ཐེངས་འདིར་སྐྱེས་ཆེན་ཁོང་ས་འདིར་ཕེབས་པ་ལ་བརྟེན་ཏེ། ས་ཡོམ་གྱི་གནོད་འཚེ་ཕོག་མཁན་མི་མང་ཚོར་དཀའ་ངལ་ལ་གདོང་ལེན་བྱ་རྒྱུར་ཕན་ཐོགས་ཆེན་པོ་ཡོད། ཅེས་བརྗོད་ཡོད།
ཉིན་རྒྱབ་༧གོང་ས་མཆོག་གིས་( CBS Canterbury Arena) ཞེས་པའི་རྩེད་ཐང་ཆེན་མོའི་ནང་། ཁི་སིར་ཆར་ཅིའི་ས་གནས་མང་ཚོགས་ ༥༠༠༠ བརྒལ་བར་བཀའ་སློབ་གནང་ཡོད་འདུག སྐབས་དེར་ཁོང་གིས། ད་ལོའི་ཕྱི་ཟླ་ ༢ ནང་ས་གནས་འདིར་བྱུང་པའི་ས་ཡོམ་གོད་ཆག་དེར་སྔོན་འགོག་བྱ་རྒྱུ་དེ་ནི་ང་ཚོའི་ནུས་པ་ལས་ཡོངས་སུ་བརྒལ་བ་ཞིག་རེད། ངོས་རང་ས་གནས་འདི་དང་སེམས་ཐག་ཉེ་བོ་ཡོད་པའི་གྲོགས་པོ་ཞིག་ཡིན་སྟབས། དེ་རིང་འདིར་ཡོང་སྟེ་འབྱུང་བའི་གོད་ཆག་འོག་རྐྱེན་འདས་སུ་སོང་བ་དག་གི་ནང་མི་ཤུལ་ལུས་ཚོར་སེམས་གསོ་བྱ་རྒྱུ་ངོས་ཀྱི་ལས་འགན་ཡིན། རྐྱེན་ངན་དེ་འདྲ་བྱུང་སྐབས་སེམས་སྡུག་བསྔལ་གྱིས་མནར་བསྡད་ན། ཕན་ཐོགས་གང་ཡང་ཡོང་གི་མ་རེད། དེ་བས་སྙིང་སྟོབས་བསྐྱེད་དེ། སྡུག་བསྔལ་ལས་ཐར་ཐབས་ལ་འབད་བརྩོན་བྱས་ཏེ་གོམ་པ་མདུན་སྤོས་གྱིས་འཚོ་བ་གསར་པ་བསྐྱལ་རྒྱུར་འཐབ་རྩོད་བྱ་དགོས་པ་རེད། སྙིང་སྟོབས་དང་ཆོད་སེམས་འཕར་མ་ཞིག་བསྐྱེད་དེ་རྐྱེན་ངན་གྲོགས་སུ་འགྱུར་ཐབས་བྱ་རྒྱུ་ཧ་ཅང་གལ་ཆེན་རེད། ཅེས་གསུངས་ཡོད། ༧གོང་ས་མཆོག་ས་གནས་སྨན་ཁང་དུ་ཆིབས་བསྒྱུར་བསྐྱངས་ཏེ། འདི་ལོའི་ས་ཡོམ་ནང་གོད་ཆག་ཕོག་མཁན་དང་མྱུར་སྐྱོབ་བྱེད་མཁན་ལས་བྱེད་ཚོར་དམིགས་བསལ་མཇལ་ཁ་གནང་ཡོད་འདུག
༧གོང་ས་མཆོག་གིས་ནེའུ་ཛི་ལན་ཌིའི་མཛད་འཕྲིན་ཁག་ལེགས་པར་གྲུབ་རྗེས་དེ་རིང་ཕྱི་ཚེས་ ༩ ཉིན་ཡུལ་དེའི་གནད་ཡོད་མི་སྣ་གཙོས་པའི་ས་གནས་བོད་མི་དང་ཡུལ་མིའི་ཕེབས་བསུའི་ཁྲོད་མཁའ་ལམ་བརྒྱུད་ཨོ་སི་ཊོ་ལི་ཡའི་གྲོང་ཁྱེར་མེལ་བྷོན་དུ་༧ཞབས་སོར་འཁོད་ཡོད་འདུག་ལ། ཕྱི་ཚེས་ ༡༡ ནས་ ༡༣ ཉིན་བར་གྲོང་ཁྱེར་དེའི་ས་གནས་མི་མང་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་༼བྱང་ཆུབ་སེམས་པའི་སྤྱོད་པ་འཇུག་པར་བྱེད་པ་༽བཀའ་ཁྲིད་གནང་རྒྱུ་ཡིན་དང་། འཇུག་པའི་བཀའ་ཆོས་བཀའ་དྲིན་སྩལ་རྒྱུ་དང་། བོད་རིགས་དང་རྒྱ་རིགས་མཐུན་སྒྲིལ་ཚོགས་པའི་གོ་སྒྲིག་འོག་ཨོ་སི་ཊི་ལི་ཡའི་རྒྱ་རིགས་ཁག་གཅིག་ལ་མཇལ་ཁ་དང་བཀའ་སློབ་སྩལ་རྒྱུ། དེ་བཞིན། དེ་གའི་གྲོས་ཚོགས་ཀྱི་འཐུས་མི་ཁག་གཅིག་ལ་ཡང་མཇལ་འཕྲད་གནང་རྒྱུ་ཡིན་འདུག ཐེངས་འདིའི་གཟིགས་སྐོར་རིང་། ཨོ་སི་ཊོ་ལི་ཡའི་ཕྱོགས་འགལ་ཚོགས་པའི་ཚོགས་གཙོ་སྐུ་ཞབས་ཊོ་ནེ་ཨེ་བྷོ་ཊི་ Tony Abbot མཆོག་དང་མཇལ་འཕྲད་གནང་འཆར་ཡོད་འདུག
གསར་འགོད་པ། དཔལ་ལྡན།
རབ་འབྱམས་རྒྱལ་བ་ཀུན་གྱི་མཛད་པའི་འཁུར། །
སྙིང་སྟོབས་ཕྲག་པར་བཟུང་བའི་རླབས་ཆེན་གྱི། །
འཕྲིན་ལས་ཀུན་ཕན་ནམ་མཁའི་སྙིང་པོ་ཅན། །
བཞེད་པ་ཇི་བཞིན་ལྷུན་གྱིས་འགྲུབ་པར་ཤོག །ཅེས་རྒྱལ་བའི་ཡོངས་འཛིན་ཟུང་གི་མཛད།
མཛད་པ་ཀུན་ལས་གསུང་གི་ནི། །མཛད་པ་མཆོག་ཡང་དེ་ཡང་ཡིན། །
དེ་ཉིད་ཡིན་ཕྱིར་མཁས་པ་ཡིས། །འདི་ལས་སངས་རྒྱས་རྗེས་དྲན་བྱོས། །ཞེས་རྗེ་ཙོང་ཁ་པའི་གསུངས་ལྟར་རོ།།
སྟོང་ཉིད་སྙིང་རྗེ་ཟུང་དུ་འཇུག་པའི་ལམ། །ཆེས་ཆེར་གསལ་གངས་ཅན་བསྟན་འགྲོའི་མགོན། །ཕྱག་ན་པད་མོ་བསྟན་འཛིན་རྒྱ་མཚོ་ལ། །གསོལ་བ་འདེབས་སོ་བཞེད་དོན་ལྷུན་འགྲུབ་ཤོག། །