འདི་གར་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༡༠ ཉིན་གྱི་བོད་ནང་གི་ཆུ་ཚོད་ ༡༢ ཙམ་ལ་ཁམས་དཀར་མཛེས་དགོན་དུ་སློབ་གཉེར་གནང་བཞིན་པའི་རྩིས་ཚང་དགོན་གྱི་གྲྭ་མགོ་དབྱངས་ལགས་ཀྱིས་དཀར་མཛེས་རྫོང་གི་ཁྲོམ་གཞུང་དུ། “༧གོང་ས་མཆོག་སྐུ་ཚེ་ཁྲི་ལོ་བརྟན་པ་ཤོག བོད་ལ་རང་དབང་དགོས། སྤང་རི་སྣ་རིན་པོ་ཆེ་མཆོག་གིས་གཙོས་པའི་ཆབ་སྲིད་བཙོན་པ་རྣམས་ཀློད་གྲོལ་གཏོང་དགོས” ཞེས་འབོད་ཚིག་སྒྲོག་བཞིན་རྒྱ་གཞུང་ལ་ཞི་བའི་ངོ་རྒོལ་གནང་ཡོད་པ་དང་། སྐབས་དེར་རྒྱ་ནག་གི་དྲག་ཆས་ཉེན་རྟོག་པ་དང་དམག་མི་མང་པོ་འབྱོར་ཏེ་ཁོང་འཛིན་བཟུང་གིས་ཉེས་རྡུང་གཏོང་བཞིན་བཙོན་འཇུག་བྱས་ཡོད་འདུག
གྲྭ་མགོ་དབྱངས་ལགས་ནི་དཀར་མཛེས་རྫོང་ལྷོ་པ་ཤང་། རྩག་ལེགས་གྲོང་ཚོ་ནས་ཡིན་ཞིང་། ད་ལྟ་རང་ལོ་ ༣༠ ཡིན་འདུག ཁོང་གི་སྤུན་མཆེད་རང་ལོ་ ༢༣ ཡིན་པའི་གྲྭ་བློ་དབྱངས་ལགས་ཀྱིས་ཀྱང་། ༢༠༠༨ ལོའི་ཟླ་ ༥ བའི་ཚེས་ ༢༠ ཉིན་དཀར་མཛེས་རྫོང་ཐོག་ཏུ་ཞི་རྒོལ་བྱས་རྐྱེན་རྒྱ་གཞུང་གིས་འཛིན་བཟུང་གིས་ལོ་ ༣ གྱི་དུས་བཀག་བཙོན་འཇུག་གི་ཁྲིམས་ཆད་ཁུར་ཏེ་ཉེ་ཆར་བཙོན་གྲོལ་ཐོབ་ཡོད། ད་ཆར་རྒྱ་གཞུང་གིས་ཁམས་དཀར་མཛེས་རྫོང་ཁོངས་ཀྱི་ཡུལ་དགོན་གཉིས་ལ་དམ་དྲག་ཤུགས་ཆེན་བྱེད་བཞིན་ཡོད་འདུག
སེར་བྱེས་ཏྲེ་གྲྭ་དཀར་མཛེས་པདྨ་ཚེ་དབང་ལགས་ཀྱིས་གནས་ཚུལ་བཏང་འབྱོར་བྱུང་།
ཁྱེད་ཚོ་ལ་ཁ་ཞེ་གཉིས་མེད་ཀྱི་གདུང་སེམས་མཉམ་བསྐྱེད་མུ་མཐུད་ཡོད།
དཔའ་རྒོད་ཚོ། མུ་མཐུད་དུ་་་་་་་་་་་་་་་། རང་དབང་དང་མང་གཙོ་འདིའི་ཆེད།