དམར་ཤོག་རྩ་རྫོགས་ཅོང་བརྡ།

ཕྱི་ཚེས་ ༡༡ ཉིན་རྒྱ་ནག་མི་དམངས་ཉིན་རེའི་དྲ་བའི་སྟེང་གནས་ཚུལ་སྤེལ་བའི་ནང་། ཐེན་ཅིན་གྲོང་ཁྱེར་སྲིད་གཞུང་སྒོ་འགྲམ་དུ་བྱུང་བའི་འགས་གཏོར་དོན་རྐྱེན་ཁྲོད་མི་གཉིས་ལ་རྨས་སྐྱོན་ཕོགས་ཡོད་པ་དང་། འགས་གཏོར་བྱེད་མཁན་གྱི་མི་དེ་ནི་ཐེན་ཅིན་གྲོང་ཁྱེར་གྱི་ཡུལ་མི་ཞིག་ཡིན་པ་དང་། ཁོ་རང་དུས་ཐོག་འཇུ་བཟུང་བྱས་ཡོད་པར་མ་ཟད། ཁོས་འགས་གཏོར་དོན་རྐྱེན་བཟོ་དོན་ནི་རྒྱན་སྐུགས་ཀྱི་ནག་ཉེས་བྱ་སྤྱོད་སྤེལ་ཏེ་ཕམ་ཉེས་བྱུང་བའི་དབང་གིས་སྤྱི་ཚོགས་ལ་འཁོན་སེམས་སློག་ཆེད་ཡིན་སྐོར་བརྗོད་ཡོད་པ་རེད།

ཡིན་ནའང་། ཕྱི་ཚེས་ ༩ ཉིན་མིང་ལ་ལིག་ཁྲང་ཧེ་ཟེར་བའི་ཐེན་ཅན་གྲོང་ཁྱེར་གྱི་ཡུལ་མི་ཞིག་གིས། ༼ངས་དམར་ཤོག་པ་རྩ་རྫོགས་ཀྱི་ཅོང་བརྡ་དཀྲོལ་རྒྱུ་ཡིན༽ ཅེས་པའི་རྩོམ་ཡིག་ཅིག ༼རྒྱ་ནག་ལ་ལྟ་བ༽ཞེས་པའི་རྒྱ་ཡིག་གི་གསར་འགྱུར་དྲ་བའི་སྟེང་སྐུར་ཡོད་པ་དང་། རྩོམ་ཡིག་ནང་ཁོས་ལས་འགུལ་དེ་བརྩམས་པའི་རྗེས་སུ་རྩོམ་ཡིག་དེ་སྤྱི་བསྒྲགས་ཡོང་བའི་འབོད་སྐུལ་དང་། ཁོས་རྒྱ་ནག་དམར་ཤོག་པར་འཁོན་ལན་སློག་དགོས་དོན་ནི། རྐྱེན་འདས་སུ་གྱུར་ཟིན་པའི་རང་ཉིད་ཀྱི་བུ་མོ་དང་ཁྱིམ་ཚང་གི་དབུལ་ཕོངས་དཀའ་སྡུག་མ་བཟོད་པའི་རྐྱེན་གྱིས་ཡིན་པ་དང་།  གལ་སྲིད་ཁོ་ལ་དཔལ་འབྱོར་གྱི་མཐུན་རྐྱེན་འདང་ངེས་ཤིག་ཡོད་ཚེ། ཆེད་དམིགས་རྒྱ་ནག་དམར་ཤོག་པ་རྩ་མེད་གཏོང་བའི་སྟོབས་ཤུགས་ཅན་གྱི་རྩ་འཛུགས་ཤིག་བཙུགས་ཏེ། གོ་སྐབས་དང་བསྟུན་ནས་འཛམ་གླིང་སྟེང་ཆེས་གདུག་རྩུབ་ཅན་གྱི་དམར་ཤོག་ཚོགས་པ་འདི་རྩ་མེད་དུ་གཏོང་རྒྱུ་ཡིན་སྐོར་བརྗོད་ཡོད་པ་རེད། རྩོམ་ཡིག་དེ་ནི་ཕྱི་ཟླ་ ༥ པའི་ཚེས་ ༢༧ བྲིས་པ་ཞིག་ཡིན་པ་དང་། ཕྱི་ཟླ་ ༦ པའི་ཚེས་ ༩ ཉིན་༼རྒྱ་ནག་ལ་ལྟ་བ༽ ཞེས་པའི་དྲ་ཚིགས་སྟེང་སྐུར་ཡོད་པ་དང་། ཕྱི་ཚེས་ ༡༠ ཉིན་རྒྱ་ནག་ཐེན་ཅིན་གྲོང་ཁྱེར་དུ་འགས་གཏོར་དོན་རྐྱེན་དེ་བྱུང་ཡོད་འདུག

འདས་མ་ཐག་པའི་ཕྱི་ཟླ་ ༥ ཚེས་ ༢༦ ཉིན་རྒྱ་ནག་ཅང་ཞི་ཞིང་ཆེན་ཧྥུའུ་གྲོང་དུའང་། ས་གནས་ཁྱེར་གྱི་སྲིད་གཞུང་ལས་ཁུངས་ཁག་ལ་བསྟུད་མར་གཏོར་རྒོལ་གྱི་དོན་རྐྱེན་བྱུང་ཡོད་པ་རེད།  སྤྱི་ཚོགས་དཔྱད་བརྗོད་པ་དག་གིས་ཉེ་ལམ་རྒྱ་ནག་ནང་སྲིད་གཞུང་ལ་གཏོར་རྒོལ་བྱེད་པའི་དོན་རྐྱེན་འབྱུང་བཞིན་པ་དེ་ནི།  མང་ཚོགས་འུ་ཐུག་སྟེ་དྲག་གནོན་ལ་དྲག་པོས་གདོང་ལེན་བྱ་རྒྱུའི་མགོ་བརྩམས་པ་ཞིག་ཡིན་པར་ངོས་འཛིན་བྱ་བཞིན་ཡོད་འདུག

གསར་འགོད་པ། ཚེ་རིང་རྒྱལ།