གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཉེར་བདུན།

 ཉེར་བདུན།

གཟའ་པ་སངས་ནམ་རྒྱུན་ལྟར། ང་རང་ཞོགས་ཉལ་ཞིག་རྒྱགས་ཁུལ་བྱེད་ཀྱི་ཡོད་ལ། མཛའ་མོའི་མ་རྒན་ཡང་རྒྱུན་ལྡན་ལྟར་ཆུ་རྐྱལ་ཁང་དུ་བུད་འགྲོ མཛའ་མོ་ཡང་མང་ཤོས་སུ་བུ་མོ་ཁྲིད་ནས་ཁྲོམ་རྭ་ཆེན་མོར་ཅ་དངོས་ཙག་ཙག་རེ་ཉོ་རུ་འགྲོ་ངེས་ཡིན། དེ་རིང་ཡང་ང་རང་ཁོང་ཚོ་ཕྱི་ལ་སོང་མ་ཐག མགྱོགས་པོ་ཉལ་ས་ནས་ཡར་བླངས་པ་དང་བསྟུན། ཁ་ངོ་གཙང་མ་ཞིག་དཀྲུས། དེ་ནས་ཡུན་རིང་མཆོད་པ་མ་གཤམས་པའི་དཀར་ཡོལ་ཆུང་ཆུང་བདུན་ཚར་དེ་གཙང་མ་ཞིག་དཀྲུས། མཆོད་པ་ཞིག་གཤམས། པོ་ཏྰ་ལ་རྟགས་ཅན་གྱི་སྤོས་རྐང་ཐུར་གཅིག་མེ་རུ་སྒྲོན། དེ་ནས་འོག་ཁང་དུ་ཡོང་ནས་གཟའ་པ་སངས་ཀྱི་ནང་ལས་ནང་ཚང་མ་ལ་གཙང་གྲྭ་བཟོ་བའི་ལས་སུ་ཞུགས།

ཆུ་ཚོད་གཅིག་དང་ཕྱེད་ལྷག་རིང་དུ་ནང་ཚང་མ་གཙང་མ་བཟོས་ཚར་བ་དང་ཤིང་ཏོག་ཁུ་ཞིག་ལག་དུ་བཟུང་ནས་ཁྱམས་རར་སོང་ནས་ཐ་མག་ཞིག་འཐེན་ཞོར་དུ། རང་ཉིད་ཀྱི་མདུན་དུ་ཡོད་པའི་ཐར་མ་མཚོའི་རྩེད་ཆས་ཀྱི་རིགས་དེ་དག་ལ་བལྟ་ཞོར། སེམས་སུ་དངོས་ནས་མཛའ་མོའི་མ་རྒན་འདི་བཟང་གི་མ་གཏོགས། དུས་རྒྱུན་དུ་རྩེད་ཆས་ཀྱི་རིགས་ཆེས་མི་ཉུང་བ་ཞིག་ག་ས་གར་དུ་གཡུགས། དེ་དག་ཕྱིར་བསྡུ་ཡང་མི་བྱེད་པར་གཡུགས་ནས་བཞག་འདུག་པ་དེ་ཙམ་གྱིས་མོ་རང་ལ་སུན་པོ་ག་ཚོད་ཅིག་བཟོ་ཡི་མེད་ངེས་ཡིན་སྙམ་སོང་། ངས་མཚམས་རེར་རྩེད་ཆས་ཀྱི་རིགས་འདྲ་མིན་དེ་དག་གང་དུ་ཡོད་པ་དེ་དག་སྒུམ་ནས་རྩེད་ཁང་ནང་དུ་འཇོག་གི་ཡོད་ཀྱང་། མཛའ་མོ་དང་མོ་རང་གི་མ་རྒན་གཉིས་ཀྱིས་ཚུར་བླངས་ནས་མོ་རང་ལ་རྩེད་རོགས་མང་ཤོས་བྱེད་ཀྱི་ཡོད་པ་ཡིན།

མཛའ་མོ་མོ་རང་ད་ལྟའི་འཆར་འགུལ་བསྐྱོད་མང་བོ་བྱེད་པར་དཀའ་ངལ་ཏན་ཏན་འཕྲད་ཀྱི་ཡོད་ན་ཡང་། མོ་རང་ནི་དངོས་ནས་ལས་ཀ་ཚང་མ་དལ་མོར་བྱེད་པར་དགའ་བའི་རིགས་དེ་ཡིན་ལ། ཞེ་དྲགས་དོ་སྣང་ཡང་མི་བྱེད་པར་འཇོག་པའི་གོམ་གཤིས་ཤིག་ཡོད། མཚམས་རེར་ངས་ཅ་དངོས་ཁ་ཤས་རེ་ཡར་འཇོག་མར་འཇོག་བྱེད་ངེས་བཤད་ན། མོ་རང་གིས་དེ་དག་ནི་ང་རང་གིས་འཇོག་ས་གང་ཡིན་མི་ཤེས་པར། རྗེས་སུ་དགོས་དུས་མོ་རང་གི་བཙལ་ན་རྙེད་ཀི་མ་རེད་ཟེར་གྱི་ཡོད། དེ་ཡང་བདེན་པ་ཡིན། དཔེར་ན། བུ་མོའི་གོན་པ་ཚང་མ་ནམ་རྒྱུན་དུ་མོ་རང་གིས་གོ་རིམ་བསྒྲིགས་ནས་བཞག་ཡོད་དུས། མཚམས་རེར་ང་རང་སོང་ནས་མོ་རང་ལ་གོན་པ་ཞིག་བརྗེ་བོ་རྒྱགས་རྒྱུར་ལེན་དུ་སོང་ན། ལས་སླ་བོ་རྙེད་ཐུབ་ཀྱི་མེད་པ་ཡིན། གཅིག་ནས་བུ་མོ་གོན་པ་མང་དྲགས་པ་དང་གཉིས་ནས་མཛའ་མོའི་གོ་རིམ་ལྡན་པའི་ངང་དུ་བསྒྲིགས་ནས་བཞག་ཡོད་པས་ཡིན།

ནང་ནས་གོན་པ་མང་ཆེ་ཤོས་ཤིག་མོ་རང་གི་དཀྲུས་སྒམ་དུ་འཇོག་པ་ཡིན་ལ། མཚམས་རེར་མོ་རང་གི་མ་རྒན་གྱིས་ཀྱང་དཀྲུ་བཞིན་ཡོད། ང་རང་གིས་དཀྲུས་སྒམ་ནང་དུ་འཇོག་པ་དེ་མི་ཤེས་པ་མེད་ཀྱང་། དཀྲུས་སྒམ་ནང་དུ་འཇོག་པ་ལ་ཡང་གོན་པ་དེ་དག་གོ་རིམ་ཡོད་པ་ཡིན། ཚོན་འདྲ་མིན་མི་བསྲེས་པ་དང་། དོར་ཐུང་དང་ནུ་ཁེབ། རྐང་ཤུབ་སོགས་མི་བསྲེས་པ་ཡིན། འདི་འདྲའི་ཁྱད་པར་དབྱེ་བ་ཕྱེ་ནས་ལས་ཀ་བྱེད་པར་མཛའ་མོ་མོ་རང་གོམ་ནས་ཡོད། དཀྲུས་སྒམ་ནས་དཀྲུས་ཚར་བ་དང་ང་རང་གིས་ཕྱི་ལ་སྐམ་རོགས་བྱེད་ཀྱི་ཡོད་ལ། མང་ཤོས་སུ་མོ་དང་མོ་རང་གི་ཨ་མས་བྱེད་ཀྱི་ཡོད།

ཁ་སང་དེ་རིང་ནང་དུ་སེམས་ཁྲལ་ཞིག་ཡོད་པ་དེ་ནི། ང་ཚོ་རྒྱུན་ལྡན་ལྟར་འཚོ་བ་རོལ་བཞིན་ཡོད་ལ། ཕན་ཚུན་མཐུན་ཞིང་། ཟས་གང་བཟང་དང་གང་ཡག་ཟོས་ནས་སྔར་བཞིན་ཡོད་ཀྱང་། མཛའ་མོའི་མ་རྒན་ལ་ཁྲག་ཤེད་མཐོ་བའི་རྟགས་མཚན་དེ་ནི་སྡུག་དུ་སོང་བ་དེ་ནི་ང་ཚོ་ཚང་མས་སེམས་ཁྲལ་བྱེད་ས་ཞིག་ཆགས་ཡོད། མཛའ་མོའི་མ་རྒན་ནི་བུད་མེད་ཟས་འདྲ་མིན་ཟ་བར་དགའ་བའི་རིགས་སུ་གཏོགས་པ་དེ་ཡིན་དུས། ཁ་འཛེམ་པར་དཀའ་ངལ་འཕྲད་ཀྱི་ཡོད། དེ་ཡང་མོ་རང་གི་མ་རྒན་གྱི་ནད་ཚ་སྡུག་དུ་འགྲོ་བའི་རྒྱུ་རྐྱེན་ཞིག་ཆགས་ཀྱི་ཡོད་པ་ཡིན།

ཁོང་ཚོའི་མི་རྒྱུད་ནས་བཤད་པ་ཡིན་ན། མོ་རང་གི་ཨ་མའི་ཕ་རྒན་ནི་ཁྲག་ཤེད་ཀྱི་ནད་ལ་བསྟེན་ནས་ལོ་ན་དྲུག་བཅུའི་ནང་དུ་གྲོངས་འདུག ཡིན་ཡང་། མོ་རང་གི་ཨ་མ་ཡི་མ་རྒན་ནི་ད་ལྟ་ཡང་གཟུགས་གཞི་བདེ་ཐང་ཡིན་ལ། ད་ལོ་ལོ་གྱ་བཅུ་གྱ་དགུ་རེད། ཉེ་དུས་རང་ང་ཚོས་མོ་རང་གི་སྐྱེ་སྐར་ཐེངས་ཁ་ཤས་ཤིག་ལ་ནང་མི་ཚོ་དང་ལྷན་དུ་བཏང་བ་རེད། སྐྱེ་སྐར་ནི་ཉིན་གཅིག་ཡིན་ཡང་། ནང་མི་ཚང་མ་ལྷན་འདུས་ཀྱི་དཀའ་ངལ་བྱུང་གི་ཡོད་དུས། མི་ཚང་རེ་ནས་རེ་རེ་བཏང་བ་དེ་ཡིས་ཐེངས་ཁ་ཤས་ཤིག་ལ་བཏང་བ་རེད། ང་རང་རྒྱལ་ཁབ་འདིར་སླེབས་དུས་སུ། ཨ་མ་ལོ་ལོན་དེ་མོ་རང་ཁང་བ་ཞིག་གི་ནང་དུ་ཁེར་རྐྱང་གི་འཚོ་བ་རོལ་བཞིན་ཡོད་པ་དེ་མཐོང་ཐེངས་རེར། དངོས་ནས་སེམས་ལ་སྐྱོ་སྣང་རེ་བྱུང་། རང་གི་བུ་ཕྲུག་ཉེ་འགྲམ་དུ་ཡོད་བཞིན་དུ། རྒས་པའི་སྡུག་བསྔལ་གྱི་ཁྲོད་ནས་རང་གི་བུ་ཕྲུག་དང་ལྷན་དུ་བསྡོད་མི་ཐུབ་པ་དང་བུ་ཕྲུག་གིས་ཀྱང་རང་གི་ཨ་མ་རང་གི་ནང་དུ་བསུས་ནས་བདག་སྐྱོང་བྱེད་ཐུབ་ན་ཅི་མ་རུང་སྙམ་ན་ཡང་། ང་རང་གིས་ཁོང་ཚོའི་གོམ་གཤིས་འདི་ལ་འགྱུར་བ་ཞིག་གང་ནས་བྱེད་ཐུབ། མི་ཐུབ་པ་ཡིན།

ལོ་ན་གྱ་དགུ་ལ་སོན་པའི་ཨ་མ་རྒན་མོ་ཁོང་ལ། ཉེ་དུས་སུ་ཞབས་ཞུ་བྱེད་མཁན་གྱི་བུད་མེད་ཅིག་བཞག་ཡོད་ཀྱང་། མོ་རང་ག་དུས་ཡིན་ཡང་རང་གི་བུ་མོའི་ནང་དུ་ཡོང་ཐེངས་རེར། བུ་མོའི་བཟོས་པའི་བྱ་ཁུ་དེ་ནི་སུས་ཀྱང་བཟོ་མི་ཤེས་པ་དེ་ནི་དངོས་ནས་ཡག་པོ་ཡོད་རབས་བཤད་ཀྱི་ཡོད། མོ་རང་གི་འདོད་བློ་ནི་ཚེ་མཇུག་དུ་རང་གི་བུ་མོའི་མཉམ་དུ་བསྡོད་འདོད་ཀྱི་མདུན་པ་ཆེ་ན་ཡང་། ང་རང་གི་མཛའ་མོའི་མ་རྒན་གྱིས་དེ་ལྟར་བསམ་གྱི་མེད། གཟའ་འཁོར་རེ་ཡི་ནང་དུ་ཐེངས་གཅིག་གཉིས་ཤིག་རིག་ན་འགྲིག་གི་ཡོད་པར་བཤད་ཀྱི་ཡོད། འདི་ནི་བོད་མི་དང་ཕྱི་རྒྱལ་བའི་རང་གི་ཕ་མ་ལ་ཞབས་ཞུ་བྱེད་སྟངས་ཀྱི་ཁྱད་པར་ཞིག་ཀྱང་རེད་ལ། དངོས་ནས་རྒས་དུས་སུ་རང་གི་ལག་པར་ཇ་ཚ་བོ་བཀང་རེ་ཡང་ཉིན་ལྟར་འཇོག་མི་ཐུབ་པའི་བུ་ཕྲུག་དེ་དག་ནི་དངོས་ནས་རང་གི་བུ་ཕྲུག་ཡིན་མིན་གྱི་ཁྱད་པར་གང་འདུག་སྙམ་དུས། རང་གིས་ཀྱང་ཐག་རིང་དུ་ཡོད་པའི་རང་གི་ཕ་མ་གཉིས་བསམ་ན་སེམས་པ་སྐྱོ་སྣང་རེ་རྟག་དུ་ཡོང་གི་ཡོད།

མུ་འགོད།