བོད་རྒྱ་འབྲེལ་མོལ་འཇའ་ལྟར་ཡལ་བཞིན་འདུག

འདྲེ་མགོ་རྡོ།

བོད་རྒྱ་ཞི་མོལ་ཞེས་པའི་སྐད་ཆ་འདིར་འཁྱུག་ལྟ་ཙམ་ཞུས་ན། དེ་ནི་ལོ་རབས་བདུན་བཅུའི་ནང་དངོས་ཡོད་དུ་གྱུར་འགོ་ཚུགས་ཤིང་། བརྒྱུད་ལམ་རིགས་འདྲ་མིན་གྱིས་ཏིན་རྒྱལ་གཉིས་ཀྱི་སྐད་ཆའི་འཕྲོ་མཐུད་བྱས་ཡོད་པས་ཟམ་གདོང་གཞུང་གི་འབྲེལ་མོལ་དུས་ཡུན་ལས་སྐུ་ཞབས་རྒྱལ་དོན་གྱི་ཞི་མོལ་ལ་ལོ་ངོ་མང་པོ་འགོར་ཡོད་པ་རེད། ཡིན་ནའང་། སྐུ་ཞབས་རྒྱལ་དོན་གྱིས་མཐའ་མར་ཨེ་ཤ་ཡ་རང་དབང་རླུང་འཕྲིན་བརྒྱུད་ལམ་ནས་འདར་འདར་ཆེ་བའི་སྐད་ཀྱིས་འགན་ཁུར་ཐབས་བྲལ་བའི་གནས་ཚུལ་ཁྱབ་བསྒྲགས་བྱས་ཤིང་། ༧ཏཱ་ལའི་བླ་མར་མཚན་སྨད་ཞུས་རབས་ཤིག་ལ་ཧང་སང་མདོག་གིས་ཞི་མོལ་གྱི་ནང་དོན་སྦུག་སྦུག་ངང་འཇོག་མ་ཐུབ་ཚུལ་གནང་བ་ནི། དོན་དངོས་བྱས་ན། ཞི་མོལ་གྱི་རིམ་པ་དེའི་སྟེང་ནས་ཡོངས་སུ་རེ་མེད་དུ་གྱུར་ཚུལ་བསྟན་པ་རེད། སྐབས་དེར་ཁོང་གིས་གསར་ཁང་ཁ་ཤས་ལ་རྒྱ་ནག་གཞུང་ལ་ཡིད་ཆེས་མེད་ཚུལ་དངོས་སུ་གསུངས་དགོས་བྱུང་ཡོད། བྱུང་རིམ་འདི་ཁོང་སྒེར་གྱི་ཆབ་སྲིད་ཆོད་སེམས་ལས་སྐྱེས་མིན་ཁ་ཚོན་མི་ཆོད་ཀྱང་། ཞི་མོལ་གྱི་དུས་རིམ་དེ་༧ཏཱ་ལའི་བླ་མའི་ཕྱོགས་ཡོངས་སུ་ཕམ་ཉེས་ཕྱིན་པ་གསལ་བོར་བསྟན་ཡོད་པ་རེད། འོན་ཏེ། ཆབ་སྲིད་དཔྱད་རྗོད་པ་ཁ་ཤས་ཀྱིས་དུས་རིམ་འདིར་རྒྱལ་སྤྱིའི་བོད་དོན་ལ་ཞི་མོལ་དང་འབྲེལ་ཏེ་འཕེལ་རྒྱས་ཕྱིན་ཚུལ་ཕྱོགས་སྡོམ་གནང་ཡོད་ཀྱང་། དོན་དངོས་བོད་ནང་གི་གནས་སྟངས་ལ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད།

ཟམ་གདོང་གཞུང་གི་དུས་སྐབས་ནི་ཉེ་བའི་སྟོང་ལོ་གསར་ཚེས་ཀྱི་སྐབས་ཏག་ཏག་ཏུ་འཁེལ་ཡོད་ལ། བཙུན་པ་ཟམ་གདོང་ལ་མཚོན་ན་ཞི་མོལ་གྱི་བྱུང་རིམ་ཧྲིལ་བོར་རྒྱུས་ཡོད་ཡིན་ཡང་། མི་རྣམས་ཀྱིས་དེ་ལ་དཔྱད་པ་བྱེད་བཞིན་པ་ཞིག་ནི། ” ཉ་མོ་མ་ཟིན་པ་མ་གཏོགས།། མཚོ་མཐའ་མ་བསྐོར་བ་མ་རེད།། “ཅེས་པའི་ཁོང་གི་རྒྱ་ནག་ཕྱོགས་ཀྱི་ཤེས་ཚད་ཐད་ནས་རེད་ལ། གཏམ་དཔེ་འདི་ནི་ཁོང་གི་ཞལ་གསོན་པོའི་ཚིག་དྲོན་མོ་རེད། མཚོ་མཐའ་བསྐོར་མིན་ནི་བྱུང་རིམ་ཞིག་གི་ངོས་ནས་གླེང་སྟེ་ཉ་མོ་ཟིན་མིན་གྱི་ཐབས་ཇུས་མེད་པ་དེས། བཙུན་པ་ཟམ་གདོང་གི་རྒྱ་ནག་ཕྱོགས་ཀྱི་ཤེས་ཚད་ཐད་ལ་དོགས་འདྲི་ཡོད་པ་ནི་དེ་གར་གནས་ཡོད།

ཡིན་ནའང་། ཞི་མོལ་གྱི་མིང་འགྱུར་འགོ་ཚུགས་པ་ནས་འབྲེལ་མོལ་གྱི་དུས་སྐབས་ཧྲིལ་བོ་ནི་བརྒྱུད་ལམ་གཅིག་དང་། ཞི་མོལ་ཚོགས་ཆུང་ཅན་གྱི་ངོ་བོར་འཕོས་པས་ཕྱི་ཚུལ་ནི་གཟབ་མནན་ཅན་དང་རེ་བ་ཅན་ཞིག་ཏུ་མཐོང་མཁན་བྱུང་ཡོད། ཟམ་གདོང་གཞུང་གི་ལོ་ངོ་བཅུ་ནི་རྒྱ་ནག་དང་འབྲེལ་ཐུག་ཐེངས་མང་བྱས་པའི་གྲས་སུ་སླེབས་ཡོད་ཀྱང་། ཆབ་སྲིད་ཁྱབ་ཁོངས་ནས་བཤད་ན་ཞི་མོལ་ལ་མིང་བསྒྱུར་བྱས་པ་ནས་རང་སྐྱོང་བསམ་འཆར་སྤྲད་པའི་ལས་དོན་ཡོངས་རྫོགས་ནང་། འབྲེལ་མོལ་གྱི་འདུན་པ་༧ཏཱ་ལའི་བླ་མའི་ལྡོག་ཏུ་མེད་པའི་བཀའ་དགོངས་ཡིན་ཤུགས་ལས། ཟམ་གདོང་དང་རྒྱ་རི་བློ་རྒྱན་གཉིས་ཀས་སྒེར་གྱི་བསམ་ཚུལ་དང་རེ་བ་སྦུག་སྦུག་རབ་རིབ་ཀྱིས་བཞག ད་དུང་ཡོད། རྒྱ་རི་བློ་རྒྱམ་ལ་མཚོན་ན་ལས་དོན་ག་རེ་ཡིན་ཡང་དོན་འབྲས་ཡོད་མེད་ལ་མ་ལྟོས་པར་༧ཏཱ་ལའི་བླ་མའི་བཀའ་ལུང་གལ་ཆེ་ཡིན་ཚུལ་གསལ་བཤད་བྱས་ཡོད་ལ། གལ་སྲིད་༧ཏཱ་ལའི་བླ་མའི་དབུ་ཁྲིད་མེད་པ་ཡིན་ན་ཁོང་གིས་ཕྱག་ལས་གནང་འདོད་མེད་པའི་འདོད་ཚུལ་གསལ་བོར་བསྟན་ཡོད། གནད་དོན་འདིས་སྐུ་ཚབ་རྒྱ་རིས་༧ཏཱ་ལའི་བླ་མའི་བློ་ངོར་ཡོད་པའི་བོད་དེ་གང་དུ་བོར་མིན་ལ་མི་རྣམས་ཀྱིས་དོགས་པ་བྱེད་ཀྱི་ཡོད་ལ། བོད་མེད་ས་ཞིག་དང་བོད་གལ་ཆུང་ཡིན་ས་ཞིག་ཏུ་༧ཏཱ་ལའི་བླ་མ་དེ་བས་ཀྱང་མེད་པ་དང་གལ་ཆུང་ཡིན་པས་རྒྱུ་མཚན་ཁོང་གིས་ཤེས་བཞིན་དང་ལེན་མ་ཞུས་པ་ནི་མི་རྣམས་ལ་དོགས་པའི་ངོ་བོར་བསྡད་ཡོད། ད་དུང་ཞོར་འཕྲོས་ཤིག་ལ། རྒྱ་རི་བློ་རྒྱམ་བཀའ་ཁྲིར་མི་ལངས་པའི་ཁྱབ་བསྒྲགས་སྤེལ་བ་དེས། ཁོང་གིས་གནང་འདོད་པའི་ཕྱག་ལས་ཀྱི་ངོ་བོ་ཡང་མི་རྣམས་ལ་ཤེས་སུ་བཅུག་ཡོད།

གོང་དུ་བཤད་པའི་སྒེར་གྱི་ཆོད་སེམས་དེ་དག་ནི་རྩོམ་འདིའི་གླེང་གཞི་ཞི་མོལ་བྱེད་པོ་དག་གི་མཁྱེན་རྒྱ་དང་སྒེར་གཤིས་ཡིན་སྟབས། རིམ་པ་འདིའི་སྟེང་ནས་ཞི་མོལ་ལ་ལྟ་དགོས་ཚེ་ད་དུང་ང་ཚོར་ཞིབ་འཇུག་བྱ་ཡུལ་མང་པོ་ཞིག་ལྷག་བསྡད་ཡོད་པར་འདོད།

སྐུ་ཞབས་རྒྱལ་དོན་གྱི་དུས་རིམ་དང་སྐུ་ཞབས་བློ་རྒྱམ་གྱི་དུས་རིམ་གཉིས་ནི་ཞི་མོལ་ནས་འབྲེལ་མོལ་ལ་འཕོས་པའི་དུས་རིམ་ཡིན་ཞེས་ན་རིག་པས་མི་གནོད་ལ། དུས་རིམ་འདི་གཉིས་ལ་ང་ཚོས་ཞིབ་ལྟ་ཞིག་བྱས་པ་ཡིན་ན་༧ཏཱ་ལའི་བླ་མ་མཆོག་ནི་རྒྱ་གཞུང་ལ་སྐད་ཆ་བཤད་རྒྱུའི་རེ་འདུན་ལྡོག་མེད་ཡོད་མཁན་དེ་ཡིན་པར་ཞི་མོལ་ལས་དོན་པ་ཆེ་ཕྲ་ཚང་མས་མགྲིན་གཅིག་ཏུ་སྐྱོར་ཡོད་མོད། ད་བར་ང་ཚོས་དོགས་པ་བྱས་མེད་པ་ཞིག་དང་། དྲི་བ་བཏང་མེད་པ་ཞིག་ནི་༧ཏཱ་ལའི་བླ་མ་དང་། ཁོང་གི་སྐུ་ཚབ། དེ་བཞིན་ཞི་མོལ་ཚོགས་ཆུང་གི་བསམ་ཚུལ་ལ་ཁྱད་པར་ཡོད་མེད་ཐད་རེད་ལ། ཁོང་ཚོས་རྒྱ་གཞུང་ལ་རེ་བ་མཐོང་གི་མེད་ན་འདི་ལྟར་འབྲེལ་མོལ་ལ་འགྱུར་བ་མེད་པའི་སྲིད་བྱུས་འཛིན་དགོས་དོན་ག་རེ་ཡིན་ནམ། ༧ཏཱ་ལའི་བླ་མས་ལོ་ཁ་ཤས་ཀྱི་སྔོན་ནས་ཁོང་ཉིད་རྒྱ་ནག་གཞུང་ལ་ཡིད་ཆེས་སྲབ་ཏུ་ཕྱིན་ཚུལ་གསུངས་ཡོད་ལ། རྒྱ་ནག་གཞུང་ཡང་༧ཏཱ་ལའི་བླ་མའི་སྐད་ཆར་ཡིད་ཆེས་མེད་པ་དེ་རིང་སྐུ་ཚབ་སྐལ་བཟང་རྒྱལ་མཚན་གྱིས་གསལ་བཤད་བྱས་ཡོད།

མཚམས་འདིར་ངས་དྲི་བ་ཞིག་འདྲི་འདོད་དེ་ཟམ་གདོང་གཞུང་དང་དམིགས་བསལ་སྐུ་ཚབ་རྣམ་གཉིས་རྒྱ་ནག་གཞུང་ལ་ཡིད་ཆེས་སྲབ་ཏུ་ཕྱིན་ཡོད་མེད་དང་། མཁྱེན་རླབས་མཚུངས་མེད་༧ཏཱ་ལའི་བླ་མ་མཆོག་གིས་ཀྱང་ཡིད་ཆེས་སྲབ་ཏུ་ཕྱིན་ཡོད་པའི་རྒྱ་ནག་གཞུང་དང་མཉམ་ཏུ་འབྲེལ་མོལ་བྱེད་རྒྱུའི་ཡིད་ཆེས་ཤིག་ཇི་ལྟར་རྙེད་ཀྱི་ཡོད་དམ། ཅེས་པ་འདི་ཡིན།

གཤམ་ཏུ་ཁ་སྣོན་ཞིག་ལ་དེ་རིང་བོད་གཞུང་དྲ་རྒྱ་ནས་སྐུ་ཚབ་སྐལ་བཟང་རྒྱལ་མཚན་གྱི་གསལ་བཤད་ཅིག་འདིར་དྲངས་ཡོད།

” ངའི་བསམ་པར་རྒྱ་ནག་གཞུང་ཕྱོགས་ནས་ད་ལྟ་རྒྱ་བོད་གཉིས་ཀྱི་འབྲེལ་ལམ་ཐོག་ནས་བོད་ཀྱི་དཀའ་རྙོག་སེལ་ཐབས་དང་། རྒྱ་བོད་གཉིས་ཀྱི་ལངས་ཕྱོགས་དེ་འགལ་ཟླ་ཆུང་དུ་འགྲོ་རྒྱུའི་གོམ་པ་མདུན་སྤོས་མ་ཐུབ་པའི་གནད་དོན་མང་དག་ཅིག་ཡོད་པ་རེད་བསམ་གྱི་ཡོད། འོན་ཀྱང་གནད་འགག་གཙོ་བོ་དེ་རྒྱ་ནག་གཞུང་གི་འགོ་ཁྲིད་རྣམས་ལ་བོད་ཀྱི་དཀའ་རྙོག་སེལ་རྒྱུའི་སྙིང་སྟོབས་དང་ཆོད་སེམས་མི་འདུག

དེ་དག་མེད་པའི་རྐྱེན་ནི་དོགས་པ་རྣམ་རྟོག་མང་པོ་ཞིག་ཡོང་གི་ཡོད་པ་རེད་བསམ་གྱི་ཡོད། ཕྱོགས་གཅིག་ནས་རྒྱ་ནག་གཞུང་གིས་ཡོངས་གྲགས་ཐོག་ངོས་ལེན་བྱས་རུང་མ་བྱས་རུང་། གནས་ཚུལ་གསལ་པོ་ཞིག་གང་རེད་དམ་ཞེ་ན། རྒྱ་ནག་གཞུང་ནས་བཅིངས་འགྲོལ་ལ་ཁ་གཡར་ནས་བོད་ལ་དྲག་པོའི་དམག་དཔུང་བེད་སྤྱོད་བཏང་སྟེ་བཙན་འཛུལ་བྱས་པ་ཞིག་རེད། དུས་དེ་ནས་བཟུང་ད་ལྟ་བར་དུ་འཛིན་པའི་སྲིད་བྱུས་དེར་གུ་བཤངས་མ་བྱས་པར་གནས་ཡོད། ༧གོང་ས་༧སྐྱབས་མགོན་ཆེན་པོ་མཆོག་གིས་ང་ཚོའི་ངོས་ནས་རང་བཙན་རྩོད་ཀྱི་མེད་ལ་ཁ་བྲལ་བྱེད་ཀྱི་མེད། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་གཉིས་ཀར་ཕན་ཐོགས་ཡོད་པའི་ལམ་ནས། བོད་ཀྱི་དཀའ་རྙོག་སེལ་རྒྱུའི་ཐག་གཅོད་གཙང་མ་བྱས་ཡོད་ཅེས་བཀའ་སློབ་རབས་དང་རིམ་པ་ཕེབས་པ་དེར་ད་ལྟ་ཡིན་ནའང་རྒྱ་ནག་གཞུང་གི་མགོ་ཁྲིད་རྣམས་ནས་དོགས་པ་རྣམ་རྟོག་ཆེ་དྲགས་པའི་དབང་གིས་མགོན་པོ་གང་ཉིད་མཆོག་གི་བཀའ་སློབ་ལ་ཡིད་ཆེས་བྱེད་ཀྱི་མི་འདུག་” ཅེས་གསུངས་ཡོད།