བདེན་སྐྱོབས། དབུལ་སྐྱོངས།

ཁ་སང་ཕྱི་ཚེས་ ༦ ཉིན་གྱི་དགུང་དྲོ་དབུས་གཞོན་ནུའི་རྒྱུན་ལས་ཟུར་པ་ལྷག་པ་ཚེ་རིང་ལགས་ཀྱི་གཙོ་འགན་འོག བོད་གཞུང་ཟློས་གར་ཚོགས་ཁང་དུ་༧གོང་ས་མཆོག་གི་སྐུའི་འཁྲུངས་སྐར་དང་བསྟུན་ཏེ། བོད་ཀྱི་གཏམ་བརྗོད་ཚན་པ་ཞིག་གསར་དུ་དབུ་འབྱེད་དང་མི་མང་ལ་ཐེངས་དང་པོའི་གཏམ་བརྗོད་གཟིགས་འབུལ་ཞུས་སོང་།

སྒྱུ་རྩལ་གཏམ་བརྗོད་ནི་མིའི་རིགས་ཀྱི་དངོས་ཡོད་འཚོ་བའི་འགྲོས་དང་བསྟུན་ནས་མི་རྣམས་ལ་དགེ་འདོན་སྐྱོན་སེལ་དང་། སྤྱི་ཚོགས་བཅོས་སྒྱུར་སོགས་ཀྱི་ཐད་ནུས་པ་བླ་ལྷག་འདོན་པ་དང་། ལྷག་པར་དུ་རྒྱལ་ཁབ་དང་མི་རིགས་རིང་ལུགས་ཀྱི་འཐབ་རྩོད་ཁྲོད་སྐུལ་འདེད་ཀྱི་ནུས་པ་ཆེན་པོ་ཐོན་གྱི་ཡོད་པ་ལྟར། བཙན་བྱོལ་བོད་མིའི་སྤྱི་ཚོགས་ལ་ལྷག་པའི་སྟོང་ཆ་འདི་ཁ་སྐོང་བྱ་ཕྱིར་༼ བདེན་སྐྱོབས་དབུལ་སྐྱོངས༽ ཀྱི་འབོད་སྒྲ་དང་རྩ་འཛིན་འོག ༧གོང་ས་མཆོག་དགུང་གྲངས་ ༧༦ ལ་ཕེབས་པའི་དུས་ཆེན་གྱི་ཉིན་མོ་སྲུང་བརྩི་དང་སྦྲགས། བོད་རིགས་གཞོན་སྐྱེས་ཁག་ཅིག་གིས་གསར་འཛུགས་གནང་བའི་གཏམ་བརྗོད་ཚན་པ་ཞིག་གིས་ཐེངས་དང་པོར་མི་མང་ལ་འཁྲབ་སྟོན་གནང་ཡོད།

ལྷག་པ་ཚེ་རིང་ལགས་ཀྱིས་གཏམ་བརྗོད་ཚན་པ་འདིའི་དམིགས་ཡུལ་སྐོར་བརྗོད་པ་ལྟར་ན། དང་པོ། དེང་དུས་ཀྱི་གཏམ་བརྗོད་འཁྲབ་སྟོན་བརྒྱུད་རྩ་དོན་འཐབ་རྩོད་ཀྱི་སྟོབས་ཤུགས་འཐོར་འདེགས་སླད། སྤྱི་ཚོགས་ཀྱི་ཞན་ཆ་གསལ་འདོན་དང་ལེགས་ཆའི་ཁ་ཕྱོགས་སྟོན་ཐབས་དང་། གཉིས་པ། གཞོན་སྐྱེས་ནང་ཁུལ་གཏམ་བརྗོད་དང་གླེང་མོལ་བརྒྱུད་གསར་གཏོད་དང་ལེགས་བཅོས་ལ་སྐུལ་འདེད་གཏོང་ཐབས། གསུམ་པ། གཏམ་བརྗོད་འབྲི་རྩོམ་དང་འཁྲབ་སྟོན་གྱི་ནུས་པ་ལྡན་པའི་བོད་རིགས་རྣམས་ལ་རང་ནུས་འདོན་སྤེལ་གྱི་སྡིངས་ཆ་བསྐྲུན་རྒྱུ། བཞི་བ། རང་སྐད་དྭངས་མའི་ཁོར་ཡུག་བསྐྲུན་ཐབས་བཅས་ཡིན་སྐོར་བརྗོད་བྱུང་།  

ཐེངས་འདིར་༼ ད་དཔེ་བསགས་སོང་༽ ཞེས་པའི་གཏམ་བརྗོད་ཅིག་འཁྲབ་སྟོན་བྱས་སོང་ལ། འཁྲབ་སྟོན་དེའི་ནང་དེང་སྐབས་བཙན་བྱོལ་སྤྱི་ཚོགས་ནང་གི་མི་མང་པོ་ཞིག་ནུབ་ཕྱོགས་རྒྱལ་ཁབ་ལ་འགྲོ་འདོད་ཀྱི་སྨྱོ་ཧམ་ཁྲོད། ཕྲུ་གུར་སློབ་གསོ་སྤྲོད་སྟངས་ནོར་གྱི་ཡོད་པ་དང་། ཁོང་ཚོའི་འདོད་འདུན་དང་མ་བསྟུན་པར་ཕ་མ་ཚོས་ཁྱིམ་ཚང་གི་དགོས་མཁོ་དང་མཚན་སྙན་གཙོར་བཟུང་གིས་བུ་ཕྲུག་ཚོའི་སློབ་སྦྱོང་གི་ཁ་ཕྱོགས་ལ་སྟངས་འཛིན་བྱེད་པ། དེ་བཞིན་ཁྲིམས་དང་བུ་ཕྲུག་གི་གཉེན་སྒྲིག་རང་དབང་བཅས་ལ་མ་བསྟུན་པར་ཕྱི་རྒྱལ་ཁག་ཏུ་གཏོང་ཐབས་བྱས་ཏེ་མཐར་སྤྲོ་སྐྱིད་ལྡན་པའི་ཁྱིམ་ཚང་དེ་ཁ་འཐོར་དུ་འགྲོ་བཞིན་ཡོད་པ། དེ་བཞིན་ ༼ མང་དུ་མང་དུ་དང་ཉུང་དུ་ཉུང་དུ ༽ ཞེས་པ་དང་༼ དེས་ག་བར་ཚད ༽ ཅེས་པའི་གཏམ་གླེང་གཉིས་དང་། གཞས་སྣ་ཁག་ཅིག་བཅས་འཁྲབ་སྟོན་ཞུས་སོང་།

ལྟད་མོ་བའི་མྱོང་ཚོར་སྐོར་ལ་བུ་ཆུང་བསོད་ནམས་ལགས་ཀྱིས་བརྗོད་དོན། བོད་མི་ཚོ་བཙན་བྱོལ་ལ་བསླེབས་པ་ནས་དཔལ་འབྱོར་དང་སྡོད་ཁང་སོགས་ཡར་རྒྱས་ཕྱིན་ཡོད་པ་རེད། འོན་ཀྱང་། དེ་དང་མཉམ་དུ་སྒྱུ་རྩལ་གྱི་ངོ་བོ་མེད་ན་ག་ལེར་མི་རིགས་ཀྱི་ངོ་བོ་བརླག་འགྲོ་ངེས་རེད། སྔོན་མ་ཞིག་ལ་གཏམ་བརྗོད་ཚོགས་པ་ཞིག་བཙུགས་པ་རེད། ཡིན་ན་ཡང་། རིམ་བཞིན་འགན་འཁུར་མཁན་ཚོ་ཕྱི་རྒྱལ་ཁག་ལ་ཕྱིན་ཏེ་མེད་པ་ཆགས་སོང་པ་དང་། ད་ལྟ་གཏམ་བརྗོད་ལྷན་ཚོགས་འདི་འཛུགས་ཐུབ་པ་ཧ་ཅང་ཡག་པོ་རེད། གཞོན་སྐྱེས་ཚོའི་བྱས་རྗེས་རེད། གཏམ་བརྗོད་ཀྱི་གལ་ཆེ་ཤོས་སྐད་ཡིན་པ་ལྟར་འཁྲབ་སྟོན་སྐབས་བོད་སྐད་གཙང་མ་དང་། ཚིག་ཀྱང་མཁྲེགས་པོ་མ་ཡིན་པའི་ཐོག་ནས་བོད་མིའི་གཤིས་སྤྱོད་འབུར་དུ་ཐོན་ཐུབ་པ་དེས་ལྟད་མོ་བའི་དགའ་སྐྱོའི་ཚོར་པ་ཕྱིར་མངོན་དུ་བཅུག་པ་རེད། དེ་ནི་འཁྲབ་སྟོན་འདིའི་རྒྱལ་ཁ་རེད་ཅེས་བརྗོད་སོང་ལ། དེ་བཞིན་ལྟད་མོར་ཕེབས་མཁན་ཨ་རི་ནས་ཡིན་པ་ནཱའོ་རན་ལགས་ཀྱིས་ “ངས་བོད་སྐད་མི་ཤེས་ཀྱང་། འཁྲབ་སྟོན་པའི་དཀའ་ལས་རྒྱག་སྟངས་དང་། གཏམ་བརྗོད་དང་དགོད་བྲོའི་གཏམ་གླེང་གི་རྣམ་འགྱུར་དངོས་གནས་ཡག་པོ་འདུག”་ཟེར།

གཏམ་བརྗོད་ཚན་པ་འདི་ནི་ལྷག་པ་ལགས་དང་བསྟན་འཛིན་ནོར་བུ་ལགས་གཉིས་ཀྱིས་ཆེད་གཉེར་བྱེད་ཀྱི་ཡོད་པ་དང་། ད་སྔ་དངུལ་གྱི་རྒྱབ་སྐྱོར་རོགས་འདེགས་བྱེད་མཁན་མེད་སྟབས། འགྲོ་གྲོན་ཡོད་ཚད་ཁོང་གཉིས་ཀྱིས་བཏང་ཡོད་པར་མ་ཟད། བུ་ལོན་ཡང་གཡར་དགོས་བྱུང་ཡོད་པ་དང་། འཁྲབ་སྟོན་པ་གཞན་རྣམས་ཁོང་གཉིས་ཀྱི་འབོད་སྐུལ་ལྟར་དང་བླང་བྱས་པ་ཞིག་ཡིན་འདུག གནད་དོན་དེའི་ཐད་འགན་འཛིན་ལྷ་པ་ལགས་ཀྱིས་བརྗོད་དོན། “ ད་ལྟའི་ཆར་ང་ཚོ་ཚོགས་པ་མིན། ལྷན་ཚོགས་ཤིག་གི་ངོ་བོ་ཆགས་ཡོད། ང་རང་ཡིན་ན་གཏམ་བརྗོད་ཐད་མི་ཚེ་གཏོང་རྒྱུའི་ཆོད་སེམས་བཟུང་ཡོད།” ཟེར། མ་འོངས་པར་གཏམ་བརྗོད་ལྷན་ཚོགས་འདི་རྒྱ་སྐྱེད་ཀྱིས་ལས་རིགས་འདིར་སྤྲོ་བ་ཡོད་མཁན་དག་ལ་ལས་ཀ་སྤྲོད་རྒྱུ་དང་། དེ་བཞིན་རྒྱ་གར་ནང་དང་ཕྱི་རྒྱལ་ཁག་ཏུ་གནས་སྡོད་བོད་མི་ཚོར་བོད་པའི་བཟང་སྤྱོད་དང་གཤིས་སྤྱོད་ངོ་སྤྲོད་རྒྱུན་གནས་ཐུབ་ཐབས་བཅས་བྱ་རྒྱུའི་ལས་འཆར་ཡོད་འདུག

གསར་འགོད་པ། བནྡེ་སྐྱབས།