སྐུ་ཚབ་དོན་གཅོད་ཀྱིས་མཚོན་པའི་དམིགས་བསལ་བསྐོ་བཞག་ཡིན་ནའང་འདྲ་འདུག དེ་དག་ཚང་མ་ག་དུས་བསྐོ་དགོས་པ་དང་། ག་དུས་ཕྱིར་བསྡུ་བྱ་དགོས་མིན་གྱི་སྐུ་དབང་དེ་དག་བཀའ་ཤག་ལ་ཡོད་པ་རེད། བཀའ་ཤག་གིས་སྐུ་དབང་དེ་བེད་སྤྱོད་ཇི་ལྟར་བྱེད་ཀྱི་ཡོད་མེད་ཀྱི་རྒྱུ་མཚན་དེ་ལ་དྲི་བ་གཏོང་སའི་གཞི་རྩ་ཞེ་དྲག་ཡོད་པ་མ་རེད་བསམ་གྱི་འདུག་ཟེར།
ཕྱི་ཟླ་ ༥ ཚེས་ ༣༡ ཉིན་བཀའ་དྲུང་ཡིག་ཚང་ནས་ཐུབ་བསྟན་རྒྱ་མཚོ་ལགས་ལ་དོན་གཅོད་གསར་བསྐོའི་བཀོད་རྒྱ་ནང་འཁོད་དུས་ཚེས་ལྟར་ཕྱག་ལས་དབུ་འཛུགས་མ་དགོས་པ་དང་། ཞིབ་ཆའི་གནས་ཚུལ་རྗེས་སུ་འབུལ་རྒྱུ་དགོངས་འཇགས་དགོས་སྐོར་གྱི་བཀོད་ཁྱབ་ཅིག་ཕེབས་ཏེ། སྐབས་དེར་ཁོང་སྦར་སིལ་སྐུ་ཚབ་དོན་གཅོད་དུ་གསར་བསྐོ་གནང་བ་ཕྱིར་བསྡུའམ་ལས་བཅར་ཕྱིར་འགྱངས་གང་ཡིན་གསལ་ཁ་གནང་མེད་ནའང་། ཟླ་ ༦ ཕྱི་ཚེས་ ༢༣ ཉིན་བཀའ་དྲུང་ཡིག་ཚང་ནས་དེའི་མཇུག་སྐྱོང་བརྡ་ཁྱབ་ཅིག་ཕེབས་པའི་ནང་ “འདི་ག་ལས་ཁུངས་ཀྱི་ཡི་གེ་ཨང་བཀའ་ ༡༦༩ ༼ ༥༥ ༽ ༢༠༡༡ ། ༡༢ ། ཕྱི་ལོ་༢༠༡༡ ཟླ་ ༤ ཚེས ༢༩ འཁོད་པའི་ནང་སྐུ་ཉིད་སྦར་སིལ་སྐུ་ཚབ་དོན་གཅོད་ཀྱི་མཛད་འགན་བཞེས་རྒྱུའི་རེ་འདུན་ཞུས་ཡོད་ཀྱང་། ད་ཆ་གོང་གསལ་རེ་འདུན་ཡིག་ཆ་དེ་བཞིན་ཕྱི་ལོ་ ༢༠༡༡ ཟླ་༥ ཚེས་ ༢༩ སྔ་དྲོ་ནས་རང་བཞིན་ནུས་མེད་དུ་ཕྱིན་ཟིན་པ་དེ་ལུགས་དགོངས་འཇགས་དང་། འགྱུར་བ་འདིས་སྤྱི་སྒེར་སུར་ཡང་ཐུགས་སྟབས་མི་བདེ་བ་བྱུང་ཡོད་ཚེ་བློ་ཕམ་ཞུ་རྒྱུ་བཅས” ཞེས་བཀོད་དེ། ཁོང་སྦར་སིལ་སྐུ་ཚབ་དོན་གཅོད་དུ་གསར་བསྐོ་གནང་བ་དངོས་སུ་ཕྱིར་བསྡུ་གནང་ཡོད་འདུག
གོང་གསལ་གནད་དོན་འདིའི་སྐོར་ལ་ཕྱི་ཚེས་ ༢ ཉིན་འདི་གའི་གསར་འགོད་པ་བཀའ་དྲུང་ཡིག་ཚང་དུ་བཅར་ཏེ། བཀའ་དྲུང་མི་འགྱུར་རྡོ་རྗེ་ལགས་སུ་བཀའ་འདྲི་ཞུས་པར་ཁོང་གིས། ཐུབ་བསྟན་རྒྱ་མཚོ་ལགས་སྦར་སིལ་སྐུ་ཚབ་དོན་གཅོད་ནས་ཕྱིར་བསྡུ་བྱ་དགོས་པའི་རྒྱུ་མཚན་དེ་བཀའ་ཤག་གིས་མཁྱེན་གྱི་རེད་མ་གཏོགས། བཀའ་དྲུང་ལ་དམིགས་བསལ་ཞུ་རྒྱུ་གང་ཡང་ཡོད་པ་མ་རེད། ཡིན་ནའང་། གཅིག་ནས་སྤྱི་ཚོགས་ནང་དོ་སྣང་གནང་གི་ཡོད་སྟབས། བརྒྱུད་རིམ་དེ་བཤད་བཞག་པ་ཡིན་ན་ཕན་ཐོགས་མི་ཡོང་ངམ་བསམ་གྱི་འདུག གཉིས་ནས་མཁྱེན་དགོས་པ་ཞིག་ལ་གཞུང་ཞབས་མིང་ཐོག་ན་ཡོད་པའི་ལས་བྱེད་ཡིན་ན་འདྲ་འདུག དེ་བཞིན། སྐུ་ཚབ་དོན་གཅོད་ཀྱིས་མཚོན་པའི་དམིགས་བསལ་བསྐོ་བཞག་ཡིན་ནའང་འདྲ་འདུག དེ་དག་ཚང་མ་ག་དུས་བསྐོ་དགོས་པ་དང་། ག་དུས་ཕྱིར་བསྡུ་བྱ་དགོས་མིན་གྱི་སྐུ་དབང་དེ་དག་བཀའ་ཤག་ལ་ཡོད་པ་རེད། བཀའ་ཤག་གིས་སྐུ་དབང་དེ་བེད་སྤྱོད་ཇི་ལྟར་བྱེད་ཀྱི་ཡོད་མེད་ཀྱི་རྒྱུ་མཚན་དེ་ལ་དྲི་བ་གཏོང་སའི་གཞི་རྩ་ཞེ་དྲག་ཡོད་པ་མ་རེད་བསམ་གྱི་འདུག ཅེས་གསུངས་སྟེ། དང་པོ་ཐུབ་བསྟན་རྒྱ་མཚོ་ལགས་ལ་བཀའ་ཤག་གིས་བཀའ་འབྲེལ་བྱས་ཏེ། ཕྱི་ལོ་ ༢༠༡༡ ཟླ་ ༤ ཚེས་ ༢༩ ཉིན་ཁོང་སྦར་སིལ་སྐུ་ཚབ་དོན་གཅོད་ལ་བསྐོ་བཞག་དང་འབྲེལ། ཕྱི་ཟླ་ ༦ ཚེས་ ༡ ནས་བཟུང་ལས་འཁུར་ཞུ་དགོས་ཚུལ་གསུངས་ཡོད་ནའང་། བར་སྐབས་དེར་བཅའ་ཁྲིམས་བསྐྱར་བཅོས་གནང་སྟེ་གཞུང་གི་ཆབ་སྲིད་དང་
འཛིན་སྐྱོང་གི་གནས་བབ་ཐོག་འགྱུར་བ་ཕྱིན་ནས། དེ་སྔའི་འཆར་འབུལ་ཕྱག་རྟགས་ཀྱི་ཐོག་ནས་བསྐོ་བཞག་བྱས་པའི་བཀའ་བློན་ལས་ཁུངས་ཁག་གི་དྲུང་ཆེ་དང་བཀའ་དྲུང་། དེ་བཞིན་ཕྱི་རྒྱལ་སྐུ་ཚབ་དོན་གཅོད་དང་དམིགས་བསལ་སྐུ་ཚབ་ཁག་ཚང་མའི་འཆར་འབུལ་ཕྱག་རྟགས་ཀྱི་ལེའུ་དེ་རྫོགས་པ་དང་། ཕྱི་ཟླ་ ༥ ཚེས་༣༠ ཡས་མས་ཤིག་ལ་ད་ལྟའི་བཀའ་ཤག་གིས་དེ་དག་ལ་བཀོད་རྒྱ་གསར་བ་མ་འབྱོར་བར་དུ་ལས་འགན་རང་འཇགས་མུ་མཐུད་དུ་བྱ་དགོས་ཚུལ་གྱི་བཀོད་ཁྱབ་གནང་བ་རེད། བརྒྱུད་རིམ་དེའི་ནང་བཀའ་ཤག་གིས་ཐུབ་བསྟན་རྒྱ་མཚོ་ལགས་ལའང་ཕྱག་ལས་དབུ་འཛུགས་གནང་མ་དགོས་པ་དང་། བཅའ་ཁྲིམས་ལ་འགྱུར་བ་ཕྱིན་པ་དེས་དོན་གཅོད་གསར་བསྐོའི་བཀོད་རྒྱ་རང་བཞིན་གྱིས་ནུས་མེད་དུ་ཕྱིན་པ་ཡིན་ཞེས་བཀའ་ཕེབས་པ་རེད། དོན་རྩ་རྡོག་རྡོག་འདི་རེད། ཅེས་བཀའ་དྲུང་ཡིག་ཚང་ནས་གོང་གསལ་མཇུག་སྐྱོང་བརྡ་ཁྱབ་གནང་བའི་བརྒྱུད་རིམ་ཐད་གསལ་བཤད་གནང་།
སྐབས་དེར་ཁོང་སྒེར་གྱི་བསམ་ཚུལ་འགའ་གསུངས་དོན། ང་རང་གི་བསམ་ཚུལ་ལྟར་ན། ཐུབ་བསྟན་རྒྱ་མཚོ་ལགས་ཁོང་དམིགས་བསལ་གྱིས་ཐུགས་ཕམ་གནང་དགོས་པའི་གནས་བབ་གང་ཡང་ཡོད་པ་མ་རེད་བསམ་གྱི་འདུག རྒྱུ་མཚན་གང་ཡིན་ཟེར་ན། ༸གོང་ས་མཆོག་གིས་འཆར་འབུལ་ཕྱག་རྟགས་ཀྱི་དུས་ཚོད་རྫོགས་ཟིན་པ་དེ། ཁོ་རང་གི་དུས་ཚོད་དེར་ཁེལ་ཟིན་པར་བརྟེན། དེ་ནུས་མེད་དུ་ཕྱིན་སོང་ཞེས་པའི་བཀའ་དེ་གནང་གི་ཡོད་པ་རེད། བསྐྱར་དུ་གསར་པ་སུ་ཞིག་བསྐོ་འཇོག་བྱེད་མིན་ཐད། བཀའ་ཤག་ནས་བསྐྱར་དུ་དགོངས་པ་བཞེས་དགོས་པའི་གནས་ཚུལ་ཞིག་ཆགས་བསྡད་ཡོད་པ་རེད་མ་གཏོགས། དེ་ལས་གཞན་གང་ཡང་ཡོད་པ་མ་རེད། དེ་མིན། དང་ཐོག་བསྐོ་བཞག་གནང་སྟངས་སྐོར་ལ་ཁྱེད་རང་གིས་ང་ལ་སྐད་ཆ་དྲིས་པ་ཡིན་ན། ང་ལ་ལན་རྒྱག་རྒྱུ་མེད། ང་བཀའ་དྲུང་རེད། བཀའ་ཤག་ནས་བཀའ་ག་རེ་ཕེབས་པ་དེ་ཕར་བསྒྱུར་རྒྱུ་དེ་ངའི་ལས་འགན་ཆགས་ཀྱི་ཡོད་པ་རེད། ཅེས་གསུངས་སོང་།
བཀའ་ཤག་གི་འགྱུར་བ་འདིའི་ཐད་དགོངས་ཚུལ་གང་ཡོད་ཧྥ་རན་སིའི་སྐུ་ཚབ་དོན་གཅོད་ཟུར་པ་ཟླ་བ་དོན་གྲུབ་ལགས་སུ་བཀའ་འདྲི་ཞུས་པར། ཁོང་གིས། དེ་ཅུང་ཡ་མཚན་འདྲ་ཞིག་མ་རེད་དམ། དོན་གཅོད་བསྐོ་བཞག་གནང་སྐབས་ཀྱི་སྒྲིག་གཞི་ཟེར་ན་རེད། སྤྱིར་བཏང་འགྲོ་སྟངས་བྱས་ན། དང་པོ་ཕྱི་དྲིལ་ལས་ཁུངས་ཀྱིས་བཀའ་ཤག་ལ་འཆར་གཞི་ཕུལ། བཀའ་ཤག་ནང་ལ་བཀའ་བསྡུར་གནང་། བཀའ་བསྡུར་གནང་གྲུབ་རྗེས་འོས་གཞི་གང་ཡོད་པ་རྣམས་ཡར་སྐུ་མདུན་ལ་ཕུལ་ནས་ཕྱག་རྟགས་གནང་གི་ཡོད་པ་རེད། ཕྱི་དྲིལ་གྱི་འཆར་གཞི་ལ་བཀའ་ཤག་གིས་རྒྱུ་མཚན་གཙོ་བོ་གསུམ་སྒང་ནས་བརྟག་དཔྱད་ཐུགས་ཞིབ་ཀྱི་བཀའ་བསྡུར་གནང་གི་ཡོད་པ་རེད། དང་པོ་ས་གནས་ཀྱི་གནས་སྟངས། གཉིས་པ་འོས་མི་དེའི་ཤེས་ཚད་དང་འཇོན་ཐང་། ལྷག་བསམ། གསུམ་པ་བསྐོ་བཞག་གནང་སའི་ཡུལ་ལུང་ནང་བོད་གཞུང་གི་འཕྲལ་ཕུགས་རྒྱང་གསུམ་གྱི་ཁེ་ཕན་ཆེད་ལས་དོན་བསྒྲུབ་ཐུབ་ཀྱི་ཡོད་མེད་བཅས་རེད། ད་ལྟ་ཐུབ་བསྟན་ལགས་དོན་གཅོད་ལ་བསྐོ་བཞག་གནང་སྟངས་ཡང་། དུས་རྒྱུན་གྱི་འགྲོ་སྟངས་ནང་བཞིན་བཀའ་ཤག་གིས་རྒྱུ་མཚན་གཙོ་བ་དེ་དག་གཞི་ལ་བཞག་སྟེ་ཐུགས་ཞིབ་བཀའ་བསྡུར་གནང་གྲུབ་པ་དང་། སྐུ་མདུན་ལ་འཆར་འབུལ་ཕྱག་རྟགས་ཀྱང་ཞུས་བསྩལ་གནང་གྲུབ་པ་རེད། སོང་ཙང་། བརྟག་དཔྱད་ཐུགས་ཞིབ་གནང་གྲུབ་པ་དང་། བསྐོ་བཞག་ཀྱང་གནང་གྲུབ་པ་ཞིག་ལ་མིའི་བསམ་ཚུལ་དང་སྐྱོན་བརྗོད་ཡོང་གི་འདུག་གསུངས་ནས་འགྱུར་བ་བཏང་བ་ཡིན་ན་དེ་ཡ་མཚན་པོ་ཞིག་དང་། སྒྲིག་འཛུགས་ཀྱི་ངོས་ནས་ཀྱང་ཏག་ཏག་ཅིག་ཨེ་ཡིན་བསམ་གི་འདུག ༽ ཅེས་གསུངས།
གཞན་ཡང་། ཧྥ་རན་སི་གནས་སྡོད་བོད་མི་དང་བོད་དོན་རྒྱབ་སྐྱོར་ཚོགས་པ། དེ་བཞིན་ཡུལ་མི་རེ་འགས་འབྲེལ་ཡོད་ལས་ཁུངས་ཁག་ལ་ཐུབ་བསྟན་རྒྱ་མཚོ་ལགས་དོན་གཅོད་དུ་བསྐོ་བཞག་བྱས་པར་བློ་ཕམ་སྙན་ཞུ་དང་། བཀའ་ཤག་གིས་ཀྱང་ཁོང་ལ་དུས་ཚེས་ལྟར་ལས་བཅར་མི་དགོས་པའི་བཀོད་རྒྱ་གནང་རྗེས། ཕྱི་ཟླ་༦ ཚེས་༤ ཉིན་ཧྥ་རན་སིའི་བོད་རིགས་ཚོགས་པས་དེ་སྐོར་ལ་དམིགས་བསལ་ཚོགས་ཆེན་ཞིག་ཚོགས་ཡོད་ལ། ཚོགས་ཆེན་སྐོར་བོད་རིགས་ཚོགས་པའི་ཚོགས་གཙོ་བསྟན་འཛིན་ཀླུ་སྒྲུབ་ལགས་ལ་བཀའ་འདྲི་ཞུས་པར། ཁོང་གིས་ཕྱི་ཟླ་༥ པའི་ཚེས་ཤར་ལ་གཞུང་གིས་ཐུབ་བསྟན་ལགས་དོན་གཅོད་ལ་བསྐོ་བཞག་གནང་བ་རེད། ཡིན་ནའང་རྗེས་ལ་མི་འགའ་ཤས་ཤིག་གིས་བསམ་ཚུལ་ཕུལ་བ་ལ་བརྟེན་ནས་འགྱུར་བ་གཏོང་རྩིས་གནང་བ་རེད། སོང་ཙང་། དེ་ལ་ས་གནས་བོད་མི་མང་པོ་ཞིག་བསམ་ཚུལ་ཡོང་བསྡད་པ་དང་། དེ་བཞིན་བོད་དོན་རྒྱབ་སྐྱོར་ཚོགས་པ་གང་མང་ཞིག་གིས་དགོངས་ཚུལ་གནང་བ་རེད། མང་པོ་ཞིག་གིས་བོད་རིགས་ཚོགས་པས་འགན་རྐང་ལེན་བྱས་ནས་གནས་ཚུལ་དེ་གསལ་བོ་བཟོ་རོགས་གནང་ཞེས་བསམ་ཚུལ་སླེབས་ཙང་དམིགས་བསལ་ཚོགས་ཆེན་དེ་བསྐོངས་པ་རེད། ཅེས་དང་། ཚོགས་ཆེན་ནང་ས་གནས་བོད་མི་ཚོས་བསམ་ཚུལ་གང་གསུངས་པ་དང་། རེ་སྐུལ་གང་གནང་བ་དེ་དག་ཡིག་ཐོག་ནས་ཚིག་ཐོ་དང་བརྙན་འཕྲིན་དུ་ཕབ་པ་མ་ཟད། གཞུང་གིས་སུ་བདེན་སུ་རྫུན་གྱི་དངོས་ཡོད་གནས་ཚུལ་ལ་ཐུགས་ཞིབ་གནང་རྒྱུ་དང་། ཐུབ་བསྟན་རྒྱ་མཚོ་ལགས་མུ་མཐུད་ནས་སྐུ་ཚབ་དུ་རང་འཇགས་འཇོག་རོགས་གནང་ཞེས་རྒྱབ་སྐྱོར་གྱི་ས་ཡིག་ཀྱང་བསྡུས་ནས་འབྲེལ་ཡོད་ལས་ཁུངས་ཁག་ལ་ཕུལ་ཡོད་ཚུལ་འགྲེལ་བརྗོད་གནང་།
ཁོང་གིས་མུ་མཐུད་ནས། ༼མི་མང་གིས་རང་གི་གཞུང་ལ་བརྩི་བཀུར་གནང་གི་ཡོད་པ་གནང་བཞིན་གཞུང་གིས་ཀྱང་མི་མང་ལ་ཆ་འཇོག་གནང་དགོས་པ་དེ་གལ་ཆེན་པོ་རེད་བསམ་གྱི་འདུག ང་ཚོས་གཞུང་ལ་དངོས་ཡོད་གནས་སྟངས་ལ་ཞིབ་འཇུག་དང་གསལ་བཤད་གནང་རོགས་ཞེས་རེ་སྐུལ་ཕུལ་ནའང་ད་བར་བཀའ་ལན་གང་ཡང་འབྱོར་མ་སོང་། འདི་ལ་བློ་ཕམ་ཆེན་པོ་འདུག མི་འགའ་ཤས་ཤིག་གིས་སྙན་ཞུ་ནང་འདྲ་མི་འདྲ་བྲིས། གཞུང་གིས་དེ་ལ་ཡིད་ཆེས་གནང་བ་ནས་ཐག་བཅད་ན་འགྲིག་གི་ཡོད་པ་མ་རེད། ང་ཚོའི་གཞུང་འདི་མང་གཙོ་དང་ཕྱི་གསལ་ནང་གསལ་ཡིན་གསུང་གི་ཡོད་པ་རེད། གསལ་བཤད་དང་བཀའ་ལན་གང་ཡང་མེད་པར་འགྱུར་བ་བཏང་བ་ཡིན་ན། འདི་ན་ཡུ་རོབ་དམིགས་བསལ་སྐུ་ཚབ་ཡོད་པ་རེད། དེ་ག་ནང་བཞིན་སྤྱི་འཐུས་གཉིས་ཀྱང་ཡོད་པ་རེད། ད་དུང་འདི་ལྟར་གསལ་བཤད་བཀའ་ལན་མེད་པར་སོང་བ་ཡིན་ན། འདི་ནས་གང་མགྱོགས་དམིགས་བསལ་སྐུ་ཚབ་དང་སྤྱི་འཐུས་རྣམ་པ་གདན་འདྲེན་ཞུས་ནས་དམིགས་བསལ་ཚོགས་ཆེན་བསྐོང་རྒྱུའི་ལས་རིམ་ཞིག་སྒྲིག་བཞིན་པ་ཡིན། གང་ལྟར་དོན་དག་འདི་སླ་བོ་བྱས་ནས་མཇུག་རྫོགས་ཐབས་ཡོད་པ་མ་རེད། ༽ཅེས་ཀྱང་འགྲེལ་བརྗོད་གནང་སོང་།
ཕྱི་ཟླ་༤ ཚེས་༢༩ ཉིན་བཀའ་དྲུང་ཡིག་ཚང་ནས་༧ གོང་ས་སྐྱབས་མགོན་ཆེན་པོ་མཆོག་ལ་འཆར་འབུལ་ཕྱག་རྟགས་ཞུས་དགོངས་ལྟར། ཐུབ་བསྟན་རྒྱ་མཚོ་ལགས་སྦར་སིལ་སྐུ་ཚབ་དོན་གཅོད་དུ་བསྐོ་བཞག་དང་འབྲེལ། ཕྱི་ཟླ་ ༦ ཚེས་༡ ཉིན་ནས་ལས་བཅར་མགོ་འཛུགས་ཞུ་དགོས་པའི་བཀོད་རྒྱ་ཞིག་ཕེབས་ཡོད་ནའང་། ཕྱི་ཟླ་༥ ཚེས་༣༡ ཉིན་བསྐྱར་དུ་བཀོད་ཁྱབ་གསར་པ་ཞིག་ཕེབས་ཏེ། དེ་སྔའི་བཀོད་རྒྱའི་ནང་འཁོད་དུས་ཚེས་ལྟར་ཕྱག་ལས་དབུ་འཛུགས་མ་དགོས་པ་དང་། ཞིབ་ཆའི་གནས་ཚུལ་རྗེས་སུ་འབུལ་རྒྱུའི་དགོངས་འཇགས་དགོས་སྐོར་བཀོད་ཡོད་ལ། ཕྱི་ཚེས་༢༣ ཉིན་བཀའ་དྲུང་ཡིག་ཚང་ནས་བཀོད་ཁྱབ་གསར་པའི་མཇུག་སྐྱོང་བརྡ་ཁྱབ་ཕེབས་ཏེ་ཁོང་གི་དོན་གཅོད་ལས་གནས་ཕྱིར་བསྡུ་གནང་ཡོད། འདི་ནི་བཀའ་ཤག་གིས་དོན་གཅོད་གསར་བསྐོའི་བྱུང་རིམ་ནང་ལས་བཅར་མགོ་འཛུགས་མ་བྱས་པར་ལས་གནས་ཕྱིར་བསྡུ་གནང་ཐེངས་དང་པོ་དེ་ཆགས་ཡོད་འདུག
གསར་འགོད་པ། ཟླ་བ་ཚེ་རིང་དང་ཚེ་རིང་རྒྱལ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཨ་ལ་ལ་ད་ཨ་ལ་ལ་རང་རེད། ཕྲུ་གུ་བསམ་མེད་དེ་སུ་ཡིན་མིན་ད་དུང་ཤེས་དཀའ་གི སེམས་ནད་སུ་ལ་ཡོད་མེད་དེ་ཡང་སོ་སོ་རང་ལ་གསལ་ནི་རེད། ངས་ནི་ང་ཚོས་རྒྱུ་མཚན་ངོ་མ་མ་རྟོགས་གོང་ལ་མུན་ནག་མདའ་འཕེན་མ་བྱས་ན་བཟང་གི གཞུང་སྒེར་གཉིས་ལ་ཅིག་ཅིག་ནག་པོ་རེད་ཅིག་ཅིག་མ་རབས་རེད་ཟེར་བའི་སྐད་ཆ་དེ་ཚོ་ང་ལ་བཤད་པའི་དབང་ཆ་མེད། རྒྱུ་མཚན་གནད་དོན་ངོ་མ་ཅི་ཡིན་མི་ཤེས་པས་སོ།
ཆབ་བྲག་ལགས། ང་ཐུབ་བསྟན་གྱི་ཕྱོགས་ན་མེད་ལ་བཀའ་ཤག་གི་ཕྱོགས་ནའང་མེད། མདོ་དོན་དྲང་པོ་བྱས་མི་འདུག་པ་དང་ཁྱེད་ཚོས་དྲང་བདེན་བྱེད་ཀིན་མི་འདུག་ཟེར་གྱི་ཡོད། དཔེར་ན་ཡར་འཇོག་དུས་རིམ་པ་༣པོ་བརྒྱུད་ཡོད་ན་མར་ཕབ་དུས་ཀྱང་ཡོད་པ་ལས་བཀའ་ཤག་གཅིག་པོ་མིན་ཚུལ་འདྲ་ཞིག་བཤད་འདུག གལ་སྲིད་ཁྱེད་ཀྱིས་བཤད་པ་བཞིན་མར་ཕབ་དུས་ཀྱང་དེ་གསུམ་ཡོད་ན། ད་དེ་ལ་འགྲེལ་བཤད་རྒྱག་མི་དགོས་པ་སྨྱོན་པ་རེད་ཅེས་ཚིག་ཐག་བཅད་ན་འགྲིག ཕྲུ་གུ་བསམ་མེད་རྩེ་མོ་རྩེས་ནའང་དེ་འདྲ་ཡིན་གྱི་མ་རེད། ད་དུང་བདེན་པའི་རྒྱབ་ལང་མི་བྱེད་པར་རང་ཉིད་ཀྱི་ཁེ་ཕན་ཁོ་ནའི་ཆེད་དུ་མི་ཆེན་དང་དཔོན་ཆེན་ལ་སྤྲེལ་ལབ་དང་གར་ཆུང་འཁྲབ་སྟོན་སྤྱན་འབུལ་གྱིས་སྡིག་པ་མིག་ཙམ་བྱས་ན་ཚེ་འདི་ནས་ཀྱང་ཁྱེད་སེམས་བདེ་བོ་ཞིག་ཡོད་ཀྱི་མ་རེད་ལ། འཆི་ཁ་མིག་བཙུམ་དུས་ཀྱང་འགྱོད་སེམས་ཡོང་རྒྱུ་ནི་ཆོས་ཉིད་དང་བདེན་པས་ཐག་ཆོད།
“ཐུབ་བསྟན་དོན་གཅོད་ལ་བསྐོ་མཁན་ཡང་བཀའ་ཤག་རེད་འདུག དོན་ཟུར་ཟླ་བ་དོན་གྲུབ་ནས་གསུང་བ་བཞིན། ལས་རིམ་གསུམ་ཅན་༡ཕྱི་དྲིལ། ༢།བཀའ་ཤག ༣།སྐུ་མདུན་བཅས་ཀྱིས་དཔྱད་གྲུབ་ནས་བཀོད་རྒྱ་གནང་བ་ཞིག་ལ་ལན་ཁ་གསལ་གང་ཡང་མེད་པར་ཕྱིར་འཐེན་དགོས་ཚུལ་བཤད་ན་ཐུབ་བསྟན་ལགས་ནག་པོ་བཟོས་པ་ཞིག་ཡིན་”ཟེར། འོ་ན་མར་ལེན་ན་ཡང་གོ་རིམ་དེ་དག་བརྒྱུད་ལོས་དགོས། དེས་ན་བཀའ་ཤག་གཅིག་པུ་ག་ལ་ཡིན།
རྒྱུ་མཚན་འདིས་ཁོ་ནག་ཅན་རེད། ནག་པོ་བཟོས་པ་རེད་ཅེས་ཐག་གཅོད་པ་དེ་ཚོ་ངོ་མ་མུན་ནག་མདའ་འཕེན་འདྲ།
ཆབ་བྲག་ལྷ་མོ་སྐྱབས་ཟེར་བ་འདི། རྣམ་དཔྱོད་མེད་མཁན་དང་བརྗོད་བྱ་གང་ཡིན་མགོ་མ་ཚོས་པར་ཚོད་ཚོད་ལ་མི་ནག་མདའ་འཕེན་དང་སྙིང་རྗེ་གོ་ལོག གཞུང་སེམས་དང་བསམ་ཡོད་ཡིན་ཁུལ་བྱེད་མཁན་ཞིག་ལ་བལྟས་ན་ཕལ་ཆེར་ས་རའི་དགེ་རྒན་རྩོམ་པ་པོ་ལྷ་མོ་སྐྱབས་མིན་པར་མཐོང་། གལ་སྲིད་ཡིན་དུ་ཆུགས་ན་ད་ཚར་འདུག ངས་ཁྱེད་ལ་འདྲི། ཐུབ་བསྟན་དོན་གཅོད་ལ་བསྐོ་མཁན་ཡང་བཀའ་ཤག་རེད་འདུག དོན་ཟུར་ཟླ་བ་དོན་གྲུབ་ནས་གསུང་བ་བཞིན། ལས་རིམ་གསུམ་ཅན་༡ཕྱི་དྲིལ། ༢།བཀའ་ཤག ༣།སྐུ་མདུན་བཅས་ཀྱིས་དཔྱད་གྲུབ་ནས་བཀོད་རྒྱ་གནང་བ་ཞིག་ལ་ལན་ཁ་གསལ་གང་ཡང་མེད་པར་ཕྱིར་འཐེན་དགོས་ཚུལ་བཤད་ན་ཐུབ་བསྟན་ལགས་ནག་པོ་བཟོས་པ་ཞིག་ཡིན་པས། རང་ངོས་ལ་དཔེ་བཞག་ནའང་འདི་འདྲའི་གནས་ཚུལ་ལའང་ཕལ་ཆེར་ཚོར་མེད་དུ་བསྡད་མི་ཐུབ་ཁ་ཚོན་གཅོད་ཐུབ། གལ་སྲིད་ནག་ཉེས་བགྲང་རྒྱུ་མེད་ན་དྲང་བདེན་གྱི་ཐག་གཅོད་ཅིག་མིན་པ་གྲུབ་ཚར་བ་རེད། གལ་སྲིད་ནག་ཉེས་དང་ཆ་རྐྱེན་ཚང་གི་མེད་ན་ཆ་རྐྱེན་བགྲང་ན་ཐུབ་བསྟན་གྱིས་ཀྱང་ཁས་ལེན་པ་གསལ་པོ་རེད། མི་འགྱུར་རྡོ་རྗེས་བཤད་པ་དེ་ཚོ་ཡང་འགན་ཁུར་བའི་སྐད་ཆ་ཞིག་མ་རེད། འདི་དང་འདི་འདྲ་བ་མང་པོ་བྱས་ན་མི་མང་ནང་གཞུང་ལ་རེ་བ་དང་ཡིད་ཆེས་ཆུང་དུ་འགྲོ་བཞིན་པ་དེ་ནས་རྦད་དེ་ཡིད་ཆེས་དང་རེ་བ་མེད་པར་ཆགས་སྲིད་པའི་ཉེན་ཁ་ཆེ།
འོ་ལགས་སོ་རྒན་ལགས་ཐུགས་རྗེ་ཆེ་ཞུ་ རྒན་ལགས་ཀྱི་གསུངས་ལའང་བསམ་བློ་གཏོང་གི་ཡོད་ ང་དང་ང་འདྲ་བ་ལ་ཕན་ཐོགས་ཡོང་བའི་རེ་བ་ཡོད་ ད་ཡང་བསྐྱར་དེའི་སྐོར་གཤད་སྙིང་བྲོ་གི་མི་འདུག་ འཚམས་འདི་ནས་དགོངས་པ་ཞུ་གི་ཡིན་ མྱུར་མཇལ་སྨོན་ལམ་དང་བཅས་
བྱམས་རྒྱལ་ལགས།
ཁུངས་ལུང་མེད་པའི་ཡིག་འཁྱར་འགའ་ལ་གཟིགས་ནས་བཀའ་ཤག་གིས་ཕྱིར་འཐེན་བྱས་པ་རེད་ཅེས་ཁྱེད་ཀྱིས་ཐག་གཅོད་བྱེད་ཐུབ་དོན་ཅི། རང་དེ་ལ་ཡིད་ཆེས་སམ། བཀའ་ཤག་ནི་དེ་འདྲའི་ཆོ་མེད་ཅིག་ཡིན་ནམ། ང་ཚོའི་བཀའ་ཤག་འདི་སུ་དང་གང་གིས་སྒུལ་མི་ཚུགས་པ་ཞིག་ཡིན། བཀའ་ཤག་གིས་གང་བསྒྲུབས་དང་སྒྲུབ་བཞིན་པ་ཚང་མར་ཞན་ཆ་ཅི་རིགས་ཡོད་མོད་བདེན་པ་དང་རྒྱུ་མཚན་གཞིར་བཟུང་ནས་ཕྱག་ལས་གནང་མཁན་ཞིག་ཡིན།
ཁྱེད་ཀྱིས་ཐུབ་བསྟན་ལགས་ལ་རྒྱབ་སྐྱོར་བྱེད་པ་དེ་བསམ་པ་ཡར་སེམས་ཡིན་ངེས་རེད། མ་གཞི་ནས་ཁོང་དེ་གའི་བོད་རིགས་ཚོགས་པའི་ཚོགས་གཙོ་བསྟུད་མར་བདམས་པར་མ་ཟད་མཐར་སྐུ་ཚབ་དོན་གཅོད་ལྟ་བུའི་ཁྲིར་ཡང་འཇོག་རྩིས་གནང་བ་འདི་དག་ཡང་གཞུང་དམངས་གཉིས་ནས་ཁོང་གི་བྱས་པ་དང་འཇོན་ཐང་ལ་གདེང་འཇོག་བྱས་པ་ཞིག་ཅི་ལ་མིན། ངས་ཁྱེད་ཅག་ལ་བཤད་ཀྱིན་པ་ཚང་མ་ཡང་གཞུང་དང་ཁོང་སྒེར་གཉིས་བར་ལ་འགལ་བ་མི་ཡོང་བ་དང་ཆུང་ཆུང་ཆེ་རུ་མི་འགྱུར་བའི་ཆེད་དུ་ཡིན།
ང་རྒྱ་གར་ན་ཡོད། གནས་སྐབས་འདིར་སྐད་ཆ་ཤོད་པ་ལས་ཐབས་ཤེས་མེད། བཀའ་ཤག་གིས་གསལ་བཤད་མ་གནང་བ་ཞིག་ལ་ངས་ཚོད་དཔག་བྱེད་མི་ཐུབ། གསལ་བཤད་མ་གནང་བ་ཡིན་ན་ནག་ཅན་ཡིན་པར་དེ་བས་ཀྱང་ངོས་ལེན་མི་བྱེད།
རྒན་ལགས་ཀྱིོས་གླེང་མོལ་གནང་བར་ཐུགས་རྗེ་ཆེ་ཞུ་
ཡང་བསྐྱར་ཡར་ཞུ་གཅིག་བྱེད་དགོས་ཐུག་སོང་ བཀའ་ཤག་ནས་ཐུབ་བསྟན་ལགས་ནག་པོ་བཟོ་བའི་གསང་བ་ཡོད་རེད་ཅེས་ཞུས་མེད་ གནད་དོན་དེ་མ་གཤད་ན་ནག་པོ་ཆགས་ཡ་རེད་ཅེས་ཞུས་ཡོད་ བཀའ་ཤག་ནས་ཆེད་མངགས་ཀྱིས་ཐུབ་བསྟན་ལགས་ནག་པོ་བཟོ་བར་དུས་ནམ་ཡང་དྲན་མ་སོང་ དེ་འདྲ་གནང་མི་སྲིད་པ་ཞིག་རེད་ འོན་ཀྱང་སྟབས་མི་ལེགས་པ་ཞིག་ལ་ཁུངས་ལུང་མེད་པའི་ཡིག་འཁྱར་འགའ་ལ་གཟིགས་ཏེ་དོན་གཅོད་ཕྱིར་བསྡུ་བྱེད་འགོ་ཚུགས་པ་རེད་ འདི་གར་ས་གནས་བོད་རིགས་ཚོགས་པའི་རྒྱུན་ལས་དང་རྒྱ་ཆེར་ཚོགས་མི་རྣམ་པའི་མངོན་འདོད་དང་བསམ་ཚུལ་ལ་རྒྱུས་ལོན་ཙམ་ཡང་གནང་ལོང་བྱུང་ཡོད་མ་རེད་ ང་ཚོ་འཁང་ར་བྱེད་ས་དེ་ལྐོག་ལྐོག་སུབ་སུབ་ལ་ཟིང་ཆ་སློང་མཁན་དང་ཕུ་དཀྲུགས་མདའ་དཀྲུགས་བྱེད་མཁན་དེ་ཚོ་ལ་ཡིན་མ་གཏོགས་བཀའ་ཤག་ལ་མིན་
དེ་ནི་བཀའ་ཤག་ནས་ཐུབ་བསྟན་ལགས་སུ་གནད་དོན་ཡོད་པའི་སྐད་ཆ་གཞན་ཡོད་གསུངས་ཡ་དེའི་འབྱུང་རྐྱེན་གཙོ་བོ་ཡང་ཡིག་འཁྱར་གཏོང་མཁན་དེ་ཚོ་ལ་ཐུག་ཡོད་
ཁོ་བོས་ཐུབ་བསྟན་ལགས་ལ་རྒྱབ་སྐྱོར་བྱེད་དགོས་པའི་རྒྱུ་མཚན་གཙོ་བོ་ནི་འདས་པའི་ལོ་ངོ་མང་པོའི་རིང་ལྷག་བསམ་ཆེན་པོས་སྤྱི་དོན་ལ་ཕྱག་ལས་གནང་བ་དེའི་བཀའ་དྲིན་རྗེས་དྲན་དང་ གུས་བཀུར་ཡོད་པ་མཚོན་བྱེད་ཡིན་
དེ་ནི་དོ་བདག་ཁོང་རང་རེད་་་་དོ་བདག་ཐུབ་བསྟན་ཁོང་རང་གིས་བཀའ་ཤག་ལ་གནད་དོན་གསལ་བཤད་མ་གནང་ན་དགོངས་པ་ཞུ་ཤེས་ས་མ་རེད་དེ་ནི་དོན་གཅོད་འཁོད་མ་འཁོད་མ་ཡིན་པ་སྒེར་གྱི་མི་ཚེའི་གནས་སྟངས་ལ་འབྲེལ་བ་ཆགས་ཀྱི་འདུག་ཅེས་ཞུས་འདུག་ དེ་འདྲ་སོང་ཙང་གནད་དོན་ཞིག་མེད་ནའང་དཀྲུགས་མཁན་དེ་ཚོས་དཀྲུགས་ཏེ་ཁོང་ལ་མ་ཉེས་ཁ་གཡོགས་ཕོག་ཡོད་ཤག་གིས་བདེན་པའི་རྒྱབ་ལང་བྱེད་པ་དེ་འདྲ་རེད་ མདོར་ན་ཐུབ་བསྟན་ལགས་ལ་རྒྱབ་སྐྱོར་བྱེད་མཁན་ཚོ་དང་ལྷག་པར་དུ་རྨོངས་རྒན་ཁོ་བོ་ནི་ཆབ་སྲིད་དང་རིག་ལམ་ལ་སྦྱང་པ་གང་ཡང་མེད་སྟབས་ཐུབ་བསྟན་ལགས་ལ་རྒྱབ་སྐྱོར་བྱེད་སྟངས་ཤེས་ཡོད་ཀྱི་མ་རེད་ རྒན་ལགས་ཀྱིས་མཁྱེན་བརྒྱི་ཡོད་ན་གསུངས་རོགས་ ལྷག་པར་དུ་ཚོགས་འདུ་སྐབས་ལ་གསུངས་རོགས་ གནད་དོན་དེའི་སྐོར་བོད་རིགས་ཚོགས་པའི་ཚོགས་འདུ་ཐེངས་གཉིས་ཙམ་བསྐོངས་པ་རེད་ སྐབས་དེ་དུས་རྒན་ལགས་ཀྱིས་བཀའ་སློབ་ལམ་སྟོན་ནི་ཅང་གནང་མ་སོང་ ཡང་མིན་ན་ནི་ང་ཚོས་བཤད་་པ་དེ་ཚོ་མ་ཤེས་པ་ལ་བརྟེན་ནས་བཤད་བཞིན་ཡོད་པ་དང་ རྒན་ལགས་ཀྱིས་ལྡོག་ཕྱོགས་ནས་གསུངས་བ་དེ་ཚོ་མཁས་ཁྱད་སྟོན་བགྱི་ཡོད་ན་གང་ཤེས་ འདི་ཀུ་རེ་ཡིན་
བདེ་མོ་བཞུགས་རོགས་
བཀའ་ཤག་ནས་ཐུབ་བསྟན་ལགས་ནག་པོ་ཡིན་ཚུལ་གྱི་གསང་བ་ཞིག་ཡོད་ཚུལ་གསལ་བསྒྲགས་གང་དུ་བྱས་སོང། ཁུངས་ག་རེ་ཡོད། གལ་ཏེ་ཡོད་པའི་དབང་དུ་བཏང་ན་དེ་བཤད་ན་ཇེ་ཡག་ལ་ཡོང་ངམ་ཇེ་ངན་ལ་འགྲོ དེ་བཤད་དཀའ་བ་ཞིག་མ་རེད་དམ། ངས་བལྟས་ན་གལ་ཏེ་ཐུབ་བསྟན་ལགས་ལ་རྒྱབ་སྐྱོར་བྱེད་མི་ཤེས་པ་ཚོས་གཟབ་གཟབ་བྱེད་དགོས་ཀྱི་འདུག་སྙམ་མོ།
གུས་ཕ་རན་སི་ལ་སྡོད་མཁན་ཞིག་ཡིན་པའི་ངོ་ནས་གཤད་ན་ཐུབ་བསྟན་ལགས་ལ་བྱུང་བའི་གནད་དོན་དེར་བསམ་བློ་མང་པོ་འཁོར་བྱུང་ དེ་ཚང་མ་གཤད་ཚོད་ཅང་མི་འདུག་
འོན་ཀྱང་གནད་དོན་ཆེ་ཤོས་དེ་ཐུབ་བསྟན་དོན་གཅོད་འཁོད་མི་འཁོད་དེ་མ་ཡིན་པ་བཀའ་ཤག་ནས་ཐུབ་བསྟན་ལགས་སུ་གཤད་རྒྱུ་མིན་པའི་གནད་དོན་ཞིག་ཡོད་པ་གསུངས་ནས་དགོངས་པ་ཞུ་དགོས་གསུངས་ཡ་དེ་རེད་ཇི་སྲིད་དུ་བཀའ་ཤག་ནས་ཐུབ་བསྟན་ལགས་སུ་གནད་དོན་ཡོད་པའི་སྐད་ཆ་དེ་མ་གཤད་ཀྱི་བར་དུ་དེ་སྲིད་དུ་ཐུབ་བསྟན་ལགས་ནག་པོ་ནག་རྐྱང་བྱས་ནས་བསྡད་ཡ་དེ་རེད་ དེ་བཀའ་ཤག་ནས་ཐུབ་བསྟན་ལགས་སུ་མཐོང་ཆེན་བྱས་པ་ཇི་ལྟར་བསྒྲུབ་ཐུབ་བམ་
མི་ངན་རེ་ཟུང་གིས་མི་དགའ་ཕྲག་དོག་གིས་བཏང་བའི་ཡིག་འཁྱར་ལ་བཀའ་ཤག་གིས་ངོས་ལེན་གནང་ན་ བོད་རིགས་ཚོགས་པའི་རྒྱུན་ལས་དང་ རྒྱ་ཆེར་ཚོགས་མི་རྣམ་པས་ཐུབ་བསྟན་ལགས་སུ་རྒྱབ་སྐྱོར་ཤུགས་ཆེར་ཡོད་པའི་ཡི་གེ་བཏང་བ་དེ་ངོས་ལེན་མི་གནང་བ་ག་རེ་རེད་ འདི་རྒན་ལྷ་མོ་ལགས་དང་ཤྰ་རིའི་བུ་གཉིས་ཀར་དྲི་བ་བཏང་བ་ཡིན་
གནད་དོན་དེ་ཡིས་ཐད་གུས་ནས་ཉམ་ཞིབ་རྟོགས་ཙམ་བྱེད་པ་ཡིན་པའི་དེ་ནི་གཞན་གྱིས་གནོད་ཤུགས་འོག་ནས་དེ་འདྲ་བྱུང་བ་ཞིག་རེད་མི་འདུག་ལ་ཐུབ་བསྟན་རྒྱ་མཚོ་ལ་ཤེས་ཚད་གིས་མི་མདངས་བ་དེ་འདྲ་ཡང་རེད་མི་འདུག དོན་ངོ་མ་ཁོང་ནི་གཞུང་སེམས་ཆེ་ཞིང་ཆོས་དད་ཆེ་བ། རྒྱ་གུང་ཕྲན་གིས་གནས་ལུགས་ཤེས་པ། ཁ་རེ་ཁ་ཐུག ཆོལ་ཁ་དང་ཆོས་ལུགས་དབྱེ་བ་མེད་པ་དེ་འདྲ་ཞིག་རེད་འདུག ཡིན་ན་ཡང་ཁོང་ལ་སྐྱོན་གཅིག་ཡོད་པ་ནི་ལས་ཀ་གང་བྱེད་ཀྱང་རང་ཉིད་གིས་གང་དྲན་པ་དེ་བྱེད་པ་ལས་ལས་རོགས་སུ་གང་ལ་ཡང་ལྟོས་སྲོལ་མི་འདུག དེ་ཡི་དོན་དུ་བོད་རིགས་ཚོགས་པའི་རྒྱུན་ལས་ཚང་མ་ལ་ཁ་རྩོད་བྱུང་མ་མྱོང་བ་མི་འདུག དེ་བཞིན་རང་མི་དགའ་ས་དེ་ལ་དོགས་པ་གཏན་ནས་བྱེད་ཤེས་གིས་མི་འདུག དཔེར་ན་ཁོང་རང་དོན་གཅོད་བསྐོ་བཞག་གནང་པ་དང་ཁོང་རང་གིས་མི་དམངས་ལ་ཁྱབ་བསྒྲགས་བྱེད་པ་རེད། དེ་བཞིན་ཁོང་རང་ལ་མི་དགའ་མཁན་དེ་ཚོ་ལ་ཁ་པར་བཏང་ཏེ་ང་ཡོབ་རོབ་གིས་དོན་གཅོད་བསྐོས་སོང་བའི་ཁྱེད་རང་ལ་གང་བྱེད་ཡག་ཡོད་ཟེར་ནས་ཁར་པར་གཏང་བ་སོགས་ནི་ཆེས་བྱེད་ལུགས་ཁན་ཚར་འདུག ཡིན་ན་ཡང་དེ་ཕྱོགས་ཡོད་པའི་བོད་རིགས་ཚང་མ་ནི་སྔར་ལས་ལྷག་པའི་ཁོང་ལ་རྒྱབ་སྐྱོབས་ཡོད་ས་འདུག སྐྱབས་བཅོལ་དང་པོ་ཡོང་མཁན་རྣམས་ལ་སློབ་གསོ་དང་རོགས་རམ་སོགས་ཧ་ཅང་གནང་མཁན་ཞིག་ཡིན་ས་འདུག རྒན་ལྷ་མོས་གསུང་པ་ལ་བདེན་པའི་ཁོང་ལ་རང་གཞུང་དང་ས་གནས་མི་དམངས་ཚང་མས་གུས་བརྩེ་ཡོད་པ་གསལ་པོ་ཡིན་པའི་དོན་དག་ཆུང་ཆུང་རིགས་ལ་མགོ་མི་འཁོར་བའི་རེ་བ་བཅས།།།
ལ་ལས་མི་སྒེར་བ་ཞིག་གི་གོ་གནས་ཙམ་ལ་ཁ་གཡར་ནས་བོད་གཞུང་དམངས་ལ་མཐོང་ཆུང་དམའ་འབེབས་བྱེད་པ་འདི་ཡག་པོ་རྩ་བ་ནས་མ་རེད།
ངའི་བསམ་ཚུལ་ལ་བཀའ་ཤག་གིས་ཐུབ་བསྟན་རྒྱ་མཚོ་ལགས་སྐུ་ཚབ་དོན་གཅོད་ཀྱི་གོ་སར་འཇོག་རྩིས་གནངས་པ་འདིས་ཁོང་ལ་ཧ་ཅང་མཐོང་ཆེན་བྱས་པ་ཞིག་མཐོང་སོང་ལ། མི་མང་པོ་ཞིག་ལ་ཡང་ཐུབ་བསྟན་རྒྱ་མཚོ་ཟེར་བའི་མི་འཇོན་པོ་ཞིག་ཡོད་པ་ཤེས་སུ་བཅུག་སོང། ཁོང་ཕྱིར་འཐེན་བྱས་པ་དེས་ཁོང་ནག་པོ་བཟོས་སོང་བ་གང་ཡང་ཡོད་མ་རེད། མ་གཞི་ནས་ཁོང་ཡར་སྤོར་མཁན་དེས་ཁོང་ཕྱིར་འཐེན་པ་ནི་ཧ་ཅང་འོས་པས་དེ་ལ་དགྲ་ལྟར་འཁོན་ཞིང་རྩོད་རྒྱུ་ཅི་ལ་ཡོད།
ངའི་རེ་བ་ལ་བོད་གཞུང་ལ་དགའ་ཞེན་གུས་བརྩི་ཡོད་མཁན་ཚོས། རང་གི་རྣམ་པར་རྟོག་པའི་འཆར་སྣང་ཁོ་ན་སྨྲས་ནས་མཐོ་རྒྱག་དམའ་རྒྱག་མ་གནང་རོགས།
དོན་གཅོད་ཀྱི་མཚན་དགོས་ན་་རྒྱབ་སྐྱོར་བཙལ་དགོས་རྒྱུ་འདུག་རྡ།
ཕྲན་ཡང་བོད་མིའི་སྒྲིག་འཛུགས་ཀྱི་ཁྱབ་འོག་ཏུ་ཡོད་ཕྱིར་ཚིག་གཅིག་ཞུ་དགོས་བྱུང་། ད་རེབ་ཀྱི་སྐུ་ཚབ་དོན་གཅོད་བསྐོ་བཞག་གནང་སྟངས་དེ་ནི་ཁྲིམས་ཀྱིས་དབང་བསྒྱུར་པའི་མང་གཙོའི་སྲིད་གཞུང་ཞིག་གི་འགྲོ་སྟངས་ལྟར་བརྒྱུད་རིམ་ཚད་ལྡན་གྱི་སྒོ་ནས་སོང་ཡོད་ཀྱང་། གློ་བུར་ཕྱིར་བསྡུ་བྱེད་སྟངས་དེ་ནི་དེ་ལས་ལྡོག་སྟེ་གནའ་བོའི་བཀས་བཀོད་བརྒྱུད་འཛིན་སྲིད་དབང་སྒེར་གཅོད་ཀྱི་ལམ་སྲོལ་དེ་དང་གཉིས་སུ་མེད་པ་ཞིག་ཆགས་འདུག གང་ལྟར་དོན་དག་འདི་མི་མང་དང་སྤྱི་ཚོགས་ལ་ཁ་གསལ་གཏིང་གསལ་གནང་དགོས་པ་གལ་ཆེ་བར་མཐོང་ངོོ།།
ངས་བསམ་ན། བྱེད་སྟངས་འདི་ནི་ནམ་རྒྱུན་ང་ཚོའི་ཁ་ལ་མ་ནི་འདོན་འདོན་བྱེད་བཞིན་པའི་ཡ་རབས་གོམས་གཤིས་དང་མཐུན་པ་ཞིག་ཡིན་པར་མི་འདོད་དོ།
བྱེད་སྟངས་འདི་ནི་ང་ཚོའི་སྤྱི་ཚོགས་ཀྱི་མཐོ་ས་དང་དམའ་ས་ཚང་མ་ན་ཡོད་པའི་ན་ཚོ་ངན་པ་རེད། ང་ཚོའི་མི་བུ་ལ་རྒྱ་ཅན་དང་ལྷག་བསམ་ཅན་རྣམས་ཀྱིས་འདི་དང་འདི་ལྟ་བའི་མཐོང་ཆུང་འཁུར་དགོས་ན། ང་ཚོའི་ནམ་རྒྱན་བཤད་བཞིན་པའི་དམ་ཚིག་དང་ལ་རྒྱ། མཐུན་འབ྄ེལ་དང་ཆིག་སྒྲིག་སོགས་ཇི་ལྟར་ཡོང་ཐུབ། ང་ཚོར་བཀའ་ཤག་གིས་གསལ་བཤད་མ་གནང་བར་དུ་བགྲོ་གླེང་བྱེད་དགོས། གསལ་བཤད་གནང་རྒ྄ུ་ནི་བཀའ་ཤག་གི་ལས་འགན་ཡིན་ལ། གཏམ་བརྗོད་རང་དབང་ནི་བཅའ་ཁྲིམས་ཀྱིས་མི་སེར་ལ་སྤྲད་པའི་ཐོབ་ཐང་ཡིན།
གནད་དོན་འདིའི་རིགས་གླེང་དུས། དོན་དངོས་གཞིར་བཞག་ནས་བསམ་ཚུལ་བཤད་རྒྱུ་ལས། ཞེ་དྲག་རྒྱབ་ལྗོངས་རྟོགས་ཁུལ་གྱིས་སྤྱིའི་བདེ་འཇགས་ལ་གནོད་གཞིའི་སྐད་ཆ་འདྲ་མིན་བཤད་ན་སྨྲ་བརྗོད་རང་དབང་གི་ཁྱབ་ཁོངས་ལས་བརྒལ་འགྲོ་གི་ཡོད་པ་རེད། མ་གཞི་ནས་གླེན་པ་ལུག་གི་སྐད་ཆར་རིག་པ་ཅན་རྣམས་འཐོམ་དུ་མི་བསམ་མོད། གཞི་རིམ་མི་མང་ཁྲོད་དཀྲོག་གཏམ་འགྲོ་ཉེན་ཆེ་ན་མདུན་རྒྱབ་གཡས་གཡོན་མཐོང་བའི་ཐོག་ནས་བཀའ་མོལ་གནང་རྒྱུ་གལ་ཆེན་རེད། སྐད་ཆ་འདིའི་རིགས་འདི་མིའི་བསམ་སྤྱོད་དང་འབྲེལ་བའི་ལོ་རྒྱུས་རང་བཞིན་ཅན་གྱི་བཀའ་མོལ་ཆགས་ཀྱི་ཡོད་སྟབས། གནས་སྟངས་མཁྱེན་པ་གནང་རྒྱུའམ་དཔྱད་པ་ཤེས་རབ་དང་ལྡན་པ་བྱས་ན་རང་གཞན་གཉིས་ཕན་ཡོང་གི་རེད།
ཐུབ་བསྟན་རྒྱ་མཚོ་བསྐོ་བཞག་བྱས་པའི་གནས་ཚུལ་དེ་བོད་མིའི་དབུས་སྒྲིག་ཚུགས་ཀྱི་དྲ་རྒྱའི་ནང་དུ་དངོས་སུ་ཁྱབ་བསྒྲགས་བྱས་པ་ངས་ཀྱང་བཀླགས་པ་ཡིན། སྐབས་དེར་ངས་ཁོ་སུ་ཡིན་མིན་དང་། གང་ནས་ཡིན་མིན། ལས་ཀ་གང་ཞིག་བྱེད་ཀྱི་ཡོད་མེད་ཞིབ་ཕྲ་མ་ཤེས་སྟབས་ངས་ཁོའི་སྐོར་ལ་ཏོག་ཙམ་དོ་སྣང་བྱས་པ་ཡིན།
དང་པོ་བཀའ་ཤག་ནས་སྐུ་ཚབ་ལ་བསྐོ་བཞག་བྱས་པ་དང་། དེ་ནས་ཕྱག་རྟགས་ཞུས་པ། ཐ་མར་དངོས་སུ་བསྐོ་བཞག་བྱས་ཏེ་ཕྱི་ ༦ ཚེས་ ༡ ལ་ལས་འཁུར་དགོས་པ་བཅས་ཡིག་ཐོག་ནས་བཀོད་ཁྱབ་བྱས་ཟིན།
ད་ལྟའི་ཆར་དེ་གཙི་མེད་བཏང་བ་ཡིན་ཞེས་བཤད་ན་དེ་ནི་ཕྲུ་གུ་ཆུང་ཆུང་ཞིག་གིས་རྩེད་མོ་རྩེད་པ་དང་འདྲ་པོ་ཆགས་ཡོད། རྒྱ་ནག་གུང་ཁྲན་འདི་ང་ཚོས་སྲིད་དབང་གཅིག་སྡུད་ཕྱི་གསལ་ནང་གསལ་མེད་པ་ཞིག་ཏུ་ངོས་འཛིན་བྱེད་ཀྱིན་ཡོད་ཀྱང་ཁོང་ཚོས་སོ་སོས་བདམས་པའི་ཏང་གི་ལས་བྱེད་ཚོར་ཁྲིམས་དང་སྒྲིག་གཞི་གང་ཡང་མེད་པར་རང་སྣང་གང་དྲན་འདི་ལྟ་བུ་ཞིག་རྩ་བ་ནས་བྱེད་ཀྱིན་མེད།
ཆབ་བྲག་ལྷ་མོས་བཤད་པ་ལྟར་གཞུང་འདི་དམངས་གཙོ་དང་དྲང་བདེན་ཕྱི་གསལ་ནང་གསལ་ཡིན་ན་གནད་དོན་དེ་ཚོ་ཕྱི་གསལ་ནང་གསལ་བྱེད་དགོས། ཐུབ་བསྟན་རྒྱ་མཚོས་ཀྱང་གནད་དོན་དེ་གསལ་པོ་ཡོང་ཐབས་བྱེད་དགོས། དེ་མིན་རྒྱ་གར་སོགས་ཀྱི་ཁྲིམས་ཁང་དུ་ཁྲིམས་གཏུགས་བྱས་ནའང་མ་འགྲིག་པ་ཁྱོན་ནས་མེད།
དེ་ནི་ཁྲིམས་དང་སྒྲིག་གཞི་མེད་པར་རང་སྣང་གང་དྲན་གྱི་བྱེད་སྟངས་ཞིག་ཡིན་པ་མངོན་བཞིན་འདུག ད་དུང་གནད་དོན་དེ་མ་འོངས་པར་སྐུ་ཚབ་སུ་ཞིག་བསྐོ་བཞག་བྱ་མིན་གྱི་དོན་དག་དང་མི་དེ་དང་ཡང་ནང་འབྲེལ་ལྐོག་འགྱུར་གྱི་འབྲེལ་བ་སོགས་ཡོད་མེད་དེར་ཐུག་ཡོད། མ་འོངས་པར་མུ་མཐུད་དཔྱད་ཞིབ་བྱེད་དགོས།
གོང་དུ་བཀའ་ཤག་དྲང་བོ་མི་འདུག་ཅེས་སྐད་ཆ་བཤད་མཁན་གྱི་མི་འདི་དག་གི་གྲས་ནས་སུས་ཐུབ་བསྟན་རྒྱ་མཚོའི་སྐད་ཆ་བཤད་སྟངས་དང་མི་ལ་འབྲེལ་བ་བྱེད་སྟངས་ཁོང་གི་མངོན་ཀློག་གི་ལོ་རྒྱུས་གང་ཡོད་སོགས་མདོར་ན་ཐུབ་བསྟན་རྒྱ་མཚོ་ག་འདྲ་ཡོད་མེད་གསལ་བོ་ཤེས་ནས་སྐད་ཆ་བཤད་མཁན་ག་ཚོད་གཅིག་ཡོད་དམ། ངས་བསམ་ན་གཅིག་དང་གཉིས་མ་གཏོགས་མི་འདུག ཕྲན་འདི་ཀ་ཧྥ་རེན་སུ་ན་ཐུབ་བསྟན་རྒྱ་མཚོ་དང་ལུས་དང་གྲུབ་མ་བཞིན་འགྲོག་ནས་སྡད་ཡོད། ཡིན་ཡང་ཁོང་སྐུ་ཚབ་དོན་གཅོད་དུ་བསྐོ་བཞག་བྱས་ཡོང་དུས་ངའི་བསམ་པར་བོད་མི་ས་ཡ་དྲུག་ལ་མི་འདི་ལྟ་བུ་ཞིག་ལས་དོན་གཅོད་དུ་བསྐོ་བཞག་བྱེད་རྒྱུ་མེད་སོང་ཚེ་དངོས་མ་བོད་རྒྱལ་ཁབ་ཆེན་པོ་རྫོགས་ཚར་འདུག་དྲེན་གྱི་འདུག་ལ་བོད་གཞུང་གིས་བོད་མི་ཤེས་ལྡན་པ་གསོ་སྐྱོང་བྱས་པ་འདང་མི་འདུག་ཀྱང་དྲེན་གྱི་འདུག ངས་འདིར་དྲ་གྲོགས་ཡོངས་ལ་ཞུ་རྒྱུར་བཀའ་ཤག་གི་ཐག་གཅོད་བྱེད་སྟངས་འགྲིག་ཡོད་མིན་ཅི་ལྟར་ཡང་དང་པོ་ཐུབ་བསྟན་རྒྱ་མཚོ་སྐུ་སྒེར་ལ་དོན་གཅོད་བྱེད་ཐུབ་པའི་ནུས་པ་འདུག་མི་འདུག་ཤེས་རྟོག་བྱེད་རྒྱུ་ཧ་ཅང་གལ་ཆེན་རེད་དྲེན་གྱི་འདུག བཀའ་ཤག་གི་བྱེད་སྟངས་འགྲིག་མི་འདུག་ཅེས་དོན་གཅོད་ནུས་མེད་གཅིག་བསྐོ་བཞག་བྱས་ཚེ་དེའི་མཇུག་འབྲས་བོད་མིའི་སྲིད་འབྱོར་རིགས་གསུམ་དང་འབྲེལ་བ་དམ་ཟབ་ཡོད་པ་ཞིག་ཡིན་པས་ཚང་མས་བསམ་བློ་གཏོང་རོགས་ཞུ། ཧྥ་རེན་སུའི་རྒྱལ་ས་ཕ་རེན་སུ་ནས།
ཆབ་བྲག་པ་མྱི་བཟང་ལ་བུད་འདུག གནས་ལུགས་ཀྱི་མདུན་ནས་ཀུ་ཡངས་བྱེད་པ་ནི་བླུན་རྟགས་རེད།
རྒྱལ་ཁབ་ཤོར་ན་ཡང་ཀུ་ཡངས་བྱེད། ཁྲིམས་མེད་ལུགས་མེད་བྱས་ན་ཡང་གུ་ཡངས་བྱེད། གོ་ས་འཕྲོགས་ན་ཡང་ཀུ་ཡངས་བྱེད། མི་རྩེད་མོ་རྩེད་བྱེད་བྱས་ན་ཡང་ཀུ་ཡངས་བྱེད། ཡོད་ཚད་ལ་ཀུ་ཡངས་བྱེད།
འདི་ནི་རྒྱ་གར་བ་ཚོས་བཤད་སྟངས་རེད། ཧོ་འཇའ་ཡེ་གྷ ཧོ་འཇའ་ཡེ་གྷ
ངོ་མ་རྡ་སའི་་བོད་སྡིག་འདི་ཚོ་ཁྲིམས་མེད་ལུགས་མེད། ངོ་ཚ་ཁྲེལ་མེད། ཉེ་རིང་ཆགས་སྡིང་།
ངས་བསམ་བློ་ཅི་ལྟར་བཏང་ཀྱང་ཐེངས་འདིར་ཐུབ་བསྟན་རྒྱ་མཚོ་ལགས་ཀྱི་ལས་གནས་གསར་བ་ཕྱིར་བསྡུ་བྱས་པ་འདི་དངོས་ཡོད་གནས་ཚུལ་དང་མཐུན་པ་འམ་དྲང་བདེན་གྱི་ལས་ཀ་ཞིག་ཏུ་མཐོང་གི་མི་འདུག གང་ཞེ་ན། ཉེ་སྔོན་མིང་འཁོད་ཡི་གེ་འགའ་སླེབས་པར་བརྟེན་ལས་གནས་ཕྱིར་བསྡུ་བྱས་པ་ཡིན་ཚུལ་བཤད་པ་རེད། ཁ་སང་བཀའ་དྲུང་མི་འགྱུར་རྡོ་རྗེ་ལགས་ནས་(བཅའ་ཁྲིམས་ལ་འགྱུར་བ་ཕྱིན་པ་དེས་དོན་གཅོད་གསར་བསྐོའི་བཀོད་རྒྱ་རང་བཞིན་གྱིས་ནུས་མེད་དུ་ཕྱིན་པ་ཡིན་ཞེས་བཀའ་ཕེབས་པ་རེད། དོན་རྩ་རྡོག་རྡོག་འདི་རེད།) སྐབས་འདིར་དྲི་བ་ཞིག་རང་བཞིན་གྱིས་སླེབས་པ་ནི། བཅའ་ཁྲིམས་འགྱུར་བ་བཏང་བ་དང་ལམ་སེང་བཀའ་ཤག་ནས་༧གོང་ས་མཆོག་གི་བཀའ་གསུང་བརྩི་མེད་རྡོག་རོལ་གཏོང་དགོས་དོན་ཡོད་དམ། བཀའ་ཤག་ནས་ལ་སྐུ་ཚབ་བསྐོ་བཞག་དང་ཕྱིར་བསྡུའི་སྐུ་དབང་ཡོད་ཐག་ཆོད་རེད་མོད། ཐུབ་བསྟན་རྒྱ་མཚོའི་སྐོར་ལ་གསལ་བཤད་ཅིག་མེད་པ་ཅིའི་ཕྱིར་ཡིན་ནམ། དང་པོར་ཡར་བསྐོ་མཁན་བཀའ་ཤག་རེད་ལ། ད་ལྟ་མར་གཡུག་མཁན་ཀྱང་སྔོན་མའི་བཀའ་བློན་དེ་དག་རང་འཇགས་རེད་མ་གཏོགས། བཀའ་བློན་རྣམ་པར་འགྱུར་བ་གང་ཡང་ཕྱིན་མེད།
བོད་གཞུང་ནི་ཕྱི་གསལ་ནང་གསལ་དང་། དྲང་པོ་དྲང་བཞག་ཞིག་ལ་ངོས་འཛིན་བྱེད་བཞིན་པའི་ང་ལ་མཚོན་ན་ཐེངས་འདིའི་བྱེད་སྟངས་འདི་བློ་ངོར་འཆར་དཀའ་བ་ཞིག་རེད། ད་དུང་ང་དང་ང་ལྟ་བུ་མང་དག་ཅིག་འདི་ལྟར་རྨོངས་ནས་བསྡད་ཡོད་པས། གསལ་བཤད་ཅིག་ཡོད་ན་ངེས་པར་དུ་གནང་རོགས།
གལ་ཏེ་མིང་འཁོད་ཡི་གེ་ཞིག་གི་ཁོང་དོན་གཅོད་ལ་འགྲིག་གི་མ་རེད་ཅེས་བརྗོད་པར་ནུས་པ་དེ་འདྲ་ཞིག་ཡོད་ཚེ། ངའི་མིང་དང་སྐྱེས་ཡུལ་ད་ལྟའི་སྡོད་གནས་ཁ་པར་ཨང་གྲངས་གློག་འཕྲིན་ཨང་གྲངས་བཅས་བཀའ་ཤག་ལ་བསྐུར་ཡོད་ལ། ཐུབ་བསྟན་རྒྱ་མཚོ་ལགས་སྦར་སིལ་སྐུ་ཚབ་དོན་གཅོད་ལ་ཧ་ཅང་འོས་པ་ཞིག་རེད་ཅེས་བརྗོད་མཁན་ཞིག་ཡིན་པས་དེ་དོན་དགོངས་འཇགས་ཡོད་པ་ཞུ།།
གོང་གི་མཆན་ནང་ལ། “རང་གི་རྨོངས་ཚོད་ཀྱིས་གནད་དོན་འདི་ལ་དབྱེ་ཞིབ་ཅིག་བྱས་ན། 1 ཐུབ་བསྟན་རྒྱ་མཚོ་སྐྱེས་ས་ནོར་བ། 2 ཐུབ་བསྟན་རྒྱ་མཚོར་སྐུ་དྲག་དང་མི་དྲག་གི་རྒྱབ་བརྟེན་མེད་པ། 3 ཐུབ་བསྟན་རྒྱ་མཚོའི་གཞུག་ན་ཆོལ་ཁ་དང་ཆོས་ལུགས་ཀྱི་དཔུང་རོགས་ཟེར་ནས་འཇིགས་ས་མེད་པ་བཅས་རེད་སྙམ” ཟེར་བའི་སྐད་ཆ་འདི་འདྲ་མ་བཤད་ན་བཟང། བཀའ་ཤག་གིས་ཐུབ་བསྟན་རྒྱ་མཚོ་ལགས་ཡར་བཀྱགས་ནས་མར་བརྡབས་དགོས་དོན་ཅི་ཡང་མེད། དེ་ལ་རྣམ་རྟོག་མ་ལངས།
དེའི་སྐོར་ཐུབ་བསྟན་རྒྱ་མཚོ་རང་ཉིད་ནས་ཀྱང་མདོ་སྨད་ཀྱི་གནད་ཡོད་མིསྣ་གང་མང་འཛོམས་ཐོག་ཅིག་ལ་གསལ་བཤད་ཆ་ཚང་གནངས་སོང། དེ་རྗེས་མདོ་སྨད་དབུས་རྒྱུན་ལས་ཀྱི་མི་དང། ཡང་མདོ་སྨད་སྤྱི་འཐུས་ཀྱི་ཚབ་བྱས་ནས་རྒྱལ་རོང་ཟླ་བ་ཚེ་རིང་ལགས་ཀྱང་བཀའ་ཁྲིའི་དྲུང་དུ་བཅར་བ་རེད། བྱེད་དགོས་ས་ནས་བྱེད་འོས་པ་ཚང་མ་བྱས་ཟིན་པ་རེད། ད་དོན་དག་འདི་རྒྱུ་མ་ཕུ་འདེད་མ་བྱས་པར་འདི་ལྟར་བཞག་བཞག་ན་དགའ་ས་རེད་སྙམ།
ཐུབ་བསྟན་རྒྱ་མཚོ་ལགས་བླ་ཕམ་ཡོད་པ་ཐུགས་ཁག་མེད་ཀྱང་བཀའ་ཁྲི་ལ་དངོས་སུ་མཇལ་ནས་ནང་གཏམ་ཡང་གསུངས་ཡོད་པས། ད་བསམ་བློ་ཀུ་ཡངས་གནང་ནས་མུ་མཐུད་སྔར་ལྟར་ཕྱག་ལས་གནང་རོགས་ཞུ་གིན་ཡོད།
འོ་ཡ།་་་་ད་ཡིན་ན།་་་་་་་་་་་་་་ངོ་ཚ་ལ།་་་་་་་་ཞབས་འདྲེན།་་་ཐུབ་བསྟན་རྒྱ་མཚོ་ལྟ་བུ་མི་སྒེར་ཕལ་པ་ཞིག་ལ་མགོ་བསྐོར་དྲ་མ་བཏང་འདུག་་་་་དང་པོ་སྐུ་ཚབ་དོན་གཅོད་ལ་བསྐོ་བཞག་བྱས་པ་ཡིན་ཞེས་བཀོད་རྒྱ་བཏང་།་་་ཟླ་ཤས་ཕྱིན་རྗེས་བཀོད་རྒྱ་དེ་ནུས་མེད་ཡིན་ཞེས་ཡི་གེ་བཏང་།་་་་་ཁོ་པའི་བཀོད་རྒྱ་རྒྱུ་མཚན་གང་གི་ཆ་ནས་ནུས་མེད་སོང་བ།་་་་གཞན་གྱི་དཀྲོག་གཏམ་མམ།་་་ཡིག་འཁྱམ།་་་་་་་གང་ཡིན་རུང་།་་བཀའ་ཤག་ཐག་གཅོད་བཀའ་ཤག་ཐག་གཅོད་ཅེས་ཟེར་ནས་ཁ་གཡར་ཡོང་དུས།་་་དོན་ངོ་མ་བཀའ་ཤག་ཚོགས་ཡོང་སྐབས་དེ་དུས་ཚོགས་འདུའི་སྟེང་ཁ་སྒྲག་ཐུབ་མཁན་བཀའ་བློན་རེ་གཉིས་ཀྱི་ཁ་ཤུགས་ཆེ་ཆུང་ལ་ཐག་གཅོད་བྱས་སོང་ཟེར་གོ་རྒྱུ་འདུག་་་རེད་མ་རེད།་་་ད་ཕན་ཁྱེད་ཚོད་ལོ་ལྔ་བསྟུད་མར་ཐག་གཅོད་དེ་འདྲ་བྱས་འདུག་པ།་་་ད་ཁྱེད་ཚོར་ག་ལེར་ཕེབས་ཟེར་རན་འདུག་་་ད་ལྟ་ནས་འགྲོ་རྩིས་བྱས་ན་སྟབས་ལེགས།་་་་་་་་་གང་མགྱོགས་སྡུབ་སོག་རྒྱབ་ཨ།་་་་ད་དུང་ཡང་མུ་མཐུད་བཀའ་བློན་ཐོབ་ཐབས་ཀྱི་རེ་བར་བཅང་ཏེ་རྡ་ས་གངས་སྐྱིད་ཉེ་ཁོར་ན་མ་བསྡད་ཪོགས་ཨ་།།།།།་་ཨེ་གོ།།།།།།།།།།།།
ད་ང་ཚོའི་འབངས་མི་སེར་གྱི་ཕྱོགས་ནས་ཅི་ཞིག་ལྷག་འདུག་ཟེར་ན། ཐུབ་བསྟན་རྒྱ་མཚོ་ཞུ་བ་ཁོང་ང་ཚོའི་འབངས་མི་སེར་ཞིག་ཡིན་པ་དང་། ནམ་རྒྱུན་ལས་དོན་ལ་ཧུར་ཐག་བྱེད་མཁན་ཞིག་ཡིན་པའི་ཆ་ནས། ཁོང་གི་མདུན་ལམ་ལ་མིང་ཤོས་ངན་བཟོས་པའི་གྱོང་གུད་ལ་བོད་གཞུང་བཀའ་ཤག་གི་ངོས་ནས་རྩིས་ཇི་ལྟར་རྒྱག་མིན་ལ་བལྟ་རྒྱུ་དེ་རེད།
འདི་ལྟར་གནམ་ལ་བཀྱགས་ནས་སར་གཡུགས་རྗེས་ད་དུང་དགོངས་དག་ཙམ་ཡང་ཞུ་རྒྱུ་མེད་པར་སབ་སིབ་དང་ནག་ནོག་གི་ངང་ནས་དུས་གཏན་ཏུ་སྐྱུར་མི་ཉན་པ་དེ་རེད། ངས་འདི་ཟེར་དོན་ནི་ང་དང་ཐུབ་བསྟན་ཞུ་བའི་བར་ན་འབྲེལ་བ་སྤུ་ཙམ་ཡོད་ན་སྲུང་མ་དམར་ནག་གཉིས་དཔང་ལ་འཇོག་ཆོག ངས་རང་རེའི་གཞུང་གི་དྲང་བདེན་དང་དགྱ་ནག་ལ་ངོ་ཚ་ཁ་སྐྱེངས་མི་ཡོང་ཆེད་ཡིན། ངེས་པར་དུ་འདི་ལ་དཀར་སིང་སིང་གི་གསལ་བཤད་ཅིག་མེད་རག་བར་ཅི་དགར་མི་འཇོག
འོ་ད་དུང་ཡིད་སྐྱོ་བའི་དོན་དག་ཅིག་བཤད་ཡ་ཡོད།
་ཧྥ་རིན་སིའི་ན་ཡོད་པའི་ནམ་རྒྱུན་བོད་གཞུང་ལ་བློ་དཀར་བ་བོད་རིགས་ཁ་ཤས་ནས་གནས་ཚུལ་འདིའི་རྐྱེན་པས་རང་བཙན་ལག་དེབ་དོན་གཅོད་ཁང་ལ་ཕྱིར་རློགས་བྱེད་གི་ཡིན་ཟེར། འདི་འདྲ་མང་དུ་སཽང་ན་བཀྲ་མཐོང་གིས་བཤད་པ་ལྟར་གུད་པའི་མགོ་ཚུགས་པ་རེད་ཟེར་བ་བདེན་པ་འདྲ་བོ་མི་འདུག་གམ།
ཐེངས་འདིའི་བཀའ་ཤག་གི་བྱེད་སྟངས་དེ་ཁྱད་མཚར་ཞིག་ཏུ་སྣང། ཡིན་ནའང་གཞུང་གི་འཛིན་སྐྱོང་གི་འགྲོ་ལུགས་དང་བྱེད་སྟངས་ཞིག་ཡིན་གྱི་རེད། གལ་སྲིད་མི་སྒེར་འགའི་འདྲ་མི་འདྲ་བཤད་པ་དང་སྙན་ཞུ་ཕུལ་བ་འདིས་བཀའ་ཤག་གི་སྲིད་བྱུས་ལ་འགྱུར་བ་གཏོང་གི་ཡོད་ན་། དེ་ངོ་མ་མི་འགྲིག་པ་ཞིག་རེད། རྒྱུ་མཚན་དང་གནས་ལུགས་སོགས་ཀྱི་སྒོ་ནས་འགྲེལ་བཤད་གསལ་པོར་མི་བྱེད་ན། མི་མང་དཀྱུས་མའི་ནང་དུ་བསམ་ཚུལ་འདྲ་མིན་ཡོང་བཞིན་ཡོད་པས་ཡིད་གཟབ་གནང་རོགས།
བཅའ་ཁྲིམས་འགྱུར་བ་སོགས་ལ་ཁ་གཡར་ནས་འཛིན་སྐྱོང་ནང་འདྲ་མི་འདྲ་བྱེད་ན་མི་འགྲིག་པ་ཡིན།
འདི་ནི་དེ་སྔོན་ལོ་མང་རང་ཧྥ་རིན་སིའི་བོད་རིགས་ཚོགས་པའི་ཚོགས་གཙོ་བྱེད་མྱོང་བའི་ཀུན་བཟང་ཆོས་འཕེལ་ཕྱོགས་ཀྱིས་ཀུན་ཆོས་ཁོ་བ་ཚོགས་གཙོ་ལག་ནས་ཤོར་བའི་ནད་དུག་མ་ཁྱོགས་ནས་ཡར་འཀྲིག་མར་འཀྲིག་བྱས་པ་རེད། གནད་དོན་འདི་དག་པ་ཅིག་འཇོག་ཚུལ་མེད།
བཀའ་ཤག་གིས་ཐུབ་བསྟན་རྒྱ་མཚོའི་མཚན་སྙན་གྱོང་གུད་ལ་ཅི་བྱེད་གི་ཡིན།
ཅི་ཕྱིར་ཐུབ་བསྟན་རྒྱ་མཚོར་དགོངས་སེལ་མ་ཞུས་བ་རེད།
བཅའ་ཁྲིམས་ལ་འགྱུར་བ་ཕྱིན་པ་དེས་དོན་གཅོད་གསར་བསྐོའི་བཀོད་རྒྱ་རང་བཞིན་གྱིས་ནུས་མེད་དུ་ཕྱིན་པ་ཡིན་ཞེས་བཀའ་ཕེབས་པ་རེད། དོན་རྩ་རྡོག་རྡོག་འདི་རེད། ཞེས་བ་འདིའི་དོན་ཅི་རེད། སྐུ་སྒེར་ཡིག་ཚང་དང་བཀའ་ཤག་བར་གི་འགལ་བ་ཞིག་རེད་དམ། བཅའ་ཁྲིམས་ལ་འགྱུར་བ་བཏང་མ་ཐག་བཀའ་ཤག་གིས་ཐུབ་བསྟན་རྒྱ་མཚོའི་ཐོག་ནས་སྐུ་སྒར་ཡིག་ཚང་ལ་དབང་ཤུགས་ཅིག་བསྟན་པ་རེད་དམ། དེ་ཡིན་ནི་ཚབ་ཆེན་རེད།
གནད་དོན་འདི་ནི་བྱིས་པའི་རྩེད་མོ་རྩེ་སྟངས་ཤིག་ལས། གཞུང་ཞིག་གིས་ལས་ཀ་བྱ་སྟངས་ཤིག་ཡིན་པར་མི་འདོད་དོ། ཐུབ་བསྟན་རྒྱ་མཚོ་ལྟ་བའི་མི་བུ་ལྷག་བསམ་ཅན་རྣམས་ཀྱི་སེམས་ཤུགས་གཅོག་རྒྱ་སྟེ། གཞུང་གི་ལས་ཀྱི་སྣེ་མོ་རྣམས་ཀྱི་ལས་ཀ་རེད་དམ། ཕྱི་རྒྱལ་དུ་ཡོད་པའི་བོད་མིའི་ཁྲོད་དུ་བོད་དོན་ཁ་ནས་གླེང་མཁན་མང་བ་ལས།
ཁོང་ལྟ་བའི་ལས་དོན་ཁུར་དུ་ལེན་མཁན་གྱི་མི་བུ་དྲང་ཚིགས་ཅན་ཧ་ཅང་ཉུང་ཉུང་ཡིན་པ་དངོས་ཡོད་གནས་ཡིན་དུས། ཡག་པོ་རེད། རང་གཞུང་གི་ལས་སྣེ་བ་རྣམས་ཀྱིས་རང་གི་མི་དམངས་ནང་གི་དྲག་ཤོས་དང་འཇོན་ཤོས་ཚོར་དམའ་ཕབས་ཏེ་ཡར་ལངས་རྒྱ་མེད་བཟོས་ཤོག
བཀའ་དྲུང་ཡིག་ཚང་གི་གསལ་བཤད་དེ་ནི་བྱིས་པ་ལ་མགོ་སྐོར་བའི་སྐད་ཆ་ལྟ་བུ་ཞིག་རེད། རྒྱུ་མཚན་དང་གསལ་བཤད་ཐབ་ཆགས་འདི་ལྟ་བུ་ཞིག་གིས་མི་མང་གི་ཁ་བཙུམ་དུ་འཇུག་འདོད་པ་ནི་ཆེས་ཡིད་ཕམ་པ་ཞིག་རེད།གསར་འགོད་པས་བཀའ་ཤག་རང་ལ་དྲི་བ་འདི་འདྲི་ཐུབ་ན་ཧ་ཅང་ལེགས།
ང་བཙན་བྱོལ་བོད་མིའི་སྒྲིག་འཛུགས་ཀྱི་འབངས་མི་ཞིག་ཡིན་པའི་ཆ་ནས། འདི་ལ་སྐད་ཆ་ཞིག་མི་བཤད་ཐབས་མེད་ཆགས་སོང་།
ད་ལོའི་དམིགས་བསལ་ཚོགས་ཆེན་གྱི་སྔ་གཞུག་དེར་གཏམ་ངན་འདི་ས་ཁྱབ་རྡོ་ཁྱབ་ཏུ་འགྲོ་ཡི་འདུག ཚོགས་ཆེན་ཉིན་གཉིས་པའི་དགོང་མོར་མདོ་སྨད་ས་གནས་ཀྱིས་ཚོགས་བཅར་བ་ཚང་མར་ཞལ་ལག་སྟབས་བདེ་ཞིག་དྲངས་པའི་ཐོག་ལ་ཐུབ་རྒྱམ་ཁོང་ཡང་ཕེབས་འདུག་ལ། ཁོང་གིས་ཀྱང་གོ་སྐབས་དེ་བརྒྱུད་ནས་གནད་དོན་འདིའི་བྱུང་རིམ་འཁྱུག་ཙམ་ཞུས་སོང་།
དེའི་རྗེས་དུས་བབ་ཏུ་འདིའི་སྐོར་གྱི་གསལ་ཁ་མེད་པའི་གསར་འགྱུར་ཞིག་ཐོན་སོང་ཡང་། ཤ་མ་ཚེས་སར་བློ་འབུར་འབུར་བྱས་ན་མི་ཡག་བསམ་ནས་བསམ་ཚུལ་སོགས་གང་ཡང་བྲིས་མེད། ད་ཐེངས་ཀྱི་གསལ་ཁ་མེད་པའི་གསལ་བཤད་འདིས་མི་ཚེའི་ཕྱེད་ཀར་ཡིད་ཆེས་དང་རེ་བ་འཛིན་སའི་རང་གི་གཞུང་འདིའི་དེ་ཉིད་ཏོག་ཙམ་རྟོགས་སུ་བཅུག་སོང་། ཞོར་དུ་བློ་ཕམ་ཡང་ཅུང་ཟད་སྐྱེ་རུ་བཅུག་སོང་།
རང་གི་རྨོངས་ཚོད་ཀྱིས་གནད་དོན་འདི་ལ་དབྱེ་ཞིབ་ཅིག་བྱས་ན། 1 ཐུབ་བསྟན་རྒྱ་མཚོ་སྐྱེས་ས་ནོར་བ། 2 ཐུབ་བསྟན་རྒྱ་མཚོར་སྐུ་དྲག་དང་མི་དྲག་གི་རྒྱབ་བརྟེན་མེད་པ། 3 ཐུབ་བསྟན་རྒྱ་མཚོའི་གཞུག་ན་ཆོལ་ཁ་དང་ཆོས་ལུགས་ཀྱི་དཔུང་རོགས་ཟེར་ནས་འཇིགས་ས་མེད་པ་བཅས་རེད་སྙམ།
གཞན་ཞིག་ནས་ད་བར་༸གོང་ས་མཆོག་ཁ་ལ་འཁྱེར་ནས་ལག་ཟུང་ཐལ་མོ་སྦྱོར་བཞིན་ལས་ཀ་བྱེད་མཁན་གྱི་ལས་ཐོགས་བཀའ་བློནས་ཕྱག་རོགས་ལས་ཀྱི་སྣེ་མོ་བ་འདི་དག་གིས་༸གོང་ས་མཆོག་གིས་ཕྱག་རྟགས་གནང་ཟིན་པའི་དོན་གཅོད་གསར་བ་ཁོང་ལས་གནས་ལ་མ་སླེབས་གོང་ཕྱིར་བསྡུ་བྱེད་སྟངས་འདིར་ང་རང་མི་ཆུང་ཆུང་ཞིག་གི་ངོས་ནས་ཧང་སངས་སོང་། དོན་དངོས་ཀྱིས་སྲང་ལམ་གྱི་སྤྲང་སྐད་ཙམ་ལ་ཆ་འཇོག་བྱས་པ་བདེན་ནམ། མི་བུ་སྒེར་ཞིག་འདི་ལྟར་རྩེད་སྤྱད་བྱས་ནས་རང་གི་འབངས་དང་མི་སེར་དག་གི་ཡིད་ཆེས་བརླག་ཏུ་བཅུག་པ་ཡིན།
གནད་དོན་འདི་ལ་རྒྱུ་མ་ཕུ་འདེད་ཅིག་བྱེད་རྒྱུ་ཡོད་ལ། མུ་མཐུད་ནས་གླེང་སློང་མཚམས་མི་འཇོག་པའི་དམ་བཅའ་ཡང་ཡོད། སྔོན་ཆད་རང་ཉིད་ལ་ལོ་ངོ་བཅུ་གཅིག་གི་བརྒྱུད་རིམ་ནང་དུ་གཞུང་ངོས་ནས་འདི་འདྲའི་བློ་ཕམ་བྱེད་ཀྱི་དོན་དག་རེ་གཉིས་བྱུང་མྱོང་ཡང་། དེ་ནི་གཞུང་ཞིག་གི་ལས་དོན་ལ་ཆ་འཇོག་གིས་རེ་བ་དང་ཡིད་ཆེས་བརླགས་མ་མྱོང་ཡང་། ད་རེའི་གནས་ཚུལ་འདི་དང་འབྲེལ་ནས་ཤིན་ཏུ་བློ་ཕམ་བྱུང་སོང་ཞུ་ལ། མུ་མཐུད་ནས་གནད་དོན་འདི་གླེང་རྒྱུའི་བསམ་བློ་ཞིག་ཀྱང་འཁོར་བྱུང་།
དྲང་བདེན་གྱི་ཆེད་དུ།
རང་དབང་གི་ཆེད་དུ།
དྲན་དབང་དང་དྲང་བདེན་པ་དག་གི་དཔྱད་ཞིབ་ལ་སྒུག་ཡོད།
བཀའ་ཤག་གིས་སྐུ་དབང་བེད་སྤྱོད་ཇི་ལྟར་བྱེད་ཀྱི་ཡོད་མེད་ཀྱི་རྒྱུ་མཚན་དེ་ལ་དྲི་བ་གཏོང་སའི་གཞི་རྩ་ཞེ་དྲག་ཡོད་པ་མ་རེད། ངོ་མ་བཀའ་བཙན་པོ་རེད།
ཐེངས་འདིར་བཀའ་ཤག་ནས་ཡིག་འཆར་ཁ་ཤས་ཤིག་ལ་གཞི་བཅོལ་ནས་ཐུབ་བསྟན་རྒྱ་མཚོ་ལགས་ཀྱི་ལས་གནས་ཕྱིར་བསྡུ་བྱས་པ་དེ་དོན་དངོས་དང་མཐུན་པ་ཞིག་ཏུ་མཐོང་གིན་མེད། གང་ཞེ་ན་ཐུབ་བསྟན་རྒྱ་མཚོ་ལགས་བོད་རིགས་ཚོགས་པའི་ཚོགས་གཙོ་གནང་སྐབས་རང་ཉིད་ཀྱི་ཉེན་ཁར་མ་འཛེམས་པར་དོལ་རྒྱལ་ཚོགས་པར་དངོས་སུ་ཁ་གཏད་གཅོག་བཞིན་ཡོད། དཔེར་ན་ཧྥ་རན་སིར་གསར་དུ་འབྱོར་བ་ཚོས་ཁོང་གི་ས་ནས་རང་ཉིད་བོད་ཡིན་པའི་རྒྱབ་གཉེར་ཡིག་ཆ་ཞིག་ལེན་བཞིན་ཡོད་ལ། ཡིག་ཆ་དེ་སྐྱབས་བཅོལ་ཞུ་བར་ཕན་ཐོགས་ཆེན་པོ་ཡོད། ཁོང་གིས་མི་རེ་རེའི་གདོང་ལ་མཛུམ་མོ་བཙུགས་སྟེ་གདོན་འདྲེ་བསྟེན་གསོལ་མཁན་ཡིན་མིན་འདྲི་བཞིན་ཡོད། དེར་བརྟེན་དོལ་རྒྱལ་བསྟེན་མཁན་དག་ལ་ཕོག་ཐུག་ཆེན་པོ་བཏང་ཡོད། འདི་ཡིག་འཆར་སྣ་ཚོགས་ཡོང་སྲིད་པའི་རྒྱུ་མཚན་གཅིག་རེད། ཡང་ཧྥ་རན་སིར་གནས་སྡོད་ཁྲོད་བཟའ་ཟླ་མགོ་སེར་ཡིན་པའི་བོད་རིགས་ཁག་ཅིག་གིས་དོན་གཅོད་ལ་སྡོད་རྒྱུའི་རྨི་ལམ་ཞིག་རྨི་བཞིན་ཡོད་ལ། དེའི་ཁྲོད་ཀྱི་ཁ་ཤས་ཤིག་གིས་བོད་དོན་རྒྱབ་སྐྱོར་ཚོགས་པའི་ནང་དུ་ལས་ཀ་བྱེད་བཞིན་ཡོད། དེ་ཡིག་འཆར་འདྲ་མིན་ཡོང་བའི་འབྱུང་ཁུངས་གཉིས་པ་རེད། གོང་དུ་བཀའ་དྲུང་ལགས་ནས་སྐུ་དབང་ཕྱིར་བསྡུ་བྱས་པར་ཁ་གཡར་བ་ནི་དགོད་བྲོ་བ་ཞིག་རེད། འོ་ན་སྐུ་དབང་ཕྱིར་བསྡུ་སྐབས་དོན་གཅོད་གཞན་པ་ཁག་ཀྱང་ཕྱིར་བསྡུ་བྱ་དགོས་མོད། དེ་ལྟར་མ་བྱུང་བ་རེད། གང་ལྟར་ཐེངས་འདིའི་གནས་ཚུལ་འདི་ཁ་གསལ་གཏིང་གསལ་ཞིག་མ་བྱས་ཚེ་གཞུང་མང་བར་གྱི་ཡིད་ཆེས་དང་དམ་ཚིག་ལ་ཕོག་ཐུག་ཆེན་པོ་འགྲོ་སྲིད་པ་ཞིག་རེད།