གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་གཅིག

གཞུང་ཚབ་ཀྱི་ལས་བྱེད་པའི་ཉིན་གུང་གི་བར་གསེང་བཞག་སྟབས། ཕྱི་དྲོ་ཆུ་ཚོད་གསུམ་པ་བར་དུ་སྒུག་དགོས་པའི་བརྡ་སྤྲད་བྱུང་། གང་ལྟར། ངེད་གཉིས་ཀྱིས་འདི་ནས་སྒུག་རྒྱུ་ལས་ཐབས་གཞན་མེད་པར་གྱུར། སང་ཉིན་གཟའ་སྤེན་པ་ཡིན་སྟབས། ཉིན་གཉིས་རིང་གུང་གསེང་རེད། ཉིན་གཉིས་ཀྱི་རྗེས་སུ་གཟའ་ཟླ་བ་སྤྱི་ཟླ་དགུ་བའི་ཚེས་བརྒྱད་ཉིན་ཆགས་ཡོད། ང་རང་གི་གནམ་གྲུ་འཕུར་བའི་ཉིན་རེད།

ཁ་སང་ཕྱི་དྲོ་ངེད་གཉིས་ཀྱིས་ཁོ་མོའི་གྲོགས་མོས་བཤད་པ་ལྟར། གཉེན་རྟོག་ལས་ཁུངས་ཀྱི་ཡི་གེ་མེད་པར་ཨེས་སུ་རལ་དུ་འབྱོར་ན་ཐབས་ཤེས་འཐེན་ཐུབ་ཀྱི་ཡོད་པ་ཡིད་ཆེས་བྱས་ནས་ངེད་གཉིས་ཀྱིས་སེམས་ཐག་བཅད་དེ་གཉེན་རྟོག་ལས་ཁུངས་ཀྱི་ཡི་གེ་མ་བླངས་པར་འགྲོ་རྒྱུ་བྱས་པ་ཡིན།

བསམ་ཡུལ་ལས་འདས་པ་ཞིག་ལ་གཞུང་ཚབ་ཀྱིས་ལས་བྱེད་པའི་ངེད་གཉིས་ལ་ཕྱི་བསྐྱོད་ལག་ཁྱེར་ཡུན་རིང་སྒུག་དུ་མ་བཅུགས་པར་སྤྲད་སོང་། དེ་ནི་གཏམ་བཟང་རེད། ངེད་གཉིས་ལ་མཚོན་ན་གཏམ་བཟང་རེད། ཐོངས་ཆེན་རེག་པ་དང་ངེད་གཉིས་ཀྱི་གདོང་ན་ཐུན་མོང་མ་ཡིན་པའི་འཛུམ་མདངས་ཤིག་རྒྱས་འདུག ཉི་མ་དེར་ངེད་གཉིས་ཀྱི་ཅ་ལག་མང་བོ་ཞིག་ཉོས་པ་ཡིན། ཚང་མ་མོ་རང་གི་སྒོར་མོ་རེད། ངས་བསམ་བློའི་ནང་དུ་ཐོངས་ཆེན་རེག་པ་ནི་དེ་འདྲའི་ལས་སླ་བོ་ཞིག་ཡོད་སྣང་སྐྱེ་མྱོང་མེད། གྲོགས་པོ་ངོ་ཤེས་མང་བོ་ཞིག་ལ་ཐོངས་ཆེན་མ་རེག་པར་དཀའ་ངལ་མང་བོ་རྒྱུད་མཐར་རེག་གི་ཡོད་པའི་སྐོར་ཐོས་པ་ལས། འདི་འདྲའི་སྟབས་བདེ་མོ་ཞིག་རེག་པ་ནི་དངོས་ནས་ལམ་འགྲོ་རེད་ཟེར་དགོས་པ་ཡིན་ནམ། ཡང་ན། དོན་དག་གཞན་ཞིག་གིས་ཤུགས་རྐྱེན་ཡིན་ནམ། རྗེས་སུ་མ་གཏོགས་ཤེས་མི་སྲིད།

དགོང་མོ་དེར་ང་རང་གི་བརྩེ་བའི་སྤུན་མཆེད་ཅིག་ཨ་རིའི་བུད་མེད་ཅིག་དང་འགྲོགས་ནས་ཨ་རིར་སོང་ནས་ཡུན་རིང་མ་སོང་བ་ཞིག་ཡོད་པ་དེ་ཡི་ཁ་པར་ཨང་གྲངས་ང་ཡི་ལག་དུ་ཡོད་དུས། ངས་རང་གི་དོན་དག་ཆེས་མི་ཉུང་བ་ཞིག་ཁོང་ལ་ནམ་ཡང་གསང་མྱོང་མེད། དེ་ཡིན་དུས་ངས་ཁོང་ལ་ཁ་པར་བརྒྱབས་ནས་ང་རང་ལ་ཨེས་སུ་རལ་གྱི་བུད་མེད་ཅིག་དགའ་རོགས་ཡོད་པ་དེ་དང་འགྲོགས་ནས་ཨེས་སུ་རལ་དུ་མི་རིང་བར་འགྲོ་བཞིན་ཡོད་ཅེས་བཤད་དུས། ཁོས་རེད་རེད། བཟང་གི སོང་ནས་ལྟད་མོ་ཞིག་བལྟས་ན་འགྲིག་གི་རེད། གོ་ཐོས་སུ་རྒྱལ་ཁབ་དེར་དངོས་ནས་ལས་སླ་བོ་མེད་ཚུལ་འདུག གང་ལྟར། ཉམ་མྱོང་ཞིག་གསོག་དུ་སོང་ན་བཟང་གི་རེད་ཅེས་གསུངས་སོང་།

ང་རང་ལ་ཐོངས་ཆེན་རེག་ཡོད་ལ། གནམ་གྲུའི་འཛིན་བྱང་ཡང་ཡོད། ཡིན་ཡང་། ང་རང་གནམ་ཐང་ནས་གནམ་གྲུའི་ནང་དུ་རང་ཉིད་གཅིག་བུ་འགྲོ་དགོས། རྒྱལ་ཁབ་གཞན་ཞིག་ལ་ནམ་ཡང་འཕུར་བསྐྱོད་བྱེད་མྱོང་མེད་པའི་ང་ལ་མཚོན་ན་སེམས་པ་ཅུང་བདེ་མོ་ཞིག་མིན་ན་ཡང་། རང་གིས་འགོ་ལ་འབབ་པའི་ལས་ལ་རང་ཉིད་ཀྱིས་དང་དུ་མི་ལེན་ཐབས་མེད་ཡིན་དུས། མོ་རང་གི་གནམ་གྲུ་བྷང་བྷེ་ནས་འཕུར་གྱི་ཡོད་སྟབས། མེ་འཁོར་མགྱོགས་ཤོས་དང་བཟས་ཤོས་ཤིག་གི་འཛིན་བྱང་ཉོས་ཡོད། ངས་མོ་རང་ལྡི་ལུ་གསར་བའི་མེ་འཁོར་ས་ཚིགས་དུ་བསྐྱལ་བ་ཡིན། མོ་རང་གིས་ང་ལ་དོན་དག་འདྲ་བྱུང་ཚེ། ང་རང་ལ་ཁ་པར་གཏོང་ཤོག དེ་རིང་སང་ཉིན་གཉིས་ཀྱི་མགྲོན་ཁང་གི་རིན་སྤྲད་ཡོད་པ་རེད། དོ་ནུབ་དང་སང་ཉིན་གཉིས་ལ་ཟ་མ་ཟ་བྱེད་དངུལ་ཞིག་ཁྱེད་རང་གི་ལག་པར་ཡོད་པ་དེ་རེད། གནམ་གྲུའི་ནང་དུ་ཟ་མ་ཡོད་པ་རེད།

རྒྱ་གར་ནས་རྗོར་རྡན་དུ་སླེབས་ན་ཆུ་ཚོད་བཅུ་ལ་འདུག་གི་རེད། དེ་ནས་ཁྱེད་རང་ལ་མགྲོན་ཁང་ཡོད་པ་རེད། ཟ་མ་ཡང་ཡོད། མགྲོན་ཁང་ངལ་གསོ་རྒྱགས་ས་ཡང་ཡོད། དེ་ཡིན་དུས་ད་ཁྱེད་རང་ལ་སྒོར་མོ་དགོས་དོན་མེད། ཁྱེད་རང་ཨེས་སུ་རལ་གྱི་གནམ་ཐང་དུ་འབྱོར་ན་ཁྱེད་རང་ལ་རྒྱ་གར་དུ་ཐུག་མྱོང་བའི་ང་རང་གི་ཚ་མོ་རྒ་ལས་ཡ་གནམ་ཐང་དུ་ཁྱེད་རང་བསུ་རུ་ཡོང་ངེས་ཡིན། གནམ་ཐང་ནས་ང་རང་ལ་སྒུག་ནས་བསྡོད་དང་། ང་རང་ཁྱེད་རང་འབྱོར་རྗེས་ཀྱི་ཆུ་ཚོད་བརྒྱད་ཀྱི་རྗེས་སུ་སླེབས་ངེས་ཡིན་ཞེས། མ་ཞིག་གི་རང་གི་བུ་ལ་ཁ་ཆེམས་འཇོག་པ་ལྟར། སྐད་ཆ་དེ་དག་མེ་འཁོར་འགྲོ་ལ་ཉེ་བའི་མཚམས་སུ་གཅིག་འཕྲོར་གཅིག་བྱས་དེ་བཤད་སོང་།

ཕྱི་དྲོ་ང་རང་མ་ཅང་ཀྲེ་ལའི་འགྲམ་གྱི་རྒྱ་གར་ཚོང་ར་དེ་ནས་ལག་རྟགས་ཁ་ཤས་ཤིག་དང་མོག་ཚགས་ཆུང་ཆུང་ཞིག་ཉོས། དགོང་མོ་ཨ་མ་དབྱངས་ལྷའི་ནང་དུ་ཟ་མ་ཟ་བར་སོང་། དེའི་རྗེས་སུ་གནམ་ཐང་ནས་མི་ཞིག་གི་ཅ་ལག་ག་ཚོད་འཁུར་ཆོག་གི་ཡོད་མེད་སྐད་ཆ་གསལ་བོ་ཞིག་དྲིས་དུས། རྒྱལ་ཁབ་རེ་རེ་ལ་མི་རེ་ཡི་སྤྱི་རྒྱ་འཁུར་ཆོག་པའི་གྲངས་ཚད་མི་འདྲ་བ་ཡིན་དུས། ང་རང་འགྲོ་སའི་རྒྱལ་ཁབ་ཨེས་སུ་རལ་དུ་ཅ་དངོས་སྤྱི་རྒྱ་ཉི་ཤུ་ལས་འཁུར་ཆོག་གི་མི་འདུག ལག་འཛིན་ཁུགས་མའི་ནང་དུ་སྤྱི་རྒྱ་བརྒྱད་ལས་འཁུར་ཆོག་གི་མེད་པ་གསལ་བོ་ཤེས་སོང་།

ཡུལ་སྡེ་གཅིག་པའི་གྲོགས་པོ་གཡང་སྐྱབས་ཀྱང་མི་རིང་བར་ཁོ་རང་གི་ཨ་མ་ཡོད་སའི་ཕྱི་རྒྱལ་དུ་འགྲོ་མཁན་ཡིན་དུས། ལྡི་ལུར་འབྱོར་ཡོད་པ་དང་ཁོ་རང་ཁྲིད་ནས་ང་རང་ཅ་དངོས་འཁུར་མི་ཐུབ་པ་ཆེས་མང་བོ་ཞིག་ལྷག་པའི་ནང་དུ་ཕ་ཡུལ་ནས་ཕ་རྒན་གྱི་འཁུར་ཡོང་བའི་ཨ་མདོའི་ལྭ་དང་། བོད་ལྷམ་དང་དགུན་ལྭ་མང་བོ་ཞིག་སྣོད་སྒམ་ཆེན་པོ་ཞིག་གི་ནང་དུ་བླུགས་དེ། ཨ་མ་དབྱངས་ལྷའི་ནང་དུ་མི་བཅོལ་ཐབས་མེད་ཆགས་པ་རེད། གཡང་སྐྱབས་ངེད་གཉིས་ཀྱིས་ཕ་ཡུལ་དང་ནང་མིའི་སྐོར་སོགས་གླེང་དེ་ཆུ་ཚོད་གཅིག་དང་ཕྱེད་བར་དུ་བསྡད་པ་ཡིན།

གཡང་སྐྱབས་ཀྱིས་ང་རང་གནམ་ཐང་བར་དུ་ཡོང་རོགས་བྱས། གནམ་ཐང་ནས་ང་རང་ནང་དུ་འཛུལ་བཅུགས་རོགས་བར་དུ་ཁོ་རང་གིས་བལྟས་ནས་བསྡད་པ་རེད། རྒྱུུ་མཚན་ནི་མི་མང་བོ་ཞིག་གི་གོ་ཐོས་སུ་གནམ་ཐང་ནས་སྒོ་དང་བོ་ནས་ནང་དུ་འཛུལ་ཐུབ་སོང་བ་ཡིན་ན། དེ་ནས་ག་ལེར་དཀའ་ངལ་མེད་རབས་ཤིག་ཐོས་ཀྱི་ཡོད་པ་དེར་ཁོ་རང་གིས་བློ་འཚབ་བྱས་པ་རེད། ངས་ཁོ་ལ་ལག་གཡུགས་ཤིག་བྱས་དེ་བདེ་མོ་བཞག ནང་ལོག་དུ་འཛུལ་ནས་བསྔོག་གཤེར་བྱེད་འགོ་འཛུགས་རྗེས། ཅ་དངོས་དག་སྤྱི་རྒྱའི་སྒང་དུ་བཞག་མ་ཐག ང་རང་གི་ཅ་དངོས་དག་སྤྱི་རྒྱ་ལས་བརྒལ་འདུག དེ་དུས་རྒྱ་གར་བུད་མེད་མཛེས་མ་དེ་ཡིས་ང་ལ་ཁྱེད་རང་གི་ཅ་དངོས་དག་སྤྱི་རྒྱ་ལས་བརྒལ་འདུག སྒོར་མོ་སྟེར་རྒྱུ་ཡིན་ནམ་ཟེར།

སྐད་ཆ་དེ་ཡིས་ང་རང་གི་སེམས་ནང་དུ། རེད་རེད། ད་ནི་ཞུ་བ་ཞིག་བྱེད། དེ་མིན་རང་ཉིད་ཀྱི་ལག་པར་རྒྱ་གར་སྒོར་མོ་ལྔ་བརྒྱ་མ་གཏོགས་ལུས་མེད། དེ་ཡི་གང་ཡང་ཕན་ཐོག་མི་སྲིད་སྙམ་ནས། སྐུ་མཁྱེན། ངས་ཅ་ལག་ནས་ཅ་ལག་གང་ཙམ་ཞིག་ཕྱི་རུ་བཏོན་ན་འགྲིག་གམ། ང་རང་ལ་དེ་འདྲའི་དངུལ་མང་བོ་ཞིག་མེད་ཅེས་བཤད་དུས། བུད་མེད་དེས་ཕོ་གསར་ཞིག་ལ་སྐད་བཏང་སོང་། ཕོ་གསར་དེ་ཡིས་ང་རང་ལ་སྒོར་མོ་སྟེར་རྒྱུ་མེད་པ་ཤེས་ནས། འགྲིག་གི་རེད་ཟེར། དེ་མ་ཐག་ང་རང་གིས་སྣོད་སྒམ་ཆེན་པོ་དེའི་ནང་ནས་ང་རང་གི་གོ་ལྷམ་རྙིང་བ་ཁ་ཤས་ཤིག གོན་པ་རྙིང་བ་རེ་ཟུང་ཞིག དེབ་ཁ་ཤས་ཤིག་ཕྱི་ལ་བཏོན་ནས་གད་སྙིགས་འཕྱོ་སའི་འཁྲིས་སུ་བཞག་རྗེས། ཕྱིར་ཅ་ལག་སྤྱི་རྒྱའི་སྒང་དུ་འཇོག་དུ་སོང་སྐབས། ཕོ་གསར་དེ་ཡིས་ཁྱེད་རང་གི་ཅ་དངོས་དེ་དག་ལས་དེབ་རྩ་ཆེན་དང་གཞན་ཁ་ཤས་འཁུར་ན་འགྲིག་གི་རེད། ངས་སྐད་ཆ་བཤད་རོགས་བྱེད་ཆོག་ཟེར། ངས་རང་ཉིད་ལ་འཁོ་བའི་ཚིག་མཛོད་གཅིག་མ་གཏོགས་ཅི་ཡང་ཕྱིར་ནང་དུ་འཇུག་རྒྱུའི་སྤོབས་པའི་འདང་མ་སོང་། སྤྱི་རྒྱ་འཇོག་མཁན་གྱི་བུད་མེད་མཛེས་མ་ལོ་ཆུང་དེ་གཉིས་ཀྱིས་ད་དུང་ཁྱེད་རང་གི་ཅ་ལག་སྤྱི་རྒྱ་ལས་བརྒལ་འདུག་ཟེར་སྐབས། ཕོ་གསར་དེ་ཡིས་འགྲིག་གི་རེད། གཏོང་རོགས་གནོང་ཞེས་བཤད་མ་ཐག བུད་མེད་ན་ཆུང་མ་དེ་གཉིས་ཀྱིས་ང་རང་གི་ཅ་དངོས་དང་ང་རང་སྤྱི་རྒྱ་འཇོག་ས་ནས་ཡར་བཏང་སོང་། ངས་ཕོ་གསར་དེ་ལ་བཀའ་དྲིན་ཆེ་ཞུས་དུས། ཁོང་གིས་མགོ་གཡུགས་ཙམ་བྱས་ནས་བུད་སོང་།

གློག་ཀླད་ནང་ནས་གནམ་གྲུའི་འཛིན་བྱང་དང་ཐོ་འགོད་བྱས་དུས་ཀྱི་དུས་ཚོད་སོགས་ཡོད་པའི་ཤོག་བུ་ལེབ་ལེབ་གཉིས་ངའི་ལག་དུ་ཡོད་པ་དེ། ང་རང་གི་སྔུན་དུ་ཡོད་པའི་གནམ་གྲུའི་འཛིན་བྱང་ལེན་ས་དེ་ལ་བསྟན་དུས། ང་ལ་གནམ་གྲུའི་འཛིན་བྱང་སྤྲད་སོང་། དེ་ནས་སྒོ་སྲུང་དམ་དྲག་ཆེ་ས་དང་སྐད་ཆ་འདྲ་མིན་འདྲི་སའི་ས་མཚམས་དེར་འབྱོར་གྲབས་ཡོད་དུས། མི་རེ་ནས་རང་རང་གི་ལོ་རྒྱུས་དང་གང་དུ་འགྲོ་མིན། ག་རེ་བྱེད་ཀྱི་ཡོད་མེད། སྐྱེ་ཚེས་དང་ལག་དེབ་ཨང་སོགས་ཁ་སྐོང་བྱེད་དགོས་པའི་ཤོག་བུ་ཞིག་འདུག ང་རང་ལ་དབྱིན་ཡིག་གི་ཤེས་ཚད་མེད་དུས་ཁ་སྐོང་བྱེད་པ་ལ་དཀའ་ངལ་འདུག དེ་ནས་མི་ཞིག་ལ་རོགས་པ་བྱེད་རོགས་བྱེད་དུ་བཅུགས། ཁོས་ཀྱང་མི་ཤེས་ས་ཁ་ཤས་ཤིག་འདུག་ཟེར་ཞོར་དུ་མང་ཤོས་ཤིག་ཁ་སྐོང་བྱས་སོང་།

ང་རང་གིས་ཤོག་ལེབ་དེ་འཁུར་ནས་མི་རེ་རེ་བྱས་ནས་ཐམ་ཁ་རྒྱགས་སའི་སྐད་ཆ་འདྲི་མཁན་གྱི་མི་དེ་ཡི་སར་སླེབས་དུས། ཁོ་རང་གིས་ང་རང་ལ་ཁྱེད་རང་ག་རེ་བྱེད་དུ་འགྲོ་བཞིན་ཡོད་དམ། རྒྱལ་ཁབ་དེས་ན་སུ་ཡོད་མེད། ཕར་སོང་ན་ཕྱིར་ཡོང་གི་ཡིན་མིན་སོགས་འདྲ་མིན་དྲིས། མི་གཞན་དག་ལ་སྐད་ཆ་མང་བོ་ཞིག་འདྲི་རྒྱུ་མི་འདུག་ལ། ཐམ་ག་ཡང་མགྱོགས་པོ་ཞིག་བརྒྱབས་དེ་གཏོང་གི་འདུག ཁོས་ང་རང་གི་ལག་དེབ་ནི་སྐྱབས་བཅོལ་བའི་ལག་དེབ་ཡིན་པ་བལྟས་ཙམ་གྱིས་ཤེས་ཀྱི་ཡོད་དུས། ང་ལ་འདི་ག་རེ་རེད་ཅེས་ཟུར་ཟ་དང་ཁྱེད་རང་གི་དགའ་རོགས་གང་དུ་ཡོད། ཁྲིད་ནས་ཤོག ང་ཚོས་འདི་ཤེས་ཀྱི་མི་འདུག་སོགས་ཟེགས་འདྲི་སྣ་ཚོགས་ཤིག་བྱས་་པའི་མཐར། ང་རང་ཁ་རོག་གེར་འཛུམ་རེ་སྟོན་ཞོར་དུ། ཁོ་རང་གིས་ག་རེ་བཤད་འདོད་པ་དག་བཤད་དུ་བཅུགས་ནས་མི་བསྡོད་ཐབས་མེད་རེད། སྟངས་ལེགས་པ་ཞིག་ལ་རང་ཉིད་ཀྱི་རྒྱ་གར་སྐད་ཤེས་པ་དེ་དག་གིས་དངོས་ནས་ཕན་ཡག་པོ་ཐོག་སོང་།

ཐ་མ་དེར་ཁོ་རང་གིས་འདོད་ལ་མི་འདོད་ཀྱི་རྣམ་འགྱུར་ཞིག་སྟོན་ཞོར་དུ། ང་རང་ལ་ཐོངས་ཆེན་སྤྲད་ཡོད་པ་ཡིན་དུས། ཁོ་རང་གིས་ཐམ་ག་མི་རྒྱགས་ཐབས་མེད་ཆགས་ཡོད་པ་རེད། ཁོ་རང་གིས་ཐམ་ག་མགྱོགས་པོ་མི་རྒྱགས་དོན་ངས་ཤེས་ཀྱི་ཡོད་ཀྱང་། ང་ལ་ཁོ་རང་སྟེར་རྒྱུའི་སྒོར་མོ་དངོས་ནས་མེད་ཀི ང་རང་གི་ལག་དུ་ཡོད་པའི་ཧིན་སྒོར་ལྔ་བརྒྱ་ཅན་གཅིག་ཡིན། དེ་ང་རང་གིས་ཁོ་ལ་སྟེར་འདོད་མ་བྱུང་། ཁོ་རང་གིས་ཁྱེད་ཀྱི་ཐོངས་ཆེན་ཟླ་གཅིག་མ་གཏོགས་མེད་ཀི དེ་སེམས་སུ་བཟུང་ཞེས་བཤད་ནས་ཐམ་ག་བརྒྱབས་དེ་ང་རང་གི་ལག་དེབ་སེར་པོ་ངའི་ཕྱོགས་སུ་གཡུགས་སོང་།

སྐབས་འདི་འདྲ་ཞིག་ལ་ངས་ཁ་སང་ཞོགས་པ་བོད་ནང་གི་ཨ་མར་ཁ་པར་གཏོང་བའི་སྐད་ཆ་དེ་དག་ལ་བསམ་བློ་འཁོར་སོང་། ཨ་མ་ངུ་ཞོར་དུ། ཁྱེད་རང་གང་དུ་སོང་ན་ཡང་བར་ཆད་མི་ཡོང་བའི་སྐྱབས་འཇུག་ཞུ་ཆོག་ལ། ཁྱེད་ཀྱིས་ཕྱི་རྒྱལ་ནས་ལས་ཀ་དཀའ་ལས་ཁག་པོ་བྱས་ནས་དངུལ་ཁོ་ན་བསམ་བློ་གཏོང་མི་དགོས། གཙོ་བོ་རང་གི་གཟུགས་པོའི་བདེ་ཐང་ཡོང་ན་དེ་ལས་འགྲིག་གི་རེད་ཅེས་གསུངས་པ་དེར་དྲན་ཞོར་དུ། ལུས་པོ་བསྔོག་གཤེར་བྱེད་དུ་བཅུགས་པ་ཡིན།

དེ་ལྟར་ད་ནི་གནམ་ཐང་ནས་གནམ་གྲུ་སླེབས་པར་སྒུག་རྒྱུ་ལས་གཞན་གང་ཡང་མེད་ཀི དོན་དག་ཚང་མ་ལེགས་པོ་འགྲུབ་སོང་བ་རེད། ད་ནི་གནམ་ཐང་གཞན་དག་ནས་ག་རེ་བྱུང་མིན་མི་ཤེས་ཀྱང་། རྒྱ་གར་གྱི་གནམ་ཐང་ནས་བདེ་ལེགས་ཐར་བ་འདྲ་བོ་རེད་འདུག་སྙམ་ནས་གནམ་ཐང་དེ་ཡི་ཅ་དངོས་དག་ལ་བལྟ་རྒྱུ་ལས་ཉོ་བྱེད་ཀྱི་སྒོར་མོ་རང་གི་ཨམ་ཕྲག་དུ་མི་འདུག

ང་རང་ཐེངས་དང་བོ་ཕྱི་རྒྱལ་ཞིག་དུ་འགྲོ་བཞིན་ཡོད་ལ། ང་རང་དེ་རུ་འགྲོ་བ་ཡང་སྒོར་མོ་གཅིག་བུའི་ཆེད་དུ་ཡིན་ནམ་ཞེས་རང་ལ་དྲི་བ་ཞིག་བཏང་། གནམ་གྲུའི་ནང་དུ་ཆུ་ཚོད་ལྔ་བའི་སྟེང་དུ་འཛུལ་བཅུགས་སོང་། གནམ་གྲུའི་ནང་དུ་འཛུལ་མ་ཐག གནམ་གྲུའི་ནང་གི་ཞབས་ཞུ་མ་མཛེས་མ་དེ་དག་གིས་མཛུབ་སྟོན་འོག ང་རང་གི་འདུག་སྟེགས་སྒེའུ་ཁུངས་འཁྲིས་སུ་འཁེལ་ཡོད་པ་མཐོང་མ་ཐག་དངོས་ནས་དགའ་བྱུང་། རང་གི་རྒྱབ་ཁུག་ནང་ནས་༧ཏྰ་ལའི་བླ་མ། ང་ཡི་བུ་ཞེས་པའི་དབྱིན་དེབ་དེ་དང་དེབ་ཁ་ཤས་ཤིག་ཕྱི་རུ་བཏོན་ནས། ཅ་ལག་འཇོག་སའི་ནང་དུ་བཞག་རྗེས། རང་གི་འདུག་ས་ནས་ཕྱི་རོལ་གྱི་རྒྱ་གར་རྒྱལ་ས་ལྡི་ལུ་གྲོང་ཁྱེར་གྱི་གློག་འོད་ལ་བརྟེན་ནས་རྒྱང་བལྟ་བྱས་དུས། སྨུག་རྒྱུ་ལྟ་བུ་ཞིག་འཐིབ་ནས་འདུག་པའི་ཡག་པོ་ཞིག་མཐོང་གི་མི་འདུག སྐར་མ་ཉི་ཤུའི་རྗེས་སུ་གནམ་གྲུ་འཕུར་འགོ་འཛུགས་ངེས་རེད། ངའི་འཁྲིས་ཀྱི་རྐུབ་སྟེགས་སྟེང་དུ་བསྡོད་མཁན་ནི་ཁ་ཆེ་ཞིག་རེད། མི་རིགས་རྒྱ་གར་བ་རེད། གནམ་གྲུ་འདིའི་ནང་དུ་སྐུ་མགྲོན་ཉིས་བརྒྱ་ལས་བརྒལ་བ་ཡོད་ཚོད་འདུག རྒྱ་གར་གྱི་གནམ་ཐང་ནས་གནམ་གྲུ་ཞོགས་པ་ཆུ་ཚོད་ལྔ་དང་ཕྱེད་ལ་འཕུར་སོང་། ༨།༩།༠༨ཤུལ་རྗེས་གསུབ་དུ་མེད་པའི་དྲན་ཤིང་གི་གནས་འདི། བཞག་ནས་རྒྱང་རིང་རྒྱལ་ཁབ་རྒྱུས་མེད་ཀྱི་ཡུལ་ལ། བསྐྱོད་རྒྱུའི་ལམ་ལ་ཞུགས་པའི་གངས་ཕྲུག་གི་སེམས་པ། ནམ་ཡང་མཛད་དུ་མེད་པའི་ཤེས་པ་ལ་འཐིམ་ཡོད།

མུ་འགོད།