ཤེས་ཡོན་སྲིད་བྱུས་གསར་པའི་དགོངས་དོན་ལྟར་སློབ་དེབ་གསར་བསྒྲིགས།

ཟླ་འདིའི་ཕྱི་ཚེས་ ༡༢ ནས་ཉིན་གསུམ་རིང་ངྷ་ས་གངས་སྐྱིད་དུ་ཤེས་རིག་ལས་ཁུངས་ཀྱིས་གསར་དུ་རྩོམ་སྒྲིག་བྱས་པའི་གཞི་རིམ་བར་མ་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་ལ་མཐའ་མའི་བསྐྱར་ཞིབ་དང་གཏན་འབེབ་བྱེད་པའི་ཚོགས་འདུ་ཞིག་ཚོགས་ཡོད།

 ཉིན་གསུམ་གྱི་ཚོགས་འདུ་དེར་ཤེས་རིག་ལས་ཁུངས་དང་། སློབ་དེབ་རྩོམ་སྒྲིག་སྡེ་ཚན། སམ་བྷོ་ཊ། བོད་ཁྱིམ། དབུས་བོད་སློབ་འཛིན་ཚོགས་བཅས་ཀྱི་འབྲེལ་ཡོད་མི་སྣ་དང་སྤྱི་ཚོགས་ཚན་རིག་གི་དགེ་རྒན་ཁག་ཅིག་མཉམ་ཞུགས་ཀྱིས། གསར་དུ་རྩོམ་སྒྲིག་ཟིན་པའི་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་ལ་མཐའ་མའི་བསྐྱར་ཞིབ་དང་གཏན་འབེབ་བྱས་ཡོད་ལ། དེ་སྔོན་དཔྱད་ཞིབ་དང་ལེགས་བཅོས་ཐེངས་གཉིས་ཙམ་བྱས་ཟིན་ཡོད་པ་མ་ཟད། སློབ་གྲྭ་ཁག་ལ་ཆེད་བསྐྱོད་ཀྱིས་བོད་ཡིག་ཏུ་རྩོམ་སྒྲིག་བྱེད་པའི་སློབ་དེབ་འདི་འབྲེལ་ཡོད་སྤྱི་ཚོགས་ཚན་རིག་དགེ་རྒན་ཚོར་ངོ་སྤྲོད་དང་ཟབ་སྦྱོང་གནང་ཡོད་པ་རེད།

ད་སྔ་གཞི་རིམ་འོག་མ་འཛིན་རིམ་ལྔ་བ་བར་སློན་ཚན་ཡོངས་རྫོགས་བོད་ཡིག་ཏུ་ཕབ་སྒྱུར་རྩོམ་སྒྲིག་ཟིན་པ་ལྟར་དངོས་སུ་སློབ་ཁྲིད་འགྲོ་བཞིན་པ་དང་།  ༢༠༡༠ ལོར་གཞི་རིམ་བར་མའི་བསླབ་གཞིའི་རྩ་འཛིན་ཟིན་བྲིས་ལ་བཀའ་ཤག་གིས་བཀའ་འཁྲོལ་གཏན་འབེབ་བྱུང་བ་ལྟར། གཞི་རིམ་བར་མའི་སློབ་ཚན་ཁག་བོད་སྒྱུར་རྩོམ་སྒྲིག་གི་ལས་གཞི་མགོ་བརྩམས་པའི་ཁྲོད། འཛིན་རིམ་དྲུག་པའི་སྤྱི་ཚོགས་ཚན་རིག་གི་སློབ་ཚན་ཆ་ཚང་བོད་སྒྱུར་ཟིན་པའི་སྟེང། སྔོན་ཆད་ཀྱི་བོད་ཡིག་སློབ་དེབ་ནང་ཡོད་པའི་རྒྱལ་རབས་དང་ཆོས་འབྱུང་ལ་བཅོས་སྒྱུར་གྱིས་སྤྱི་ཚོགས་ཚན་རིག་གི་སློབ་ཚན་ཁོངས་སུ་བཏང་འདུག ཤེས་རིག་དྲུང་འཕར་བཀྲིས་དོན་གྲུབ་ལགས་ཀྱིས་ “བཅོས་སྒྱུར་ཟིན་པའི་རྒྱལ་རབས་ཆོས་འབྱུང་འདི་སྔོན་མ་ནང་བཞིན་བློ་འཛིན་བྱ་མི་དགོས་པ་ཞིག་ཆགས་ཡོད་” ཅེས་བརྗོད་བྱུང་ལ། དེ་ནི་འཛིན་རིམ་དྲུག་པའི་སློབ་ཕྲུག་ཅིག་ལ་གཞུང་ལུགས་ཁྲིད་རྒྱུ་མ་ཡིན་པར་རིག་གནས་ཀྱི་ངོ་བོར་བསླབ་གཞི་བཅོས་སྒྱུར་བྱས་པ་ཞིག་རེད་འདུག

གཞི་རིམ་སློབ་གྲྭའི་སློབ་ཚན་བོད་སྒྱུར་རྩོམ་སྒྲིག་གི་ལས་གཞི་འདི་༢༠༠༤ ལོར་གྲོས་ཚོགས་ཀྱིས་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གཏན་འབེབ་གནང་རྗེས། དཔེ་སྟོན་སློབ་གྲྭ་གསར་འཛུགས་དང་། ༢༠༠༨ ལོར་གཏན་འབེབ་བྱས་པའི་གཞི་རིམ་འོག་མའི་བསླབ་གཞིའི་རྩ་འཛིན་དང་། ༢༠༡༠ གཞི་རིམ་བར་མའི་བསླབ་གཞིའི་རྩ་འཛིན་གཏན་འབེབ་གནང་པ་ཁག་གི་དགོངས་དོན་ལྟར། རྩིས་རིག་དང་ཚན་རིག སྤྱི་ཚོགས་ཚན་རིག་བཅས་དབྱིན་ཡིག་ནས་བོད་ཡིག་ནང་ཕབ་སྒྱུར་གྱིས་བོད་ཡིག་གི་བསླབ་གཞིར་རྩོམ་སྒྲིག་བྱེད་ཀྱི་ཡོད་པའི་ལས་གཞི་ཞིག་ཆགས་ཡོད། འོན་ཀྱང་། གསར་དུ་རྩོམ་སྒྲིག་བྱས་པའི་སློབ་དེབ་འདི་ཁྲིད་གཞིར་འཇོག་མིན་སློབ་གྲྭ་སོ་སོར་ཐག་གཅོད་ཀྱི་དབང་ཆ་ཡོད་ན་ཡང་། སློབ་གྲྭ་ཁག་གི་བསླབ་གཞིའི་སློབ་ཚན་རྣམས་ཤེས་ཡོན་སྲིད་བྱུས་གསར་པའི་རྩ་འཛིན་གཏན་འབེབ་འོག་འགྲོ་དགོས་པ་ཞིག་ཆགས་ཡོད་འདུག་ལ། གནད་དོན་དེར་དམིགས་ཏེ་རྩ་འཛིན་གཏན་འབེབ་ཀྱི་དགོངས་དོན་གཞིར་བཞག་སློབ་དེབ་འདི་རྩོམ་སྒྲིག་བྱས་པ་ཞིག་ཡིན་འདུག

གཞི་རིམ་སློབ་གྲྭའི་བསླབ་གཞིའི་རྩ་འཛིན་བཟོ་འགོད་ཚོགས་ཆུང་གི་ཚོགས་གཙོ་ཤེས་རིག་དྲུང་འཕར་བཀྲིས་དོན་གྲུབ་ལགས་ཀྱིས། བསླབ་གཞིའི་སློབ་ཚན་ཁག་བོད་སྒྱུར་བྱེད་པའི་ཐད་དཀའ་ངལ་ཆེ་ཤོས་རྩོམ་སྒྱུར་བྱེད་མཁན་ཆེད་ལས་པ་མེད་པ་དང་། ཐེངས་འདིའི་སློབ་ཚན་རྩོམ་སྒྲིག་སྡེ་ཚན་གྱི་རྩོམ་སྒྱུར་བྱེད་མཁན་ཚོ་ནི་ཆེད་ལས་པ་མིན་ཀྱང་། བོད་དབྱིན་གཉིས་ཀྱི་ཐད་མཐོ་སློབ་ལག་འཁྱེར་ཡོད་པའི་སྟེང་། སློབ་ཕྲུག་གི་ཤེས་ཡོན་སློབ་གསོ་དང་འབྲེལ་པའི་ཉམས་མྱོང་ཡང་གང་འཚམ་ཡོད་པ་དེ་འདྲ་ཆགས་ཡོད་སྟབས། གསར་དུ་རྩོམ་སྒྲིག་ཟིན་པའི་འཛིན་རིམ་དྲུག་པའི་སློབ་དེབ་རྩོམ་སྒྲིག་ཐད། “འབྲེལ་ཡོད་སྡེ་ཚན་ཁག་ནས་ཕེབས་པའི་མི་སྣ་དང་དགེ་རྒན་ཚོས་གདེང་འཇོག་ཆེན་པོ་བྱེད་ཀྱི་འདུག” ཅེས་བརྗོད་བྱུང་ལ། བཙན་བྱོལ་བོད་མིའི་སྤྱི་ཚོགས་ནང་བོད་དབྱིན་གཉིས་ཀར་ཤེས་ཚད་ལེགས་པོ་ཡོད་པའི་ཐོག་ཡིག་སྒྱུར་ཡང་བྱེད་ཐུབ་མཁན་དཀོན་པོ་ཡིན་སྟབས། མ་འོངས་པར་ཤེས་རིག་ལས་ཁུངས་ཀྱི་ངོས་ནས་ཡིག་སྒྱུར་ཆེད་ལས་པ་གསོ་སྐྱོང་བྱ་རྒྱུའི་ལས་འཆར་ཡང་སྒྲིག་བཞིན་འདུག

སློབ་དེབ་རྩོམ་སྒྲིག་སྡེ་ཚན་གྱི་བུངྷ་སྐྱབས་དང་བསོད་ནམས་བཟང་པོ་གཉིས་ཀྱིས། སློབ་དེབ་རྩོམ་སྒྲིག་གི་བརྒྱུད་རིམ་ནང་སློབ་ཚན་ཁག་ཕྱིའི་སྐད་ཡིག་ནས་བོད་ཡིག་ཏུ་རྩོམ་སྒྱུར་བྱེད་སྐབས་དཀའ་ངལ་ཆེ་ཤོས་དབྱིན་ཇིའི་ཐ་སྙད་མང་པོ་ཞིག་བོད་སྐད་དུ་མེད་པ་དེ་ཆགས་ཡོད་སྟབས།  བོད་ཕྱི་ནང་གཉིས་ཀྱི་བོད་དབྱིན་ཚིག་མཛོད་དང་ཐ་སྙད་གསར་ཐོན་རིགས་ལ་ཞིབ་འཇུག་གིས་ཐ་སྙད་དང་བརྗོད་ཚིག་གཏན་འབེབ་བྱེད་པ་དང་། དེ་དག་ལས་བརྒལ་པའི་ཐ་སྙད་རིགས་ཤེས་རིག་ལས་ཁུངས་ཀྱི་ཐ་སྙད་གཏན་འབེབ་སྡེ་ཚན་གྱིས་གཏན་འབེབ་ལྟར་ཐག་གཅོད་བྱེད་ཀྱི་ཡོད་འདུག་ལ། སློབ་དེབ་རྩོམ་སྒྲིག་ཟིན་རྗེས་སློབ་གྲྭ་ཁག་ཏུ་བསྐྱོད་དེ་འཛིན་རིམ་དྲུག་པའི་སྤྱི་ཚོགས་ཚན་རིག་དགེ་རྒན་ཚོར་ཟབ་སྦྱོང་ཐེངས་གཉིས་ཙམ་སྤྲད་ཡོད་པའི་སྐོར་ནས།  “དགེ་རྒན་ཚོས་ཚོད་ལྟའི་སློབ་ཁྲིད་བྱས་པ་བཅས་ཀྱི་སྐབས་སུ་བརྗོད་དོན་གང་གི་ཐད་ནས་ཚད་ཐིག་ཅིག་གི་སྟེང་སླེབས་ཡོད་པའི་ཚོར་སྣང་བྱུང་།” ཞེས་བརྗོད་བྱུང་ལ། སློབ་དེབ་འཆད་ཁྲིད་ཐད་དགེ་རྒན་ཚོར་བོད་ཡིག་གི་ཤེས་ཚད་གང་འཚམ་དགོས་ཀྱི་ཡོད་པའི་བསམ་ཚུལ་ཡང་འདུག

ཐེངས་འདིར་རྩོམ་སྒྲིག་གཏན་འབེབ་ཟིན་པ་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་འདི་ནི་ཤེས་ཡོན་སྲིད་བྱུས་གསར་པའི་དགོངས་དོན་ལྟར་སློབ་ཚན་གཏན་འབེབ་དང་སློབ་དེབ་རྩོམ་སྒྲིག་གི་ལས་གཞིའི་ཆ་ཤས་ཤིག་དང་།   ༢༠༡༣ བར་གཞི་རིམ་བར་མའི་འཛིན་རིམ་དྲུག་པ་ནས་བརྒྱད་པ་བར་གྱི་སྤྱི་ཚོགས་ཚན་རིག་གི་སློབ་དེབ་རྣམས་ཡོངས་ཁྱབ་འགྲེམས་སྤེལ་བྱ་འཆར་རེད་འདུག

གསར་འགོད་པ། བནྡེ་སྐྱབས།