བོད་ལྗོངས་སློབ་གྲྭ་ཆེན་མོའི་དགེ་རྒན་ཆེན་མོ་བློ་བཟང་ལགས་ཀྱིས་བོད་ཡིག་ཐོག་བཀོད་སྤྱོད་བྱེད་ཆོག་པའི་ལག་འཁྱེར་ཁ་པར་ཞིག་བཟོས་ཡོད་འདུག
ཟླ་འདིའི་ཕྱི་ཚེས་ ༢༦ ཉིན་བོད་ནང་གི་དྲ་ལམ་ཁག་ཅིག་ཏུ་གནས་ཚུལ་སྤེལ་བ་ལྟར་ན། ཉེ་ཆར་བོད་ལྗོངས་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་བློ་བཟང་ལགས་ཀྱིས་སྣེ་འཁྲིད་པའི་བློ་བཟང་ཀུང་ཟིས་བོད་ཡིག་གི་ལག་འཁྱེར་ཁ་པར་ཞིག་གསར་བཟོ་བྱས་ཡོད་འདུག་ལ། ཁ་པར་དེའི་ཁྱད་ཆོས་གཙོ་བོ་བརྙན་ངོས་སུ་བོད་རྒྱ་དབྱིན་གསུམ་གྱི་ཡིག་རིགས་འཆར་བ་དང་འཕྲིན་ཐུང་བསྐུར་ཐུབ་པ། མཉེན་ཆས་ཁག་རང་ངོས་ནས་སྒྲིག་འཇུག་བྱས་ཆོག་པ། ཧི་མ་ལ་ཡའི་བོད་ཡིག་དང་ཀུ་ཤུ་རྟགས་ཅན་གྱི་ཁ་པར་སོགས་སུ་ཡོད་པའི་བོད་ཡིག་ཕན་ཚུན་མཐུན་འཇུག་བྱེད་ཐུབ་པ་བཅས་ཀྱི་ཁྱད་ཆོས་ཡོད་འདུག
༢༠༠༩ ལོ་སྐུ་ཞབས་བློ་བཟང་ལགས་ཀྱིས་བོད་རྒྱ་དབྱིན་གསུམ་གྱི་ཀློག་རྡུལ་ཚིག་མཛོད་ཞིག་གསར་གཏོད་བྱས་ཡོད་ལ། ཟླ་རྗེས་མར་ཁོང་གིས་གསར་གཏོད་གནང་བའི་བོད་ཡིག་ཅན་གྱི་ལག་འཁྱེར་ཁ་པར་ཚོང་རར་་འགྲེམས་སྤེལ་བྱ་རྒྱུ་ཡིན་འདུག
གསར་འགོད་པ། དོན་གོ
དགེ་རྒན་ཆེན་མོ་བློ་བཟང་ལགས་ཀྱི་མཛད་རྗེས་ལ་དགའ་བསུ་ཞུ། ཡར་རྒྱས་ཀྱི་མཛད་རྗེས་རང་རེད། བོད་མི་རིགས་ཀྱི་ལ་རྒྱ་བཟུང་སྟངས་དེ་འདྲ་རང་རེད། མུ་མཐུད་བྱ་བ་དེ་ལྟ་བུ་སྤེལ་གང་ཐུབ་གནང་རོགས། བོད་ཀྱི་རྒྱལ་ས་ལྷ་སའི་ནང་དུ་མཁས་དབང་དུང་དཀར་བློ་བཟང་འཕྲིན་ལས་དང་བཀྲིས་ཆེ་རིང་སོགས་བོད་ཡིག་ལ་ཧ་ཙང་གིས་གཙིགས་ཆེར་འཛིན་མཁན་གྱི་མི་རིགས་དཀོན་པའི་དུས་ཡུན་གཉན་འཕྲང་གི་སྐབས་སུ་ཁྱེད་ལྟ་བུས་དམིགས་བསལ་གྱིས་ཤུགས་རྒྱག་པ་ལ་ངོ་མར་དགའ་བསུ་ཞུ་བཞིན་ཡོད། མ་གཏོགས་བོད་ནང་གི་བོད་མི་རིགས་འགའ་ཤས་ཀྱིས་བྱ་བ་ཆུང་ཆུང་ཞིག་བྱས་པ་ལ་བསྙད་ནས་སྙན་གྲགས་ཀྱི་མིང་ཆེན་པོ་ཐོབ་འདོད་ཀུན་སློང་བྱེད་པ་ནི་མི་རིགས་པ་ཞིག་ཡིན།
སེམས་བསམ་པའི་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། འདི་ལྟ་བུའི་ལས་གཞི་ནི་བོད་ཀྱི་སྐད་ཡིག་སྲུང་སྐྱོབ་ལ་ཧ་ཅང་མཁོ་བ་རེད།
ངས་བོད་ཕྱི་ནང་གི་བོད་མི་ཡོངས་ཀྱི་ཚབ་ཞུས་ནས་དགེ་རྒན་ཆེ་མོ་བློ་བཟང་ལགས་སུ་བསྔགས་བརྗོད་དང་ཁྱེད་ཀྱི་བྱ་གང་བརྩམས་ཀྱང་དེ་དག་ཀུན་སྒྱུབ་པའི་སྨོན་ལམ་ཞུ་་་་བོད་ནང་གི་བོད་མི་འབྱོར་ལྡན་ཚོས་མི་རིགས་ཀྱི་ལ་རྒྱ་སེམས་ལ་བཅང་ནས་མི་རིགས་ཀྱི་རིག་གཞུང་དང་མི་རིགས་སྤྱི་ལ་ཕན་པའི་དཔལ་འབྱོར་བེད་སྤྱད་ཐུབ་ན་དེ་ནི་རྩ་དོན་ཡིན་
ཧ་ཅང་ལེགས། རྟེན་འབྲེལ་བཀྲིས་བདེ་ལེགས་ཞུ། དང་པོ་སུས་གསར་དུ་བཏོད་པ་དེར་སྐྱོན་ཆ་ཡོང་སྲིད་ཅིང་ཆོག་པ་ཞིག་ཀྱང་རེད། མུ་མཐུད་ཕྱག་ལས་གནང་རོགས་གནང་། ང་ཚོ་གངས་ཅན་པའི་ལ་རྒྱ་ཟེར་བའང་འདི་འདྲ་བའི་གསེང་ནས་སྐེ་སྲེང་གིན་རེད།
སྤྱིར་བཏང་ལག་འཁྱེར་ཁ་པར་ཞེས་པ་དང་། ལག་ཐོགས་ཁ་པར་ཞེས་པ་གཉིས་ཀྱི་དོན་ལ་ཁྱད་པར་སྤུ་ཙམ་མེད་རུང་། ལག་འཁྱེར་ཐ་སྙད་དེ་སློབ་སྦྱོང་མཐར་ཕྱིན་པའི་རྗེས་སུ་དཔང་རྟགས་སུ་འཐོབ་རྒྱུ་ཡོད་པའི་ཤོག་བུར་སྦྱར་ཟིན་སྟབས། ལག་ཐོགས་ཁ་པར་ཞེས་བརྗོད་ན་བཟང་སྙམ། ཚིག་དེ་བེད་སྤྱོད་བྱས་ན་དཀའ་ངལ་ཡང་མི་འཕྲད་མི་སྲིད་དེ། གཞིས་བྱེས་གཉིས་སུ་མི་ཉུང་བར་སྤྱོད་བཞིན་མཆིས། དེ་འདྲ་སོང་ཙང་། ཀློག་པ་པོ་རྣམས་ཀྱིས་དགོངས་བཞེས་ཡོང་བ་ཞུ།
བློ་བཟང་ཟུང་ལ་མངོན་པར་བསྟོད་དོ། ཁ་པར་དེ་འཛམ་གླིང་གང་སར་ཁྱབ་པའི་སྨོན་འདུན་ཞུ།
བཀྲིས་བདེ་ལེགས་ཞུ། གང་ལྟར་འདི་དང་འདི་ལྟ་བུ་གང་མང་ཞིག་ཐོན་བཞིན་པ་འདི་བོད་མི་ཚི་དེང་དུས་ཀྱི་བསམ་བློ་རིག་སྒོ་གསར་པ་ཞིག་གི་ནང་དུ་འགྲོ་ཐུབ་པ་མཚོན་གྱི་ཡོད་ངོ་མ་རིན་ཐང་ཡོད་པ་ཞིག་རེད་ཟེར་ན་མི་ཆོགས་པ་ཡོད་པ་མ་རེད། དགའ་འོས་པའི་བྱ་བ་ཞིག་རེད།
གོང་ཚད་ཧང་ཅང་ཆེ་ལ་སྤེས་ཀ་དེ་འདྲ་མི་བཟང་བ་ཞིག་ཡིན་པ་ཐག་གི་ཆོད། སྔོན་གྱི་ཀློག་རྡུལ་ཚིག་མཛོད་བཞིན།
ཡིན་ནའང་དེ་འདྲ་ཞིག་མིའི་སྤྱི་ཚོགས་ནང་སྟོན་རྒྱུ་ཡོད་པ་བཟོ་བ་ལ་ཐུགས་རྗེ་ཆེ།
བོད་དུ་ཡོད་པའི་དགེ་རྒན་བློ་བཟང་ལགས་ལ་ཐུགས་རྗེ་ཆེ་ཞེས་ཞུ་རྒྱུ་དང་བརྩན་བྱོལ་དུ་ཡོད་པའི་ཤེས་ཡོད་ཅན་རྣམས་ནི་རང་དབང་ལུང་པའི་ནང་གནས་ཡོད་ཀྱང་ད་དུང་བོད་ཡིག་གི་སྤྱོད་ཁོ་ཆེ་རུ་འགྲོ་རྒྱུའི་ལས་འགུལ་ཙམ་ཡང་སྤེལ་ཐུབ་ལ་མ་ཐུབ་ཀྱི་གནས་ཚུལ་དེ་དག་མཐོང་ཚེ་སྣ་ཁུག་ན་ཟུག་རྒྱག་པའི་རྒྱུ་རང་རེད།
བཀྲིས་བདེ་ལེགས། བོད་ཕྱི་ནང་གཉིས་ནས་གློག་ཀླད་མཛུབ་སྣོན་དབྱིན་ལྟར་གཅིག་གྱུར་ཞིག་བཟོ་ཐུབ་པའི་རེ་བ་ཡོད། དབྱིན་ཡིག་ལ་གཅིག་གྱུར་ཐོག་ནས་མཛུབ་སྣོན་གཅིག་ལས་མེད་ཀྱང་བོད་ཡིག་ལ་མཛུབ་སྣོན་ཁག་མང་པོ་ཞིག་ཡོད་པའི་དབང་གིས་གཅིག་གྱུར་མ་བྱུང་སྟབས་གཅིག་ཤེས་ནས་གཞན་པ་ཞིག་བློ་བུར་དུ་བེད་སྤྱོད་བྱ་དགོས་བྱུང་ཚེ་དཀའ་ངལ་ཆེན་པོ་འདུག ཁ་ས་སྤྲུལ་སྐུ་ཨོ་རྒྱན་ཉི་མ་ལགས་ནས་དེའི་ཐོག་ལ་དགོངས་ཚུལ་ཞིག་གསུངས་འདུག དངོས་གནས་དེ་འདྲ་ཞིག་བྱུང་ཐུབ་པ་ཡིན་ན་བོད་ཡིག་གཅིག་གྱུར་ཅན་ལ་གྱུར་ཐུབ་པ་མ་ཟད་བོད་ཡིག་ཡར་རྒྱས་ལ་གཡུར་ཟའི་འབྲས་བུ་སྨིན་པར་ངེས། དེ་དོན་བོད་རིགས་ཚན་རྩལ་མཁས་ཅན་རྣམས་ནས་ཐུགས་ཟབ་གནང་བ་དང་མ་ཟད་དྲ་གྲོགས་ཡོངས་ཀྱི་མཐའ་གཅིག་ཏུ་ཁོང་རྣམས་ལ་འབོད་སྐུའི་ཞུ་བའི་རེ་བ་ཡོད།
རྩ་་ཆེན་གསར་བསྟེན་གྱི་ལས་འགུལ་འདིའི་རིགས་གང་དུ་སྤེལ་མཁན་ཡོད་པ་དེ་ལ་ཐུགས་རྗེ་ཆེན་ཞུ་བ་དང་བོད་ཕྲུག་རྣམས་ཀྱིས་འདི་དག་ལ་མིག་དཔེ་བལྟ་རོགས་ཞུ།