བོད་མི་རིགས་ཀྱི་སློབ་གསོའི་ལས་དོན་ཐོག་རླབས་ཆེན་གྱི་ཕྱག་རྗེས་ཆེ་བའི་དགེ་རྒན་ཆེན་མོ་སངས་རྒྱས་རྒྱལ་ལགས་སྐུ་སྐུའི་སྙུང་གཞིའི་དབང་གིས་སྐུ་གཤེགས་ཡོད་འདུག
ཟླ་འདིའི་ཕྱི་ཚེས་ ༢༦ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༢ དང་སྐར་མ་ ༤༦ གི་ཐོག་མཁས་དབང་སྐུ་ཞབས་སངས་རྒྱལ་ལགས་སྙུང་གཞི་ཞིག་གི་དབང་གིས་ཟི་ལིང་གི་རང་ཤག་ནས་སྐུ་ཚེ་འཕེན་པ་རྫོགས་ཡོད་པ་དང་། ད་ལྟ་དགུང་ལོ་ ༥༥ ཡིན་འདུག དགེ་རྒན་ཆེན་མོ་སངས་རྒྱས་རྒྱལ་ལགས་ནི་ཕྱི་ལོ་ ༡༩༥༧ ལོར་མདོ་སྨད་རྡོ་སྦིས་གཤོང་པ་སྡེ་བར་སྐྱེས་ཤིང་། ༡༩༧༤ ལོ་ནས་ཡ་རྫི་རྫོང་རྐང་ཚ་ཤང་གི་དམངས་སྒྲུབ་དགེ་རྒན་གྱི་ཕྱག་ལས་གནང་ཞིང་། ཞོར་དུ་མཚོ་སྔོན་མི་རིགས་སློབ་གྲྭ་ཆེན་མོའི་གྲངས་རིག་སྡེ་ཁག་ཏུ་སློབ་གཉེར་གནང་ཡོད་འདུག
༡༩༧༨ ལོ་ནས་བཟུང་རྨ་ལྷོ་མི་རིགས་དགེ་ཐོན་སློབ་གྲྭ་དང་མཚོ་སྔོན་སློབ་གསོ་སློབ་གླིང་བཅས་སུ་གྲངས་རིག་གི་དགེ་རྒན་གནང་སྟེ། ཕྱི་སྐད་ཐོག་ཡོད་པའི་དེང་རབས་གྲངས་ཀྱི་རིག་གནས་བོད་ཡིག་གི་ལམ་ནས་སློབ་ཁྲིད་ཀྱི་སྲོལ་ཐོག་མར་གཏོད་ཅིང་། སྔ་ཕྱིར་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་སློབ་སྟོན་པ་དང་མཚོ་སྔོན་ཞིང་ཆེན་ལོ་ཙཱ་བ་མཐུན་ཚོགས་ཀྱི་ཚོགས་གཙོ་གཞོན་པ། མཚོ་སྔོན་དགེ་ཐོན་སློབ་ཆེན་མི་རིགས་དགེ་ཐོན་སློབ་གླིང་གི་སློབ་གཙོ་གཞོན་པ་བཅས་ཀྱི་འགན་འཁུར་ཡོད། དེང་རབས་གྲངས་རིག་གི་ཐད་ལ་ཁྱད་དུ་འཕགས་པའི་རིགས་རྩལ་རྒྱས་ཏེ། བོད་ཀྱི་སྐར་རྩིས་རིག་པའི་ཕྱོགས་ནས་སེང་གྷ་པོར་ནན་ཡཱང་རྩིས་ཚན་བཟོ་རིགས་སློབ་ཆེན་དང་ཨ་རིའི་ལྦི་ཇི་ནེ་ཡཱ་སློབ་ཆེན། ཧོང་ཀོང་སློབ་ཆེན། པེ་ཅིན་སློབ་ཆེན། ཀྲུང་དབྱང་མི་རིགས་སློབ་ཆེན། པེ་ཅིན་དགེ་ཐོན་སློབ་ཆེན་སོགས་སུ་བོད་ཀྱི་རིག་གནས་དང་འབྲེལ་བའི་སློབ་ཁྲིད་དང་གསུང་བཤད་རབས་དང་རིམ་པ་གནང་ཡོད་འདུག
སློབ་གཉེར་གྱི་བཞུད་ལམ་རིང་མོའི་ཁྲོད་ཀྱི་བསྒྱུར་ཡིག་དང་བརྩམས་ཆོས་དག་ནི་༼གྲངས་རིག་རྒྱ་མཚོའི་འཇུག་ངོགས༽དང་༼དབྱིབས་རིག་ཞིབ་འགྲེལ༽། མཐོ་རིམ་སློབ་འབྲིང་གི༼གྲངས་རིག༽དང་༼ཚབ་རྩིས༽། ༼ གྲངས་རིག་སློབ་ཁྲིད་བྱེད་ཐབས༽། ༼མཐོ་རིམ་ཚབ་རྩིས༽། ༼གྲངས་རིག་དབྱེ་ཞིབ༽སོགས་ཡིག་བསྒྱུར་དང་ཞུ་དག་པའི་འགན་བཞེས་ཤིང་། ༢༠༠༠ ལོ་ནས་བཟུང་པར་བསྐྲུན་བྱས་པའི་༼རྟེན་འབྲེལ་བསྟོད་པའི་འགྲེལ་བ༽དང་།༼སྐར་རྩིས་དང་སྐྱེ་ཁམས༽། ༼སྐྱེ་དགུའི་ཕན་བདེའི་འབྱུང་གནས༽། ༼ལམ་རིམ་བརྗེད་བྱང་ཆེན་མོ་ཕན་བདེ་འབྱུང་གནས༽། སྟོད་སྨད་གཉིས། དཔྱད་རྩོམ་༼བོད་ཡིག་ཨང་ཀིས་མཚོན་བྱེད་འཕྲུལ་གྱི་གཤོག་པ༽དང་༼ སེང་གྷ་པོའི་སྐད་གཉིས་སློབ་གསོ་དང་བསྡུར་དེ་དཔྱད་པ།༽། ༼དུས་རབས་ཉེར་གཅིག་པའི་བོད་ཀྱི་སློབ་གསོ་བཅོས་བསྒྱུར་དང་འཕེལ་རྒྱས༽། ༼བོད་རིགས་སློབ་གྲྭ་ཆེན་མོའི་བསླབ་གཞི་བཅོས་བསྒྱུར་སྐོར་གྱི་དཔྱད་གཏམ༽། ༼བོད་རིགས་འབྲོག་ཁུལ་གྱི་ཐོན་ཁུངས་སྐོར་གྱི་དཔྱད་གཏམ༽བཅས་རྩོམ་གནང་མཛད་ཡོད་འདུག
གཞན། ཁོང་གིས་རང་ཉིད་ཀྱི་ལས་ཀའི་ཞོར་ནས་འཛམ་གླིང་རང་བྱུང་ཐེབས་རྩ་ཚོགས་པ་དང་མཉམ་འབྲེལ་བྱས་ཏེ་བོད་ཀྱི་རོང་འབྲོག་ས་ཁུལ་དུ་བོད་རིགས་དགེ་རྒན་ཟབ་སྦྱོང་འཛིན་གྲྭ་བཙུགས་ཤིང་། མདོ་དབུས་མཐོ་སྒང་གི་རི་ཆུ་དང་རི་སྐྱེས་སྲོག་ཆགས། རྩི་ཤིང་དང་འབྲེལ་བའི་ས་གནས་སློབ་གྲྭའི་བསླབ་གཞི་རྩོམ་སྒྲིག་པའི་ཕྱག་ལས་གནང་སྟེ་དཔེ་དེབ་ལྔ་དང་། ཧོང་ཀོང་སྦྱིན་སྤྲོ་ཐེབས་རྩ་ཚོགས་པ་དང་མཉམ་འབྲེལ་བྱས་ཏེ། བོད་མིའི་འདུ་ཤེས་དང༌བོད་ཀྱི་རྒྱུན་སྐྱོང་ཐུབ་པའི་འཕེལ་རྒྱས་སློབ་གསོ། བོད་ཀྱི་རི་མོ། བོད་ཀྱི་གླུ་གར། བོད་ཀྱི་ལག་རྩལ་བཅས་ཕྱོགས་ལྔ་འཛོམས་པའི་དཔེ་དེབ་ལྔ་བཅས་དཔེ་དེབ་ ༡༠ དཔར་སྐྲུན་བྱེད་བཞིན་ཡོད་འདུག གཞན། ཧོང་ཀོང་སློབ་གྲྭ་ཆེན་མོ་དང་མཉམ་འབྲེལ་ཐོག་ཀྲུང་གོ་བོད་ཀྱི་སློབ་གསོ་དྲ་བ་དབུ་འབྱེད་སོགས་ལས་གཞི་གང་མང་ཞིག་བསྒྲུབ་ཏེ། དེང་རབས་ཀྱི་རིག་གནས་བོད་རིག་ཅན་དང༌། བོད་ཀྱི་སྲོལ་རྒྱུན་རིག་གནས་དེང་རབས་ཅན་དུ་སྒྱུར་བའི་ཐད་ལ་ཕྱག་ལས་རྒྱ་ཆེར་གནང་ཡོད་པར་མ་ཟད། བོད་རྒྱའི་ལོ་ཙཱའི་བྱ་བ་བླ་ལྷག་ཏུ་བསྒྲུབས་ཏེ། སྐུ་ཚེ་ཧྲིལ་བོ་མི་རིགས་སློབ་གསོའི་ལས་དོན་ཐོག་ཕུལ་ཡོད་པ་རེད།
གསར་འགོད་པ། དོན་གོ
ངའི་སེམས་གཏང་ནས་འགྱོད་འཕང་ཆེན་པོ་ཡོད།
དངོས་གནས་བོད་ཀྱི་ཤེས་ཡོན་ཅན་རྣམས་པ་ཚོ་འདི་འདྲ་དགོངས་པ་རྫོགས་སོང་ན་བོད་མི་རིགས་ལ་གྱོང་སྒྱུད་ཅིག་རེད། ཁོང་ལ་རྗེས་དྲན་སུ་མྱ་ངན་བྱེད་གྱི་ཡོད།
འཕང་བ་ལ་འགྱོད་སེམས་ཆེན་པོ་ཡོད།
རྒན་དམ་པ་དགེ་རྒན་ཆེན་མོ་སངས་རྒྱས་རྒྱལ་ཁོང་དགོངས་པ་རྫོགས་སོང་བར་ཐོས་པས་ཁོང་ལ་རྗེས་དྲན་དང་མྱ་ངན་བྱེད་བཞིན་ཡོད།
བོད་མི་རིགས་ཀྱི་རིག་གཞུང་གི་བླ་སྲོག་ལྟ་བུ་ཤེས་ཡོན་ཅན། རྒན་དམ་པ་དགེ་རྒན་ཆེན་མོ་སངས་རྒྱས་རྒྱལ་ཁོང་དགོང་པ་རྫོགས་སོང་བར་ཐོས་པས་ཁོང་ལ་རྗེས་དྲན་དང་མྱ་ངན་བྱེད་བཞིན་ཡོད།
ནོར་བུ་རང་ལ་ཡོད་དུས། །ནོར་བའི་ནོར་ཉམས་མི་ཤེས །ནོར་བུ་དགྲ་ལ་ཤོར་དུས་མིག་མཐའ་མཆི་མའི་གང་སོང་།། ཟེར་བ་བཞིན་རེད་འདུག
བོད་ཀྱི་དེང་རབས་སྐད་གཉིས་སློབ་གསོའི་ཐད་བླ་ན་མེད་པའི་བྱས་རྗེས་ཕུལ་མཁན་དམ་པ་གང་ཉིད་ལ་ངས་རང་གི་སེམས་པ་མཆོད་མེ་སྟོང་དུ་བསྒྲོན་ནས་མྱ་ངན་གྲངས་མེད་ཞུ་བ་ཡིན།བཀྲ་མི་ཤིས་པའི་གཏམ་འདི་ཐོས་རྗེས།ངའི་སེམས་སུ་རང་དབང་མེད་པར་ད་ལྟ་བོད་ན་བོད་རང་གི་མི་རིགས་ལ་ཤ་ཞེན་ཆེ་ཞིང་བོད་ཀྱི་མ་འོངས་པའི་མདུན་ལམ་ལ་རང་གི་མི་ཚེ་ཧྲིལ་པོ་བློས་གཏོང་མཁན་དམ་པ་ཁོང་ཉིད་ལྟ་བའི་མི་ག་ཚོད་ཡོད་དམ་སྙམ།ཕལ་ཆེར་མཛུབ་མོས་བརྩིས་ཆོག་པ་འདྲ་བས་སེམས་པ་ཕྲ་མོ་སྡུག་གི་དམྱལ་བའི་ནང་ལ་ལྷུང་སོང་།
སེམས་གཏིང་ནས་མཁས་དབང་དང་མི་རིགས་ལ་སྙིང་ཉེ་བའི་སློབ་གསོ་བ་ཆེན་མོ་ཁོང་ལ་རྗེས་དྲན་དང་མྱ་ངན་ཞུ།
སེམས་བསམ་པའི་གཏིང་ནས་མཁས་དབང་དེ་ལ་རྗེས་དྲན་ཞུ། ་ད་དུང་གདུང་འབོད་ཀྱང་ཞུ་རྒྱུ་ཡིན། མི་རིགས་བླ་དང་རིག་གནས་ཀྱི་སྲོག་རེ་རེ་བཞིན་འདི་ལྟར་ཡལ་སོང་ན་དངོས་གནས་ཕངས་པ་ལ། ཨ་ཨ་་་གནམ་རྒན་མཱ ཡང་སྙིང་གསེང་ལ་ཙག་སེ་བཏང་སོང་།
མཁས་དབང་དམ་པ་ཁོང་གིས”གཞན་གྱི་སྐད་ཤེས་དགོས་པ་རེད། རང་གི་སྐད་ལ་མཁས་དགོས་པ་རེད། “ཅེས་གསུང་སྐད་ཡང་ནས་བསྐྱར་དུ་བསྐྱོན་པ་ད་དུང་རྣ་ལམ་ན་ལྷང་ལྷང་གྲགས་ཀིན་འདུག
དངོས་གནས་བོད་ཀྱི་ཤེས་ཡོན་ལ་ལག་རྗེས་བླ་ན་མེད་པ་འཇོག་མཁན་གྱི་སྐྱེས་པུ་ཞིག་ཡིན་པ་དང་། ཁོང་གིས་ཉེ་ཆར་སློབ་གསོའི་སྐོར་ལ་གསུངས་པའི་བཀའ་སློབ་ཅིག་འདུག དེ་ནི་ཤར་ནུབ་ཀྱི་བོད་རིགས་དག་གི་སེམས་ནང་དུ་ལྷུང་ཡོད་པ་རེད།
ཁོང་ལ་རྗེས་དྲན་དང་མྱ་ངན་ཞུ།