སྐྱོ་དྲགས་པའི་ངལ་བ།

སྐྱི་མོ་མ་གཏོགས་མི་གཤིས་གཏན་འབྲལ་བ།།
སེམས་པ་འདི་ལ་བརྒྱུས་པ་ཆགས་པའི་རྩ།།
དུས་ཡུན་ངེས་མེད་ཀུན་ལ་རབ་སྨྱོས་དུས།།
འདི་ཉིད་ཁོ་ནའི་བྲན་དུ་སྐྱེ་བ་སྐྱོ།།

ཕར་འཁོར་ཚུར་འཁོར་བར་ན་མིག་ཟུང་གིས།།
བུད་མེད་རིག་ཚད་ཀུན་གྱི་རྐུབ་ལ་བལྟས།།
འབར་བའི་སྲེད་པ་གཟུགས་མེད་ཡང་ཡང་རྩེན།།
དེ་ནི་མི་ངན་བདག་གི་བསམ་བློ་རེད།།

རྒྱང་རིང་རི་བོའི་ཕར་ཕྱོགས་དྲན་པ་དང་།།
སྐྱེ་བའི་ཡུལ་ཁམས་ཡིད་ངོར་བརྐོས་ན་ཡང་།།
དྲིན་གྱི་སྐྱོང་བའི་ཉེ་དུ་རིང་སྐྱུར་ནས།།
འཁྱམས་སྤྲང་རྒྱུས་མེད་གྲོང་ནས་མི་ཚེ་ཚར།།

རེ་བའི་མདའ་མོ་སྙིང་གི་སྒྲོན་མེ་རེ།།
མུན་ནག་སྟོང་ཁམས་ཆེན་མོར་སྤར་ན་ཡང་།།
རྒྱུ་ལ་འབྲས་པའི་མེད་པའི་མུ་གེ་བ།།
སྟོང་འདང་མོད་པོ་ཞིག་གིས་འཐག་ནས་སོང་།།

དགའ་དུས་དགོད་ས་ཡོད་ན་ལོས་བསམ་དང་།།
སྡུག་དུས་སྐྱོ་བ་བཤད་ས་ལོས་འཁོ་ཡང་།།
དགའ་སྐྱོ་དར་ལ་བརྒྱུས་པའི་བོད་ཀྱི་སྐད།།
བཤད་ཡུལ་མེད་པའི་གཞན་ཡུལ་མི་སྐྱིད་ཀི།

གཙབ་གཏུབ་དབྱིན་སྐད་ཐར་ཐོར་བཤད་ཤེས་ཀྱང་།།
ཆུང་ནས་འདྲིས་པའི་སྐད་དེ་མ་ཡིན་དུས།།
སེམས་ཀྱི་ཟབ་ས་ཞིག་གི་སྙིང་གི་ཚིག།
རེ་རེ་བཞིན་དུ་མིད་པའི་ཁ་ནས་འགག།